عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پۆڵس له‌ ئه‌نجومه‌نی جوله‌كه‌ 
1
پۆڵس ڕوانییه‌ سه‌نهه‌درین و گوتی: «برایان، تاكو ئه‌مڕۆ به‌ ته‌واوی ویژدانێكی پاك بۆ خودا ژیاوم.»
2
حه‌نانیای سه‌رۆك كاهین فه‌رمانی به‌وانه‌ دا كه‌ له‌لای ڕاوه‌ستابوون تاكو به‌ ده‌میدا بكێشن.
3
پۆڵس پێی گوت: «خودا لێت بدات، ئه‌ی دیواری سپیكراو! چۆن دانیشتووی به‌پێی ته‌ورات حوكمم ده‌ده‌یت، كه‌چی پێچه‌وانه‌ی ته‌ورات فه‌رمانی لێدانم ده‌ده‌یت؟»
4
ئه‌وانه‌ی له‌لای ڕاوه‌ستابوون گوتیان: «ئایا جنێو به‌ سه‌رۆك كاهینی خودا ده‌ده‌یت؟»
5
پۆڵس گوتی: «برایان، نه‌مده‌زانی سه‌رۆك كاهینه‌، چونكه‌ نووسراوه‌: {به‌ خراپه‌ باسی سه‌ركرده‌یه‌كی گه‌له‌كه‌ت مه‌كه‌.}[a] »
6
پۆڵس ده‌یزانی به‌شێك سه‌دوقین و به‌شێك فه‌ریسی، له‌ سه‌نهه‌دریندا هاواری كرد: «برایان، من فه‌ریسی كوڕی فه‌ریسیم. له‌به‌ر هیوام به‌ هه‌ستانه‌وه‌ی مردووان وا حوكم ده‌درێم.»
7
كه‌ ئه‌مه‌ی گوت، ناكۆكی كه‌وته‌ نێوان فه‌ریسی و سه‌دوقییه‌كان و ئه‌نجومه‌نه‌كه‌ بوو به‌ دوو به‌ش،
8
چونكه‌ سه‌دوقییه‌كان ده‌ڵێن هه‌ستانه‌وه‌ و فریشته‌ و ڕۆح نین، به‌ڵام فه‌ریسییه‌كان دان به‌ هه‌موو ئه‌مانه‌دا ده‌نێن.
9
ئینجا هاوار به‌رزبووه‌وه‌، هه‌ندێك له‌ مامۆستایانی ته‌ورات كه‌ فه‌ریسی بوون هه‌ستان و به‌ توندی ده‌مه‌قاڵه‌یان ده‌كرد: «تاوان له‌م پیاوه‌دا نابینین. مه‌گه‌ر ڕۆحێك یان فریشته‌ له‌گه‌ڵیدا دوابێت؟»
10
كاتێك ناكۆكییه‌كه‌ په‌ره‌ی سه‌ند، فه‌رمانده‌كه‌ ترسا پۆڵس پارچه‌پارچه‌ بكه‌ن، ئینجا فه‌رمانی به‌ سه‌ربازه‌كان دا دابه‌زن، له‌نێوانیاندا بیڕفێنن و بیبه‌نه‌وه‌ سه‌ربازگه‌.
11
بۆ شه‌وی پاشتر، مه‌سیحی خاوه‌ن شكۆ له‌لای پۆڵس ڕاوه‌ستا و فه‌رمووی: «وره‌ت به‌رزبێت! وه‌ك له‌ ئۆرشه‌لیم شایه‌تیت بۆ من دا، ده‌بێ له‌ ڕۆماش ئاوا شایه‌تی بده‌یت.»
پیلانی جوله‌كه‌ بۆ كوشتنی پۆڵس 
12
كاتێك ڕۆژهه‌ڵات جوله‌كه‌ پیلانیان كێشا، سوێندیان خوارد و گوتیان كه‌ نه‌ بخۆن و نه‌ بخۆنه‌وه‌ هه‌تا پۆڵس ده‌كوژن.
13
ئه‌وانه‌ی ئه‌م پیلانه‌یان كێشا له‌ چل زیاتر بوون.
14
چوونه‌ لای كاهینانی باڵا و پیران، گوتیان: «سوێندمان خواردووه‌ تامی هیچ نه‌كه‌ین هه‌تا پۆڵس ده‌كوژین.
15
ئێستاش ئێوه‌ و سه‌نهه‌درین به‌ فه‌رمانده‌كه‌ ڕابگه‌یه‌نن، به‌ڵكو بۆ لاتان بینێرێت، وه‌ك بتانه‌وێت وردتر له‌ بابه‌ته‌كه‌ی بكۆڵنه‌وه‌. ئێمه‌ش پێش نزیك كه‌وتنه‌وه‌ی ئاماده‌ین بۆ كوشتنی.»
16
به‌ڵام كاتێك خوشكه‌زاكه‌ی پۆڵس به‌ پیلانه‌كه‌ی زانی، هاته‌ سه‌ربازگه‌ و هه‌واڵی دایه‌ پۆڵس.
17
جا پۆڵس سه‌رپه‌لێكی بانگكرد، گوتی: «ئه‌م گه‌نجه‌ ببه‌ لای فه‌رمانده‌كه‌، چونكه‌ هه‌واڵێكی پێیه‌ بیداتێ.»
18
ئه‌ویش بردییه‌ لای فه‌رمانده‌كه‌.
گوتی: «پۆڵسی به‌ندكراو بانگی كردم و داوای لێكردم ئه‌م گه‌نجه‌ بهێنمه‌ لات، شتێكی هه‌یه‌ پێتی بڵێت.»
19
فه‌رمانده‌كه‌ش ده‌ستی گرت و به‌ ته‌نها بردییه‌ ئه‌و لاوه‌، لێی پرسی: «چیت هه‌یه‌ پێمی بڵێی؟»
20
گوتی: «جوله‌كه‌ ڕێككه‌وتوون داوات لێ بكه‌ن كه‌ به‌یانی پۆڵس بنێریته‌ سه‌نهه‌درین، وه‌ك بیانه‌وێت وردتر لێی بكۆڵنه‌وه‌.
21
بۆیه‌ ڕازی مه‌به‌ به‌ داواكارییه‌كه‌یان، چونكه‌ زیاتر له‌ چل پیاویان له‌ بۆسه‌دان بۆی، سوێندیان خواردووه‌ نه‌خۆن و نه‌خۆنه‌وه‌ هه‌تا ده‌یكوژن. ئێستا ئاماده‌ن و چاوه‌ڕێی به‌ڵێنن له‌ تۆوه‌.»
22
فه‌رمانده‌كه‌ گه‌نجه‌كه‌ی به‌ڕێكرد و فه‌رمانی پێدا: «به‌ كه‌س نه‌ڵێیت كه‌ ئه‌مه‌ت به‌ من گوتووه‌.»
ناردنی پۆڵس بۆ لای فیلیكس 
23
ئینجا دووان له‌ سه‌رپه‌له‌كانی بانگكرد و گوتی: «دوو سه‌د سه‌رباز له‌گه‌ڵ حه‌فتا سوار و دوو سه‌د ڕمهه‌ڵگر ئاماده‌ بكه‌ن، تاكو له‌ كاتژمێر نۆی[b] شه‌و بچنه‌ قه‌یسه‌رییه‌.
24
هه‌روه‌ها وڵاخ ئاماده‌ بكرێ تاكو پۆڵس سواری بێت و به‌ سه‌لامه‌تی بیگه‌یێننه‌ لای فیلیكسی فه‌رمانڕه‌وا.»
25
نامه‌یه‌كی نووسی ئه‌مه‌ی تێدابوو:
26
له‌ كلودیۆس لیسیاس،
بۆ به‌ڕێز فیلیكسی فه‌رمانڕه‌وا،
سڵاو.
27
ئه‌م پیاوه‌، جوله‌كه‌ گرتییان و خه‌ریك بوو بیكوژن، به‌ڵام له‌گه‌ڵ سه‌ربازان چووم و ڕزگارم كرد، چونكه‌ بیستمه‌وه‌ هاوڵاتی ڕۆمانییه‌.
28
ده‌مویست بزانم به‌ چی تاوانباری ده‌كه‌ن، بردمه‌ سه‌نهه‌درینه‌كه‌یان.
29
بینیم له‌به‌ر كاروباری ته‌وراته‌كه‌یان تاوانبار كراوه‌، به‌ڵام تاوانێكی له‌سه‌ر نه‌بوو كه‌ شایانی سزای مردن یان به‌ندكردن بێت.
30
كاتێك ئاگادار كرامه‌وه‌ كه‌ پیلانێك له‌م پیاوه‌ ده‌گێڕدرێت، ده‌ستبه‌جێ بۆ لای تۆم نارد، فه‌رمانم به‌ سكاڵاكاران كرد چییان له‌سه‌ری هه‌یه‌ له‌لای تۆ باسی بكه‌ن.
31
بۆیه‌ سه‌ربازان وه‌ك فه‌رمانیان پێ كرابوو، پۆڵسیان برد و به‌ شه‌و بۆ ئه‌نتیپاتریسیان[c] هێنا.
32
بۆ به‌یانی سواره‌كانیان له‌گه‌ڵ نارد و خۆیان بۆ سه‌ربازگه‌ گه‌ڕانه‌وه‌.
33
سواره‌كانیش چوونه‌ قه‌یسه‌رییه‌ و نامه‌كه‌یان دایه‌ فه‌رمانڕه‌وا و پۆڵسیان برده‌ به‌رده‌می.
34
خوێندییه‌وه‌ و پرسی خه‌ڵكی چ ناوچه‌یه‌كه‌. زانی خه‌ڵكی كیلیكیایه‌،
35
گوتی: «كه‌ی سكاڵاكاران گه‌یشتن، گوێت لێ ده‌گرم.» ئینجا فه‌رمانی دا له‌ كۆشكی هێرۆدس پاسه‌وانی بكرێت.
  1. a. 23‏:5 \+xt ده‌رچوون 22‏:28‏\+xt*‏
  2. b. 23‏:23 یۆنانی: كاتژمێری سێ.
  3. c. 23‏:31 شارێك بووه‌ كه‌ ئێستا پێی ده‌گوترێ ڕه‌ئسلعه‌ین، نزیكه‌ی 40كم له‌ ئۆرشه‌لیم دووره‌.