عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كه‌وتنی بابل 
1
«دابه‌زه‌ و له‌سه‌ر خۆڵ دابنیشه‌،
ئه‌ی بابلی كچه‌ پاكیزه‌[a] .
به‌بێ ته‌خت له‌سه‌ر زه‌وی دابنیشه‌،
كچی بابلییه‌كان،
چونكه‌ چیتر پێت ناگوترێت
ناسك و نازدار.
2
ده‌ستاڕ ببه‌ و باراش بهاڕه‌،
عه‌بات فڕێبده‌،
دامێن هه‌ڵبكه‌ و قاچ به‌ده‌رخه‌،
له‌ ڕووباره‌كان بپه‌ڕه‌وه‌.
3
ڕووتیت ده‌رده‌كه‌وێت،
هه‌روه‌ها ڕیسواییت ده‌بینرێت.
تۆڵه‌ی خۆم ده‌كه‌مه‌وه‌ و
له‌ كه‌س نابوورم.»
4
ئه‌وه‌ی ده‌مانكڕێته‌وه‌ ناوی یه‌زدانی سوپاسالاره‌،
پیرۆزه‌كه‌ی ئیسرائیله‌.
5
«بێده‌نگ دابنیشه‌ و وه‌ره‌ ناو تاریكییه‌وه‌،
شاری شاهانه‌ی بابلییه‌كان،
چونكه‌ چیتر پێت ناگوترێت
شاژنی شانشینه‌كان.
6
تووڕه‌ بووم له‌ گه‌لی خۆم و
میراتی خۆمم گڵاوكرد.
ئه‌وانم دا به‌ ده‌ست تۆوه‌،
تۆش له‌گه‌ڵیاندا به‌ به‌زه‌یی نه‌بوویت.
ته‌نانه‌ت له‌سه‌ر پیره‌كانیش
نیری[b] خۆتت زۆر قورس كرد.
7
گوتت: ”بۆ هه‌تاهه‌تایه‌
ده‌بمه‌ شاژن!“
به‌ڵام له‌م ڕووداوانه‌ وردنه‌بوویته‌وه‌،
بیرت له‌ كۆتاییه‌كه‌ی نه‌كرده‌وه‌.
8
«ئێستا گوێ له‌مه‌ بگره‌، ئه‌ی سۆزانی،
ئه‌ی دانیشتوو به‌ ئاسووده‌یی،
ئه‌ی ئه‌وه‌ی له‌ دڵی خۆیدا ده‌ڵێت:
”هه‌ر خۆم و به‌س!
نه‌ بێوه‌ژن ده‌بم و
نه‌ سك سووتاوی ده‌زانم.“
9
له‌پڕ له‌ یه‌ك ڕۆژدا
ئه‌م دووانه‌ت به‌سه‌ردێت،
سك سووتان و بێوه‌ژنیێتی.
به‌ ته‌واوی به‌سه‌رت دێت،
سه‌ره‌ڕای زۆری جادووگه‌ری و
سه‌ره‌ڕای له‌ ڕاده‌به‌ده‌ری نوشته‌ كردنت.
10
پشتت به‌ خراپه‌كارییه‌كانت به‌ست و
گوتت: ”كه‌س نامبینێت.“
داناییه‌كه‌ت و زانینه‌كه‌ت تۆیان له‌ڕێ لادا،
له‌ دڵی خۆتدا گوتت:
”هه‌ر خۆم و به‌س.“
11
خراپه‌یه‌كت به‌سه‌رهاتووه‌،
سه‌رهه‌ڵدانه‌كه‌ی نازانیت،
به‌ڵایه‌كت به‌سه‌ردێت.
ناتوانیت ڕه‌تی بكه‌یته‌وه‌،
له‌پڕ كاولبوونێكت به‌سه‌ردێت
پێی نازانیت.
12
«جا به‌رده‌وام به‌، به‌ نوشته‌كانت و
به‌ زۆری جادووگه‌ریت،
ئه‌وه‌ی له‌ مێردمنداڵیته‌وه‌ تێیدا ماندوو بوویت،
به‌ڵكو سوودی هه‌بێ بۆت،
بۆ ئه‌وه‌ی بیانترسێنیت!
13
هێزت له‌به‌ر بڕا له‌ زۆری ڕاوێژه‌كانت!
با ئه‌ستێره‌ناسه‌كانت بێنه‌ پێشه‌وه‌،
ئه‌وانه‌ی ئاسمان دابه‌ش ده‌كه‌ن و
چاو له‌ ئه‌ستێره‌كان ده‌بڕن و
مانگ له‌دوای مانگ پێشبینی ده‌كه‌ن،
با ئه‌وانه‌ ڕزگارت بكه‌ن
له‌وه‌ی به‌سه‌رت دێت.
14
ئه‌وه‌تا وه‌ك پووشیان لێدێت،
ئاگر ده‌یانسووتێنێت.
له‌ ده‌ست بڵێسه‌
فریای گیانی خۆیان ناكه‌ون.
ئه‌و پشكۆ خه‌ڵووزه‌ بۆ خۆگه‌رمكردنه‌وه‌ نییه‌،
ئه‌و ئاگره‌ش بۆ دانیشتن له‌به‌رده‌می نییه‌.
15
ئه‌و جادووگه‌رانه‌ی له‌ مێردمنداڵیته‌وه‌ هه‌ڵسوكه‌وتت له‌گه‌ڵدا ده‌كردن و
پێیانه‌وه‌ ماندوو بوویت،
به‌و ده‌رده‌ ده‌چن.
هه‌ركه‌سه‌ و ملی ڕێی خۆی ده‌گرێت،
كه‌س نییه‌ ڕزگارت بكات.
  1. a. 47‏:1 پاكیزه‌: مه‌به‌ست له‌پێش داگیركردنیه‌تی، كه‌ به‌راوردی ده‌كات به‌ كچی پاكیزه‌.
  2. b. 47‏:6 مه‌به‌ستی له‌ بارگرانییه‌.