عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
تاكه‌ ڕزگاركه‌ری ئیسرائیل 
1
ئێستاش یه‌زدان ئه‌مه‌ ده‌فه‌رموێت،
به‌دیهێنه‌رت، ئه‌ی یاقوب،
شێوه‌كێشت، ئه‌ی ئیسرائیل:
«مه‌ترسه‌، چونكه‌ تۆم كڕیوه‌ته‌وه‌،
به‌ ناوی خۆته‌وه‌ بانگم كردوویت، تۆ هی منیت.
2
كه‌ به‌ناو ئاودا بپه‌ڕیته‌وه‌، من له‌گه‌ڵتدام،
به‌ناو ڕووباره‌كانیشدا، نوقومت ناكه‌ن.
به‌ناو ئاگردا بڕۆیت، داغ نابیت،
بڵێسه‌ش ناتسووتێنێت،
3
چونكه‌ من یه‌زدانم، خودای تۆم،
پیرۆزه‌كه‌ی ئیسرائیل، ڕزگاركه‌ری تۆ.
میسرم كردووه‌ به‌ كه‌فاره‌تی تۆ،
كوش و سه‌با له‌ جێی تۆ.
4
له‌به‌ر ئه‌وه‌ی تۆ به‌نرخ بوویت له‌لام،
سه‌نگین بوویت و من خۆشم ویستیت،
له‌ جێی تۆ خه‌ڵكی ده‌ده‌م،
له‌ جیاتی گیانت نه‌ته‌وه‌كان.
5
مه‌ترسه‌، چونكه‌ من له‌گه‌ڵتدام.
له‌ ڕۆژهه‌ڵاته‌وه‌ نه‌وه‌كانت ده‌هێنم و
له‌ ڕۆژئاواوه‌ كۆت ده‌كه‌مه‌وه‌.
6
به‌ باكوور ده‌ڵێم: ”بیانده‌رێ!“ و
به‌ باشووریش: ”مه‌یانگره‌!“
كوڕانم له‌ دووره‌وه‌ بهێنه‌ و
كچانم له‌وپه‌ڕی زه‌وییه‌وه‌.
7
هه‌موو ئه‌وانه‌ی به‌ ناوی منه‌وه‌ بانگ ده‌كرێن،
بۆ شكۆمه‌ندیی خۆم به‌دیم هێناون،
شێوه‌م كێشاون و دروستم كردوون.»
8
ده‌ریبخه‌ ئه‌و گه‌له‌ی كوێره‌، به‌ڵام چاوی هه‌یه‌،
كه‌ڕه‌، به‌ڵام گوێی هه‌یه‌.
9
با هه‌موو نه‌ته‌وه‌كان پێكه‌وه‌ كۆببنه‌وه‌،
با نه‌ته‌وه‌كان خڕ ببنه‌وه‌.
كێ له‌وان ئه‌مه‌ ڕاده‌گه‌یه‌نێت و
سه‌ره‌تاكانمان پێ ده‌ڵێت؟
با شایه‌ته‌كانیان بهێننه‌ پێش و ڕاستی پێشبینییه‌كانیان ده‌ربخه‌ن،
یان گوێیان لێ بێت و بڵێن: «ڕاسته‌.»
10
یه‌زدان ده‌فه‌رموێت: «ئێوه‌ شایه‌تی منن،
به‌نده‌ی هه‌ڵبژارده‌م،
بۆ ئه‌وه‌ی بزانن و باوه‌ڕم پێ بهێنن و
تێبگه‌ن كه‌ من ئه‌وم،
پێش من شێوه‌ی هیچ خودایه‌ك نه‌كێشراوه‌ و
پاش منیش نابێت.
11
منم، منم یه‌زدان،
له‌ من به‌ولاوه‌ ڕزگاركه‌ر نییه‌.
12
من ئاشكرام كرد و ڕزگارم كرد و ڕامگه‌یاند،
منم، نه‌ك خوداوه‌ندێكی بێگانه‌ له‌نێوتاندا بێت.
ئێوه‌ شایه‌تی منن كه‌ من خودام.» ئه‌وه‌ فه‌رمایشتی یه‌زدانه‌.
13
«له‌و ڕۆژه‌وه‌ من ئه‌وم،
كه‌س له‌ ده‌ستم ده‌رباز نابێت.
هه‌رچی بكه‌م كێ ده‌یگه‌ڕێنێته‌وه‌؟»
به‌زه‌یی خودا و بێوه‌فایی ئیسرائیل 
14
یه‌زدان ئه‌وه‌ی ده‌تانكڕێته‌وه‌،
پیرۆزه‌كه‌ی ئیسرائیل، ئه‌مه‌ ده‌فه‌رموێت:
«له‌ پێناوی ئێوه‌ ده‌نێرم بۆ بابل و
هه‌موو هه‌ڵاتووه‌كانی به‌ده‌رده‌نێم،
بابلییه‌كانیش به‌و كه‌شتییانه‌ی كه‌ هاواری شادییان تێدا كردبوون.
15
منم یه‌زدان، پیرۆزه‌كه‌تان،
به‌دیهێنه‌ری ئیسرائیل، پاشاكه‌تان.»
16
یه‌زدان ئه‌مه‌ ده‌فه‌رموێت،
ئه‌وه‌ی له‌ناو ده‌ریا ڕێگای داناوه‌،
له‌ناو ئاوه‌ به‌هێزه‌كان ڕێچكه‌،
17
ئه‌وه‌ی گالیسكه‌ و ئه‌سپی ده‌ركرد،
سوپا و هێزی پێكه‌وه‌ ڕاكێشا و هه‌ڵنه‌ستانه‌وه‌،
كپ بوون، وه‌ك پڵیته‌یه‌ك كوژانه‌وه‌، ده‌فه‌رموێت:
18
«باسی سه‌ره‌تاكان مه‌كه‌ن،
له‌ دێرینه‌كان ڕامه‌مێنن.
19
ئه‌وه‌تا من شتێكی نوێ ده‌كه‌م!
ئێستا سه‌رهه‌ڵده‌دات، ئایا نایزانن؟
له‌ چۆڵه‌وانی ڕێگا داده‌نێم و
له‌ بیابان ڕووباره‌كان.
20
ئاژه‌ڵه‌ كێوییه‌كان شكۆمه‌ندم ده‌كه‌ن،
چه‌قه‌ڵ و كونده‌په‌پوو،
چونكه‌ ئاوم خسته‌ چۆڵه‌وانییه‌وه‌،
ڕووباره‌كان له‌ بیاباندا
بۆ ئاودانی گه‌له‌كه‌م، هه‌ڵبژارده‌كه‌م،
21
ئه‌م گه‌له‌ بۆ خۆم شێوه‌م كێشاوه‌
باسی ستایشم ده‌كه‌ن.
22
«به‌ڵام نزاتان بۆ نه‌كردم، ئه‌ی یاقوب،
له‌ پێناوی من كۆششتان نه‌كرد، ئه‌ی ئیسرائیل.
23
به‌رخی قوربانی سووتاندنه‌كه‌ی خۆتت بۆ من نه‌هێنا،
به‌ قوربانییه‌ سه‌ربڕدراوه‌كانت ڕێزت لێ نه‌گرتم.
به‌ پێشكه‌شكراوی دانه‌وێڵه‌ بارگرانم نه‌كردیت،
به‌ قوربانی بخوور ماندووم نه‌كردیت.
24
به‌ زیوه‌كه‌ت قامیشی بۆنخۆشت بۆ نه‌كڕیم،
به‌ پیوی قوربانییه‌ سه‌ربڕدراوه‌كانت تێرت نه‌كردم،
به‌ڵكو به‌ گوناهه‌كانت بارگرانت كردم،
به‌ تاوانه‌كانت ماندووت كردم.
25
«منم، منم كه‌ یاخیبوونه‌كانت ده‌سڕمه‌وه‌،
له‌ پێناو خۆم،
گوناهه‌كانیشت به‌بیر خۆمی ناهێنمه‌وه‌.
26
به‌بیرم بخه‌ره‌وه‌،
با پێكه‌وه‌ بكه‌وینه‌ دادگاییكردن،
به‌ به‌ڵگه‌ بێتاوانییه‌كه‌ت بسه‌لمێنه‌.
27
باوكی یه‌كه‌مت گوناهی كرد و
په‌یوه‌ندی ڕێكخه‌رانت لێم یاخی بوون.
28
له‌به‌ر ئه‌وه‌ میرانی پیرۆزگا گڵاو ده‌كه‌م و
یاقوب ده‌ده‌مه‌ قڕكردن[a] و
ئیسرائیلیش بۆ جنێوپێدان.
  1. a. 43‏:28 قڕكردن: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.