عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یه‌رمیا له‌ به‌ندیخانه‌ 
1
ئینجا نه‌بوخودنه‌سری پاشای بابل سدقیا كوڕی یۆشیای له‌ خاكی یه‌هودا كرده‌ پاشا، له‌ جێی یه‌هۆیاكینی كوڕی یه‌هۆیاقیم.
2
به‌ڵام نه‌ خۆی و نه‌ خزمه‌تكاره‌كانی و نه‌ گه‌لی خاكه‌كه‌ گوێیان له‌ په‌یامه‌كه‌ی یه‌زدان نه‌گرت كه‌ له‌ ڕێگه‌ی یه‌رمیای پێغه‌مبه‌ره‌وه‌ فه‌رمووی.
3
جا سدقیای پاشا یه‌هوخه‌لی كوڕی شه‌له‌میاهو و سه‌فه‌نیای كوڕی مه‌عسێیاهوی كاهینی بۆ لای یه‌رمیای پێغه‌مبه‌ر نارد و گوتی: «تكایه‌ له‌ پێناوی ئێمه‌ له‌ یه‌زدانی په‌روه‌ردگارمان بپاڕێوه‌.»
4
له‌و كاته‌دا یه‌رمیا به‌ ئازادی هاتوچۆی ناو خه‌ڵكی ده‌كرد، چونكه‌ هێشتا نه‌یانخسبووه‌ به‌ندیخانه‌وه‌.
5
سوپاكه‌ی فیرعه‌ونیش له‌ میسره‌وه‌ به‌ڕێكه‌وتبوون، كاتێك ئه‌و بابلییانه‌ی كه‌ گه‌مارۆی ئۆرشه‌لیمیان دابوو هه‌واڵی ئه‌وانیان بیست، له‌ ئۆرشه‌لیم كشانه‌وه‌.
6
ئینجا فه‌رمایشتی یه‌زدان بۆ یه‌رمیای پێغه‌مبه‌ر هات، پێی فه‌رموو:
7
«یه‌زدانی په‌روه‌ردگاری ئیسرائیل ئه‌مه‌ ده‌فه‌رموێت: پاشای یه‌هودا كه‌ ئێوه‌ی ناردووه‌ بۆ لام تاكو لێم بپرسێت، پێی بڵێن: ”ئه‌وه‌تا سوپاكه‌ی فیرعه‌ون كه‌ بۆ یارمه‌تیتان به‌ڕێكه‌وتوون، ده‌گه‌ڕێته‌وه‌ خاكه‌كه‌ی خۆی، میسر.
8
بابلییه‌كانیش ده‌گه‌ڕێنه‌وه‌ و شه‌ڕ له‌گه‌ڵ ئه‌م شاره‌ ده‌كه‌ن، ده‌یگرن و به‌ ئاگر ده‌یسووتێنن.“
9
«یه‌زدان ئه‌مه‌ ده‌فه‌رموێت: خۆتان مه‌خه‌ڵه‌تێنن و بڵێن: ”بابلییه‌كان به‌ ته‌واوی له‌ كۆڵمان ده‌بنه‌وه‌.“ له‌ كۆڵتان نابنه‌وه‌!
10
ته‌نانه‌ت ئه‌گه‌ر هه‌موو سوپای بابلییه‌كانیش ببه‌زێنن كه‌ له‌ دژتان ده‌جه‌نگن، ته‌نها چه‌ند پیاوێكی برینداریان لێ بمێنێته‌وه‌، ئه‌وا هه‌ریه‌كه‌ له‌ چادره‌كه‌ی خۆیانه‌وه‌ هه‌ڵده‌ستنه‌وه‌ و ئه‌م شاره‌ به‌ ئاگر ده‌سووتێنن.»
11
دوای ئه‌وه‌ی سوپای بابلییه‌كان له‌ ئۆرشه‌لیم به‌رامبه‌ر به‌ سوپاكه‌ی فیرعه‌ون كشانه‌وه‌،
12
یه‌رمیاش ده‌ستبه‌جێ ئۆرشه‌لیمی به‌جێهێشت بۆ ئه‌وه‌ی بچێته‌ خاكی بنیامین، تاكو له‌وێ له‌نێو گه‌ل به‌شی خۆی له‌ زه‌وی وه‌ربگرێت.
13
به‌ڵام كه‌ گه‌یشته‌ ناو ده‌روازه‌ی بنیامین، سه‌ركارێكی پاسه‌وانان له‌وێ هه‌بوو، ناوی یرئیا ی كوڕی شه‌له‌میاهوی كوڕی حه‌نه‌نیا بوو، یه‌رمیای پێغه‌مبه‌ری گرت و پێی گوت: «تۆ ده‌چیته‌ پاڵ بابلییه‌كان!»
14
یه‌رمیاش گوتی: «درۆیه‌! من ناچمه‌ پاڵ بابلییه‌كان.» به‌ڵام یرئیا گوێی لێ نه‌گرت، ئینجا یه‌رمیای گرت و هێنایه‌ لای پیاوه‌ گه‌وره‌كان.
15
پیاوه‌ گه‌وره‌كانیش له‌ یه‌رمیا تووڕه‌ بوون، لێیاندا و له‌ ماڵی یۆناتانی خامه‌ی نهێنی به‌ندیان كرد، چونكه‌ ئه‌وێیان كردبووه‌ به‌ندیخانه‌.
16
یه‌رمیایان خسته‌ كونجی زیندانه‌وه‌ له‌ به‌ندیخانه‌كه‌، ماوه‌یه‌كی زۆر له‌وێ مایه‌وه‌.
17
ئینجا سدقیا پاشا ناردی و له‌وێ ده‌ریانهێنا، پاشا له‌ ماڵه‌كه‌ی خۆی به‌دزییه‌وه‌ پرسیاری لێكرد و گوتی: «ئایا هیچ په‌یامێك له‌لایه‌ن یه‌زدانه‌وه‌ هه‌یه‌؟»
یه‌رمیاش وه‌ڵامی دایه‌وه‌: «به‌ڵێ، هه‌یه‌. تۆ ده‌كه‌ویته‌ ده‌ست پاشای بابله‌وه‌.»
18
ئینجا یه‌رمیا به‌ سدقیا پاشای گوت: «تاوانی من ده‌رهه‌ق به‌ تۆ و خزمه‌تكاره‌كانت و ئه‌م گه‌له‌ چییه‌، هه‌تا بمخه‌نه‌ به‌ندیخانه‌وه‌؟
19
ئه‌ی كوا پێغه‌مبه‌ره‌كانتان، ئه‌وانه‌ی پێشبینییان بۆ كردیت و گوتیان: ”پاشای بابل نایه‌ته‌ سه‌ر ئێوه‌ و ئه‌م خاكه‌“؟
20
ئێستاش، ئه‌ی پاشای گه‌وره‌م، تكایه‌ گوێ بگره‌. تكایه‌ با له‌به‌رده‌مت بپاڕێمه‌وه‌: مه‌مگه‌ڕێنه‌وه‌ بۆ ماڵه‌كه‌ی یۆناتانی خامه‌ی نهێنی، با له‌وێ نه‌مرم.»
21
سدقیای پاشاش فه‌رمانی دا كه‌ یه‌رمیا بخرێته‌ حه‌وشه‌ی پاسه‌وانه‌كان، ڕۆژانه‌ یه‌ك نانی له‌ بازاڕی نانه‌وایانه‌وه‌ پێبدرێت، هه‌تا به‌ ته‌واوی نان له‌ شاره‌كه‌ ده‌بڕدرێته‌وه‌. یه‌رمیا له‌ حه‌وشه‌ی پاسه‌وانه‌كان مایه‌وه‌.