عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
په‌یمانی داود و یۆناتان 
1
ئه‌وه‌ بوو كه‌ داود له‌گه‌ڵ شاولدا له‌ قسه‌كردن بووه‌وه‌، ڕۆحی یۆناتان و ڕۆحی داود په‌یمانێكیان به‌ست، یۆناتان داودی وه‌ك خۆی خۆشویست.
2
شاولیش له‌و ڕۆژه‌وه‌ داودی برده‌ لای خۆی و نه‌یهێشت بۆ ماڵی باوكی بگه‌ڕێته‌وه‌.
3
یۆناتان له‌گه‌ڵ داود په‌یمانی به‌ست، چونكه‌ وه‌ك خۆی خۆشی ویست.
4
ئینجا یۆناتان كه‌واكه‌ی كه‌ له‌به‌ری بوو دایكه‌ند و دای به‌ داود، له‌گه‌ڵ كراسه‌كه‌ی كه‌ پۆشیبووی، ته‌نانه‌ت شمشێر و كه‌وان و كه‌مه‌ربه‌نده‌كه‌شی.
5
داود له‌ هه‌ر ئه‌ركێك سه‌ركه‌وتوو ده‌بوو كه‌ شاول بۆی ده‌نارد، له‌به‌ر ئه‌وه‌ شاول داودی به‌سه‌ر جه‌نگاوه‌ره‌كان دانا، ئه‌مه‌ش له‌لای هه‌موو سه‌رباز و ئه‌فسه‌ره‌كانی شاول په‌سه‌ند بوو.
6
له‌ كاتی گه‌ڕانه‌وه‌ی جه‌نگاوه‌ران بۆ ماڵه‌وه‌، پاش ئه‌وه‌ی داود فه‌له‌ستییه‌كه‌ی كوشت، ئافره‌تان له‌ هه‌موو شارۆچكه‌كانی ئیسرائیله‌وه‌ به‌ گۆرانی و سه‌ماوه‌ بۆ پێشوازی شاولی پاشا هاتنه‌ ده‌ره‌وه‌، به‌ گۆرانی شادی و ده‌ف و عووده‌وه‌.
7
ژنه‌ سه‌ماكه‌ره‌كان به‌ده‌م گۆرانییه‌وه‌ ده‌یانگوت:
«شاول هه‌زارانی كوشت و
داودیش ده‌یان هه‌زار.»[a]
8
ئه‌م قسه‌یه‌ شاولی په‌ست كرد و زۆر تووڕه‌ بوو، گوتی: «ده‌یان هه‌زاره‌كانیان دایه‌ داود و به‌ منیش هه‌زاره‌كان، هه‌ر ئه‌وه‌ ماوه‌ پاشایه‌تییه‌كه‌ بۆ ئه‌و بێت.»
9
ئیتر له‌و ڕۆژه‌وه‌ شاول چاوی له‌سه‌ر داود بوو.
10
بۆ ڕۆژی دوای ئه‌وه‌ ڕۆحێكی به‌د له‌لایه‌ن خوداوه‌ به‌ تواناوه‌ هاته‌ سه‌ر شاول، له‌ناوه‌ڕاستی ماڵه‌كه‌دا وڕێنه‌ی ده‌كرد، داودیش وه‌ك هه‌موو ڕۆژێك قیساره‌كه‌ی لێده‌دا و شاولیش ڕمێكی به‌ده‌سته‌وه‌ بوو.
11
شاول ڕمه‌كه‌ی تێگرت و گوتی: «له‌ داود ده‌ده‌م و به‌ دیواره‌كه‌وه‌ هه‌ڵیده‌واسم.» به‌ڵام داود دوو جار خۆی له‌ ڕمه‌كه‌ لادا.
12
له‌به‌ر ئه‌وه‌ی یه‌زدان له‌گه‌ڵ داود بوو و وازی له‌ شاول هێنابوو، شاول لێی ده‌ترسا.
13
ئیتر شاول داودی له‌ خۆی دوورخسته‌وه‌ و كردی به‌ سه‌ركرده‌ی هه‌زار، ڕابه‌رایه‌تی سوپاكه‌ی كرد.
14
داود له‌ هه‌موو ئه‌ركه‌كانی سه‌ركه‌وتوو بوو، له‌به‌ر ئه‌وه‌ی یه‌زدانی له‌گه‌ڵدا بوو.
15
جا كه‌ شاول بینی زۆر سه‌ركه‌وتووه‌، لێی ترسا.
16
به‌ڵام هه‌موو ئیسرائیل و یه‌هودا داودیان خۆشویست، چونكه‌ له‌ شه‌ڕ پێشڕه‌وی ده‌كردن.
17
ئه‌وه‌ بوو شاول به‌ داودی گوت: «من وا مێره‌ڤی كچه‌ گه‌وره‌كه‌ی خۆمت ده‌ده‌مێ ببێته‌ ژنت، ته‌نها ئه‌وه‌نده‌ی كه‌ ئازا بیت بۆم و له‌ جه‌نگه‌كانی یه‌زدان شه‌ڕ بكه‌یت.» جا شاول له‌به‌ر خۆیه‌وه‌ گوتی: «با ده‌ستی منی به‌سه‌ره‌وه‌ نه‌بێت، به‌ڵكو ده‌ستی فه‌له‌ستییه‌كانی به‌سه‌ره‌وه‌ بێت.»
18
داودیش به‌ شاولی گوت: «من كێم و ژیانی من و خێڵه‌كه‌ی باوكم له‌ ئیسرائیلدا چییه‌ هه‌تا ببمه‌ زاوای پاشا؟»
19
ئه‌وه‌ بوو له‌و كاته‌ی كه‌ ده‌بووایه‌ مێره‌ڤی كچی شاول بدرێته‌ داود، كه‌چی درایه‌ عه‌درئێلی مه‌حۆلاتی و بووه‌ ژنی ئه‌و.
20
به‌ڵام میخه‌لی كچی شاول داودی خۆشویست، جا به‌ شاولیان ڕاگه‌یاند، ئه‌ویش ئه‌م كاره‌ی به‌لاوه‌ باش بوو.
21
شاول له‌ دڵی خۆیدا گوتی: «پێی ده‌ده‌م، جا بۆی ده‌بێت به‌ ته‌ڵه‌، ده‌ستی فه‌له‌ستییه‌كانی به‌سه‌ره‌وه‌ ده‌بێت.» ئینجا شاول به‌ داودی گوت: «ده‌رفه‌تێكی دیكه‌ت ده‌ده‌مێ، ئه‌مڕۆ ده‌بیت به‌ زاوای من؟»
22
شاول فه‌رمانی به‌ خزمه‌تكاره‌كانی كرد: «به‌دزییه‌وه‌ قسه‌ له‌گه‌ڵ داود بكه‌ن و پێی بڵێن: ”ئه‌وه‌تا پاشا پێت دڵخۆشه‌ و هه‌موو خزمه‌تكاره‌كانیشی تۆیان خۆشده‌وێ، جا ئێستا ببه‌ به‌ زاوای پاشا.“»
23
خزمه‌تكاره‌كانی شاول ئه‌و قسانه‌یان به‌ داود گوت و داودیش پێی گوتن: «ئایا زاوایه‌تیكردنی پاشا به‌ كه‌م ده‌زانن، له‌ كاتێكدا من پیاوێكی هه‌ژار و گه‌دام؟»
24
ئینجا خزمه‌تكاره‌كانی شاول قسه‌كانی داودیان گه‌یاند.
25
شاولیش گوتی: «ئاوا به‌ داود بڵێن: ”خۆشی پاشا له‌ شیربایی نییه‌، به‌ڵكو به‌ سه‌د پێستی سه‌ری ئه‌ندامی نێرینه‌ی فه‌له‌ستییه‌كانه‌، بۆ تۆڵه‌سه‌ندنه‌وه‌ له‌ دوژمنه‌كانی پاشا.“» شاول بیری له‌وه‌ ده‌كرده‌وه‌ كه‌ داود به‌ ده‌ستی فه‌له‌ستییه‌كان بكوژرێت.
26
خزمه‌تكاره‌كانی ئه‌و قسانه‌یان به‌ داود ڕاگه‌یاند، داودیش ئه‌مه‌ی پێ باش بوو كه‌ ببێت به‌ زاوای پاشا. بۆیه‌ پێش ئه‌وه‌ی ماوه‌كه‌ ته‌واو بێت،
27
هه‌ستا و له‌گه‌ڵ پیاوه‌كانی ڕۆیشتن، دوو سه‌د پیاویان له‌ فه‌له‌ستییه‌كان كوشت. داود پێستی سه‌ری ئه‌ندامه‌ نێرینه‌كانی ئه‌وانی هێنا و ژماره‌ی ته‌واوی دایه‌ پاشا، هه‌تا ببێته‌ زاوای. شاولیش میخه‌لی كچی دایێ هه‌تا ببێته‌ ژنی.
28
جا شاول بینی و زانی یه‌زدان له‌گه‌ڵ داوده‌ و میخه‌لی كچیشی خۆشی ده‌وێت.
29
شاول زیاتر له‌ داود ترسا، ئیتر هه‌تا كۆتایی ژیانی دوژمنی داود بوو.
30
فه‌رمانده‌ فه‌له‌ستییه‌كان به‌رده‌وام بۆ جه‌نگ ده‌چوون، هه‌ر كاتێك ده‌چوون داود له‌ هه‌موو ئه‌فسه‌ره‌كانی شاول سه‌ركه‌وتووتر ده‌بوو، جا ناوبانگی زۆر بڵاو بووه‌وه‌.
  1. a. 18‏:7 واته‌ ئه‌گه‌ر شاول به‌ هه‌زارانی كوشتبێت، ئه‌وا داود ده‌یان هه‌زار ده‌كوژێت.