عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نموونه‌ی مه‌نجه‌ڵ 
1
له‌ ده‌ی مانگی ده‌ی ساڵی نۆیه‌م[a] فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، ئه‌م به‌رواره‌ تۆمار بكه‌، هه‌ر ئه‌م ڕۆژه‌، چونكه‌ هه‌ر له‌م ڕۆژه‌دا بوو پاشای بابل گه‌مارۆی ئۆرشه‌لیمی دا.
3
په‌ندێك بۆ بنه‌ماڵه‌ی یاخیبوو بهێنه‌وه‌ و پێیان بڵێ: ”یه‌زدانی باڵاده‌ست ئه‌مه‌ ده‌فه‌رموێت:
«”مه‌نجه‌ڵ له‌سه‌ر ئاگر دابنێ،
دایبنێ و ئاوی تێ بكه‌.
4
پارچه‌ گۆشته‌كانی تێدا كۆبكه‌ره‌وه‌،
هه‌موو پارچه‌ چاكه‌كان، ڕان و شان،
پڕی بكه‌ له‌ ئێسكی هه‌ڵبژارده‌.
5
باشترین مه‌ڕی مێگه‌ل ببه‌ و
دار له‌ژێر مه‌نجه‌ڵی ئێسكه‌كانی كۆبكه‌ره‌وه‌،
به‌ ته‌واوی بیكوڵێنه‌،
با ئیسكه‌كانیشی له‌ناویدا بكوڵێن.
6
«”چونكه‌ یه‌زدانی باڵاده‌ست ئه‌مه‌ ده‌فه‌رموێت:
«”قوڕبه‌سه‌ر شاره‌ خوێنڕێژه‌كه‌،
ئه‌و مه‌نجه‌ڵه‌ی ژه‌نگه‌كه‌ی خۆی تێدایه‌،
ژه‌نگه‌كه‌ی لێ ده‌رنه‌چوو!
پارچه‌پارچه‌ ده‌ریبهێنن،
تیروپشكی له‌سه‌ر مه‌كه‌ن.
7
«”له‌به‌ر ئه‌وه‌ی ئه‌و خوێنه‌ی ڕشتوویه‌تی له‌ناوه‌ڕاستیدایه‌،
چونكه‌ له‌سه‌ر به‌ردی ڕووت دایناوه‌،
نه‌یڕشته‌ سه‌ر زه‌وی،
تاكو به‌ خۆڵ دایپۆشێت.
8
بۆ هه‌ڵچوونی تووڕه‌یی و بۆ تۆڵه‌سه‌ندنه‌وه‌
خوێنه‌كه‌ی ئه‌وم له‌سه‌ر به‌ردێكی ڕووت دانا،
تاكو دانه‌پۆشرێت.
9
«”له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت:
«”قوڕبه‌سه‌ر شاره‌ خوێنڕێژه‌كه‌!
هه‌روه‌ها منیش كه‌ڵه‌كه‌ داره‌كه‌ی گه‌وره‌ ده‌كه‌م.
10
دار زۆر بكه‌ و ئاگری تێبه‌رده‌،
گۆشته‌كه‌ پێ بگه‌یه‌نه‌،
به‌ ته‌واوی به‌هاراتی پێوه‌ بكه‌،
لێگه‌ڕێ با ئێسكه‌كان بسووتێنێت.
11
دوای ئه‌وه‌ مه‌نجه‌ڵه‌كه‌ به‌ به‌تاڵی له‌سه‌ر پشكۆیه‌كان دابنێ،
با گه‌رم بێت و مسه‌كه‌ی بسووتێت،
جا پیسییه‌كه‌ی تێیدا ده‌توێته‌وه‌ و
ژه‌نگه‌كه‌ی نامێنێت.
12
ڕه‌نجیان به‌ خه‌سار چوو،
ژه‌نگه‌ زۆره‌كه‌ی لانه‌درا،
ته‌نانه‌ت به‌ ئاگریش.
13
«”جا پیسییه‌كه‌ت به‌دڕه‌وشتییه‌. له‌به‌ر ئه‌وه‌ی هه‌وڵم دا پاكت بكه‌مه‌وه‌ به‌ڵام پاك نه‌بوویته‌وه‌، هه‌ر له‌ پیسییه‌كه‌ت پاك نابیته‌وه‌ هه‌تا تووڕه‌یی خۆمت به‌سه‌ردا دانه‌مركێنمه‌وه‌.
14
«”من یه‌زدانم، ئه‌وه‌م فه‌رموو، دێته‌ دی و ده‌یكه‌م. نه‌ ده‌ستت لێ ده‌پارێزم و نه‌ دڵم پێت ده‌سووتێت و نه‌ پاشگه‌ز ده‌بمه‌وه‌. به‌گوێره‌ی ڕه‌فتار و كرده‌وه‌كانت حوكمت ده‌ده‌ن، ئه‌وه‌ فه‌رمایشتی یه‌زدانی باڵاده‌سته‌.“»
مردنی ژنی حزقیێل 
15
فه‌رمایشتی یه‌زدانم بۆ هات، پێی فه‌رمووم:
16
«ئه‌ی كوڕی مرۆڤ، من خه‌ریكم به‌ لێدانی گورزێك ئه‌وه‌ی چاوت ئاره‌زووی ده‌كات لێتی ده‌ستێنم، جا مه‌لاوێوه‌ و مه‌گریێ و فرمێسك مه‌ڕێژه‌.
17
به‌ كپی ئاخ هه‌ڵكێشه‌، شیوه‌ن مه‌گێڕه‌ بۆ مردوو. مێزه‌ر له‌ خۆت بپێچه‌، با پێڵاوه‌كانت له‌ پێتدا بن و سمێڵت دامه‌پۆشه‌ و نانی ماته‌م مه‌خۆ.»
18
بۆ به‌یانی قسه‌م له‌گه‌ڵ گه‌ل كرد و بۆ ئێواره‌ ژنه‌كه‌م مرد، ڕۆژی دواتریش چۆن فه‌رمانم پێ كرابوو وام كرد.
19
ئینجا گه‌ل لێیان پرسیم: «ئایا پێمان ناڵێیت، ئه‌مه‌ی تۆ ده‌یكه‌یت په‌یوه‌ندی چییه‌ به‌ ئێمه‌وه‌؟»
20
منیش وه‌ڵامم دانه‌وه‌: «فه‌رمایشتی یه‌زدانم بۆ هات، پێی فه‌رمووم:
21
له‌گه‌ڵ بنه‌ماڵه‌ی ئیسرائیل قسه‌ بكه‌ و بڵێ: ”یه‌زدانی باڵاده‌ست ئه‌مه‌ ده‌فه‌رموێت: من خه‌ریكم پیرۆزگای خۆم گڵاو ده‌كه‌م، ئه‌و قه‌ڵایه‌ی شانازی پێوه‌ ده‌كه‌ن، ئاره‌زووی چاوتان و خۆشی گیانتانه‌. كوڕ و كچه‌كانتان، ئه‌وانه‌ی به‌جێتان هێشتن به‌ شمشێر ده‌كوژرێن.
22
من چیم كرد ئێوه‌ش به‌ هه‌مان شێوه‌ ده‌كه‌ن، سمێڵتان داناپۆشن و نانی ماته‌م ناخۆن.
23
مێزه‌ره‌كانتان به‌ سه‌رتانه‌وه‌ و پێڵاوه‌كانتان له‌ پێتان ده‌بێت، شیوه‌ن ناگێڕن و ناگریێن، به‌ڵكو به‌ تاوانه‌كانتانه‌وه‌ ده‌فه‌وتێن و بۆ یه‌كتری ده‌نوزێنه‌وه‌.
24
حزقیێل بۆ ئێوه‌ ده‌بێته‌ نیشانه‌. هه‌موو ئه‌وه‌ی كردی ئێوه‌ش ده‌یكه‌ن. كاتێك ئه‌مه‌ ڕووده‌دات، ئیتر ئێوه‌ ده‌زانن كه‌ من یه‌زدانی باڵاده‌ستم.“
25
«تۆش، ئه‌ی كوڕی مرۆڤ، ئه‌و ڕۆژه‌ی كه‌ قه‌ڵاكه‌یان لێ ده‌ستێنمه‌وه‌، كه‌ شادی و شانازییانه‌، ئاره‌زووبه‌خشی چاوانیانه‌ و خۆشی دڵیانه‌، هه‌روه‌ها كوڕ و كچیشیان لێ ده‌ستێنمه‌وه‌،
26
هه‌ر له‌و ڕۆژه‌دا، ده‌ربازبووێك دێت بۆ لات وه‌ك هه‌واڵده‌رێك.
27
له‌و ڕۆژه‌دا زمانت بۆ ده‌ربازبووه‌كه‌ ده‌كرێته‌وه‌ قسه‌ ده‌كه‌یت و چیتر لاڵ نابیت. بۆیان ده‌بیت به‌ نیشانه‌، ئیتر ئه‌وان ده‌زانن كه‌ من یه‌زدانم.»
  1. a. 24‏:1 به‌پێی ساڵنامه‌ی یه‌هودا به‌رامبه‌ر به‌ ساڵنامه‌ی ئێستا ده‌كاته‌ پێنجی مانگی یه‌ك ساڵی 587ی پێش زایین. بڕوانه‌ \+xt دووه‌م پاشایان 25‏:1‏\+xt*‏.