عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شاول ده‌یه‌وێت داود بكوژێت 
1
ئیتر شاول به‌ یۆناتانی كوڕی و هه‌موو خزمه‌تكاره‌كانی گوت كه‌ داود بكوژن. به‌ڵام یۆناتانی كوڕی شاول له‌ دڵه‌وه‌ داودی خۆشده‌ویست.
2
جا یۆناتان به‌ داودی ڕاگه‌یاند و گوتی: «شاولی باوكم ده‌یه‌وێ بتكوژێت. به‌یانی ئاگات له‌ خۆت بێت و له‌ حه‌شارگه‌یه‌كدا بمێنه‌وه‌، خۆت بشاره‌وه‌.
3
منیش ده‌چم و له‌ته‌نیشت باوكمه‌وه‌ له‌و كێڵگه‌یه‌دا ڕاده‌وه‌ستم كه‌ خۆتت تێیدا شاردووه‌ته‌وه‌، له‌باره‌ی تۆوه‌ قسه‌ له‌گه‌ڵ باوكم ده‌كه‌م و ته‌ماشا ده‌كه‌م بزانم چی ده‌بێت و پێتی ڕاده‌گه‌یه‌نم.»
4
ئینجا یۆناتان به‌ چاكه‌ ده‌رباره‌ی داود بۆ شاولی باوكی قسه‌ی كرد و گوتی: «با پاشا خراپه‌یه‌ك ده‌رهه‌ق به‌ داودی خزمه‌تكاری خۆی نه‌كات، چونكه‌ ئه‌و خراپه‌ی ده‌رهه‌ق به‌ تۆ نه‌كردووه‌ و كاره‌كانیشی ده‌رهه‌ق به‌ تۆ زۆر چاكن.
5
ئه‌و ژیانی خۆی خسته‌ سه‌ر ده‌ستی و فه‌له‌ستییه‌كه‌ی كوشت، یه‌زدانیش ڕزگارییه‌كی گه‌وره‌ی بۆ هه‌موو ئیسرائیل هێنایه‌ ئاراوه‌، تۆ خۆت بینیت و دڵخۆش بوویت، ئیتر بۆچی خراپه‌ ده‌رهه‌ق به‌ خوێنی بێتاوانێك ده‌كه‌یت، به‌بێ هۆ داود ده‌كوژیت؟»
6
شاولیش گوێی له‌ ده‌نگی یۆناتان گرت، شاول سوێندی خوارد: «به‌ یه‌زدانی زیندوو، داود ناكوژرێت.»
7
ئینجا یۆناتان داودی بانگكرد و هه‌موو ئه‌و قسانه‌ی پێ ڕاگه‌یاند، یۆناتان داودی هێنایه‌وه‌ لای شاول و ئیتر وه‌ك جاران له‌به‌رده‌میدا بوو.
8
جارێكی دیكه‌ جه‌نگ هه‌ڵگیرسا و داود چوو له‌ دژی فه‌له‌ستییه‌كان بجه‌نگێت، گورزێكی گه‌وره‌ی لێ وه‌شاندن و له‌به‌رده‌می هه‌ڵاتن.
9
به‌ڵام كاتێك شاول له‌ ماڵه‌وه‌ دانیشتبوو و ڕمێكی به‌ده‌سته‌وه‌ بوو، دیسان ڕۆحێكی به‌د له‌لایه‌ن یه‌زدانه‌وه‌ هاته‌وه‌ سه‌ری. كاتێك داود قیساره‌كه‌ی ده‌ژه‌ند،
10
شاول ویستی به‌ ڕمه‌كه‌ی له‌ داود بدات و به‌ دیواره‌كه‌وه‌ هه‌ڵیبواسێت، به‌ڵام ئه‌و له‌به‌رده‌م شاولدا هه‌ڵات، جا له‌ دیواره‌كه‌ی دا و داودیش هه‌ڵات و ئه‌و شه‌وه‌ ده‌رباز بوو.
11
پاشان شاول چه‌ند نێردراوێكی بۆ ماڵی داود نارد هه‌تا چاودێری بكه‌ن و له‌ به‌یانیدا بیكوژن. به‌ڵام میخه‌لی ژنی پێی ڕاگه‌یاند و گوتی: «ئه‌گه‌ر ئه‌مشه‌و ده‌رباز نه‌بیت، بۆ سبه‌ینێ كوژراویت.»
12
ئیتر میخه‌ل داودی له‌ په‌نچه‌ره‌كه‌وه‌ شۆڕكرده‌وه‌، ئه‌ویش ڕۆیشت، ڕایكرد و ده‌رباز بوو.
13
پاشان میخه‌ل په‌یكه‌رێكی برد و خستییه‌ ناو جێگاكه‌یه‌وه‌، هه‌ندێك مووی بزنیشی له‌ جێی سه‌ری دانا و به‌ جلوبه‌رگ دایپۆشی.
14
شاولیش چه‌ند نێردراوێكی نارد هه‌تا داود بگرن، میخه‌لیش گوتی: «نه‌خۆشه‌.»
15
ئینجا شاول چه‌ند نێردراوێكی بۆ بینینی داود نارد و گوتی: «به‌ جێگاكه‌یه‌وه‌ بۆ منی بهێنن هه‌تا بیكوژم.»
16
به‌ڵام كاتێك نێردراوه‌كان هاتنه‌ ژووره‌وه‌، ته‌ماشایان كرد ئه‌وه‌تا په‌یكه‌رێك له‌ناو جێگاكه‌یه‌ و هه‌ندێك مووی بزنیش له‌ جێی سه‌رییه‌تی.
17
جا شاول به‌ میخه‌لی گوت: «بۆچی ئاوا هه‌ڵتخه‌ڵه‌تاندم، دوژمنه‌كه‌ی منت به‌ڕه‌ڵا كرد و ده‌رباز بوو؟»
میخه‌لیش به‌ شاولی گوت: «ئه‌و پێی گوتم: ”ئه‌گه‌ر به‌ڕه‌ڵام نه‌كه‌ی ده‌تكوژم.“»
18
كاتێك داود ڕایكرد و ده‌رباز بوو، چوو بۆ لای ساموئێل له‌ ڕامه‌، هه‌موو ئه‌وه‌ی شاول پێی كردبوو پێی ڕاگه‌یاند. ئینجا داود له‌گه‌ڵ ساموئێل چوون و له‌ نایۆت مانه‌وه‌.
19
جا به‌ شاول ڕاگه‌یه‌نرا و گوترا: «داود وا له‌ نایۆته‌ له‌ ڕامه‌.»
20
شاولیش چه‌ند نێردراوێكی نارد بۆ گرتنی داود، كاتێك كۆمه‌ڵی پێغه‌مبه‌رانیان بینی حاڵیان گرتووه‌ و ساموئێلیش وه‌ك سه‌رۆك به‌سه‌ریانه‌وه‌ ڕاوه‌ستاوه‌، ڕۆحی خودا به‌سه‌ر نێردراوه‌كانی شاولیشدا هات و ئه‌وانیش حاڵیان گرت.
21
ئه‌مه‌یان به‌ شاول ڕاگه‌یاند، ئه‌ویش چه‌ند نێردراوێكی دیكه‌ی نارد، هه‌روه‌ها ئه‌وانیش حاڵیان گرت. ئینجا بۆ جاری سێیه‌م چه‌ند نێردراوێكی نارد و ئه‌وانیش حاڵیان گرت.
22
ئینجا خۆی چوو بۆ ڕامه‌، گه‌یشته‌ ئه‌مباراوه‌ گه‌وره‌كه‌، ئه‌وه‌ی له‌ سه‌خویه‌، پرسیاری كرد: «ساموئێل و داود له‌كوێن؟»
پێی گوترا: «له‌ نایۆتن، له‌ شارۆچكه‌ی ڕامه‌.»
23
جا شاول چوو بۆ ئه‌وێ، بۆ نایۆت له‌ ڕامه‌. ته‌نانه‌ت ئه‌ویش ڕۆحی خودا هاته‌ سه‌ری و به‌ ڕۆیشتنه‌وه‌ حاڵی گرت هه‌تا گه‌یشته‌ نایۆت.
24
جله‌كانی له‌به‌ر خۆی داكه‌ند و ئه‌ویش له‌به‌رده‌م ساموئێل حاڵی گرت، به‌ درێژایی ئه‌و شه‌و و ڕۆژه‌ به‌ ڕووتی خۆی دا به‌ زه‌ویدا. له‌به‌ر ئه‌وه‌یه‌ ده‌ڵێن، «ئایا شاولیش له‌نێو پێغه‌مبه‌ره‌كانه‌؟»