عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ناردنی تیمۆساوس بۆ سالۆنیكی 
1
بۆیه‌ كاتێك به‌رگه‌مان نه‌گرت، به‌ باشمان زانی به‌ ته‌نها له‌ ئه‌سینا بمێنینه‌وه‌،
2
تیمۆساوسمان نارد كه‌ برا و هاوكارمانه‌ بۆ خودا له‌ مزگێنی مه‌سیحدا، بۆ ئه‌وه‌ی باوه‌ڕتان به‌هێز بكات و هانتان بدات،
3
تاكو له‌م ناخۆشیانه‌دا كه‌س نه‌هه‌ژێت. خۆتان ده‌زانن كه‌ بۆ ئه‌مه‌ دیاری كراوین.
4
له‌ ڕاستیدا، كاتێك له‌لاتان بووین، به‌رده‌وام پێمان گوتوون كه‌ تووشی چه‌وسانه‌وه‌ ده‌بین، وه‌ك ده‌زانن ڕوویدا.
5
له‌به‌ر ئه‌وه‌ منیش كاتێك به‌رگه‌م نه‌گرت، تیمۆساوسم نارد بۆ ئه‌وه‌ی دۆخی باوه‌ڕتان بزانم، نه‌وه‌ك تاقیكه‌ره‌وه‌ تاقی كردبنه‌وه‌ و ڕه‌نجمان به‌فیڕۆ بچێت.
6
به‌ڵام ئێستا تیمۆساوس له‌لای ئێوه‌وه‌ هاته‌وه‌ بۆ لامان، مژده‌ی باوه‌ڕ و خۆشه‌ویستی ئێوه‌ی پێداین، هه‌روه‌ها چۆن هه‌رده‌م به‌ چاكه‌ یادمان ده‌كه‌ن و په‌رۆشی بینینمانن، هه‌روه‌ك چۆن ئێمه‌ش به‌ په‌رۆشین بۆ بینینی ئێوه‌.
7
له‌به‌ر ئه‌وه‌ خوشكان و برایان، له‌ كاتی ته‌نگانه‌ و چه‌وسانه‌وه‌ماندا، باوه‌ڕتان هانده‌رێكی گه‌وره‌ بوو بۆمان،
8
چونكه‌ ئێوه‌ به‌هۆی یه‌كبوونتان له‌گه‌ڵ مه‌سیحی باڵاده‌ستدا چه‌سپاون، ئێستا ئێمه‌ش به‌ڕاستی ده‌ژین.
9
نازانین به‌ چ شێوه‌یه‌ك سوپاسی خودا بكه‌ین له‌به‌ر ئه‌و هه‌موو دڵخۆشییه‌ی له‌به‌رده‌م خودامان به‌ ئێوه‌ هه‌مانه‌.
10
شه‌و و ڕۆژ گه‌رمتر ده‌پاڕێینه‌وه‌، تاكو بتانبینین و كه‌موكوڕی باوه‌ڕتان دابین بكه‌ین.
11
با‏ خودای باوكمان‏ و عیسای گه‌وره‌مان ڕێگای هاتنمان بۆ لاتان ئاسان بكات،
12
هه‌روه‌ها داواكارین عیسای خاوه‌ن شكۆ خۆشه‌ویستیتان بۆ یه‌كتری و هه‌موو خه‌ڵكی دیكه‌ زیاد و سه‌رڕێژ بكات، به‌ ئه‌ندازه‌ی خۆشه‌ویستی ئێمه‌ بۆتان.
13
با عیسای خاوه‌ن شكۆمان دڵتان به‌هێز بكات تاوه‌كو له‌ كاتی گه‌ڕانه‌وه‌ی له‌گه‌ڵ هه‌موو گه‌له‌ پیرۆزه‌كه‌ی، له‌به‌رده‌م خودای باوكمان بێ گله‌یی له‌ پیرۆزیدا بن.