عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دادوه‌ری له‌گه‌ڵ ئۆرشه‌لیم و یه‌هودا 
1
چونكه‌ ئه‌وه‌تا په‌روه‌ردگار،
یه‌زدانی سوپاسالار،
به‌ته‌مایه‌ له‌ ئۆرشه‌لیم و له‌ یه‌هودا دابماڵێت
پاڵپشتی و پشتگیری،
هه‌موو پاڵپشتییه‌كی نان و ئاو،
2
پاڵه‌وان و جه‌نگاوه‌ر،
دادوه‌ر و پێغه‌مبه‌ر و
فاڵگره‌وه‌ و پیر و
3
سه‌رۆكی په‌نجاكان و پیاوماقوڵان،
ڕاوێژكار و پیشه‌وه‌ری دانا و نوشته‌كه‌ری تێگه‌یشتوو.
4
مێردمنداڵان ده‌كه‌م به‌ میریان،
منداڵان فه‌رمانڕواییان ده‌كه‌ن.
5
گه‌ل له‌نێو خۆیان سته‌م له‌ یه‌كتری ده‌كه‌ن،
هه‌ركه‌سه‌ و له‌ هاوڕێكه‌ی.
مێردمنداڵ له‌ پیر ڕاست ده‌بێته‌وه‌،
چروكیش له‌ سه‌نگین.
6
چونكه‌ پیاو یه‌خه‌ی برای خۆی ده‌گرێت
له‌ ماڵی باوكی و ده‌ڵێت:
«تۆ كه‌وات هه‌یه‌، ببه‌ به‌ سه‌رۆكمان و
ئه‌م كاولگه‌یه‌ش له‌ژێر ده‌ستته‌!»
7
له‌و ڕۆژه‌دا ده‌نگ به‌رز ده‌كاته‌وه‌ و ده‌ڵێت:
«نابم به‌ چاره‌ساز،
نان و به‌رگ له‌ ماڵه‌كه‌م نییه‌.
مه‌مكه‌ن به‌ سه‌رۆكی گه‌ل.»
8
ئۆرشه‌لیم شكست ده‌خوات و
یه‌هوداش ده‌كه‌وێت،
چونكه‌ زمانیان و كرده‌وه‌كانیان له‌ دژی یه‌زدانه‌،
بۆ یاخیبوون له‌به‌رچاوی شكۆمه‌ندییه‌كه‌ی.
9
دیمه‌نی ڕوخساریان شایه‌تییان له‌سه‌ر ده‌دات،
وه‌ك سه‌دۆم گوناهه‌كه‌یان ڕاده‌گه‌یه‌نن،
نایشارنه‌وه‌.
قوڕبه‌سه‌ریان،
چونكه‌ خراپه‌ ده‌هێننه‌ سه‌ر خۆیان!
10
بڵێن، ڕاستودروستان خۆشحاڵن
چونكه‌ به‌ری كرده‌وه‌كانی خۆیان ده‌خۆن.
11
قوڕبه‌سه‌ر به‌دكار! خراپه‌ی بۆ ده‌بێت،
چونكه‌ پاداشتی كرده‌وه‌كانی ده‌ستی خۆی وه‌رده‌گرێت.
12
منداڵان سته‌م له‌ گه‌لی من ده‌كه‌ن و
ژنان فه‌رمانڕه‌وایه‌تی ده‌كه‌ن.
گه‌لی من، ڕاسته‌ڕێكارانت چه‌واشه‌كارن و
ڕێگای هاتوچۆی تۆیان تێكداوه‌.
13
یه‌زدان له‌ شوێنی دادوه‌ر دانیشت،
هه‌ستا بۆ حوكمدان به‌سه‌ر گه‌لان.
14
یه‌زدان ده‌ست به‌ دادوه‌ری ده‌كات،
له‌گه‌ڵ پیرانی گه‌له‌كه‌ی و میره‌كانیان:
«ئێوه‌ بوون ڕه‌زه‌مێوه‌كه‌تان لووشدا،
ڕووتانه‌وه‌ی هه‌ژاران له‌ ماڵه‌كانتانه‌.
15
ئه‌وه‌ چیتانه‌، گه‌له‌كه‌م وردوخاش ده‌كه‌ن و
ڕووی هه‌ژاران ده‌هاڕن؟»
ئه‌وه‌ فه‌رمایشتی یه‌زدانه‌، په‌روه‌ردگاری سوپاسالار.
16
یه‌زدان ده‌فه‌رموێت:
«كچانی سییۆن له‌خۆبایی بوون،
گه‌ردنیان ده‌رخستووه‌ و
به‌ چاوبازییه‌وه‌ ده‌ڕۆن،
به‌ لاروله‌نجه‌وه‌ ده‌ڕۆن
به‌ زرنگه‌ی له‌رزانه‌ی گۆزینگیان.
17
له‌به‌ر ئه‌وه‌ په‌روه‌ردگار ته‌پڵی سه‌ری كچانی سییۆن كه‌چه‌ڵ ده‌كات،
یه‌زدان ڕووتی ئه‌وان به‌ده‌رده‌خات.»
18
له‌و ڕۆژه‌دا په‌روه‌ردگار جوانكاری داده‌ماڵێت: له‌رزانه‌ و لاسه‌ره‌ و ملوانكه‌،
19
گواره‌ و بازن و په‌چه‌،
20
سه‌رپێچ و قۆڵبه‌ست و پشتێن و ته‌لیسم و چه‌ناخه‌،
21
ئه‌نگوستیله‌ و خه‌زێم،
22
جلوبه‌رگی جه‌ژن و پاڵتۆ و چارۆكه‌ و جزدان و
23
ئاوێنه‌، كراسی كه‌تان و سه‌رپۆش و كۆڵوانه‌كان.
24
جا له‌ جێی بۆنوبه‌رام، بۆگه‌نی و
له‌ جێی كه‌مه‌ربه‌ند گوریس و
له‌ جێی پرچی به‌ ئه‌گریجه‌ سه‌ری ڕووتاوه‌ و
له‌ جێی به‌رگی گرانبه‌ها گوش[a] له‌به‌ر ده‌كه‌ن،
نیشانه‌ی داغیش له‌ جێی جوانی ده‌بێت.
25
پیاوه‌كانتان به‌ شمشێر و
پاڵه‌وانه‌كانتان له‌ جه‌نگدا ده‌كه‌ون.
26
جا ده‌روازه‌كانی سییۆن شین ده‌گێڕن و ده‌گریێن،
بێكه‌س له‌سه‌ر زه‌وی داده‌نیشن.
  1. a. 3‏:24 ڕیشاڵێكی ڕووه‌كییه‌ كه‌ له‌و سه‌رده‌مه‌ به‌رگی ماته‌می لێ دروستده‌كرا.