عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سروودی داود بۆ ستایشی خودا 
1
داود ئه‌م سرووده‌ی بۆ یه‌زدان گوت، دوای ئه‌وه‌ی یه‌زدان له‌ ده‌ستی هه‌موو دوژمنه‌كانی و له‌ ده‌ستی شاول ڕزگاری كرد.
2
گوتی:
«یه‌زدان تاشه‌به‌ردی منه‌، قه‌ڵا و ده‌ربازكه‌رمه‌،
3
خودام ئه‌و تاشه‌به‌رده‌یه‌ كه‌ په‌نای بۆ ده‌به‌م،
قه‌ڵغان و هێزی ڕزگاریمه‌،
په‌ناگا و حه‌شارگه‌مه‌، ڕزگاركه‌ری منه‌،
له‌ سته‌م ڕزگارم ده‌كات.
4
«له‌ یه‌زدان ده‌پاڕێمه‌وه‌، ئه‌وه‌ی كه‌ شایانی ستایشه‌،
له‌ دوژمنه‌كانم ڕزگار ده‌بم.
5
شه‌پۆلی مه‌رگ منی پێچایه‌وه‌،
لێشاوی له‌ناوچوون زه‌نده‌قی بردم.
6
په‌تی جیهانی مردووان به‌ ده‌ورمدا ته‌نراوه‌،
داوی مردن له‌به‌رده‌مم دانراوه‌.
7
«له‌ ته‌نگانه‌مدا له‌ یه‌زدان پاڕامه‌وه‌،
هاوارم برده‌ به‌ر خودام،
له‌ په‌رستگاكه‌یه‌وه‌ گوێی له‌ ده‌نگی من بوو،
گوێی له‌ هاوارم بوو.
8
ئینجا زه‌وی له‌رزی و هه‌ژا،
بناغه‌كانی ئاسمان ڕاژه‌نین،
له‌ تووڕه‌یی ئه‌و له‌رزین.
9
دووكه‌ڵ له‌ لووتی به‌رزبووه‌وه‌،
ئاگرێكی لووشده‌ر له‌ ده‌می هاته‌ ده‌ره‌وه‌،
وه‌ك ژیله‌مۆی پشكۆی داگیرساو بوو.
10
ئاسمانی لێككرده‌وه‌ و دابه‌زییه‌ خواره‌وه‌،
هه‌وری تاریك له‌ژێر پێی بوو.
11
سواری كه‌ڕوب[a] بوو و فڕی،
به‌سه‌ر باڵی بادا به‌رزبووه‌وه‌.
12
تاریكی كرده‌ ڕه‌شماڵ له‌ ده‌وری خۆی،
هه‌وری تاریكی پڕ بارانی ئاسمان.
13
له‌ ڕۆشنایی ئاماده‌بوونی ئه‌و
پشكۆ ئاگره‌كان داگیرسان.
14
یه‌زدان له‌ ئاسمانه‌وه‌ گرماندی،
ئه‌و خودایه‌ی هه‌ره‌به‌رزه‌ ده‌نگی خۆی له‌رزانده‌وه‌.
15
تیره‌كانی هاویشت و بڵاوه‌ی به‌ دوژمنه‌كانی كرد،
به‌ بروسكه‌ی گه‌وره‌ په‌رێشانی كردن.
16
بنی ده‌ریا ده‌ركه‌وت،
بناغه‌كانی زه‌وی ئاشكرا بوون،
له‌ سه‌رزه‌نشتی یه‌زدان،
له‌ گه‌رمی هه‌ناسه‌ی لووتی.
17
«له‌ به‌رزاییه‌وه‌ ده‌ستی درێژكرد و منی گرت،
له‌ناو ئاوه‌ قووڵه‌كانه‌وه‌ ده‌ریهێنام.
18
له‌ دوژمنه‌ به‌ تواناكه‌م ڕزگاری كردم،
له‌ ناحه‌زه‌كانم كه‌ زۆر له‌ من به‌هێزتر بوون.
19
له‌ ڕۆژی لێقه‌ومانم هاتنه‌ سه‌رم،
به‌ڵام یه‌زدان پشت و په‌نام بوو.
20
منی هێنایه‌ ده‌ره‌وه‌ بۆ جێگایه‌كی پان و به‌رین،
ڕزگاری كردم، چونكه‌ دڵخۆشه‌ پێم.
21
«یه‌زدان به‌گوێره‌ی ڕاستودروستیم پاداشتی داومه‌ته‌وه‌،
به‌گوێره‌ی ده‌ستپاكیم ڕێزداری كردووم.
22
چونكه‌ من ڕێچكه‌ی یه‌زدانم گرتووه‌ته‌به‌ر،
له‌ خودای خۆم یاخی نه‌بووم.
23
هه‌موو حوكمه‌كانی له‌به‌رچاومدان،
له‌ فه‌رزه‌كانی لام نه‌داوه‌.
24
له‌به‌رده‌می ئه‌و بێ كه‌موكوڕی بووم و
خۆم له‌ گوناه پاراستووه‌.
25
یه‌زدان به‌گوێره‌ی ڕاستودروستیم پاداشتی داومه‌ته‌وه‌،
به‌گوێره‌ی ده‌ستپاكیم له‌به‌رده‌می.
26
«له‌گه‌ڵ دڵسۆزه‌كان دڵسۆزی ده‌نوێنیت،
له‌گه‌ڵ ئه‌وانه‌ی بێ كه‌موكوڕین چاكی ده‌نوێنیت،
27
له‌گه‌ڵ پاكه‌كان پاكی ده‌نوێنیت،
به‌ڵام له‌گه‌ڵ خواره‌كان زیره‌كی ده‌نوێنیت.
28
تۆ خه‌ڵكی بێفیز ڕزگار ده‌كه‌یت،
به‌ڵام چاوه‌كانت له‌سه‌ر لووتبه‌رزانه‌، ده‌یانشكێنیت.
29
ئه‌ی یه‌زدان، تۆ چرای منیت،
یه‌زدان تاریكیم ڕووناك ده‌كاته‌وه‌.
30
به‌ یارمه‌تی تۆ ده‌توانم له‌شكرێك تێكبشكێنم،
له‌گه‌ڵ خودای خۆم ده‌توانم به‌سه‌ر شووراكاندا سه‌ربكه‌وم.
31
«ڕێبازی خودا ته‌واوه‌،
به‌ڵێنی یه‌زدان بێگه‌رده‌،
ئه‌و قه‌ڵغانه‌ بۆ هه‌موو ئه‌وانه‌ی په‌نای بۆ ده‌به‌ن.
32
چونكه‌ له‌ یه‌زدان به‌ولاوه‌ كێ خودایه‌؟
له‌ خودامان به‌ولاوه‌ كێ تاشه‌به‌رده‌كه‌یه‌؟
33
خودایه‌ ئه‌وه‌ی به‌ هێز پاڵپشتیم ده‌كات،
به‌ ته‌واوی ڕێگام له‌به‌رده‌مدا ده‌كاته‌وه‌.
34
پێیه‌كانم وه‌ك پێی ئاسك لێ ده‌كات،
له‌سه‌ر به‌رزایی ڕامده‌گرێت.
35
مه‌شق به‌ ده‌سته‌كانم ده‌كات بۆ جه‌نگ،
تاكو بتوانم به‌ بازووم كه‌وانی بڕۆنز بچه‌مێنمه‌وه‌.
36
تۆ قه‌ڵغانی ڕزگاریی خۆتت پێ به‌خشیوم،
هاوكاریت گه‌وره‌م ده‌كات.
37
جێی هه‌نگاوه‌كانم ته‌خت و فراوان ده‌كه‌یت،
تاكو پێم نه‌خلیسكێت.
38
«دوژمنه‌كانم ڕاونا و نابوودم كردن،
هه‌تا له‌ناوم نه‌بردن نه‌گه‌ڕامه‌وه‌.
39
له‌ناوم بردن و وردوخاشم كردن، ئیتر نه‌یانتوانی هه‌ستنه‌وه‌،
له‌ژێر پێم كه‌وتن.
40
كه‌مه‌ری منت توند كرد بۆ جه‌نگ،
وات له‌ به‌رهه‌ڵستكارانی من كرد له‌به‌ر پێم كڕنۆش ببه‌ن.
41
دوژمنه‌كانم پشتیان تێ كردم و ڕایانكرد،
من ناحه‌زه‌كانی خۆمم له‌ناوبرد.
42
هاواریان هێنا، به‌ڵام ڕزگاركه‌ر نه‌بوو،
هاواریان بۆ یه‌زدان برد، به‌ڵام به‌ ده‌نگیانه‌وه‌ نه‌چوو.
43
وه‌ك تۆزی زه‌وی ئه‌وانم هاڕی،
وه‌ك قوڕی سه‌ر ڕێگا پێم خسته‌ سه‌ریان و پێشێلم كردن.
44
«له‌ هێرشی گه‌لان ڕزگارت كردم،
تۆ منت به‌ سه‌رۆكی نه‌ته‌وه‌كان هێشته‌وه‌.
گه‌لێك كه‌ نه‌مده‌ناسین خزمه‌تم ده‌كه‌ن،
45
بێگانه‌كان ملكه‌چیم بۆ ده‌نوێنن،
هه‌ر كه‌ ده‌نگم ده‌بیستن گوێڕایه‌ڵم ده‌بن.
46
بێگانه‌كان وره‌ به‌ر ده‌ده‌ن و
به‌ له‌رزه‌وه‌ له‌ قه‌ڵاكانیان دێنه‌ ده‌ره‌وه‌.
47
«یه‌زدان زیندووه‌، ستایش بۆ تاشه‌به‌رده‌كه‌م!
خودای ڕزگاركه‌رم تاشه‌به‌رده‌كه‌یه‌، پایه‌به‌رزه‌!
48
خودایه‌ كه‌ تۆڵه‌م بۆ ده‌كاته‌وه‌،
گه‌لان ملكه‌چی من ده‌كات،
49
له‌ چنگی دوژمنه‌كانم ده‌رمده‌هێنێت.
پایه‌به‌رزی كردم به‌سه‌ر ناحه‌زانم،
له‌ ده‌ست كه‌سه‌ توندوتیژه‌كان ڕزگارت كردم.
50
له‌به‌ر ئه‌وه‌ ئه‌ی یه‌زدان، له‌نێو نه‌ته‌وه‌كاندا ستایشت ده‌كه‌م،
گۆرانی ستایش بۆ ناوت ده‌ڵێم.
51
«سه‌ركه‌وتنی گه‌وره‌ به‌ پاشای خۆی ده‌به‌خشێت،
خۆشه‌ویستی نه‌گۆڕ به‌سه‌ر ده‌ستنیشانكراوه‌كه‌یدا ده‌بارێنێت،
بۆ سه‌ر داود و نه‌وه‌كانی بۆ هه‌تاهه‌تایه‌.»
  1. a. 22‏:11 كه‌ڕوب: بوونه‌وه‌رێكی ئاسمانی باڵداره‌. بڕوانه‌ \+xt حزقیێل 10‏:5‏\+xt*‏.