عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پێشبینییه‌ك له‌سه‌ر عه‌مۆن 
1
فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، ڕووت له‌ عه‌مۆنییه‌كان بكه‌ و پێشبینییان له‌سه‌ر بكه‌،
3
به‌ عه‌مۆنییه‌كان بڵێ: ”گوێ له‌ فه‌رمایشتی یه‌زدانی باڵاده‌ست بگرن، یه‌زدانی باڵاده‌ست ئه‌مه‌ ده‌فه‌رموێت: له‌به‌ر ئه‌وه‌ی گوتت ’هۆیها!‘ له‌سه‌ر پیرۆزگاكه‌م چونكه‌ گڵاو بوو، له‌سه‌ر خاكی ئیسرائیل چونكه‌ وێران بوو، له‌سه‌ر بنه‌ماڵه‌ی یه‌هوداش چونكه‌ به‌ دیلی ڕاپێچ كران،
4
له‌به‌ر ئه‌وه‌ منیش ده‌تده‌مه‌ ده‌ست خه‌ڵكی ڕۆژهه‌ڵات داگیرت بكه‌ن، جا خێوه‌تگاكانیان له‌نێو تۆدا داده‌مه‌زرێنن و نشینگه‌كانیان له‌نێو تۆدا داده‌نێن. ئه‌وان میوه‌كه‌ت ده‌خۆن و هه‌ر ئه‌وانیش شیره‌كه‌ت ده‌خۆنه‌وه‌.
5
ڕه‌به‌ ده‌كه‌م به‌ مۆڵگای وشتر و خاكی عه‌مۆنییه‌كانیش به‌ پشتیری[a] مه‌ڕ، ئیتر ئێوه‌ ده‌زانن كه‌ من یه‌زدانم.
6
یه‌زدانی باڵاده‌ست ئه‌مه‌ ده‌فه‌رموێت: له‌به‌ر ئه‌وه‌ی به‌ ده‌ست چه‌پڵه‌ت لێدا و پێت دا به‌ زه‌ویدا و به‌ هه‌موو قینی دڵته‌وه‌ به‌ ڕووخاندنی ئیسرائیل دڵخۆش بوویت،
7
له‌به‌ر ئه‌وه‌ منیش ده‌ستم بۆت درێژ ده‌كه‌م، وه‌ك ده‌ستكه‌وت ده‌تده‌مه‌ ده‌ست نه‌ته‌وه‌كان. له‌نێو گه‌لان ڕیشه‌كێشت ده‌كه‌م، له‌ خاكه‌كان له‌ناوت ده‌به‌م. وێرانت ده‌كه‌م، جا ده‌زانیت كه‌ من یه‌زدانم.“»
پێشبینییه‌ك له‌سه‌ر مۆئاب 
8
«یه‌زدانی باڵاده‌ست ئه‌مه‌ ده‌فه‌رموێت: ”له‌به‌ر ئه‌وه‌ی مۆئاب و سێعیر ده‌ڵێن، ’ببینه‌ بنه‌ماڵه‌ی یه‌هودا وه‌ك هه‌موو نه‌ته‌وه‌كانه‌،‘
9
هه‌ر له‌به‌ر ئه‌وه‌ من له‌لای شارۆچكه‌كانییه‌وه‌ سنووری مۆئاب ده‌كه‌مه‌وه‌، له‌ شارۆچكه‌كانی ئه‌وپه‌ڕییه‌وه‌، كه‌ جوانترینی خاكه‌كه‌ن، بێت‌یه‌شیمۆت و به‌عل‌مه‌عۆن و قیریاته‌یم.
10
مۆئاب له‌گه‌ڵ عه‌مۆنییه‌كان ده‌ده‌مه‌ ده‌ست خه‌ڵكی ڕۆژهه‌ڵات، بۆ ئه‌وه‌ی ئیتر ناوی عه‌مۆنییه‌كان له‌نێو نه‌ته‌وه‌كان نه‌هێنرێت.
11
مۆئاب سزا ده‌ده‌م، ئیتر ئه‌وان ده‌زانن كه‌ من یه‌زدانم.“»
فه‌رمووده‌یه‌ك سه‌باره‌ت به‌ ئه‌دۆم 
12
«یه‌زدانی باڵاده‌ست ئه‌مه‌ ده‌فه‌رموێت: ”له‌به‌ر ئه‌وه‌ی ئه‌دۆم تاوانێكی گه‌وره‌ی كرد، به‌وه‌ی تۆڵه‌ی له‌ بنه‌ماڵه‌ی یه‌هودا سه‌نده‌وه‌،
13
هه‌ر له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: ده‌ستم بۆ سه‌ر ئه‌دۆم درێژ ده‌كه‌م و مرۆڤ و ئاژه‌ڵی لێ ڕیشه‌كێش ده‌كه‌م. له‌ تێمانه‌وه‌ بۆ دیدان به‌ شمشێر ده‌كوژرێن و خاكه‌كه‌ش ده‌كه‌مه‌ چۆڵه‌وانی.
14
به‌ ده‌ستی ئیسرائیلی گه‌له‌كه‌م تۆڵه‌ له‌ ئه‌دۆم ده‌كه‌مه‌وه‌، جا ئه‌وه‌ی به‌ ئه‌دۆمی ده‌كه‌ن به‌گوێره‌ی تووڕه‌یی و هه‌ڵچوونی من ده‌بێت، ئه‌و كاته‌ تۆڵه‌ی من ده‌زانن. ئه‌وه‌ فه‌رمایشتی یه‌زدانی باڵاده‌سته‌.“»
پێشبینییه‌ك له‌سه‌ر فه‌له‌ستیه‌ 
15
«یه‌زدانی باڵاده‌ست ئه‌مه‌ ده‌فه‌رموێت: ”له‌به‌ر ئه‌وه‌ی فه‌له‌ستییه‌كان به‌ دڵێكی پڕ له‌ قینه‌وه‌ تۆڵه‌یان له‌ یه‌هودا سه‌نده‌وه‌ و كاریان كرد بۆ وێرانی و دوژمندارییه‌كی هه‌تاهه‌تایی،
16
هه‌ر له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: من خه‌ریكم ده‌ست بۆ سه‌ر فه‌له‌ستییه‌كان درێژ ده‌كه‌م و كریتییه‌كان ڕیشه‌كێش ده‌كه‌م و پاشماوه‌ی دانیشتووانی كه‌ناری ده‌ریا له‌ناوده‌به‌م.
17
تۆڵه‌ی مه‌زنیان لێ ده‌كه‌مه‌وه‌ و به‌ تووڕه‌یی سزایان ده‌ده‌م، جا ده‌زانن كه‌ من یه‌زدانم، كاتێك تۆڵه‌ی خۆمیان لێ وه‌رده‌گرمه‌وه‌.“»
  1. a. 25‏:5 پشتیر: گه‌وڕ، شوێنێكی تایبه‌ت بووه‌ به‌ په‌روه‌رده‌كردنی ئاژه‌ڵ.