عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نوێكردنه‌وه‌ی چاودێریێتی حزقیێل 
1
ئینجا فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، قسه‌ له‌گه‌ڵ هاونیشتیمانیانت بكه‌ و پێیان بڵێ: ”ئه‌گه‌ر شمشێر بۆ سه‌ر خاكێك بهێنم و ئه‌گه‌ر گه‌لی خاكه‌كه‌ پیاوێك له‌نێو خۆیان ببه‌ن و بیكه‌ن به‌ چاودێر،
3
كاتێك ببینێت شمشێره‌كه‌ بۆ سه‌ر خاكه‌كه‌ دێت، فوو به‌ كه‌ڕه‌نادا ده‌كات و گه‌له‌كه‌ ئاگادار ده‌كاته‌وه‌.
4
ئه‌گه‌ر یه‌كێك گوێی له‌ ده‌نگی كه‌ڕه‌ناكه‌ بوو و وریای خۆی نه‌بوو، ئینجا شمشێره‌كه‌ هات و ژیانی برد، خوێنی له‌ ئه‌ستۆی خۆی ده‌بێت.
5
له‌به‌ر ئه‌وه‌ی گوێی له‌ ده‌نگی كه‌ڕه‌ناكه‌ بوو و وریای خۆی نه‌بوو، خوێنی له‌ ئه‌ستۆی خۆی ده‌بێت، ئه‌گه‌ر وریای خۆی بووایه‌ خۆی ده‌رباز ده‌كرد.
6
به‌ڵام ئه‌گه‌ر چاودێره‌كه‌ ببینێت وا شمشێره‌كه‌ دێت، فووی به‌ كه‌ڕه‌نادا نه‌كرد و گه‌له‌كه‌ی ئاگادار نه‌كرده‌وه‌، شمشێره‌كه‌ش هات و كه‌سێكی له‌وان كوشت، ئه‌و كه‌سه‌ به‌هۆی تاوانه‌كانی كه‌ كردوویه‌تی گیان ده‌سپێرێت، به‌ڵام من خوێنه‌كه‌ی ده‌خه‌مه‌ ئه‌ستۆی چاودێره‌كه‌.“
7
«ئه‌ی كوڕی مرۆڤ، من تۆم كرد به‌ چاودێر به‌سه‌ر بنه‌ماڵه‌ی ئیسرائیله‌وه‌، له‌به‌ر ئه‌وه‌ گوێ له‌ فه‌رمایشته‌كه‌م بگره‌ و به‌ ناوی منه‌وه‌ ئاگاداریان بكه‌ره‌وه‌.
8
ئه‌گه‌ر به‌ خراپه‌كار بفه‌رمووم: ”ئه‌ی خراپه‌كار، سزاكه‌ت مردنه‌!“ ئه‌گه‌ر تۆ خراپه‌كاره‌كه‌ ئاگادار نه‌كه‌یته‌وه‌ كه‌ له‌ ڕه‌فتاره‌كه‌ی بگه‌ڕێته‌وه‌، ئه‌وا ئه‌و خراپه‌كاره‌ به‌ تاوانی خۆیه‌وه‌ ده‌مرێت، به‌ڵام خوێنه‌كه‌ی ده‌خه‌مه‌ ئه‌ستۆی تۆ.
9
ئه‌گه‌ر هاتوو تۆ خراپه‌كاره‌كه‌ت له‌ ڕه‌فتاره‌كه‌ی ئاگادار كرده‌وه‌ هه‌تا لێی بگه‌ڕێته‌وه‌، به‌ڵام ئه‌و له‌ ڕه‌فتاره‌كه‌ی خۆی نه‌گه‌ڕایه‌وه‌، ئه‌وا به‌ تاوانی خۆیه‌وه‌ ده‌مرێت، به‌ڵام تۆ خۆت ڕزگار ده‌كه‌یت.
10
«ئه‌ی كوڕی مرۆڤ، قسه‌ له‌گه‌ڵ بنه‌ماڵه‌ی ئیسرائیل بكه‌ و بڵێ: ”ئێوه‌ به‌م جۆره‌ ده‌دوێن: ’یاخیبوون و گوناهه‌كانمان له‌سه‌ر خۆمانن و به‌وانه‌ له‌ناوده‌چین. ئیتر ئێمه‌ چۆن بژین؟‘“
11
پێیان بڵێ: ”یه‌زدانی باڵاده‌ست ده‌فه‌رموێت: به‌ گیانی خۆم، من به‌ مردنی خراپه‌كار دڵخۆش نابم، به‌ڵكو به‌وه‌ی خراپه‌كار له‌ ڕه‌فتاره‌كه‌ی بگه‌ڕێته‌وه‌ و بژیێت. بگه‌ڕێنه‌وه‌! له‌ ڕێگا خراپه‌كانتان بگه‌ڕێنه‌وه‌! ئه‌ی بنه‌ماڵه‌ی ئیسرائیل، بۆچی بمرن؟“
12
«ئه‌ی كوڕی مرۆڤ، له‌به‌ر ئه‌وه‌ به‌ هاونیشتیمانیانت بڵێ: ”ڕاستودروستی كه‌سی ڕاستودروست له‌ كاتی یاخیبوونی فریای ناكه‌وێت، خراپه‌كاریش له‌ كاتی گه‌ڕانه‌وه‌ی له‌ خراپه‌كه‌ی، به‌هۆی خراپه‌كه‌ی له‌ناو ناچێت. كه‌سی ڕاستودروست له‌ كاتی گوناهه‌كه‌ی ناتوانێت به‌ ڕاستودروستییه‌كه‌ی بژیێت.“
13
ئه‌گه‌ر به‌ كه‌سی ڕاستودروستم فه‌رموو: ”بێگومان تۆ ده‌ژیت،“ جا ئه‌گه‌ر پشتی به‌ ڕاستودروستییه‌كه‌ی به‌ست و خراپه‌ی كرد، هه‌موو ڕاستودروستییه‌كه‌ی له‌یاد ده‌كرێت، به‌ڵكو خراپه‌كه‌ی ده‌بێته‌ هۆی مردنی.
14
ئه‌گه‌ر به‌ خراپه‌كارم فه‌رموو: ”سزاكه‌ت مردنه‌!“ جا ئه‌گه‌ر له‌ گوناهه‌كه‌ی گه‌ڕایه‌وه‌ و به‌ ڕاستودروستی و دادپه‌روه‌ری كاری كرد،
15
ئه‌گه‌ر خراپه‌كاره‌كه‌ بارمته‌ یان هه‌ر شتێكی دزیوه‌ گه‌ڕاندییه‌وه‌ و ڕێگای فه‌رزه‌كانی ژیانی گرته‌به‌ر، به‌بێ ئه‌وه‌ی خراپه‌ بكات، ئه‌وا بێگومان ده‌ژیێت و نامرێت.
16
هه‌موو گوناهه‌كانی كه‌ كردوویه‌تی له‌یاد ده‌كرێن. به‌ ڕاستودروستی و دادپه‌روه‌ری كاری كردووه‌، بێگومان ده‌ژیێت.
17
«هاونیشتیمانیانت ده‌ڵێن: ”ڕێگای په‌روه‌ردگار ڕاست نییه‌.“ به‌ڵكو ئه‌وان ڕێگای خۆیان ڕاست نییه‌.
18
كاتێك كه‌سی ڕاستودروست له‌ ڕاستودروستییه‌كه‌ی بگه‌ڕێته‌وه‌ و خراپه‌ بكات، ئه‌وا پێی ده‌مرێت.
19
كاتێكیش خراپه‌كار له‌ خراپه‌كه‌ی بگه‌ڕێته‌وه‌ و به‌ ڕاستودروستی و دادپه‌روه‌ری كار بكات، ئه‌وا پێیان ده‌ژیێت.
20
ئێوه‌ش ده‌ڵێن: ”ڕێگای په‌روه‌ردگار ڕاست نییه‌!“ ئه‌ی بنه‌ماڵه‌ی ئیسرائیل، من هه‌ریه‌كه‌تان به‌پێی ڕێگاكانی خۆی حوكمی ده‌ده‌م.»
هۆیه‌كانی ڕووخاندنی ئۆرشه‌لیم 
21
له‌ ساڵی دوازده‌مینی ڕاپێچكردنمان، له‌ پێنجی مانگی ده‌،[a] له‌ ئۆرشه‌لیمه‌وه‌ ده‌ربازبووێك بۆ لام هات و گوتی: «شاره‌كه‌ لێی درا.»
22
ئێواره‌ی پێش گه‌یشتنی ده‌ربازبووه‌كه‌، ڕۆحی یه‌زدان هاته‌ سه‌رم، ده‌می كردمه‌وه‌، جا كه‌ به‌یانی هات بۆ لام ده‌مم كرابووه‌وه‌ و چیتر لاڵ نه‌بووم.
23
ئینجا فه‌رمایشتی یه‌زدانم بۆ هات، پێی فه‌رمووم:
24
«ئه‌ی كوڕی مرۆڤ، دانیشتووانی كه‌لاوه‌كانی خاكی ئیسرائیل قسه‌ ده‌كه‌ن و ده‌ڵێن: ”ئیبراهیم ته‌نها كه‌سێك بوو، به‌ڵام ده‌ستی به‌سه‌ر خاكه‌كه‌دا گرت. ئێمه‌ زۆرین و خاكه‌كه‌ به‌ ئێمه‌ دراوه‌ كه‌ ده‌ستی به‌سه‌ردا بگرین.“
25
له‌به‌ر ئه‌وه‌ پێیان بڵێ: ”یه‌زدانی باڵاده‌ست ئه‌مه‌ ده‌فه‌رموێت: گۆشت به‌ خوێنه‌وه‌ ده‌خۆن، چاوتان بۆ بته‌كانتان هه‌ڵده‌بڕن و خوێن ده‌ڕێژن، ئایا ده‌ست به‌سه‌ر خاكه‌كه‌دا ده‌گرن؟
26
پشت به‌ شمشێری خۆتان ده‌به‌ستن، شتی قێزه‌ون ده‌كه‌ن، هه‌ریه‌كه‌تان به‌ ژنی كه‌سێكی دیكه‌ گڵاو بوو. ئایا ده‌ست به‌سه‌ر خاكه‌كه‌دا ده‌گرن؟“
27
«پێیان بڵێ: ”یه‌زدانی باڵاده‌ست ئه‌مه‌ ده‌فه‌رموێت: به‌ گیانی خۆم، ئه‌وانه‌ی له‌ كه‌لاوه‌كانن به‌ شمشێر ده‌كوژرێن، ئه‌وانه‌ی له‌سه‌ر ڕووی ده‌شتوده‌رن ده‌یانكه‌مه‌ خۆراكی گیانله‌به‌ران، ئه‌وانه‌ی له‌ قه‌ڵا و له‌ ئه‌شكه‌وته‌كانن به‌ ده‌رد ده‌مرن.
28
خاكه‌كه‌ ده‌كه‌م به‌ وێرانه‌ و چۆڵه‌وانی، كۆتایی به‌ شانازی هێزی دێت، چیاكانی ئیسرائیل ده‌بن به‌ وێرانه‌ی بێ ڕێبوار.
29
جا ده‌زانن كه‌ من یه‌زدانم، كاتێك خاكه‌كه‌ ده‌كه‌م به‌ وێرانه‌ و چۆڵه‌وانی، له‌سه‌ر هه‌موو كاره‌ قێزه‌ونه‌كانیان كه‌ كردوویانه‌.“
30
«ئه‌ی كوڕی مرۆڤ، هاونیشتیمانیانت له‌پاڵ دیواره‌كان و له‌ به‌رده‌رگای ماڵه‌كان له‌باره‌ی تۆوه‌ ده‌دوێن، هه‌ریه‌كه‌ له‌گه‌ڵ براكه‌ی، به‌ یه‌كتر ده‌ڵێن: ”وه‌رن با گوێ له‌و قسه‌یه‌ بگرین كه‌ له‌لایه‌ن یه‌زدانه‌وه‌ هاتووه‌.“
31
هه‌روه‌ك هه‌موو كات، گه‌له‌كه‌م بۆ لات دێن، له‌به‌رده‌مت داده‌نیشن و گوێ له‌ قسه‌كانت ده‌گرن، به‌ڵام كاری پێ ناكه‌ن، چونكه‌ ته‌نها به‌ ده‌م په‌رۆشی خۆیان بۆ خودا ده‌رده‌بڕن، به‌ڵام به‌ دڵ به‌دوای قازانجی ناڕه‌وایی خۆیان كه‌وتوون.
32
له‌ ڕاستیدا تۆ بۆ ئه‌وان وه‌ك كه‌سێكی ده‌نگ خۆشیت كه‌ باش مۆسیقا ده‌ژه‌نێت و گۆرانی خۆشه‌ویستی ده‌ڵێته‌وه‌، جا گوێ له‌ قسه‌كانت ده‌گرن و كاری پێ ناكه‌ن.
33
«كه‌ی ئه‌مه‌ به‌ ئه‌نجام گه‌یشت، بێگومان ده‌شگاته‌ ئه‌نجام، ئه‌و كاته‌ ده‌زانن كه‌ پێغه‌مبه‌رێك له‌نێویان بوو.»
  1. a. 33‏:21 ده‌كاته‌ هه‌شتی مانگی یه‌كی ساڵی 585ی پێش زایین.