عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ماڵی باوكم 
1
«نیگه‌ران مه‌بن. پشت به‌ خودا ببه‌ستن[a] ، پشت به‌ منیش ببه‌ستن.
2
ماڵی باوكم ژووری زۆری لێیه‌، ئه‌گه‌ر ئاوا نه‌بووایه‌ پێم ده‌گوتن. من ده‌چم تاكو شوێنتان بۆ ئاماده‌ بكه‌م.
3
جا كه‌ ڕۆیشتم و شوێنم بۆ ئاماده‌كردن، دێمه‌وه‌ و ده‌تانبه‌مه‌ لای خۆم، تاكو ئێوه‌ش له‌و شوێنه‌ بن كه‌ من لێی ده‌بم.
4
ئێوه‌ش ڕێگای ئه‌و شوێنه‌ ده‌زانن كه‌ بۆی ده‌چم.»
من ڕێگا و ڕاستی و ژیانم 
5
تۆماس پێی گوت: «گه‌وره‌م، نازانین بۆ كوێ ده‌چیت، چۆن ڕێگاكه‌ بزانین؟»
6
عیساش پێی فه‌رموو: «منم ڕێگا و ڕاستی و ژیان. كه‌س نایه‌ته‌ لای باوك له‌ ڕێگه‌ی منه‌وه‌ نه‌بێت.
7
ئه‌گه‌ر ئێوه‌ منتان بناسیایه‌، باوكیشمتان ده‌ناسی. له‌ ئێستاوه‌ ده‌یناسن و بینیوتانه‌.»
8
فیلیپۆس پێی گوت: «گه‌وره‌م، باوكمان پیشان بده‌ و به‌سمانه‌.»
9
عیساش پێی فه‌رموو: «فیلیپۆس، ئایا ماوه‌یه‌كی درێژه‌ له‌گه‌ڵتانم و نه‌تناسیوم؟ ئه‌وه‌ی منی بینیوه‌ باوكی بینیوه‌. ئیتر چۆن ده‌ڵێی: ”باوكمان نیشان بده‌“؟
10
ئایا باوه‌ڕ ناكه‌ی من له‌ باوكدام و باوكیش له‌ مندایه‌؟ ئه‌و قسانه‌ی پێتانی ده‌ڵێم له‌ خۆمه‌وه‌ نایڵێم، به‌ڵكو باوك كه‌ له‌ مندا نیشته‌جێیه‌، ئه‌و كاره‌كانی خۆی ده‌كات.
11
باوه‌ڕم پێ بكه‌ن كه‌ من له‌ باوكدام و باوكیش له‌ مندایه‌، ئه‌گه‌ر نا به‌هۆی كاره‌كان خۆیانه‌وه‌ باوه‌ڕ بكه‌ن.
12
ڕاستی ڕاستیتان پێ ده‌ڵێم: ئه‌وه‌ی باوه‌ڕم پێ بهێنێت، ئه‌و كارانه‌ ده‌كات كه‌ من ده‌یكه‌م، له‌مانه‌ش گه‌وره‌تر[b] ده‌كات، چونكه‌ بۆ لای باوك ده‌چم.
13
هه‌رچییه‌ك به‌ ناوی منه‌وه‌ داوا بكه‌ن ده‌یكه‌م، تاكو باوك له‌ كوڕه‌كه‌دا شكۆدار بێت.
14
ئه‌گه‌ر شتێكتان به‌ ناوی منه‌وه‌ داوا كرد، ده‌یكه‌م.
به‌ڵێنی هاتنی ڕۆحی پیرۆز 
15
«ئه‌گه‌ر منتان خۆشبوێ كار به‌ ڕاسپارده‌كانم ده‌كه‌ن.
16
منیش داوا له‌ باوك ده‌كه‌م یارمه‌تیده‌رێكی[c] دیكه‌تان[d] بداتێ كه‌ هه‌تاهه‌تایه‌ له‌گه‌ڵتان بمێنێته‌وه‌،
17
ڕۆحی ڕاستی، كه‌ جیهان ناتوانێت وه‌ریبگرێت، چونكه‌ نایبینێت و نایناسێت. به‌ڵام ئێوه‌ ده‌یناسن، چونكه‌ له‌گه‌ڵتان ده‌مێنێته‌وه‌ و له‌ناو ئێوه‌دا ده‌بێت.
18
به‌ هه‌تیوی به‌جێتان ناهێڵیم، دێمه‌وه‌ لاتان.
19
پاش ماوه‌یه‌كی كه‌م ئیتر جیهان نامبینێت، به‌ڵام ئێوه‌ ده‌مبینن. له‌به‌ر ئه‌وه‌ی زیندووم و ئێوه‌ش ده‌ژین.
20
له‌و ڕۆژه‌دا ده‌زانن من له‌ باوكمدام، ئێوه‌ش له‌ مندان، منیش له‌ ئێوه‌دام.
21
ئه‌وه‌ی ڕاسپارده‌كانی منی له‌لایه‌ و كاریان پێ ده‌كات، ئه‌وا منی خۆشده‌وێت. ئه‌وه‌ی منی خۆشبوێ، باوكیشمی خۆشده‌وێت، منیش خۆشمده‌وێت و خۆمی بۆ ده‌رده‌خه‌م.»
22
ئینجا یه‌هوزایه‌كی دیكه‌ كه‌ یه‌هوزای ئه‌سخه‌ریوتی نه‌بوو لێی پرسی: «گه‌وره‌م، بۆچی ده‌ته‌وێ خۆت بۆ ئێمه‌ ده‌ربخه‌یت، به‌ڵام بۆ جیهان نا؟»
23
عیسا وه‌ڵامی دایه‌وه‌: «ئه‌وه‌ی منی خۆشبوێ كار به‌ وته‌كانم ده‌كات، باوكیشم خۆشی ده‌وێت و من و باوك دێینه‌ لای و له‌لای ئه‌ویش نیشته‌جێ ده‌بین.
24
ئه‌وه‌ش كه‌ منی خۆشناوێت كار به‌ وته‌كانم ناكات. ئه‌م وتانه‌ی گوێتان لێی ده‌بێت هی من نییه‌، به‌ڵكو هی ئه‌و باوكه‌یه‌ كه‌ ناردوومی.
25
«ئه‌مانه‌م پێ گوتن كه‌ هێشتا له‌لاتانم.
26
به‌ڵام یارمه‌تیده‌ره‌كه‌، ڕۆحی پیرۆز، ئه‌وه‌ی باوك به‌ ناوی منه‌وه‌ ده‌ینێرێت، ئه‌و هه‌موو شتێكتان فێرده‌كات و هه‌موو ئه‌و شتانه‌ی پێم گوتوون بیرتان ده‌خاته‌وه‌[e] .
ئاشتی عیسا 
27
«ئاشتیتان بۆ به‌جێده‌هێڵم، ئاشتی خۆمتان ده‌ده‌مێ. ئه‌وه‌ی من ده‌تانده‌مێ وه‌ك ئه‌وه‌ نییه‌ كه‌ جیهان ده‌تانداتێ. نیگه‌ران مه‌بن و مه‌ترسن.
28
گوێتان لێبوو پێم گوتن: ”ده‌ڕۆم و دێمه‌وه‌ لاتان.“ ئه‌گه‌ر منتان خۆشبوێ، دڵشاد ده‌بن كه‌ ده‌چمه‌ لای باوك، چونكه‌ باوك له‌ من مه‌زنتره‌.
29
ئه‌وه‌تا ئێستا پێش ڕوودانی پێم گوتن، تاكو كاتێك ڕوویدا باوه‌ڕ بهێنن.
30
له‌مه‌ولا زۆر قسه‌تان له‌گه‌ڵ ناكه‌م، چونكه‌ سه‌رۆكی ئه‌م جیهانه‌[f] وا دێت. هیچ ده‌سه‌ڵاتێكی به‌سه‌ر مندا نییه‌،
31
به‌ڵام ئه‌و دێت تاكو جیهان بزانێت باوكم خۆشده‌وێت و به‌و شێوه‌یه‌ كار ده‌كه‌م كه‌ باوك ڕایسپاردووم.
«هه‌ستن با لێره‌ بڕۆین.
  1. a. 14‏:1 ئه‌م ده‌ربڕینه‌ له‌ یۆنانیدا دوو واته‌ ده‌به‌خشێت. له‌مه‌ نزیكتره‌ كه‌ دانراوه‌، به‌م واتایه‌ش دێت: (باوه‌ڕ به‌ خودا بكه‌ن.)
  2. b. 14‏:12 به‌ واتای له‌ ژماره‌ به‌ده‌ر و بێ سنووری جوگرافی.
  3. c. 14‏:16 له‌ زمانی یۆنانی به‌ واتای ئه‌وه‌ی بانگكراو دێته‌ ته‌نیشتت بۆ یارمه‌تیدانت، مه‌به‌ستی له‌ ڕۆحی پیرۆزه‌ كه‌ شوێنی مه‌سیح ده‌گرێته‌وه‌ له‌ یارمه‌تیدانمان.
  4. d. 14‏:16 به‌ زمانی یۆنانی به‌ واتای (دیكه‌) له‌ هه‌مان جۆر دێت.
  5. e. 14‏:26 به‌ڵێنێكی تایبه‌ته‌ بۆ ئه‌وانه‌ی گوێیان له‌ وته‌كانی مه‌سیح بووه‌ به‌ هاتنی سروش بۆ نووسینه‌وه‌ی ئینجیلی پیرۆز.
  6. f. 14‏:30 شه‌یتان.