عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
حەنانیا و سەفیرا 
1
لێ زەڵامەكی ناڤێ وی حەنانیا بوو، ل گەل هەڤژینا خۆ سەفیرایێ، زەڤیەك فرۆت
2
و هندەك ژ بهایێ زەڤیێ ب ئاگەهداریا وێ بۆ خۆ هەلگرتن و ئەوێ مای ژی ئینا و دانا بەر پێیێن هنارتیان.
3
ئینا پەترۆسی گۆتێ حەنانیا: «تە بۆچی هێلا ئبلیس دلێ تە تژی بكەت، دا تۆ درەوێ ل گیانێ پیرۆز بكەی و هندەك پارەیێن زەڤیێ بۆ خۆ هەلگری؟
4
بەری فرۆتنا وێ زەڤیێ، ما ئەو نە یا تە بوو؟ و پشتی فرۆتنا وێ، ما بهایێ وێ نە د دەستێ تە دا بوو؟ بۆچی تە د دلێ خۆ دا ڤیا ڤێ چەندێ بكەی، تە درەو ل خەلكی نەكر، بەلكو تە ل خودێ كر!»
5
گاڤا حەنانیای گوهـ ل ڤێ ئاخفتنێ بووی، كەفتە ئەردی و مر، ترسەكا مەزن ب سەر وان هەمیان دا هات، ئەوێن ئەڤ تشتە بهیستی.
6
هندەك گەنجان حەنانیا كفن كر و برە ژ دەرڤە و ڤەشارت.
7
پشتی سێ دەمژمێران هەڤژینا حەنانیای هات و ئەو نزانیت چ رویدایە.
8
پەترۆسی پرسیار ژێ كر: «ئەرێ بێژە من هەوە زەڤی ب ڤی بهایی فرۆتیە؟» ئینا بەرسڤ دا: «بەلێ، ب ڤی بهایی.»
9
پەترۆسی گۆتێ: «بۆچی هوین ل سەر تاقیكرنا گیانێ خودانی ل گەل ئێك رێككەفتن؟ ئها ئەڤە پێژنا ئەوێن هەڤژینێ تە ڤەشارتی یا ل بەر دەرگەهی دهێت، دێ تە ژی هەلگرن و بەنە ژ دەرڤە!»
10
د گاڤێ دا ئەو ژی كەفتە بەرپێیێن پەترۆسی و مر. دەمێ گەنج ب ژۆر كەفتین و دیتی یا مری، ئەو ژی هەلگرت و ب رەخ هەڤژینێ وێ ڤە ڤەشارت.
11
ترسەكا مەزن ب سەر هەمی كەنیسەیێ و هەمی ئەوێن ئەڤ نوچە گوهـ لێ بووین دا هات.
هنارتی گەلەكان ساخ دكەن 
12
ل سەر دەستێ هنارتیان گەلەك نیشان و مەندەهۆشی د ناڤ مللەتی دا دهاتنە كرن. ئەو هەمی ب ئێك دل ل ئەیوانا سلێمانی كۆم دبوون
13
و كەسەكی ژ ئەوێن ماینە ژ دەرڤە، وێرەكی نەبوو بگەهیتە وان، لێ خەلكی رێز لێ دگرت
14
و ژمارەیا ئەوێن باوەری ب خودانی دئینا، هێشتا زێدەتر لێ دهات، ژن و زەڵام كۆم ب كۆم دهاتن،
15
هەتا خەلكی نەساخێن خۆ دئینانە كۆلان و جادان و ددانانە سەر تەخت و نڤینان داكو دەمێ پەترۆس دبوریت، ب كێماسی سیبەرا وی ب هندەك ژ وان بكەڤیت.
16
خەلك ژ باژێڕێن دەوروبەرێن ئورشەلیمێ ژی خڕڤە دبوون، نەساخ و ئەوێن ژ لایێ گیانێن پیس ڤە دهاتنە ئازاردان دئینان و هەمی ساخ دبوون.
هنارتی ب خرابی دهێنە تەنگاڤ كرن 
17
ئینا سەرۆككاهنی و ئەو كەسێن د گەل دا، كو ژ لایەنگرێن سەدوقیان بوون، ژ چاڤپێڕانەبوونێ تژی بوون.
18
هنارتی گرتن و هاڤێتنە د زیندانا گشتی دا،
19
لێ ب شەڤێ فریشتەیەكێ خودانی[a] دەرگەهێن زیندانێ ڤەكرن و بەردان و گۆتە وان:
20
«هەڕن، ل پەرستگەهێ راوەستن و هەمی پەیاما ڤێ ژیانێ بۆ خەلكی ڤەگێڕن.»
21
ئینا وان گوهداری كر و ل گەل ئەلندێ چوونە پەرستگەهێ و دەست ب فێركرنا خەلكی كر.
ب داخوازا سەرۆككاهنی و ئەوێن د گەل دا جڤاتێ كۆمبوونەك گرێ دا، هەمی ریهسپیێن گەلێ ئیسرائیل لێ ئامادە بوون و فەرمان دا كو هنارتیان ژ زیندانێ بۆ بینن،
22
لێ دەمێ زێرەڤان چووینێ، د زیندانێ دا نەدیتن، ئینا زڤڕینەڤە و ئەڤ چەندە راگەهاند.
23
گۆتن: «مە دیت دەرگەهێن زیندانێ ب موكمی دگرتینە، زێرەڤان ژی ل بەر دەرگەهان د راوەستیاینە، لێ گاڤا مە ڤەكرین، مە كەسەك د ژۆرڤە نەدیت.»
24
دەمێ سەرۆكێ زێرەڤانێن پەرستگەهێ و سەرۆكێن كاهنان گوهـ ل ڤێ ئاخفتنێ بووی، ل دۆر ڤێ چەندێ هزرێن وان ئالۆز بوون، كا دویماهیا ڤێ چەندێ دێ چ بیت!
25
پاشی زەڵامەك هاتە جڤاتێ و گۆت: «ئەو زەڵامێن هەوە كرینە د زیندانێ دا، ئها نوكە ل پەرستگەهێ د راوەستیاینە و یێ خەلكی فێر دكەن!»
26
ئینا سەرۆكێ زێرەڤانان و زەڵامێن خۆ چوون و هنارتی ئینان بێی كو هێزێ ل گەل ب كار بینین، ژ ترسێن مللەتی داكو بەرباران نەكەن.
27
دەمێ ل وێرێ ئامادە كرین، ل بەرسینگێ جڤاتێ راوەستاندن و سەرۆككاهنی پرسیار ژێ كر
28
و گۆت: «مە فەرمانەكا دژوار ل هەوە كر، كو هوین ب ڤی ناڤی فێركرنێ نەكەن، لێ ئەڤە هەوە ئورشەلیم ب فێركرنا خۆ تژی كر و هەوە دڤێت مە ب رشتنا خوینا وی گونەهبار بكەن!»
29
پەترۆس و هنارتیان بەرسڤ دا: «پێدڤیە گوهداریا خودێ بهێتە كرن نە یا مرۆڤان!
30
خودایێ بابكالێن مە عیسا راكرەڤە، ئەوێ هەوە ب داری ڤە هەلاویستی و كوشتی
31
لێ خودێ ل دەستێ خۆ یێ راستێ دانا و كرە سەرۆك و قورتالكەر، دا ئیسرائیلیان ژ گونەهێن وان ڤەگەڕینیت و لێ ببوریت
32
و ئەم شاهدەییێ ل سەر ڤێ چەندێ ددەین، هەروەسا گیانێ پیرۆز ژی یێ كو خودێ دایە وان كەسێن گوهداریا وی دكەن شاهدەییێ ددەت.»
33
دەمێ كۆمبوویان گوهـ ل ڤێ ئاخفتنێ بووی، تۆڕە بوون و بڕیار دا هنارتیان بكوژن.
34
لێ ئێك ژ ئەندامێن جڤاتێ ناڤێ وی گەمالائیل بوو، هەمی خەلكی رێز لێ دگرت و مامۆستایێ دەستووری بوو و ژ لایەنگرێن فەریسیان بوو، راوەستیا و فەرمان دا كو هنارتیان بۆ دەمەكی ببەنە ژ دەرڤە.
35
گۆتە كۆمبوویان: «گەلی ئیسرائیلیان، هشیار بن ل سەر وی كارێ هەوە ل بەرە ل ڤان كەسان بكەن.
36
بەری دەمەكێ كێم توداس رابوو و گۆتی ئەز مرۆڤەكێ مەزنم، ئینا چوار سەد زەڵام ب دویڤ كەفتن، لێ هاتە كوشتن و دیڤەلانكێن وی بەڵاڤ بوون و بزاڤا وان نەما.
37
پشتی هنگی، ل دەمێ سەرژمێركرنێ، یەهودایێ جەلیلی رابوو و گەلەك مرۆڤ د سەردا برن و ب دویڤ خۆ ئێخستن، لێ ئەو ژی ژ ناڤ چوو و دیڤەلانكێن وی بەڵاڤ بوون.
38
ئەڤجا نوكە ئەز هەوە ئاگەهدار دكەم، كو هوین خۆ ژ ڤان مرۆڤان بدەنە پاش و بهێلنە ب تنێ. ئەگەر ئەو بیر و باوەری یان ئەڤ كارە ژ لایێ مرۆڤان ڤە بیت، دێ هێتە هەڕفاندن.
39
لێ ئەگەر ژ لایێ خودێ ڤە بیت، هوین نەشێن ل بەرامبەر راوەستن، چێدبیت ل دویماهی دەركەڤیت هوین یێ دژی خودێ شەڕی دكەن.»
ئینا ئەندامێن جڤاتێ ب ئاخفتنا وی قاییل بوون
40
و هنارتی ئینان و قامچی دان و فەرمان لێ كر، كو ب ناڤێ عیسای فێربوونێ نەكەن و پاشی ئازاد كرن.
41
ئەڤجا هنارتی ب دلخۆشی ژ جڤاتێ دەركەفتن، چنكو ئەو ل وێ باوەریێ بوون، كو بۆ وان شانازیە ژ بەر ناڤێ عیسای بهێنە فهێت كرن.
42
ئەوان هەر رۆژ ل پەرستگەهێ و ل مالان خەلك فێر دكر و بێ راوەستیان مزگینی ددا كو مەسیح، عیسایە.
  1. a. 5‏:19 ل ڤێرێ ‹خودان› جهناڤێ خودێیە، ل فەرهەنگۆكێ بنێڕە پەیڤا \k خودان\k*