عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حه‌نانیا و سه‌فیره‌ 
1
پیاوێك ناوی حه‌نانیا بوو، له‌گه‌ڵ سه‌فیره‌ی ژنی پارچه‌ زه‌وییه‌كی فرۆشت.
2
به‌ ئاگاداری ژنه‌كه‌ی به‌شێك له‌ نرخه‌كه‌ی بۆ خۆی هه‌ڵگرت، ئه‌وه‌ی مایه‌وه‌ هێنای و خستییه‌ به‌رپێی نێردراوان.
3
په‌ترۆس گوتی: «حه‌نانیا، بۆچی شه‌یتان دڵی پڕكردوویت، تاكو درۆ له‌گه‌ڵ ڕۆحی پیرۆز بكه‌یت و له‌ نرخی زه‌وییه‌كه‌ به‌شێك بۆ خۆت هه‌ڵبگریت؟
4
ئایا نه‌تده‌توانی كێڵگه‌كه‌ بۆ خۆت دابنێیت و نه‌یفرۆشی كاتێك كه‌ هی خۆت بوو؟ پاش فرۆشتنی ئایا مافی ئه‌وه‌ت نه‌بوو نرخه‌كه‌ی هه‌ڵبگریت؟ ئیتر بۆچی له‌ دڵی خۆتدا ویستت ناپاكی بكه‌یت؟ تۆ درۆت له‌گه‌ڵ خه‌ڵك نه‌كرد، به‌ڵكو له‌گه‌ڵ خودا.»
5
كاتێك حه‌نانیا گوێی له‌م قسه‌یه‌ بوو كه‌وت و مرد. هه‌موو ئه‌وانه‌ی ئه‌مه‌یان بیست ترسێكی گه‌وره‌یان لێ نیشت.
6
ئینجا چه‌ند گه‌نجێك هه‌ستان و كفنیان كرد، هه‌ڵیانگرت بۆ ده‌ره‌وه‌ و ناشتیان.
7
پاش نزیكه‌ی سێ كاتژمێر، ژنه‌كه‌ی هاته‌ ژووره‌ و نه‌یده‌زانی چی ڕوویداوه‌.
8
په‌ترۆس لێی پرسی: «پێم بڵێ، زه‌وییه‌كه‌تان به‌م بڕه‌ فرۆشت؟»
گوتی: «به‌ڵێ، به‌م بڕه‌.»
9
په‌ترۆسیش پێی گوت: «بۆچی ڕێككه‌وتن ڕۆحی یه‌زدان تاقی بكه‌نه‌وه‌؟ ئه‌وه‌تا ئه‌وانه‌ی مێرده‌كه‌تیان ناشت له‌ به‌رده‌رگان، تۆش هه‌ڵده‌گرنه‌ ده‌ره‌وه‌.»
10
ده‌ستبه‌جێ له‌به‌رپێی كه‌وت و مرد. كاتێك گه‌نجه‌كان هاتنه‌ ژووره‌وه‌ و بینییان مردووه‌، هه‌ڵیانگرت و له‌ته‌نیشت مێرده‌كه‌ی ناشتیان.
11
ئیتر ترسێكی گه‌وره‌ هاته‌ سه‌ر هه‌موو كڵێسا و هه‌موو ئه‌وانه‌ی ئه‌مانه‌یان بیست.
زۆربوونی باوه‌ڕداران 
12
له‌سه‌ر ده‌ستی نێردراوان زۆر نیشانه‌ و په‌رجوو له‌نێو گه‌لدا كرا. هه‌موو باوه‌ڕداران به‌ یه‌ك دڵ له‌ ڕێڕه‌وه‌كه‌ی سلێمان له‌ په‌رستگادا كۆده‌بوونه‌وه‌.
13
كه‌س نه‌یده‌وێرا بچێته‌ پاڵیان، به‌ڵام گه‌ل زۆر ڕێزیان ده‌گرتن.
14
هه‌روه‌ها خه‌ڵكی زیاتر باوه‌ڕیان ده‌هێنا و ده‌هاتنه‌ پاڵ مه‌سیحی خاوه‌ن شكۆ، ژن و پیاو به‌ كۆمه‌ڵ،
15
وای لێهات نه‌خۆشیان ده‌هێنایه‌ سه‌ر شه‌قام و له‌سه‌ر جێگا و نوێن دایانده‌نان، به‌ڵكو ئه‌گه‌ر په‌ترۆس هات، سێبه‌ره‌كه‌ی بكه‌وێته‌ سه‌ر هه‌ندێكیان.
16
خه‌ڵكی شاره‌كانی ده‌وروپشتی ئۆرشه‌لیمیش كۆببوونه‌وه‌، نه‌خۆش و ئه‌وانه‌یان هه‌ڵگرتبوو كه‌ به‌ ده‌ست ڕۆحی پیس ده‌یانناڵاند، جا هه‌موویان چاكده‌بوونه‌وه‌.
17
به‌ڵام سه‌رۆك كاهین و هه‌موو ئه‌وانه‌ی له‌گه‌ڵی بوون له‌ ڕێبازی سه‌دوقی هه‌ستان و پڕبوون له‌ ئیره‌یی.
18
نێردراوانیان گرت و فڕێیان دانه‌ زیندانی گشتییه‌وه‌.
19
به‌ڵام فریشته‌یه‌كی یه‌زدان له‌ شه‌ودا ده‌رگای زیندانه‌كه‌ی كرده‌وه‌ و بردنییه‌ ده‌ره‌وه‌، گوتی:
20
«بڕۆن بۆ حه‌وشه‌كانی په‌رستگا و ڕاوه‌ستن، ته‌واوی په‌یامی ئه‌م ژیانه‌ به‌ خه‌ڵكی بڵێن.»
21
كه‌ گوێیان لێبوو، به‌یانی زوو چوونه‌ حه‌وشه‌كانی په‌رستگا و ده‌ستیان كرد به‌ فێركردنی خه‌ڵك.
سه‌رۆك كاهین و ئه‌وانه‌ی له‌گه‌ڵی بوون هاتن، سه‌نهه‌درین و هه‌موو كۆمه‌ڵی پیرانی نه‌وه‌ی ئیسرائیلیان بانگكرد و ناردیان له‌ زیندان بیانهێنن.
22
به‌ڵام كه‌ پاسه‌وانه‌كان هاتن و له‌ زیندان نه‌یاندۆزینه‌وه‌، گه‌ڕانه‌وه‌ و هه‌واڵیان دا:
23
«زیندانه‌كه‌مان بینی به‌ باشی داخرابوو، پاسه‌وانیش له‌ به‌رده‌رگاكان ڕاوه‌ستابوون، به‌ڵام كاتێك كردمانه‌وه‌ كه‌سمان تێیدا نه‌بینی.»
24
كاتێك سه‌رۆكی پاسه‌وانی په‌رستگا و كاهینانی باڵا ئه‌مه‌یان بیست، لێیان سه‌رسام بوون و گوتیان ئه‌مه‌ چی به‌سه‌ردێت!
25
ئینجا یه‌كێك هات و گوتی: «ئه‌و پیاوانه‌ی فڕێتاندانه‌ زیندانه‌وه، وا له‌ حه‌وشه‌كانی په‌رستگادا ڕاوه‌ستاون و خه‌ڵكی فێر ده‌كه‌ن.»
26
ئه‌وسا سه‌رۆك و پاسه‌وانان ڕۆیشتن و بێ توندوتیژی نێردراوانیان هێنا، چونكه‌ ده‌ترسان گه‌ل به‌ردبارانیان بكه‌ن.
27
كاتێك ئه‌وانیان هێنا له‌به‌رده‌م سه‌نهه‌دریندا ڕایانگرتن، سه‌رۆك كاهین لێی پرسین:
28
«به‌ توندی فه‌رمانمان پێ كردن خه‌ڵكی به‌م ناوه‌ فێر نه‌كه‌ن، ئه‌وه‌تا ئۆرشه‌لیمتان له‌ فێركردنه‌كانتان پڕكردووه‌ و ده‌تانه‌وێ خوێنی ئه‌م پیاوه‌ بخه‌نه‌ ئه‌ستۆمان.»
29
په‌ترۆس و نێردراوان وه‌ڵامیان دایه‌وه‌: «ده‌بێت گوێڕایه‌ڵی بۆ خودا بێت زیاتر له‌وه‌ی بۆ خه‌ڵك!
30
خودای باوباپیرانمان عیسای هه‌ستانده‌وه‌، ئه‌وه‌ی به‌ هه‌ڵواسینی له‌سه‌ر دار كوشتتان.
31
خودا ئه‌وی وه‌ك سه‌رۆك و ڕزگاركه‌ر بۆ ده‌سته‌ ڕاستی خۆی به‌رز كرده‌وه‌، تاكو تۆبه‌كردن و لێخۆشبوونی گوناه به‌ ئیسرائیل ببه‌خشێت.
32
ئێمه‌ شایه‌تی ئه‌م شتانه‌ین، هه‌روه‌ها ڕۆحی پیرۆزیش، ئه‌وه‌ی خودا به‌خشیویه‌تییه‌ ئه‌وانه‌ی گوێڕایه‌ڵن بۆی.»
33
كاتێك گوێیان لێبوو زۆر تووڕه‌ بوون، ویستیان بیانكوژن.
34
به‌ڵام فه‌ریسییه‌ك ناوی گه‌مالائیل بوو، مامۆستای ته‌ورات و ڕێزدار بوو له‌لای هه‌موو گه‌ل، له‌ سه‌نهه‌درین هه‌ستا و فه‌رمانی دا بۆ ماوه‌یه‌كی كه‌م ببردرێنه‌ ده‌ره‌وه‌.
35
پێی گوتن: «پیاوانی ئیسرائیل، ئاگاداری خۆتان بن له‌وه‌ی ده‌تانه‌وێ به‌م پیاوانه‌ی بكه‌ن.
36
له‌مێژ نییه‌ سوداس هه‌ستا و خۆی به‌ شتێك داده‌نا، نزیكه‌ی چوار سه‌د پیاو لێی كۆبوونه‌وه‌، به‌ڵام كوژرا و هه‌موو ئه‌وانه‌ی دوای كه‌وتبوون بڵاو بوونه‌وه‌، بوونه‌ هیچ.
37
دوای ئه‌مه‌ش له‌ كاتی ناونووسینه‌كه‌دا یه‌هوزای جه‌لیلی هه‌ستا و خه‌ڵكانێكی به‌دوای خۆیدا له‌خشته‌ برد، ئه‌ویش له‌ناوچوو و ئه‌وانه‌ی دوای كه‌وتبوون بڵاوبوونه‌وه‌.
38
ئێستاش ئامۆژگاریتان ده‌كه‌م، له‌م پیاوانه‌ دوور بكه‌ونه‌وه‌ و وازیان لێ بهێنن، چونكه‌ ئه‌گه‌ر ئه‌م بیروباوه‌ڕه‌ و كاره‌ له‌ خه‌ڵكه‌وه‌ بێت، تێكده‌چێت.
39
به‌ڵام ئه‌گه‌ر له‌ خوداوه‌ بێت، ناتوانن تێكی بده‌ن، ئه‌گینا خۆتان ده‌بیننه‌وه‌ له‌ دژی خودا ده‌جه‌نگن.»
40
وته‌كانی قایلی كردن، ئیتر نێردراوانیان بانگكرد و فه‌رمانیان دا كه‌ ئه‌وان بدرێنه‌ به‌ر قامچی. ئینجا فه‌رمانیان پێكردن ناوی عیسا نه‌هێنن و ئازادیان كردن.
41
جا به‌ دڵشادییه‌وه‌ له‌به‌رده‌م سه‌نهه‌درین هاتنه‌ ده‌ره‌وه‌، چونكه‌ وا دانران شایانی ئه‌وه‌ بن بۆ ناوی ئه‌و سووكایه‌تییان پێ بكرێت.
42
ئیتر هه‌موو ڕۆژێك له‌ حه‌وشه‌كانی په‌رستگا و له‌ ماڵاندا، بێوچان خه‌ڵكیان فێرده‌كرد و مزگێنییان ده‌دا كه‌ عیسا مه‌سیحه‌كه‌یه‌.