عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕۆژووگرتنی ڕاسته‌قینه‌ 
1
«پڕ به‌ گه‌رووت هاوار بكه‌ و مه‌یگه‌ڕێنه‌وه‌،
وه‌ك كه‌ڕه‌نا ده‌نگت به‌رز بكه‌وه‌!
یاخیبوونه‌كه‌ی گه‌له‌كه‌م به‌ خۆیان ڕابگه‌یه‌نه‌،
گوناهه‌كانی بنه‌ماڵه‌ی یاقوبیش به‌ خۆیان.
2
ڕۆژ به‌ ڕۆژ داوای من ده‌كه‌ن و
خۆیان وا ده‌رده‌خه‌ن كه‌ به‌ په‌رۆشن بۆ زانینی ڕێگاكانم،
وه‌ك نه‌ته‌وه‌یه‌ك ڕاستودروستی ئه‌نجام دابێت و
حوكمه‌كانی خودای خۆیان پشتگوێ نه‌خستبێت.
داوای حوكمه‌كانی ڕاستودروستیم لێ ده‌كه‌ن و
خۆیان وا ده‌رده‌خه‌ن كه‌ به‌ په‌رۆشن بۆ نزیكبوونه‌وه‌ له‌ خودا.
3
ده‌ڵێن: ”بۆچی به‌ڕۆژوو بووین و سه‌یرت نه‌كردین،
خۆمان زه‌لیل كرد و پێت نه‌زانین؟“
«وا له‌ ڕۆژی به‌ڕۆژوبوونتان خۆشی ده‌بینن و
هه‌موو كرێكاره‌كانتان ده‌چه‌وسێننه‌وه‌.
4
وا سه‌رئه‌نجامی ڕوژووگرتنتان ده‌بێته‌ شه‌ڕ و ناكۆكی،
به‌ خراپه‌ مست له‌ یه‌كتری ده‌وه‌شێنن.
ئه‌مڕۆ به‌ڕۆژوو نابن
بۆ ئه‌وه‌ی له‌ ئاسمان ده‌نگتان ببیسترێت.
5
ئایا ئه‌مه‌ ئه‌و ڕۆژووه‌یه‌ كه‌ من ده‌مه‌وێت؟
مرۆڤ ته‌نها ڕۆژێك گیانی خۆی زه‌لیل ده‌كات،
وه‌ك زه‌ل سه‌ری داده‌نه‌وێنێت و
له‌سه‌ر گوش و خۆڵه‌مێش ڕاده‌كشێت؟
ئایا ئه‌مه‌ ناو ده‌نێیت ڕۆژوو،
یان ڕۆژێكی په‌سه‌ند له‌لای یه‌زدان؟
6
«ئایا ئه‌مه‌ ئه‌و ڕۆژووه‌ نییه‌ كه‌ من ده‌مه‌وێت،
كۆتی سته‌مكاری بكرێته‌وه‌ و
گرێیه‌كانی نیر شل بكرێنه‌وه‌،
چه‌وساوه‌كان به‌ڕه‌ڵا بكرێن و
هه‌موو نیرێك بشكێنن؟
7
ئایا ئه‌وه‌ نییه‌ كه‌ نانی خۆت بۆ برسی له‌ت بكه‌یت و
هه‌ژاره‌ بێ لانه‌كان ببه‌یته‌ ماڵه‌وه‌،
كه‌ ڕووتێكت بینی پۆشته‌ی بكه‌یت و
خۆت له‌ خزمه‌كانی خۆت نه‌شاریته‌وه‌؟
8
ئه‌وسا ڕووناكیت وه‌ك به‌یان پڕشنگ ده‌داته‌وه‌،
ته‌ندروستیت به‌ خێرایی چرۆ ده‌كات،
ڕاستودروستیت له‌پێشته‌وه‌ ده‌ڕوات و
شكۆمه‌ندی یه‌زدانیش پاشڕه‌و و پارێزه‌ری تۆیه‌.
9
ئه‌وسا هاوار ده‌كه‌یت و یه‌زدان وه‌ڵام ده‌داته‌وه‌،
هاواری فریاكه‌وتن ده‌كه‌یت، ئه‌ویش پێت ده‌فه‌رموێت: ئه‌وه‌تام.
«ئه‌گه‌ر به‌رگی سته‌م له‌ خۆت داماڵیت و
واز له‌ قسه‌ی به‌د و تاوانباركردنی خه‌ڵكی بهێنێت،
10
هه‌روه‌ها ئه‌گه‌ر خۆت بۆ برسی ماندوو بكه‌یت و
پێداویستی زه‌لیل دابین بكه‌یت،
ئاوا ڕووناكیت له‌ناو تاریكی ده‌دره‌وشێته‌وه‌ و
تاریكی ئه‌نگوسته‌چاوت وه‌ك نیوه‌ڕۆ ده‌بێت.
11
یه‌زدان هه‌میشه‌ ڕێنماییت ده‌كات و
له‌ خاكی ڕووته‌ندا گیانت تێر ده‌كات و
جه‌سته‌ت به‌هێز ده‌كات.
وه‌ك باخچه‌یه‌كی تێر ئاوت لێدێت،
كانییه‌ك كه‌ ئاوی لێ نه‌بڕێت.
12
گه‌لی تۆ كه‌لاوه‌ داڕووخاوه‌ كۆنه‌كان بنیاد ده‌نێنه‌وه‌،
بناغه‌كان هه‌ڵده‌ستێننه‌وه‌، كه‌ له‌ نه‌وه‌كانی پێشووه‌وه‌یه‌،
ئینجا ناوت لێ ده‌نێن، ”بنیادنه‌ره‌وه‌ی شوورا“ و
”ئاوه‌دانكه‌ره‌وه‌ی كۆڵانه‌كان“.
13
«ئه‌گه‌ر به‌ پێیه‌كانت ڕۆژی شه‌ممه‌ت نه‌شكاند،
له‌ ڕۆژی پیرۆزم به‌ ئاره‌زووی خۆت نه‌كه‌یت،
ئه‌گه‌ر ڕۆژی شه‌ممه‌ به‌ ڕۆژی خۆشی دابنێیت و
ڕۆژی پیرۆزی یه‌زدان، ڕێزداره‌،
ئه‌گه‌ر ڕێزی لێ بگریت به‌وه‌ی ڕێگای خۆت ئه‌نجام نه‌ده‌یت و
به‌دوای خۆشی خۆته‌وه‌ نه‌بیت و قسه‌كانی خۆت نه‌كه‌یت،
14
ئه‌وسا خۆشی له‌ یه‌زدان ده‌بینیت و
سواری به‌رزاییه‌كانی زه‌ویت ده‌كه‌م و
میراته‌كه‌ی یاقوبی باوكت ده‌رخوارد ده‌ده‌م.»
یه‌زدان به‌ ده‌می خۆی فه‌رمووی.