عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌مه‌ په‌یامی ئامۆسه‌ كه‌ یه‌كێك بوو له‌ شوانه‌كانی شارۆچكه‌ی ته‌قۆعه‌، دوو ساڵ پێش بوومه‌له‌رزه‌كه‌ له‌ سه‌رده‌می عوزیای پاشای یه‌هودا و له‌ سه‌رده‌می یارۆڤعامی كوڕی یه‌هۆئاشی پاشای ئیسرائیل، ئه‌م بینینه‌ی ده‌رباره‌ی ئیسرائیل بۆ ئاشكرا كرا.
2
گوتی:
«یه‌زدان له‌ سییۆنه‌وه‌ ده‌نه‌ڕێنێت،
له‌ ئۆرشه‌لیمه‌وه‌ ده‌نگی دێت،
له‌وه‌ڕگای شوانه‌كان شیوه‌ن ده‌گێڕن و
لووتكه‌ی كارمه‌ل وشك ده‌بێت.»
حوكم به‌سه‌ردادانی وڵاتانی ده‌وروبه‌ر 
3
یه‌زدان ئه‌مه‌ ده‌فه‌رموێت:
«دیمه‌شق یاخی بوو، له‌ یاخیبوونه‌كه‌ی به‌رده‌وامه‌،
سزاكه‌تان به‌سه‌ردا تێناپه‌ڕێنم،
له‌به‌ر ئه‌وه‌ی به‌ جه‌نجه‌ڕی ئاسن گلعادیان شێلا،
4
ئاگر ده‌نێرمه‌ سه‌ر ماڵی حه‌زائێل
قه‌ڵاكانی به‌ن‌هه‌ده‌د ده‌خوات.
5
شه‌وبه‌ندی ده‌روازه‌كانی دیمه‌شق ده‌شكێنم،
فه‌رمانڕه‌واكه‌ له‌ دۆڵی ئاڤه‌ن ڕیشه‌كێش ده‌كه‌م،
هه‌روه‌ها گۆچان به‌ده‌ست له‌ بێت‌عه‌ده‌ن.
گه‌لی ئارام بۆ قییر ڕاپێچ ده‌كرێن.»
ئه‌وه‌ فه‌رمایشتی یه‌زدانه‌.
6
یه‌زدان ئه‌مه‌ ده‌فه‌رموێت:
«غه‌زه‌ یاخی بوو، له‌ یاخیبوونه‌كه‌ی به‌رده‌وامه‌،
سزاكه‌تان به‌سه‌ردا تێناپه‌ڕێنم،
له‌به‌ر ئه‌وه‌ی چه‌ند كۆمه‌ڵگایه‌كی به‌ ته‌واوه‌تی به‌ دیل گرت و
به‌ ئه‌دۆمی فرۆشت،
7
ئاگر ده‌نێرمه‌ سه‌ر شووراكانی غه‌زه‌،
قه‌ڵاكانی ده‌خوات.
8
فه‌رمانڕه‌واكه‌ له‌ ئه‌شدۆد ڕیشه‌كێش ده‌كه‌م و
گۆچان به‌ده‌ست له‌ ئه‌سقه‌لان.
ده‌ستم ده‌گه‌ڕێنمه‌وه‌ سه‌ر عه‌قرۆن،
پاشماوه‌ی فه‌له‌ستییه‌كان له‌ناوده‌چن.»
ئه‌وه‌ فه‌رمایشتی یه‌زدانی باڵاده‌سته‌.
9
یه‌زدان ئه‌مه‌ ده‌فه‌رموێت:
«سور یاخی بوو، له‌ یاخیبوونه‌كه‌ی به‌رده‌وامه‌،
سزاكه‌تان به‌سه‌ردا تێناپه‌ڕێنم،
له‌به‌ر ئه‌وه‌ی ته‌واوی چه‌ند كۆمه‌ڵگایه‌كی به‌ دیلگیراوی فرۆشته‌ ئه‌دۆم و
په‌یمانی برایه‌تییان نه‌هێنایه‌وه‌ یادیان،
10
ئاگر ده‌نێرمه‌ سه‌ر شووراكانی سور
قه‌ڵاكانی ده‌خوات.»
11
یه‌زدان ئه‌مه‌ ده‌فه‌رموێت:
«ئه‌دۆم یاخی بوو، له‌ یاخیبوونه‌كه‌ی به‌رده‌وامه‌،
سزاكه‌تان به‌سه‌ردا تێناپه‌ڕێنم،
له‌به‌ر ئه‌وه‌ی به‌ شمشێره‌وه‌ دوای براكه‌ی كه‌وت،
به‌بێ ده‌ربڕینی به‌زه‌یی.
هه‌روه‌ها چونكه‌ تووڕه‌ییه‌كه‌ی به‌رده‌وام له‌ جۆش بوو،
قینیشی بۆ هه‌تاهه‌تایه‌ هه‌ڵده‌گرت،
12
هه‌ر له‌به‌ر ئه‌وه‌ ئاگر ده‌نێرمه‌ سه‌ر تێمان،
قه‌ڵاكانی بۆزرا ده‌خوات.»
13
یه‌زدان ئه‌مه‌ ده‌فه‌رموێت:
«عه‌مۆن یاخی بوو، له‌ یاخیبوونه‌كه‌ی به‌رده‌وامه‌،
سزاكه‌تان به‌سه‌ردا تێناپه‌ڕێنم،
له‌به‌ر ئه‌وه‌ی سكپڕه‌كانی گلعادیان هه‌ڵدڕی،
بۆ ئه‌وه‌ی سنووره‌كانیان به‌رفراوان بكه‌ن،
14
ئاگر له‌ شووراكانی ڕه‌به‌ به‌رده‌ده‌م
قه‌ڵاكانی ده‌خوات،
به‌ هاتوهاواره‌وه‌ له‌ ڕۆژی جه‌نگدا،
به‌ زریانه‌وه‌ له‌ ڕۆژی باوباراندا.
15
پاشاكه‌یان ڕاپێچ ده‌كرێت،
ئه‌و و هه‌موو كاربه‌ده‌سته‌كانی به‌ یه‌ك جار.»
ئه‌وه‌ فه‌رمایشتی یه‌زدانه‌.