عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئیسرائیلی هه‌ڵبژێردراو 
1
«ئێستا یاقوبی به‌نده‌م،
ئیسرائیلی هه‌ڵبژارده‌م، گوێ بگره‌.
2
دروستكه‌ر، یارمه‌تیده‌رت،
شێوه‌كێشت له‌ سكی دایكه‌وه‌،
یه‌زدان ئه‌مه‌ ده‌فه‌رموێت:
مه‌ترسه‌ یاقوبی به‌نده‌م،
یه‌شوروونی[a] هه‌ڵبژارده‌م،
3
چونكه‌ ئاو به‌سه‌ر خاكه‌ تینووه‌كه‌دا ده‌ڕێژم و
لافاو به‌سه‌ر زه‌وییه‌ وشكه‌كه‌دا،
ڕۆحی خۆم به‌سه‌ر نه‌وه‌كانتدا ده‌ڕێژم و
به‌ره‌كه‌تم به‌سه‌ر توخمت.
4
جا له‌نێو سه‌وزه‌گیا سه‌رهه‌ڵده‌ده‌ن
وه‌ك شۆڕه‌بی ڕۆخ جۆگه‌كان.
5
ئه‌مه‌یان ده‌ڵێت: ”من سه‌ر به‌ یه‌زدانم،“
ئه‌ویان به‌ ناوی یاقوب بانگ ده‌كرێت،
ئه‌میان له‌سه‌ر ده‌ستی ده‌نووسێت: ”بۆ یه‌زدانه‌“ و
به‌ ناوی ئیسرائیله‌وه‌ نازناوی لێ ده‌نرێت.
یه‌زدان، نه‌ك بت 
6
«یه‌زدان، پاشای ئیسرائیل و ئه‌وه‌ی ده‌یكڕێته‌وه‌،
یه‌زدانی سوپاسالار، ئه‌مه‌ ده‌فه‌رموێت:
من سه‌ره‌تا و من كۆتاییم،
له‌ من به‌ولاوه‌ هیچ خودایه‌ك نییه‌.
7
كێ وه‌ك منه‌؟ با بانگه‌واز بكات،
با ڕایبگه‌یه‌نێت و بیخاته‌ به‌رده‌مم
له‌و كاته‌وه‌ی گه‌لی دێرینم داناوه‌ و
داهاتووه‌كان و ئه‌وه‌ی له‌گه‌ڵ خۆی ده‌یهێنێت،
با پێیان ڕابگه‌یه‌نن.
8
مه‌تۆقن و مه‌ترسن.
ئه‌ی له‌ كۆنه‌وه‌ پێم نه‌گوتوویت و پێم ڕانه‌گه‌یاندوویت؟
ئێوه‌ شایه‌تی منن، ئایا له‌ من به‌ولاوه‌ خودای دیكه‌ هه‌یه‌؟
هیچ تاشه‌به‌ردێكی دیكه‌ نییه‌، من نه‌مناسیبێت.»
9
شێوه‌كێشه‌كانی بت هه‌موو پووچن،
شته‌ ئاره‌زوو به‌خشه‌كانیان بێ سوودن.
شایه‌تیده‌ری خۆیانن كه‌ نابینن و
نازانن، له‌به‌ر ئه‌وه‌ شه‌رمه‌زار ده‌بن.
10
كێ شێوه‌ی خودایه‌كی كێشاوه‌
یان بتێكی داڕشتووه‌ به‌بێ سوود؟
11
ئه‌وه‌تا هه‌موو هاوڕێیه‌كانی شه‌رمه‌زار ده‌بن.
وه‌ستاكانی له‌ مرۆڤن،
هه‌موو كۆده‌بنه‌وه‌ و ڕاده‌وه‌ستن،
پێكه‌وه‌ ده‌تۆقن و شه‌رمه‌زار ده‌بن.
12
ئاسنگه‌ر به‌ ئامێره‌كانی
پارچه‌ ئاسن له‌ناو خه‌ڵووز سوور ده‌كاته‌وه‌.
به‌ چه‌كوش شێوه‌ی ده‌كات،
به‌ هێزی بازووی دروستی ده‌كات.
برسی ده‌بێت هێزی نییه‌،
ئاوی نه‌خواردووه‌ته‌وه‌ و ماندوو بوو.
13
دارتاش گوریسی پێوانه‌ی ڕاكێشا،
نیشانی كرد به‌ نیشانكه‌ر،
به‌ ئه‌سكه‌نه‌ دروستی ده‌كات.
به‌ پرگال وێنه‌ی ده‌كێشێت،
جا وه‌ك شێوه‌ی پیاو دروستی ده‌كات،
وه‌ك جوانی مرۆڤ
بۆ ئه‌وه‌ی له‌ نزرگه‌ جێگیر بێت.
14
دار ئورزی بۆ خۆی بڕییه‌وه‌،
یان داری سه‌روو یاخود داری به‌ڕووی برد،
به‌جێی هێشت كه‌ له‌نێو داره‌كانی دارستان گه‌شه‌ بكات،
یاخود دار سنه‌وبه‌رێكی ڕواند و باران گه‌وره‌ی كرد.
15
جا بۆ مرۆڤ ده‌بێت بۆ سووتاندن،
لێی ده‌بات و گه‌رم ده‌بێته‌وه‌،
دایده‌گیرسێنێت و نانی پێ ده‌برژێنێت.
به‌ڵام خوداوه‌ندێكیش دروستده‌كات و كڕنۆشی بۆ ده‌بات،
ده‌یكات به‌ په‌یكه‌ر و ڕوو له‌ زه‌وی ده‌كات بۆی.
16
نیوه‌ی به‌ ئاگر ده‌سووتێنێت،
له‌سه‌ر نیوه‌ی خواردن ئاماده‌ ده‌كات،
گۆشت ده‌برژێنێت و تێرده‌بێت.
هه‌روه‌ها گه‌رم ده‌بێته‌وه‌ و ده‌ڵێت: «ئه‌ها!
گه‌رم بوومه‌وه‌، ئاگرم بینی.»
17
پاشماوه‌كه‌شی خوداوه‌ندێكی لێ دروستكرد، بته‌ داتاشراوه‌كه‌ی،
ڕوو له‌ زه‌وی ده‌كات بۆی و كڕنۆشی بۆ ده‌بات.
نوێژی بۆ ده‌كات و ده‌ڵێت:
«ڕزگارم بكه‌، چونكه‌ تۆ خودای منی.»
18
نازانن و تێناگه‌ن،
چونكه‌ چاوه‌كانیان داخراوه‌ له‌ بینین و
مێشكیان له‌ تێگه‌یشتن.
19
له‌ دڵی خۆیدا بیری لێ ناكاته‌وه‌ و
زانین و تێگه‌یشتنی نییه‌
هه‌تا بڵێت: «به‌ نیوه‌ی ئاگرم خۆشكرد،
به‌ پشكۆیه‌كه‌شی نان و گۆشتم برژاند و خواردم.
ئه‌و كاته‌ پاشماوه‌كه‌ی بكه‌م به‌ قێزه‌ون،
بۆ قه‌دی دارێك ڕوو له‌ زه‌وی بكه‌م؟»
20
له‌سه‌ر خۆڵه‌مێش ده‌له‌وه‌ڕێت، دڵی هه‌ڵخه‌ڵه‌تا و چه‌واشه‌ی كرد.
گیانی خۆی ڕزگار ناكات،
ناڵێت: «ئایا ئه‌مه‌ درۆ نییه‌ له‌ ده‌سته‌ ڕاستم؟»
21
«ئه‌مه‌ت له‌بیر بێت، ئه‌ی یاقوب،
ئه‌ی ئیسرائیل، چونكه‌ تۆ به‌نده‌ی منیت،
شێوه‌ی تۆم كێشا، تۆ به‌نده‌ی منیت.
ئه‌ی ئیسرائیل، له‌بیرم ناچیت.
22
یاخیبوونه‌كانی تۆم وه‌ك هه‌وری تار سڕییه‌وه‌،
گوناهه‌كانیشت وه‌ك ته‌می به‌یانییان،
بگه‌ڕێوه‌ بۆ لام،
چونكه‌ تۆم كڕییه‌وه‌.»
23
ئه‌ی ئاسمان، هاواری خۆشی بكه‌، چونكه‌ یه‌زدان ئه‌مه‌ی كرد؛
ئه‌ی ناخی زه‌وی، هاوار بكه‌ن!
هاواری خۆشی بكه‌ن، ئه‌ی چیاكان،
ئه‌ی دارستان و هه‌موو دارێك كه‌ تێیدایه‌،
چونكه‌ یه‌زدان یاقوبی كڕییه‌وه‌ و
له‌ ئیسرائیل شكۆداره‌.
ئاوه‌دانی ئۆرشه‌لیم 
24
«یه‌زدان، ئه‌وه‌ی ده‌تكڕێته‌وه‌، شێوه‌كێشت له‌ سكی دایكه‌وه‌،
ئه‌مه‌ ده‌فه‌رموێت:
«من یه‌زدانم،
دروستكه‌ری هه‌موو،
به‌ ته‌نها ئاسمانم لێككرده‌وه‌،
زه‌ویم ڕاخست، كه‌سم له‌گه‌ڵ نه‌بوو،
25
نیشانه‌ی پێغه‌مبه‌رانی درۆزنم پوكانده‌وه‌،
فاڵگره‌وه‌م گێل كرد.
دانام گه‌ڕانده‌وه‌ دواوه‌،
زانینه‌كه‌ی ئه‌وانم كرده‌ نه‌زانی.
26
وشه‌ی خزمه‌تكاره‌كه‌ی به‌جێده‌هێنێت،
پلانی نێردراوه‌كانی ته‌واو ده‌كات،
سه‌باره‌ت به‌ ئۆرشه‌لیم ده‌ڵێت: ”ئاوه‌دان ده‌بێته‌وه‌،“
به‌ شارۆچكه‌كانی یه‌هوداش: ”بنیاد ده‌نرێنه‌وه‌،“
سه‌باره‌ت به‌ كه‌لاوه‌كانیش: ”نۆژه‌نیان ده‌كه‌مه‌وه‌،“
27
«به‌ ده‌ریا ده‌ڵێت: ”وشك به‌،
منیش ڕووباره‌كانت وشك ده‌كه‌م،“
28
سه‌باره‌ت به‌ كۆرش[b] ده‌ڵێت: ”ئه‌و شوانی منه‌،
هه‌موو ئه‌وه‌ی دڵم پێی خۆشه‌ ده‌یهێنێته‌ دی.
كۆرشیش سه‌باره‌ت به‌ ئۆرشه‌لیم ده‌ڵێت: ’با بنیاد بنرێته‌وه‌،‘
به‌ په‌رستگاش ده‌ڵێت: ’با دابمه‌زرێته‌وه‌.‘“»
  1. a. 44‏:2 یه‌شوروون: وشه‌یه‌كی عیبرییه‌ به‌ واتای سه‌رڕاست یان دادپه‌روه‌ر، لێره‌ مه‌به‌ست له‌ گه‌لی ئیسرائیله‌.
  2. b. 44‏:28 بڕوانه‌ \+xt دووه‌م پوخته‌ی مێژوو 36‏:22‏\+xt*‏ و 23.