عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یارمه‌تیده‌ری ئیسرائیل 
1
«ئه‌ی خه‌ڵكی دوورگه‌كان له‌به‌رده‌مم بێده‌نگ بن!
با نه‌ته‌وه‌كان هێزیان نوێ بكه‌نه‌وه‌!
با نزیك بنه‌وه‌ ئینجا قسه‌ بكه‌ن،
با پێكه‌وه‌ بچینه‌ دادگاییكردن.
2
«كێ له‌ ڕۆژهه‌ڵاته‌وه‌ كه‌سه‌ سه‌ركه‌وتووه‌كه‌ی هه‌ستاندووه‌،
ئه‌وه‌ی به‌ ڕاستودروستی بانگی كرد بۆ خزمه‌ته‌كه‌ی؟
نه‌ته‌وه‌كانی ده‌داته‌ پێشی،
پاشایان ژێرده‌سته‌ی ده‌كات.
به‌ شمشێره‌كه‌ی وه‌ك خۆڵیان لێ ده‌كات،
به‌ كه‌وانه‌كه‌ی وه‌ك سه‌ركۆزه‌ری به‌باكراو.
3
ڕاویان ده‌نێت، به‌ سه‌لامه‌تی تێده‌په‌ڕێت،
به‌ ڕێگایه‌كدا كه‌ پێیه‌كانی پێیدا نه‌ڕۆیشتوون.
4
كێ كردوویه‌تی و كێ ئه‌نجامی داوه‌،
له‌ سه‌ره‌تاوه‌ بانگی نه‌وه‌كانی كردووه‌؟
من یه‌زدانم،
له‌ سه‌ره‌تاوه‌ هه‌تا كۆتایی، من هه‌ر ئه‌وم.»
5
دوورگه‌كان ته‌ماشایان كردووه‌ و ده‌ترسن،
هه‌ر چوار لای زه‌وی ده‌له‌رزن،
نزیك بوونه‌وه‌ و دێن،
6
هه‌ریه‌كه‌ و هاوكاری براده‌ره‌كه‌ی ده‌كات،
به‌ براكه‌ی ده‌ڵێت: «وره‌ت به‌رز بێت!»
7
دارتاش زێڕنگه‌ر هانده‌دات،
ئه‌وه‌ی به‌ چه‌كوش لووس ده‌كات
ئاسنگه‌ر هانده‌دات له‌ ده‌ستگاكه‌ی بكوتێت،
به‌ جۆشكردن ده‌ڵێت: «باشه‌.»
به‌ بزماره‌كان توندی ده‌كات هه‌تا نه‌له‌قێت.
8
«به‌ڵام تۆ ئه‌ی ئیسرائیلی به‌نده‌م،
ئه‌ی یاقوب كه‌ هه‌ڵمبژاردووه‌،
توخمی ئیبراهیمی خۆشه‌ویستم،
9
ئه‌وه‌ی له‌وپه‌ڕی زه‌وییه‌وه‌ تۆم گرت،
له‌ دوورترین گۆشه‌یه‌وه‌ بانگم كردیت و
به‌ تۆم گوت: ”تۆ به‌نده‌ی منیت،“
تۆم هه‌ڵبژاردووه‌ و ڕه‌تم نه‌كردوویته‌وه‌.
10
مه‌ترسه‌، چونكه‌ له‌گه‌ڵتدام،
مه‌په‌شۆكێ، چونكه‌ من خودای تۆم.
به‌هێزت ده‌كه‌م و یارمه‌تیت ده‌ده‌م،
به‌ ده‌سته‌ ڕاستی دادپه‌روه‌ریم پشتیوانیت ده‌كه‌م.
11
«ئه‌وه‌تا شه‌رمه‌زار و ڕیسوا ده‌بن
هه‌موو ئه‌وانه‌ی له‌ تۆ تووڕه‌ن،
وه‌ك هیچیان لێدێت و له‌ناوده‌چن
ئه‌وانه‌ی دژایه‌تیت ده‌كه‌ن.
12
به‌دوایدا ده‌گه‌ڕێیت و نایانبینیته‌وه‌
ئه‌وانه‌ی ناكۆكن له‌گه‌ڵت.
ئه‌وانه‌ی له‌ دژت ده‌جه‌نگن
وه‌ك هیچ و وه‌ك نه‌بوو ده‌بن،
13
چونكه‌ من یه‌زدانم، خودای تۆ،
ئه‌وه‌ی ده‌سته‌ ڕاستی گرتوویت،
ئه‌وه‌ی پێت ده‌ڵێت،
مه‌ترسه‌، من یارمه‌تیت ده‌ده‌م.
14
مه‌ترسه‌ ئه‌ی یاقوبی كرم،
ئه‌ی ئیسرائیلی بچووك،
من یارمه‌تیت ده‌ده‌م.» ئه‌وه‌ فه‌رمایشتی یه‌زدانه‌،
ئه‌وه‌ی ده‌تكڕێته‌وه‌، پیرۆزه‌كه‌ی ئیسرائیل.
15
«ئه‌وه‌تا ده‌تكه‌مه‌ جه‌نجه‌ڕێكی
تیژی نوێی دداندار.
چیاكان ده‌كوتییه‌وه‌ و وردوخاشیان ده‌كه‌یت،
گرده‌كان وه‌ك كا لێ ده‌كه‌یت.
16
شه‌نیان ده‌كه‌یت و با هه‌ڵیانده‌گرێت،
ڕه‌شه‌با په‌رتوبڵاویان ده‌كات،
به‌ڵام تۆ به‌ یه‌زدان دڵخۆش ده‌بیت،
شانازی به‌ خودا پیرۆزه‌كه‌ی ئیسرائیل ده‌كه‌یت.
17
«كڵۆڵ و هه‌ژاران به‌دوای ئاودا ده‌گه‌ڕێن و نییه‌،
له‌ تینووێتییان زمانیان وشك بوو.
به‌ڵام من یه‌زدانم به‌ ده‌نگیانه‌وه‌ ده‌چم،
خودای ئیسرائیلم به‌جێیان ناهێڵم.
18
ڕووباری ڕۆیشتوو له‌ گردۆڵكه‌كان ده‌رده‌هێنم،
كانیاو له‌ناوه‌ندی دۆڵه‌كانیش هه‌ڵده‌قوڵێنم.
چۆڵه‌وانی ده‌كه‌م به‌ گۆلاو،
زه‌وی وشك ده‌كه‌مه‌ سه‌رچاوه‌ی ئاو.
19
داری ئورز و ئه‌كاسیا[a] و مۆرد[b] و زه‌یتوون
له‌ چۆڵه‌وانی ده‌ڕوێنم،
داری سنه‌وبه‌ر و كاژ و سه‌روو پێكه‌وه‌
له‌ بیابان داده‌نێم،
20
بۆ ئه‌وه‌ی پێكه‌وه‌ ببینن و بزانن و
سه‌رنج بده‌ن و تێبگه‌ن
كه‌ ده‌ستی یه‌زدان ئه‌مه‌ی كردووه‌ و
خودا پیرۆزه‌كه‌ی ئیسرائیل به‌دییهێناوه‌.»
21
یه‌زدان ده‌فه‌رموێت: «به‌رگری له‌ خۆتان بكه‌ن.»
پاشای یاقوب ده‌فه‌رموێت: «به‌ڵگه‌كانتان بخه‌نه‌ به‌رده‌ستم.
22
بته‌كانتان بهێنن و با پێمان ڕابگه‌یه‌نن
ئه‌وه‌ی ڕووده‌دات.
ئه‌وانه‌ی ڕابردوو چین، پێمان ڕابگه‌یه‌نن،
با مێشكمان بخه‌ینه‌ سه‌ری و
بزانین كۆتاییه‌كه‌یان چییه‌.
یان داهاتوومان پێ بڵێن،
23
ئه‌وانه‌ی له‌ داهاتوودا دێن، ڕایبگه‌یه‌نن
بۆ ئه‌وه‌ی بزانین ئێوه‌ خوداوه‌نده‌كانن،
هه‌رچی بێت بیكه‌ن، چاكه‌ یان خراپه‌،
هه‌تا پێكه‌وه‌ سه‌رسام بین و ببینین.
24
به‌ڵام ئێوه‌ هیچن و
كاره‌كانتان له‌ هیچ كه‌مترن،
قێزه‌ون ئێوه‌ هه‌ڵده‌بژێرێت.
25
«له‌ باكووره‌وه‌ هه‌ڵمستاند و هات.
له‌ ڕۆژهه‌ڵاته‌وه‌ به‌ ناوی منه‌وه‌ نزا ده‌كات،
به‌سه‌ر پارێزگاره‌كاندا دێت وه‌ك به‌سه‌ر قوڕدا،
وه‌ك گۆزه‌كه‌ر قوڕ بشێلێت.
26
كێ له‌ سه‌ره‌تاوه‌ ڕایگه‌یاند، بۆ ئه‌وه‌ی بزانین،
پێش وه‌خت، هه‌تا بڵێین: ”ڕاستودروسته‌؟“
بێگومان ڕاگه‌یه‌نه‌ر نییه‌،
بێگومان به‌گوێداده‌ر نییه‌،
بێگومان گوێگری وشه‌كانتان نییه‌.
27
سه‌ره‌تا به‌ سییۆن: ”ئه‌وه‌تا ئه‌وان!“
به‌ ئۆرشه‌لیمیش مزگێنیده‌رم دا.
28
بینیم كه‌س نییه‌،
ئه‌مانه‌ ڕاوێژكاریان تێدا نییه‌
هه‌تا پرسیاریان لێ بكه‌م و به‌ وشه‌یه‌ك وه‌ڵام بده‌نه‌وه‌.
29
ته‌ماشا بكه‌، هه‌موو هه‌ڵخه‌ڵه‌تێنه‌رن!
كاره‌كانیان هیچ نین،
بته‌ داتاشراوه‌كانیان به‌ وێنه‌ی بایه‌ و پووچن.
  1. a. 41‏:19 داری شه‌تیم.
  2. b. 41‏:19 مۆرد: دارێكه‌ گه‌ڵاكانی به‌بریقه‌ و سه‌وزێكی تۆخه‌، گوڵی سپی ده‌گرێت و بۆنی خۆشه‌، له‌ بێت‌له‌حم و حه‌برۆن هه‌یه‌. ئه‌و ناوه‌ی ئێستا له‌ ڕۆژهه‌ڵات به‌كاریده‌هێنن بۆی (ئاس)ـه‌.