عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌رگری پۆڵس 
1
«برایان و باوكان، ئێستا گوێ له‌و به‌رگرییه‌ بگرن كه‌ له‌ خۆمی ده‌كه‌م.»
2
كاتێك گوێیان لێبوو به‌ زمانی عیبری قسه‌یان بۆ ده‌كات زیاتر بێده‌نگ بوون.
ئه‌ویش گوتی:
3
«من جوله‌كه‌م، له‌ ته‌رسۆسی كیلیكیا له‌دایك بووم، به‌ڵام له‌م شاره‌ گه‌وره‌ بووم، له‌به‌رده‌ستی[a] گه‌مالائیل به‌ توندی به‌گوێره‌ی ته‌وراتی باوباپیرانمان فێركراوم. زۆر دڵگه‌رم بووم بۆ خودا، وه‌ك ئه‌مڕۆ هه‌ر یه‌كێكتان.
4
شوێنكه‌وتووانی ئه‌م ڕێگایه‌م هه‌تا مردن چه‌وسانده‌وه‌، ژن و پیاوم ده‌گرت و ڕاده‌ستی زیندانم ده‌كردن،
5
وه‌كو سه‌رۆك كاهین و هه‌موو ئه‌نجومه‌نی پیران شایه‌تیم بۆ ده‌ده‌ن. نامه‌م بۆ برایانی دیمه‌شق له‌وان وه‌رگرت، چووم تاكو ئه‌وانه‌ی ئه‌وێش به‌ به‌ندكراوی بهێنمه‌ ئۆرشه‌لیم تاكو سزا بدرێن.
6
«ئه‌وه‌ بوو كاتێك ده‌ڕۆیشتم و له‌ نیوه‌ڕۆدا له‌ دیمه‌شق نزیك ده‌بوومه‌وه‌، له‌ناكاو له‌ ئاسمانه‌وه‌ ڕووناكییه‌كی گه‌وره‌ له‌ ده‌وروبه‌رم دره‌وشایه‌وه‌.
7
كه‌وتمه‌ سه‌ر زه‌وی و گوێم له‌ ده‌نگێك بوو پێی فه‌رمووم: ”شاول! شاول! بۆچی ده‌مچه‌وسێنیته‌وه‌؟“
8
«وه‌ڵامم دایه‌وه‌: ”گه‌وره‌م، تۆ كێیت؟“
«پێی فه‌رمووم: ”من عیسای ناسیره‌ییم، ئه‌وه‌ی تۆ ده‌یچه‌وسێنیته‌وه‌.“
9
ئه‌وانه‌ی له‌گه‌ڵم بوون ڕووناكییه‌كه‌یان بینی، به‌ڵام له‌و ده‌نگه‌ تێنه‌گه‌یشتن كه‌ قسه‌ی له‌گه‌ڵم ده‌كرد.
10
«گوتم: ”ئه‌ی خاوه‌ن شكۆ، چی بكه‌م؟“»
«مه‌سیحی خاوه‌ن شكۆ پێی فه‌رمووم: ”هه‌سته‌ بڕۆ دیمه‌شق، له‌وێ هه‌موو ئه‌وه‌ی بۆت دانراوه‌ بیكه‌یت، پێت ده‌گوترێ.“
11
جا له‌به‌ر هێزی ڕووناكییه‌كه‌ نه‌مده‌بینی، ئه‌وانه‌ی له‌گه‌ڵم بوون ده‌ستیان گرتم و هێنامیانه‌ دیمه‌شق.
12
«پیاوێك به‌ ناوی حه‌نانیا، به‌گوێره‌ی ته‌ورات له‌خواترس، هه‌موو جوله‌كه‌ی ئه‌وێ به‌ باشی باسیان ده‌كرد.
13
هاته‌ لام، وه‌ستا و پێی گوتم: ”شاولی برام، ببینه‌.“ یه‌كسه‌ر ئه‌وم بینی.
14
«ئینجا گوتی: ”خودای باوباپیرانمان هه‌ڵیبژاردووی تاكو خواستی بزانیت، هه‌روه‌ها ڕاستودروسته‌كه‌[b] ببینیت و گوێت له‌ وشه‌ی ده‌می ئه‌و بێت،
15
چونكه‌ تۆ بۆ هه‌موو خه‌ڵك ده‌بیته‌ شایه‌تی ئه‌و، به‌وه‌ی بینیت و بیستت.
16
ئێستا بۆ خۆت دواده‌خه‌یت؟ هه‌سته‌ له‌ ئاو هه‌ڵبكێشرێ و به‌ پاڕانه‌وه‌ به‌ ناوی ئه‌و گوناهه‌كانت بشۆره‌وه‌.“
17
«ئه‌وه‌ بوو كه‌ بۆ ئۆرشه‌لیم گه‌ڕابوومه‌وه‌ و له‌ په‌رستگا نوێژم ده‌كرد، له‌هۆشی خۆم چووم،
18
مه‌سیحم بینی و پێی فه‌رمووم: ”خێراكه‌ و به‌ په‌له‌ له‌ ئۆرشه‌لیم بڕۆ ده‌ره‌وه‌، چونكه‌ شایه‌تییه‌كه‌ت كه‌ سه‌باره‌ت به‌ منه‌ وه‌ریناگرن.“
19
«منیش گوتم: ”خاوه‌ن شكۆ، خۆیان ده‌زانن له‌ هه‌موو كه‌نیشته‌كان ئه‌وانه‌ی باوه‌ڕیان به‌ تۆ هه‌بوو، ده‌مگرتن و داركاریم ده‌كردن.
20
كاتێك خوێنی ستیفانۆسی شایه‌تی تۆ ڕژا، من ڕاوه‌ستابووم، ڕازی بووم و پارێزگاریم له‌ جلوبه‌رگی بكوژانی ده‌كرد.“
21
«به‌ڵام پێی فه‌رمووم: ”بڕۆ! بۆ دوور ده‌تنێرم، بۆ نه‌ته‌وه‌كان.“»
22
هه‌تا باسی نه‌ته‌وه‌كان گوێیان له‌ پۆڵس گرت، ئینجا هاواریان كرد و گوتیان: «له‌سه‌ر ڕووی زه‌وی مه‌یهێڵه‌! چونكه‌ ئه‌مه‌ شایانی ژیان نییه‌!»
23
ئینجا هاواریان كرد و جله‌كانی خۆیان فڕێده‌دا و خۆڵیان به‌ هه‌وادا ده‌كرد.
24
فه‌رمانده‌كه‌ فه‌رمانی دا بۆ سه‌ربازگه‌ ببردرێت و له‌ژێر قامچیدا لێی بكۆڵنه‌وه‌، تاكو بزانێت بۆچی ئاوا هاواریان لێی ده‌كرد.
پۆڵس هاوڵاتییه‌كی ڕۆمانییه‌ 
25
كاتێك به‌ستیانه‌وه‌ تاكو به‌ قامچی لێی بده‌ن، پۆڵس به‌ سه‌رپه‌له‌كه‌ی گوت كه‌ له‌وێ وه‌ستا بوو: «ئایا له‌ ڕووی یاساییه‌وه‌ ڕێتان پێدراوه‌ كه‌ هاوڵاتی ڕۆمانی به‌ر قامچی بده‌ن كه‌ هێشتا نه‌سه‌لمێنراوه‌ تاوانباره‌؟»
26
كاتێك سه‌رپه‌له‌كه‌ گوێی له‌مه‌ بوو چووه‌ لای فه‌رمانده‌كه‌، هه‌واڵی پێدا و گوتی: «ئه‌وه‌ به‌ته‌مای چی بكه‌یت؟ ئه‌م پیاوه‌ هاوڵاتی ڕۆمانییه‌!»
27
فه‌رمانده‌كه‌ش چوو بۆ لای پۆڵس و پێی گوت: «پێم بڵێ، تۆ هاوڵاتی ڕۆمانیت؟»
گوتی: «به‌ڵێ.»
28
فه‌رمانده‌كه‌ گوتی: «به‌ پاره‌یه‌كی زۆر ئه‌م هاوڵاتی بوونه‌م وه‌رگرت.»
پۆڵس گوتی: «به‌ڵام من به‌ زگماك هاوڵاتیم.»
29
ئه‌وانه‌ی به‌ته‌مابوون لێی بكۆڵنه‌وه‌ ده‌ستبه‌جێ لێی دووركه‌وتنه‌وه‌، فه‌رمانده‌كه‌ش كه‌ زانی هاوڵاتی ڕۆمانییه‌ و وا كۆتی كردووه‌، ترسا.
30
بۆ به‌یانی ویستی به‌ ته‌واوی بزانێت بۆچی جوله‌كه‌ سكاڵای لێده‌كه‌ن، ئازادی كرد و فه‌رمانی دا كاهینانی باڵا و هه‌موو سه‌نهه‌درین كۆببنه‌وه‌، پۆڵسی بانگكرد و له‌به‌رده‌میاندا ڕایگرت.
  1. a. 22‏:3 یۆنانی: له‌به‌رپێی.
  2. b. 22‏:14 مه‌به‌ست له‌ مه‌سیحه‌