عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حه‌زقیا په‌رستگاكه‌ پاك ده‌كاته‌وه‌ 
1
حه‌زقیا گه‌نجێكی بیست و پێنج ساڵان بوو كه‌ بوو به‌ پاشا، بیست و نۆ ساڵ له‌ ئۆرشه‌لیم پاشایه‌تی كرد، ناوی دایكی ئه‌بیای كچی زه‌كه‌ریا بوو.
2
به‌ هه‌مان شێوه‌ی داودی باپیره‌ گه‌وره‌ی ئه‌وه‌ی له‌به‌رچاوی یه‌زدان ڕاست بوو كردی.
3
له‌ یه‌كه‌م مانگی ساڵی یه‌كه‌می پاشایه‌تییه‌كه‌ی ده‌رگاكانی په‌رستگای یه‌زدانی چاككرده‌وه‌ و ده‌رگاكانی كرده‌وه‌.
4
كاهین و لێڤییه‌كانی برده‌ ژووره‌وه‌ و له‌ گۆڕه‌پانه‌كه‌ی ڕۆژهه‌ڵاتدا كۆی كردنه‌وه‌ و
5
پێی گوتن: «ئه‌ی لێڤییه‌كان گوێم لێ بگرن، ئێستا خۆتان ته‌رخان بكه‌ن و په‌رستگای یه‌زدانی په‌روه‌ردگاری باوباپیرانتان ته‌رخان بكه‌ن. گڵاوی له‌ پیرۆزگا ده‌ربكه‌ن،
6
چونكه‌ باوباپیرانمان ناپاكییان كرد و له‌به‌رچاوی یه‌زدانی په‌روه‌ردگارمان خراپه‌كارییان كرد و به‌جێیان هێشت. ڕوویان له‌ نشینگه‌ی یه‌زدان وه‌رگێڕا و پشتیان تێكرد،
7
هه‌روه‌ها ده‌رگاكانی هه‌یوانه‌كه‌یان داخست و چراكه‌یان كوژانده‌وه‌ و بخووریان نه‌سووتاند و هیچ قوربانی سووتاندنیان له‌ پیرۆزگادا بۆ خودای ئیسرائیل نه‌كرد.
8
له‌به‌ر ئه‌وه‌ تووڕه‌یی یه‌زدان به‌سه‌ر یه‌هودا و ئۆرشه‌لیمدا هاته‌ خواره‌وه‌، ئه‌ویش كردنی به‌ په‌ند و مایه‌ی سه‌رسوڕمان و تانه‌ و ته‌شه‌ر، هه‌روه‌ك به‌ چاوی خۆتان ده‌یبینن.
9
له‌به‌ر ئه‌مه‌ باوباپیرانمان به‌ شمشێر كوژران و كوڕ و كچ و ژنه‌كانمان دیلن.[a]
10
ئێستاش له‌ دڵمدایه‌ په‌یمانێك له‌گه‌ڵ یه‌زدانی په‌روه‌ردگاری ئیسرائیل ببه‌ستم، به‌ڵكو گڕی تووڕه‌ییه‌كه‌ی له‌ ئێمه‌ دابمركێته‌وه‌.
11
كوڕه‌كانم، ئێستا كه‌مته‌رخه‌می مه‌كه‌ن، چونكه‌ یه‌زدان ئێوه‌ی هه‌ڵبژارد هه‌تا له‌به‌رده‌می ڕابوه‌ستن و خزمه‌تی بكه‌ن و ببن به‌ خزمه‌تكار و بخوور بسووتێن بۆی.»
12
ئینجا ئه‌م لێڤییانه‌ هه‌ستان به‌ خزمه‌ته‌كه‌یان:
له‌ نه‌وه‌ی قه‌هاتییه‌كان،
مه‌حه‌تی كوڕی عه‌ماسه‌ی و یۆئێلی كوڕی عه‌زه‌ریا؛
له‌ نه‌وه‌ی مه‌راری،
قیشی كوڕی عه‌بدی و عه‌زه‌ریای كوڕی یه‌هه‌له‌لئێل؛
له‌ گێرشۆنییه‌كانیش،
یۆئاحی كوڕی زیما و عه‌ده‌نی كوڕی یۆئاح؛
13
له‌ نه‌وه‌ی ئه‌لیچافان،
شیمری و یه‌عیێل؛
له‌ نه‌وه‌ی ئاساف،
زه‌كه‌ریا و مه‌ته‌نیا؛
14
له‌ نه‌وه‌ی هێیمان،
یه‌حیێل و شیمعی؛
له‌ نه‌وه‌ی یه‌دوتون،
شه‌مه‌عیا و عوزیێل.
15
كاتێك برا لێڤییه‌كانیان كۆكردبووه‌وه‌ و خۆیان ته‌رخان كردبوو، به‌ فه‌رمانی پاشا چوونه‌ ژووره‌وه‌ بۆ ئه‌وه‌ی به‌گوێره‌ی فه‌رمایشتی یه‌زدان په‌رستگاكه‌ پاك بكه‌نه‌وه‌.
16
كاهینه‌كان چوونه‌ ناو پیرۆزگای یه‌زدانه‌وه‌ بۆ ئه‌وه‌ی پاكی بكه‌نه‌وه‌ و هه‌موو ئه‌و گڵاوییه‌ی له‌ناو په‌رستگای یه‌زداندا دۆزییانه‌وه‌، بردیانه‌ ده‌ره‌وه‌ بۆ حه‌وشه‌ی په‌رستگای یه‌زدان و لێڤییه‌كانیش هه‌ڵیانگرت بۆ ئه‌وه‌ی ده‌ریبكه‌نه‌ ده‌ره‌وه‌ بۆ دۆڵی قدرۆن.
17
له‌ ڕۆژی یه‌كه‌می مانگی یه‌كدا ده‌ستیان به‌ ته‌رخانكردنه‌كه‌ كرد و له‌ ڕۆژی هه‌شتی مانگدا گه‌یشتنه‌ هه‌یوانه‌كه‌ی په‌رستگای یه‌زدان. له‌پاش ئه‌وه‌ هه‌شت ڕۆژی دیكه‌ش په‌رستگای یه‌زدانیان ته‌رخان كرد و له‌ ڕۆژی شازده‌ی مانگی یه‌كدا كۆتاییان پێهێنا.
18
ئینجا چوونه‌ ژووره‌وه‌ بۆ لای حه‌زقیای پاشا و گوتیان: «هه‌موو په‌رستگای یه‌زدان و قوربانگاكه‌ی قوربانی سووتاندن و هه‌موو قاپوقاچاغه‌كانی و مێزی نانی ته‌رخانكراو و هه‌موو قاپوقاچاغه‌كانیمان پاككرده‌وه‌،
19
له‌گه‌ڵ هه‌موو ئه‌و قاپوقاچاغانه‌ی كه‌ ئاحازی پاشا فڕێیدا له‌ سه‌رده‌می پاشایه‌تییه‌كه‌یدا له‌ ناپاكییه‌كه‌ی، ئاماده‌ و ته‌رخانمان كردوون و ئێستا له‌به‌رده‌م قوربانگاكه‌ی یه‌زدانن.»
20
به‌یانی زوو حه‌زقیای پاشا هه‌ستا و كاربه‌ده‌سته‌كانی شاری كۆكرده‌وه‌ و چوو بۆ په‌رستگای یه‌زدان.
21
حه‌وت گا و حه‌وت به‌ران و حه‌وت به‌رخی نێر و حه‌وت گیسكی نێریان هێنا بۆ قوربانی گوناه له‌ پێناوی پاشایه‌تییه‌كه‌ و پیرۆزگا و یه‌هودا. فه‌رمانی به‌ كاهینه‌كان كه‌ له‌ نه‌وه‌ی هارون بوون كرد سه‌ریان بخه‌نه‌ سه‌ر قوربانگاكه‌ی یه‌زدان.
22
ئیتر گایه‌كانیان سه‌ربڕی و كاهینه‌كان خوێنه‌كه‌یان وه‌رگرت و به‌سه‌ر قوربانگاكه‌دا پرژاندیان؛ دواتر به‌رانه‌كانیان سه‌ربڕی و خوێنه‌كه‌یان پرژانده‌ سه‌ر قوربانگاكه‌؛ ئینجا به‌رخه‌كانیان سه‌ربڕی و خوێنه‌كه‌یان پرژانده‌ سه‌ر قوربانگاكه‌.
23
پاشان گیسكه‌كانی قوربانی گوناهیان برده‌ به‌رده‌م پاشا و كۆمه‌ڵ و ئه‌وانیش ده‌ستیان له‌سه‌ر دانان.
24
ئینجا كاهینه‌كان سه‌ریان بڕین و خوێنه‌كه‌یان پێشكه‌ش كرده‌ سه‌ر قوربانگاكه‌ وه‌ك قوربانی گوناه و كه‌فاره‌تیان بۆ هه‌موو ئیسرائیل كرد، چونكه‌ پاشا گوتی، قوربانی سووتاندن و قوربانییه‌كه‌ی گوناه بۆ هه‌موو ئیسرائیله‌.
25
ئینجا لێڤییه‌كانی له‌ په‌رستگای یه‌زدان ڕاگرت، به‌ سه‌نج و قیساره‌ و سازه‌وه‌، به‌گوێره‌ی فه‌رمانی داود، گاد كه‌ په‌یامی خودای به‌ پاشا ڕاده‌گه‌یاند و ناتانی پێغه‌مبه‌ریش، چونكه‌ فه‌رمانه‌كه‌ له‌لایه‌ن یه‌زدانه‌وه‌ بوو له‌ ڕێگه‌ی پێغه‌مبه‌ره‌كانییه‌وه‌.
26
ئیتر لێڤییه‌كان به‌ ئامێره‌ مۆسیقییه‌كانی داوده‌وه‌ و كاهینه‌كانیش به‌ كه‌ڕه‌ناوه‌ ڕاوه‌ستان.
27
حه‌زقیاش فه‌رمانی دا به‌ سه‌رخستنی قوربانی سووتاندنه‌كه‌ بۆ سه‌ر قوربانگاكه‌ و له‌ كاتی ده‌ستپێكردنی قوربانی سووتاندنه‌كه‌دا، ستایشی یه‌زدان ده‌ستی پێ كرد له‌گه‌ڵ لێدانی كه‌ڕه‌نا و ئامێره‌ مۆسیقییه‌كانی داودی پاشای ئیسرائیل.
28
هه‌موو كۆمه‌ڵه‌كه‌ش كڕنۆشیان ده‌برد و گۆرانیبێژه‌كان گۆرانییان ده‌گوت و كه‌ڕه‌نا لێده‌ره‌كانیش فوویان به‌ كه‌ڕه‌ناكانیاندا ده‌كرد، هه‌ر هه‌موو به‌رده‌وام بوون هه‌تا قوربانی سووتاندنه‌كه‌ كۆتایی پێهات.
29
له‌ كاتی ته‌واوبوونی قوربانی سووتاندنه‌كه‌، پاشا و هه‌موو ئه‌وانه‌ی له‌گه‌ڵیدا بوون چه‌مانه‌وه‌ و كڕنۆشیان برد.
30
حه‌زقیای پاشا و كاربه‌ده‌سته‌كان به‌ لێڤییه‌كانیان گوت كه‌ به‌ وشه‌كانی داود و ئاسافی پێشبینیكه‌ر ستایشی یه‌زدان بكه‌ن، ئه‌وانیش به‌ خۆشییه‌وه‌ ستایشیان كرد و چه‌مانه‌وه‌ و كڕنۆشیان برد.
31
ئینجا حه‌زقیا گوتی: «ئێستا خۆتان بۆ یه‌زدان ته‌رخان كردووه‌، وه‌رنه‌ پێش و قوربانی سه‌ربڕاو و قوربانی سوپاسگوزاری بۆ په‌رستگای یه‌زدان بهێنن.» پاشان كۆمه‌ڵه‌كه‌ قوربانی سه‌ربڕاو و قوربانی سوپاسگوزارییان هێنا و هه‌ركه‌سێكیش له‌ دڵه‌وه‌ ئاره‌زووی كرد قوربانی سووتاندنی هێنا.
32
ژماره‌ی ئه‌و قوربانی سووتاندنانه‌ی كه‌ كۆمه‌ڵه‌كه‌ هێنایان، حه‌فتا گا و سه‌د به‌ران و دوو سه‌د به‌رخی نێر بوو، هه‌موو ئه‌مانه‌ قوربانی سووتاندن بۆ یه‌زدان بوون.
33
ئاژه‌ڵه‌ ته‌رخانكراوه‌كانیش شه‌ش سه‌د گا و سێ هه‌زار مه‌ڕ و بزن بوون.
34
به‌ڵام كاهینه‌كان كه‌م بوون و نه‌یانتوانی هه‌موو قوربانی سووتاندنه‌كان كه‌وڵ بكه‌ن، له‌به‌ر ئه‌وه‌ برا لێڤییه‌كانیان یارمه‌تییان دان، هه‌تا كاره‌كه‌ ته‌واو بوو و هه‌تا كاهینی دیكه‌ش خۆیان ته‌رخان كرد، چونكه‌ لێڤییه‌كان بۆ خۆته‌رخانكردن له‌ كاهینه‌كان دڵسۆزتر بوون.
35
هه‌روه‌ها قوربانی سووتاندنه‌كان زۆر بوون به‌ پیوی قوربانییه‌كانی هاوبه‌شی و به‌ شه‌رابی پێشكه‌شكراوی قوربانی سووتاندنه‌كان.
به‌م شێوه‌یه‌ خزمه‌تكردنی په‌رستگای یه‌زدان جارێكی دیكه‌ به‌رده‌وامی پێدرایه‌وه‌.
36
حه‌زقیا و هه‌موو گه‌لیش دڵشاد بوون له‌به‌ر ئه‌وه‌ی خودا گه‌لی ئاماده‌ كرد، چونكه‌ كاره‌كه‌ كتوپڕ بوو.
  1. a. 29‏:9 مه‌به‌ست له‌ ڕاپێچكراوانی گه‌لی شانشینی باكوور و به‌شێك له‌ شانشینی باشووره‌ له‌لایه‌ن پاشای ئاشوره‌وه‌. بڕوانه‌ \+xt دووه‌م پاشایان 17‏:6‏\+xt*.