عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شیوه‌نێك بۆ فیرعه‌ون 
1
له‌ یه‌كی مانگی دوازده‌ی ساڵی دوازده‌مین[a] فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، شیوه‌نێك بۆ فیرعه‌ونی پاشای میسر بگێڕه‌ و پێی بڵێ:
«”له‌ شێری نێو نه‌ته‌وه‌كان ده‌چیت،
تۆ وه‌ك تیمساحی ناو ڕووباره‌ گه‌وره‌كه‌یت،
دڕ به‌ چه‌مه‌كانت ده‌ده‌یت،
به‌ پێیه‌كانت ئاوه‌كه‌ت شڵه‌قاند و
چه‌مه‌كانی ئه‌وانت لێڵ كرد.
3
«”یه‌زدانی باڵاده‌ست ئه‌مه‌ ده‌فه‌رموێت:
«”تۆڕی خۆم به‌سه‌رتدا هه‌ڵده‌ده‌م
له‌گه‌ڵ چه‌ندین گه‌ل،
ئه‌وان ڕاتده‌كێشنه‌ ناو تۆڕه‌كه‌م.
4
له‌سه‌ر زه‌وی به‌جێت ده‌هێڵم،
له‌سه‌ر ڕووی ده‌شتوده‌ر فڕێتده‌ده‌م،
هه‌موو باڵنده‌ی ئاسمان له‌سه‌رت ده‌نیشێنمه‌وه‌،
هه‌موو گیانله‌به‌رانی زه‌ویت پێ تێر ده‌كه‌م.
5
گۆشتت به‌سه‌ر چیاكاندا بڵاو ده‌كه‌مه‌وه‌ و
دۆڵه‌كان له‌ كه‌لاكت پڕ ده‌كه‌م.
6
خاك به‌ لافاوی خوێنت ئاوده‌ده‌م
هه‌تا چیاكان،
شیوه‌كانیش له‌ تۆ پڕ ده‌بن.
7
كه‌ تۆ ده‌كوژێنمه‌وه‌، ئاسمان داده‌پۆشم،
ئه‌ستێره‌كانی تاریك ده‌كه‌م.
به‌ هه‌ور خۆر داده‌پۆشم و
مانگیش ڕووناكییه‌كه‌ی نادره‌وشێته‌وه‌.
8
هه‌موو ڕووناكییه‌كانی ئاسمانت
لێ تاریك ده‌كه‌م،
تاریكی به‌سه‌ر خاكه‌كه‌تدا ده‌هێنم.“»
ئه‌وه‌ فه‌رمایشتی یه‌زدانی باڵاده‌سته‌.
9
«”گه‌لانێكی زۆر خه‌مبار ده‌كه‌م،
كاتێك له‌نێو نه‌ته‌وه‌كان ده‌تشكێنم،
له‌و خاكانه‌ی ئاشنایان نه‌بوویت.
10
وا له‌ گه‌لانێكی زۆر ده‌كه‌م واقیان لێت وڕبمێنێت،
له‌به‌ر تۆ پاشاكانیان موچڕكه‌یان پێدا دێت،
كاتێك شمشێره‌كه‌م له‌به‌رده‌میان ڕاده‌وه‌شێنم.
له‌و ڕۆژه‌ی تۆ ده‌كه‌ویت،
هه‌موو ساتێك ده‌له‌رزن و له‌ گیانی خۆیان ده‌ترسن.
11
«”چونكه‌ یه‌زدانی باڵاده‌ست ئه‌مه‌ ده‌فه‌رموێت:
«”شمشێری پاشای بابل
دێته‌ سه‌رت.
12
وا ده‌كه‌م به‌ شمشێری پاڵه‌وانان،
ئه‌وانه‌ی دڕنده‌ترینی هه‌موو نه‌ته‌وه‌كانن
ئاپۆره‌ی سوپاكه‌ت بكه‌وێت.
جا شانازی میسر ده‌شكێنم،
هه‌موو ئاپۆره‌ی جه‌ماوه‌ره‌كه‌ی له‌ناوده‌چێت.
13
هه‌موو مه‌ڕوماڵاته‌كانی له‌ناوده‌به‌م
له‌لای ئاوه‌ زۆره‌كان،
له‌مه‌ودوا نه‌ پێی مرۆڤ ده‌یشڵه‌قێنێت و
نه‌ سمی گاوگۆتاڵ لێڵی ده‌كات.
14
ئینجا وا ده‌كه‌م ئاوه‌كه‌ی ڕوون بێت و
جۆگه‌كانی وه‌ك زه‌یت بڕۆن.
ئه‌وه‌ فه‌رمایشتی یه‌زدانی باڵاده‌سته‌.
15
كاتێك خاكی میسر وێران ده‌كه‌م و
له‌ هه‌رچی تێیدایه‌ چۆڵی ده‌كه‌م،
كاتێك له‌ هه‌موو دانیشتووانه‌كه‌ی ده‌ده‌م،
ئینجا ده‌زانن كه‌ من یه‌زدانم.“
16
«ئه‌مه‌ شیوه‌نێكه‌ ده‌یگێڕن، كچانی نه‌ته‌وه‌كان ئه‌م شیوه‌نه‌ ده‌گێڕن، بۆ میسر و بۆ هه‌موو ئاپۆره‌ی گه‌له‌كه‌ی ده‌یگێڕن. ئه‌وه‌ فه‌رمایشتی یه‌زدانی باڵاده‌سته‌.»
شۆڕبوونه‌وه‌ی میسر بۆ ناو جیهانی مردووان 
17
پازده‌ی مانگی یه‌كی ساڵی دوازده‌مین،[b] فه‌رمایشتی یه‌زدانم بۆ هات، پێی فه‌رمووم:
18
«ئه‌ی كوڕی مرۆڤ، واوه‌یلا بۆ ئاپۆره‌ی گه‌لی میسر بكه‌، بۆ ئه‌و و كچانی نه‌ته‌وه‌ گه‌وره‌كان، بیاننێره‌ بۆ دنیای خواره‌وه‌ له‌گه‌ڵ ئه‌وانه‌ی ده‌چنه‌ نێو جیهانی مردووان.
19
پێیان بڵێ: ”ئایا ئێوه‌ له‌وان جوانترن؟ بڕۆن و له‌گه‌ڵ خه‌ته‌نه‌ نه‌كراوان ڕابكشێن.“
20
له‌ ناوه‌ڕاستی كوژراوان به‌ شمشێر ده‌كه‌ون، شمشێره‌كه‌ ئاماده‌یه‌؛ میسر ده‌گرن و له‌گه‌ڵ هه‌موو ئاپۆره‌ی سوپاكه‌ی ده‌یبه‌ن.
21
ڕابه‌ره‌ پاڵه‌وانه‌كان له‌ناوه‌ڕاستی جیهانی مردووان سه‌باره‌ت به‌ میسر و هاوپه‌یمانه‌كانی ده‌ڵێن: ”ئه‌وانه‌ هاتوون له‌گه‌ڵ خه‌ته‌نه‌ نه‌كراوان ڕابكشێن، له‌گه‌ڵ ئه‌وانه‌ی به‌ شمشێر كوژراون.“
22
«پاشای ئاشور و هه‌موو سوپاكه‌ی له‌وێ كه‌وتوون، گۆڕه‌كانیان له‌و چوارده‌وره‌ن، هه‌موو ئه‌وانه‌ی به‌ شمشێر كوژراون.
23
له‌ ژێره‌وه‌ی جیهانی مردووان گۆڕی سوپاكه‌ له‌ چوارده‌وری گۆڕی پاشاكه‌یه‌، هه‌موو ئه‌وانه‌ی ترسیان خسته‌ خاكی زیندووان، به‌ شمشێر كوژراون.
24
«پاشای ئیلام له‌وێیه‌، گۆڕی هه‌موو سوپاكه‌ی له‌ چوارده‌وری گۆڕه‌كه‌ی ئه‌ون. هه‌موویان كوژراون، به‌ شمشێر كه‌وتوون. هه‌موو ئه‌وانه‌ی ترسیان خسته‌ خاكی زیندووان به‌ خه‌ته‌نه‌ نه‌كراوی چوونه‌ دنیای خواره‌وه‌، له‌گه‌ڵ ئه‌وانه‌ی ده‌چنه‌ نێو جیهانی مردووان ئابڕوویان چوو.
25
له‌نێو كوژراوان جێگایه‌كیان پێیدا، گۆڕی هه‌موو سوپاكه‌ی له‌ چوارده‌وری گۆڕه‌كه‌ین. هه‌موویان به‌ خه‌ته‌نه‌ نه‌كراوی به‌ شمشێر كوژراون. له‌به‌ر ئه‌وه‌ی ئه‌وان ترسیان خستبووه‌ خاكی زیندووان، ئابڕوویان چوو له‌گه‌ڵ ئه‌وانه‌ی ده‌چنه‌ نێو جیهانی مردووان، له‌نێو كوژراوان ڕاكشاون.
26
«پاشای مه‌شه‌ك و پاشای توبال له‌وێن، هه‌موو سوپاكه‌یان له‌ ده‌وری گۆڕه‌كانیانن. له‌به‌ر ئه‌وه‌ی ئه‌وان ترسیان خستبووه‌ خاكی زیندووان، هه‌موویان به‌ خه‌ته‌نه‌ نه‌كراوی به‌ شمشێر كوژراون.
27
ئایا له‌گه‌ڵ پاڵه‌وانانی دیكه‌ی خه‌ته‌نه‌ نه‌كراو كه‌ كوژراون پاڵناخرێن، ئه‌وانه‌ی به‌ چه‌كه‌ جه‌نگییه‌كانیانه‌وه‌ له‌ گۆڕ نران، ئه‌وانه‌ی شمشێره‌كانیان له‌ژێر سه‌ریان دانراوه‌؟ سزای تاوانه‌كانیان له‌سه‌ر ئێسكیان ده‌بێت، ئه‌وانه‌ی له‌ خاكی زیندووان پاڵه‌وانه‌كانیان تۆقاندووه‌.
28
«تۆش، ئه‌ی فیرعه‌ون، له‌نێو خه‌ته‌نه‌ نه‌كراوان ده‌شكێیت و ڕاده‌كشێیت، له‌گه‌ڵ ئه‌وانه‌ی به‌ شمشێر كوژراون.
29
«پاشای ئه‌دۆمیش له‌گه‌ڵ هه‌موو میره‌كانی له‌وێن، ئه‌وانه‌ی وێڕای به‌تواناییان له‌گه‌ڵ خه‌ته‌نه‌ نه‌كراوان ڕاده‌كشێن، له‌گه‌ڵ ئه‌وانه‌ی به‌ شمشێر كوژراون له‌ گۆڕ نران، ده‌چنه‌ نێو جیهانی مردووان.
30
«میرانی باكوور هه‌موویان و هه‌موو سه‌یدائییه‌كان له‌وێن. هه‌رچه‌نده‌ له‌ ڕابردوودا به‌ تواناكه‌یان خه‌ڵكیان تۆقاندووه‌، به‌ڵام به‌ ئابڕووچوونه‌وه‌ له‌گه‌ڵ كوژراوان ئه‌سپه‌رده‌ كراون، به‌ خه‌ته‌نه‌كراوی له‌گه‌ڵ كوژراوان به‌ شمشێر ڕاكشان و ئابڕوویان چوو له‌گه‌ڵ ئه‌وانه‌ی له‌ گۆڕ نران.
31
«فیرعه‌ون و هه‌موو سوپاكه‌ی سه‌بوورییان دێته‌وه‌، كاتێك هه‌موو ئه‌وانه‌ ده‌بینن كه‌ به‌ شمشێر كوژراون. ئه‌وه‌ فه‌رمایشتی یه‌زدانی باڵاده‌سته‌.
32
هه‌رچه‌نده‌ ترسی ئه‌وم خسته‌ خاكی زیندووان، به‌ڵام فیرعه‌ون و هه‌موو سوپاكه‌ی له‌نێو خه‌ته‌نه‌ نه‌كراوان ڕاده‌كشێن، له‌گه‌ڵ ئه‌وانه‌ی به‌ شمشێر كوژراون. ئه‌وه‌ فه‌رمایشتی یه‌زدانی باڵاده‌سته‌.»
  1. a. 32‏:1 مه‌به‌ست له‌و ماوه‌یه‌ له‌دوای ڕاپێچكردنی یه‌هۆیاكینی پاشای یه‌هودا بۆ بابل، كه‌ به‌رامبه‌ر به‌ ساڵنامه‌ی ئێستا ده‌كاته‌ سێی مانگی سێی ساڵی 585ی پێش زایین.
  2. b. 32‏:17 به‌پێی ساڵنامه‌ی بابلی به‌رامبه‌ر به‌ ساڵنامه‌ی ئێستا ده‌كاته‌ بیست و حه‌وتی مانگی چواری ساڵی 586ی پێش زایین.