عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یه‌رمیا فڕێدرایه‌ ناو ئه‌مباراوێك 
1
ئینجا شه‌فه‌تیای كوڕی مه‌تان، گه‌ده‌لیاهوی كوڕی په‌شحور، یه‌هوخه‌لی كوڕی شه‌له‌میاهو و په‌شحوری كوڕی مه‌لكیا گوێیان له‌و قسانه‌ بوو كه‌ یه‌رمیا له‌گه‌ڵ گه‌ل ده‌یكرد و ده‌یگوت:
2
«یه‌زدان ئه‌مه‌ ده‌فه‌رموێت: ”ئه‌وه‌ی له‌م شاره‌دا بمێنێته‌وه‌ به‌ شمشێر و قاتوقڕی و ده‌رد له‌ناوده‌چێت، به‌ڵام ئه‌وه‌ی بچێته‌ ده‌ره‌وه‌ بۆ ناو بابلییه‌كان ده‌ژیێت. ژیانی خۆی ده‌رباز ده‌كات و ده‌ژیێت.“
3
یه‌زدان ئه‌مه‌ ده‌فه‌رموێت: ”به‌ دڵنیاییه‌وه‌ ئه‌م شاره‌ ده‌درێته‌ ده‌ست سوپاكه‌ی پاشای بابل، ده‌ستی به‌سه‌ردا ده‌گرێت.“»
4
جا پیاوه‌ گه‌وره‌كان به‌ پاشایان گوت: «ده‌بێت ئه‌م پیاوه‌ بكوژرێت. له‌به‌ر ئه‌وه‌ی به‌و قسانه‌ی وره‌ی ئه‌و سه‌ربازانه‌ ده‌ڕووخێنێ كه‌ له‌ شاره‌كه‌دا ماونه‌ته‌وه‌، هه‌روه‌ها وره‌ی هه‌موو خه‌ڵكیش ده‌رووخێنێ. ئه‌م پیاوه‌ داوای چاكه‌ بۆ ئه‌م گه‌له‌ ناكات، به‌ڵكو خراپه‌.»
5
سدقیای پاشا گوتی: «ئه‌وه‌تا له‌به‌رده‌ستتانه‌، پاشا توانای هیچی نییه‌ به‌رامبه‌ر به‌ ئێوه‌.»
6
ئه‌وانیش یه‌رمیایان برد و فڕێیان دایه‌ ناو ئه‌مباراوه‌كه‌ی مه‌لكیای كوڕی پاشا، ئه‌وه‌ی له‌ حه‌وشه‌ی پاسه‌وانه‌كانه‌. یه‌رمیایان به‌ گوریس شۆڕكرده‌ خواره‌وه‌، ئه‌مباراوه‌كه‌ش ئاوی تێدا نه‌بوو، به‌ڵكو قوڕ. جا یه‌رمیا له‌ناو قوڕه‌كه‌ چه‌قی.
7
به‌ڵام عه‌به‌دمه‌له‌خ، كه‌ كاربه‌ده‌ستێكی كوشی[a] بوو له‌ كۆشكی پاشا، بیستی كه‌ یه‌رمیایان فڕێداوه‌ته‌ ناو ئه‌مباراوه‌كه‌. پاشاش له‌ ده‌روازه‌ی بنیامین دانیشتبوو،
8
عه‌به‌د‌مه‌له‌خ له‌ كۆشكی پاشاوه‌ چوو و به‌ پاشای گوت:
9
«پاشای گه‌وره‌م، ئه‌م پیاوانه‌ خراپیان كرد له‌ هه‌موو ئه‌وه‌ی به‌ یه‌رمیای پێغه‌مبه‌ریان كرد. ئه‌وان فڕێیان داوه‌ته‌ ناو ئه‌مباراوه‌كه‌وه‌، ئه‌و له‌ شوێنه‌كه‌ی خۆی له‌ برسان ده‌مرێت، چونكه‌ نان له‌ شار نه‌ماوه‌.»
10
پاشاش فه‌رمانی به‌ عه‌به‌د‌مه‌له‌خی كوشی كرد و گوتی: «لێره‌وه‌ سی پیاو له‌گه‌ڵ خۆت ببه‌، یه‌رمیای پێغه‌مبه‌ر له‌ ئه‌مباراوه‌كه‌وه‌ ده‌ربێنه‌، هه‌تا نه‌مردووه‌.»
11
عه‌به‌د‌مه‌له‌خیش پیاوه‌كانی له‌گه‌ڵ خۆی برد، چووه‌ ژوورێك له‌ژێر گه‌نجینه‌ی كۆشكی پاشا. له‌وێ هه‌ندێك په‌ڕۆوپاتاڵ و جلی كۆنی هه‌ڵگرت و به‌ گوریس بۆ یه‌رمیای شۆڕی كرده‌وه‌ ناو ئه‌مباراوه‌كه‌.
12
عه‌به‌د‌مه‌له‌خی كوشی به‌ یه‌رمیای گوت: «په‌ڕۆوپاتاڵ و جله‌ كۆنه‌كان له‌بن هه‌نگڵت له‌ژێر گوریسه‌كه‌وه‌ دابنێ.» یه‌رمیاش ئاوای كرد.
13
ئینجا به‌ گوریس یه‌رمیایان هه‌ڵكێشا، له‌ ئه‌مباراوه‌كه‌ ده‌ریانهێنا. جا یه‌رمیا له‌ حه‌وشه‌ی پاسه‌وانه‌كان مایه‌وه‌.
پرسیاری سدقیا له‌ یه‌رمیا 
14
پاشان سدقیا پاشا به‌دوای یه‌رمیای پێغه‌مبه‌ردا ناردی، له‌ ده‌روازه‌ی سێیه‌می په‌رستگای یه‌زدان هێنایه‌ لای خۆی. ئینجا پاشا به‌ یه‌رمیای گوت: «ده‌مه‌وێت شتێكت لێ بپرسم، هیچم لێ مه‌شاره‌وه‌.»
15
یه‌رمیاش به‌ سدقیای گوت: «ئه‌گه‌ر پێت بڵێم، ئایا نامكوژیت؟ ته‌نانه‌ت ئه‌گه‌ر ئامۆژگاریشت بكه‌م، گوێم لێ ناگریت.»
16
سدقیای پاشاش به‌دزییه‌وه‌ سوێندی بۆ یه‌رمیا خوارد و گوتی: «به‌ یه‌زدانی زیندوو كه‌ ژیانی به‌ ئێمه‌ به‌خشیوه‌، نه‌ ده‌تكوژم و نه‌ ده‌تده‌مه‌ ده‌ست ئه‌وانه‌ی ده‌یانه‌وێ بتكوژن.»
17
ئینجا یه‌رمیا به‌ سدقیای گوت: «یه‌زدان، خودای سوپاسالار، خودای ئیسرائیل ئه‌مه‌ ده‌فه‌رموێت: ”ئه‌گه‌ر خۆت ڕاده‌ستی سه‌ركرده‌كانی پاشای بابل بكه‌یت، ئه‌وا گیانت به‌ زیندووێتی ده‌مێنێته‌وه‌ و ئه‌م شاره‌ش به‌ ئاگر ناسووتێت، خۆت و خێزانه‌كه‌شت به‌ زیندووێتی ده‌مێننه‌وه‌.
18
به‌ڵام ئه‌گه‌ر خۆت ڕاده‌ستی سه‌ركرده‌كانی پاشای بابل نه‌كه‌یت، ئه‌وا ئه‌م شاره‌ ده‌كه‌وێته‌ ده‌ست بابلییه‌كان و به‌ ئاگر ده‌یسووتێنن، تۆش له‌ ده‌ستیان ده‌رباز نابیت.“»
19
سدقیای پاشا به‌ یه‌رمیای گوت: «من له‌و جوله‌كانه‌ ده‌ترسم كه‌ چوونه‌ته‌ پاڵ بابلییه‌كانه‌وه‌، نه‌وه‌ك بابلییه‌كان بمده‌نه‌ ده‌ست ئه‌وان، ئه‌وانیش سووكایه‌تیم پێ بكه‌ن.»
20
یه‌رمیاش گوتی: «ناتده‌نه‌ ده‌ست ئه‌وان. گوێڕایه‌ڵی فه‌رمووده‌ی یه‌زدان به‌ كه‌ من پێت ڕاده‌گه‌یه‌نم. ئینجا چاكه‌ت بۆ ده‌بێت و ژیانت ده‌رباز ده‌بێت.
21
ئه‌گه‌ر ڕازیش نیت خۆت ڕاده‌ست بكه‌یت، ئه‌وا ئه‌مه‌ ئه‌و په‌یامه‌یه‌ كه‌ یه‌زدان پیشانی دام.
22
ئه‌وه‌تا هه‌موو ئه‌و ژنانه‌ی له‌ كۆشكی پاشای یه‌هودا ماونه‌ته‌وه‌، بۆ سه‌ركرده‌كانی پاشای بابل ده‌بردرێن. ئه‌و ژنانه‌ پێت ده‌ڵێن:
«”ئه‌وانه‌ی دۆستی تۆ بوون
فریویان دایت و زاڵ بوون به‌سه‌رت.
كاتێك پێیه‌كانت له‌ناو زه‌لكاو چه‌قین
به‌جێیان هێشتیت.“
23
«هه‌موو ژنه‌كانت و منداڵه‌كانیشت بۆ بابلییه‌كان ده‌بردرێن. تۆش له‌ ده‌ستیان ده‌رباز نابیت، به‌ڵكو به‌ ده‌ستی پاشای بابل ده‌گیرێیت، ئه‌م شاره‌ش به‌ ئاگر ده‌سووتێت.»
24
سدقیاش به‌ یه‌رمیای گوت: «با كه‌س ئه‌م قسانه‌ نه‌زانێت، نه‌وه‌ك بمریت.
25
ئه‌گه‌ر پیاوه‌ گه‌وره‌كان بیستیان من قسه‌م له‌گه‌ڵ تۆ كردووه‌، هاتنه‌ لات و گوتیان: ”پێمان بڵێ چیت به‌ پاشا گوت و پاشا چی به‌ تۆ گوت، لێمان مه‌شاره‌وه‌، ئه‌گه‌ر نا ده‌تكوژین،“
26
تۆش پێیان بڵێ: ”له‌ پاشا پاڕامه‌وه‌ تاوه‌كو نه‌مگه‌ڕێنێته‌وه‌ بۆ ماڵی یۆناتان و له‌وێ نه‌مرم.“»
27
جا هه‌موو پیاوه‌ گه‌وره‌كان بۆ لای یه‌رمیا هاتن و لێیان پرسی، ئه‌ویش به‌گوێره‌ی هه‌موو ئه‌و قسانه‌ی پاشا فه‌رمانی پێی كرد، وه‌ڵامی دانه‌وه‌. ئیتر ئه‌وانیش لێی بێده‌نگ بوون، چونكه‌ كه‌س قسه‌كردنی ئه‌وی له‌گه‌ڵ پاشا نه‌بیست.
28
ئیتر یه‌رمیا هه‌تا ئه‌و ڕۆژه‌ی ئۆرشه‌لیم گیرا له‌ حه‌وشه‌ی پاسه‌وانه‌كان مایه‌وه‌.
  1. a. 38‏:7 كوش: وڵاتێكه‌ له‌ سه‌رووی ڕووباری نیل.