عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یه‌زدان ده‌بێته‌ شوانی ئیسرائیل 
1
فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، له‌سه‌ر شوانه‌كانی ئیسرائیل پێشبینی بكه‌ و پێیان بڵێ: ”یه‌زدانی باڵاده‌ست ئه‌مه‌ ده‌فه‌رموێت: قوڕبه‌سه‌ر شوانه‌كانی ئیسرائیل، ئه‌وانه‌ی هه‌ر خه‌ریكی خۆیانن، ئایا نابێت شوانه‌كان مێگه‌ل بله‌وه‌ڕێن؟
3
ئێوه‌ چه‌ورییه‌كه‌ی ده‌خۆن و خورییه‌كه‌ی له‌به‌ر ده‌كه‌ن و كامه‌شیان قه‌ڵه‌وه‌ سه‌ری ده‌بڕن، به‌ڵام مێگه‌ل ناله‌وه‌ڕێنن.
4
لاوازتان به‌هێز نه‌كرد، نه‌خۆشتان تیمار نه‌كرد، شكاوتان نه‌گرته‌وه‌، ده‌ركراوتان نه‌گه‌ڕانده‌وه‌ و به‌دوای ونبوودا نه‌گه‌ڕان، به‌ڵكو توندوتیژی خۆتان به‌سه‌ریاندا سه‌پاند.
5
جا به‌بێ شوان په‌رته‌وازه‌ بوون و به‌ په‌رته‌وازه‌یی به‌ نێچیری هه‌موو ئاژه‌ڵێكی كێوی بوون.
6
مێگه‌لی من به‌سه‌ر هه‌موو چیا و گردێكی به‌رزدا وێڵ بوون، به‌سه‌ر هه‌موو ڕووی زه‌ویدا په‌رته‌وازه‌ بوون و كه‌سیش نه‌بوو لێیان بپرسێت و به‌دوایاندا بگه‌ڕێت.
7
«”له‌به‌ر ئه‌وه‌ ئه‌ی شوانه‌كان، گوێ له‌ فه‌رمایشتی یه‌زدان بگرن:
8
یه‌زدانی باڵاده‌ست ده‌فه‌رموێت: به‌ گیانی خۆم، له‌به‌ر ئه‌وه‌ی مێگه‌لی من به‌بێ شوان بوو به‌ تاڵانی، هه‌تا ببێته‌ نێچیری هه‌موو ئاژه‌ڵێكی كێوی، هه‌روه‌ها شوانه‌كانم له‌ مێگه‌لی منیان نه‌پرسی، هه‌ر خه‌ریكی خۆیان بوون و مێگه‌لی منیان نه‌له‌وه‌ڕاند،
9
ئه‌ی شوانه‌كان له‌به‌ر ئه‌وه‌ گوێ له‌ فه‌رمایشتی یه‌زدان بگرن:
10
یه‌زدانی باڵاده‌ست ئه‌مه‌ ده‌فه‌رموێت: من له‌ دژی شوانه‌كانم و داوای مێگه‌لی خۆم له‌ ده‌ستیان ده‌كه‌م، له‌ له‌وه‌ڕاندنی مێگه‌له‌كه‌م ڕایانده‌گرم، له‌مه‌ودوا شوانه‌كان خه‌ریكی خۆیان نابن، فریای مێگه‌لی خۆم ده‌كه‌وم له‌ناو ده‌میان، ئیتر نابێت به‌ خۆراكیان.
11
«”چونكه‌ یه‌زدانی باڵاده‌ست ئه‌مه‌ ده‌فه‌رموێت: من به‌دوای مێگه‌لی خۆمدا ده‌گه‌ڕێم و به‌سه‌ریان ده‌كه‌مه‌وه‌،
12
وه‌ك چۆن شوان مێگه‌له‌ په‌رته‌وازه‌كه‌ی خۆی به‌سه‌رده‌كاته‌وه‌ كاتێك له‌نێویان ده‌بێت، ئاوا منیش مێگه‌لی خۆم به‌سه‌رده‌كه‌مه‌وه‌ و فریایان ده‌كه‌وم له‌ هه‌موو ئه‌و شوێنانه‌ی كه‌ له‌ ڕۆژی ته‌مومژدا بۆی په‌رته‌وازه‌ بوون.
13
له‌نێو گه‌لان ده‌ریانده‌هێنم و له‌ خاكه‌كان كۆیان ده‌كه‌مه‌وه‌، ده‌یانهێنمه‌وه‌ خاكی خۆیان، له‌سه‌ر چیاكانی ئیسرائیل و له‌ شیوه‌كان و له‌ناو هه‌موو ئاوه‌دانییه‌كانی خاكه‌كه‌ ده‌یانله‌وه‌ڕێنم.
14
له‌ له‌وه‌ڕگایه‌كی چاك ده‌یانله‌وه‌ڕێنم و پاوه‌نیان له‌ چیای به‌رزی ئیسرائیل ده‌بێت و له‌وێ له‌ پاوه‌نه‌ باشه‌كان كاوێژ ده‌كه‌ن، له‌ له‌وه‌ڕگا به‌پیته‌كان له‌سه‌ر چیاكانی ئیسرائیل ده‌له‌وه‌ڕێن.
15
من مه‌ڕی خۆم ده‌له‌وه‌ڕێنم هه‌تا كاوێژ ده‌كه‌ن، یه‌زدانی باڵاده‌ست ده‌فه‌رموێت،
16
به‌دوای ونبوودا ده‌گه‌ڕێم، ده‌ركراو ده‌گه‌ڕێنمه‌وه‌، شكاو ده‌گرمه‌وه‌، نه‌خۆش به‌هێز ده‌كه‌م، قه‌ڵه‌و و به‌هێز له‌ناوده‌به‌م و به‌ دادپه‌روه‌ری شوانه‌تییان ده‌كه‌م.
17
«”یه‌زدانی باڵاده‌ست ئه‌مه‌ ده‌فه‌رموێت: ئێوه‌ش ئه‌ی مێگه‌له‌كه‌م، سه‌یر بكه‌ن، من له‌نێوان مه‌ڕێك و مه‌ڕێكی دیكه‌ دادوه‌ری ده‌كه‌م، له‌نێوان به‌ران و نێرییه‌كان.
18
ئایا به‌س نییه‌ به‌لاتانه‌وه‌ له‌ له‌وه‌ڕگای باش بله‌وه‌ڕێن، له‌وه‌ڕگاكانی دیكه‌ش به‌ پێ ده‌په‌ستنه‌وه‌؟ ئایا به‌س نییه‌ كه‌ له‌ ئاوه‌ سازگاره‌كان بخۆنه‌وه‌، ئه‌وه‌ی ده‌مێنێته‌وه‌ به‌ پێتان ده‌یشڵه‌قێنن
19
هه‌تا مێگه‌لی من له‌ پێپه‌ستی ئێوه‌ بخوات و له‌ ئاوی شڵه‌قاوی پێیه‌كانتان بخواته‌وه‌؟
20
«”له‌به‌ر ئه‌وه‌ یه‌زدانی باڵاده‌ست ئه‌مه‌یان پێ ده‌فه‌رموێت: من له‌نێوان مه‌ڕی قه‌ڵه‌و و مه‌ڕی لاواز دادوه‌ری ده‌كه‌م.
21
له‌به‌ر ئه‌وه‌ی ئێوه‌ هه‌موو مه‌ڕه‌ لاوازه‌كان به‌ كه‌له‌كه‌تان به‌لاوه‌ ده‌نێن و به‌ شانیشتان پاڵیان پێوه‌ ده‌نێن و به‌ قۆچتان لێیان ده‌ده‌ن هه‌تا دووریان بخه‌نه‌وه‌ و په‌رته‌وازه‌یان بكه‌ن،
22
من فریای مێگه‌لی خۆم ده‌كه‌وم و له‌مه‌ودوا نابێت به‌ تاڵانی، دادوه‌ریش له‌نێوان مه‌ڕێك و مه‌ڕێكی دیكه‌دا ده‌كه‌م.
23
یه‌ك شوانی بۆ داده‌نێم، كه‌ داودی به‌نده‌مه‌، ئه‌و ده‌یله‌وه‌ڕێنێت و ئه‌و ده‌بێت به‌ شوانی.
24
من یه‌زدانم ده‌بم به‌ خودایان و داودی به‌نده‌شم له‌نێویاندا ده‌بێت به‌ سه‌رۆك، من یه‌زدانم، ئه‌وه‌م فه‌رموو.
25
«”په‌یمانی ئاشتییان له‌گه‌ڵ ده‌به‌ستم و ئاژه‌ڵه‌ دڕنده‌كان له‌ خاكه‌كه‌ داده‌ماڵم، جا به‌ ئاسووده‌یی له‌ چۆڵه‌وانی نیشته‌جێ ده‌بن و له‌ناو دارستانه‌كان ده‌نوون.
26
ئه‌وان و ده‌وروبه‌ری گرده‌كه‌م به‌ره‌كه‌تدار ده‌كه‌م و له‌ كاتی خۆیدا بارانیان به‌سه‌ردا ده‌بارێنم و بارانی به‌ره‌كه‌ت ده‌بێت.
27
دره‌ختی ده‌شتوده‌ر به‌ری خۆی ده‌دات، زه‌ویش به‌روبوومی خۆی ده‌دات و له‌ خاكه‌كه‌یان ئاسووده‌ ده‌بن. كاتێك به‌ندی نیره‌كه‌یان ده‌شكێنم و له‌ ده‌ستی ئه‌وانه‌ ڕزگاریان ده‌كه‌م كه‌ كردبوونیان به‌ كۆیله‌، ئه‌و كاته‌ ده‌زانن كه‌ من یه‌زدانم.
28
له‌مه‌ودوا نابن به‌ تاڵانی نه‌ته‌وه‌كان و گیانله‌به‌ره‌كانی خاكه‌كه‌ نایانخۆن، به‌ڵكو به‌ ئاسووده‌یی نیشته‌جێ ده‌بن و كه‌س نایانترسێنێت.
29
نه‌مامێكیان بۆ ده‌ڕوێنم بۆ ناوبانگ، له‌مه‌ودوا له‌ خاكه‌كه‌دا نابنه‌ نێچیری قاتوقڕی و چیتر نابنه‌ مایه‌ی تانه‌ و ته‌شه‌ری نه‌ته‌وه‌كان.
30
ئیتر ئه‌وان ده‌زانن كه‌ من یه‌زدانی په‌روه‌ردگاریانم و له‌گه‌ڵیاندام، بنه‌ماڵه‌ی ئیسرائیلیش گه‌لی منن. ئه‌وه‌ فه‌رمایشتی یه‌زدانی باڵاده‌سته‌.
31
ئێوه‌ش ئه‌ی مه‌ڕه‌كانم، مه‌ڕه‌كانی له‌وه‌ڕگاكه‌م، ئێوه‌ مرۆڤن و من خودای ئێوه‌م. ئه‌وه‌ فه‌رمایشتی یه‌زدانی باڵاده‌سته‌.“»