عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گوناهی ئیسرائیل و ملكه‌چی به‌نده‌ 
1
یه‌زدان ئه‌مه‌ ده‌فه‌رموێت:
«كوا ته‌ڵاقنامه‌ی دایكتان
ئه‌وه‌ی كه‌ من به‌ڕه‌ڵام كرد پێی؟
یان كێیه‌ له‌ خاوه‌ن قه‌رزه‌كانم
ئه‌وه‌ی ئێوه‌م پێی فرۆشتووه‌؟
ئه‌وه‌تا له‌به‌ر تاوانه‌كانتان فرۆشران،
له‌به‌ر یاخیبوونه‌كانتان دایكتان به‌ڕه‌ڵا كرا.
2
بۆچی هاتم و كه‌س نه‌بوو؟
بانگم كرد و كه‌س وه‌ڵامی نه‌دایه‌وه‌؟
ئایا ده‌ستكورت بووم له‌ كڕینه‌وه‌،
یان توانای ئه‌وه‌م تێدا نییه‌ فریا بكه‌وم؟
ئه‌وه‌تا به‌ ڕاخوڕینم ده‌ریا وشك ده‌كه‌م،
ڕووباره‌كان ده‌كه‌م به‌ چۆڵه‌وانی،
له‌به‌ر بێ ئاوی ماسییه‌كانی بۆگه‌ن ده‌بن،
له‌ تینووان ده‌مرن.
3
تاریكی ده‌كه‌مه‌ به‌ر ئاسمان،
گوش ده‌كه‌م به‌ پۆشاكی.»
4
یه‌زدانی باڵاده‌ست زمانی فێربووانی پێم به‌خشی
بۆ ئه‌وه‌ی بزانم كه‌ چۆن به‌ قسه‌ یارمه‌تی ماندوو بده‌م.
هه‌موو به‌یانییه‌ك به‌خه‌به‌رم ده‌هێنێته‌وه‌،
گوێی من به‌ئاگا ده‌هێنێت
بۆ سه‌رنجدان وه‌ك قوتابی.
5
یه‌زدانی باڵاده‌ست گوێیه‌كانی منی كرده‌وه‌،
منیش یاخی نه‌بووم،
به‌ره‌و دوا هه‌ڵنه‌گه‌ڕامه‌وه‌.
6
پشتم ڕاگرت بۆ ئه‌وه‌ی لێی بده‌ن،
ڕوومه‌تیشم بۆ ئه‌وه‌ی ڕیشم بڕننه‌وه‌.
ڕووی خۆمم دانه‌پۆشی له‌
گاڵته‌ پێكردن و تف لێكردن.
7
چونكه‌ یه‌زدانی باڵاده‌ست یارمه‌تیم ده‌دات،
ڕیسوا نابم،
له‌به‌ر ئه‌وه‌ ڕووی خۆمم وه‌ك به‌رده‌ئه‌ستێ لێكرد،
ده‌زانم شه‌رمه‌زار نابم.
8
ئه‌وه‌ی بێتاوانم ده‌كات نزیكه‌،
كێ سكاڵا له‌ من ده‌كات؟
با پێكه‌وه‌ ڕابوه‌ستین،
كێ خاوه‌نی سكاڵایه‌ له‌ دژی من؟
با لێم بێته‌ پێش!
9
ئه‌وه‌تا یه‌زدانی باڵاده‌ست یارمه‌تیم ده‌دات،
ئیتر كێ تاوانبارم ده‌كات؟
ئه‌وه‌تا هه‌موویان وه‌ك كراس داده‌ڕزێن،
مۆرانه‌ ده‌یانخوات.
10
كێ له‌ ئێوه‌ له‌ یه‌زدان ده‌ترسێت و
گوێڕایه‌ڵی به‌نده‌كه‌ی ده‌بێت؟
ئه‌وه‌ی به‌ تاریكیدا ده‌ڕوات و
ڕووناكی نابینێت،
با پشت به‌ ناوی یه‌زدان ببه‌ستێت و
پاڵ بداته‌ پاڵ خودای خۆی.
11
به‌ڵام ئه‌ی هه‌موو ئه‌وانه‌ی ئاگر ده‌كه‌نه‌وه‌،
مه‌شخه‌ڵ داگیرسێنن،
بڕۆن به‌ ڕووناكی ئاگره‌كه‌ی خۆتان و
به‌و مه‌شخه‌ڵانه‌ی داتانگیرساند.
له‌ ده‌ستی منه‌وه‌ ئه‌مه‌تان بۆ ده‌بێت
له‌ناو ئازاردا ڕاده‌كشێن.