عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئاماده‌كاری بۆ بنیادنانی په‌رستگا 
1
كاتێك حیرامی پاشای هه‌رێمی سور بیستی كه‌ سلێمانیان ده‌ستنیشان كردووه‌ بۆ پاشایه‌تی له‌ شوێنی باوكی، خزمه‌تكاره‌كانی خۆی نارده‌ لای، چونكه‌ حیرام به‌ درێژایی ژیانی هاوڕێ و دۆستی داود بوو.
2
سلێمانیش ناردی بۆ لای حیرام و گوتی:
3
«تۆ ده‌رباره‌ی داودی باوكم ده‌زانیت، كه‌ نه‌یتوانی په‌رستگایه‌ك بۆ ناوی یه‌زدانی خوداكه‌ی بنیاد بنێت، به‌هۆی ئه‌و جه‌نگانه‌ی ده‌وریان دا، هه‌تا ئه‌و كاته‌ی یه‌زدان دوژمنه‌كانی خسته‌ ژێر پێیه‌وه‌.
4
به‌ڵام ئێستا یه‌زدانی په‌روه‌ردگارم له‌ هه‌موو لایه‌كه‌وه‌ منی حه‌ساندووه‌ته‌وه‌، نه‌ ناحه‌ز هه‌یه‌ و نه‌ ڕووداوی خراپ.
5
له‌به‌ر ئه‌وه‌ گوتم په‌رستگایه‌ك بۆ ناوی یه‌زدانی په‌روه‌ردگارم بنیاد بنێم، هه‌روه‌ك چۆن یه‌زدان به‌ داودی باوكمی فه‌رموو: ”كوڕه‌كه‌ت، ئه‌وه‌ی له‌ شوێنی تۆ له‌سه‌ر ته‌خته‌كه‌ت دایده‌نێم ئه‌و ماڵه‌كه‌ بۆ ناوی من بنیاد ده‌نێت.“
6
«ئێستاش فه‌رمان بده‌ با دار ئورزم له‌ لوبنانه‌وه‌ بۆ ببڕنه‌وه‌، خزمه‌تكاره‌كانم له‌گه‌ڵ خزمه‌تكاره‌كانت ده‌بن و كرێی خزمه‌تكاره‌كانت پێده‌ده‌م، به‌گوێره‌ی هه‌موو ئه‌وه‌ی تۆ ده‌یڵێیت، چونكه‌ تۆ ده‌زانیت كه‌س نییه‌ له‌ناومان بزانێت وه‌ك سه‌یدائییه‌كان دار ببڕێته‌وه‌.»
7
ئه‌وه‌ بوو كه‌ حیرام گوێی له‌ قسه‌كانی سلێمان بوو، زۆر دڵخۆش بوو، گوتی: «ئه‌مڕۆ ستایش بۆ یه‌زدان، ئه‌وه‌ی كوڕێكی دانای دایه‌ داود، هه‌تا فه‌رمانڕه‌وایه‌تی ئه‌م گه‌له‌ مه‌زنه‌ بكات.»
8
ئیتر حیرام ناردی بۆ لای سلێمان و گوتی:
«ئه‌وه‌ی بۆ منت نارد گوێم لێی بوو، هه‌رچی ئاره‌زوو بكه‌یت ئه‌وه‌ ده‌كه‌م بۆ داری ئورز و دار سنه‌وبه‌ره‌كان.
9
خزمه‌تكاره‌كانم له‌ لوبنانه‌وه‌ بۆ ده‌ریا ده‌یانهێنن و منیش له‌سه‌ر ده‌ریا ده‌یانكه‌مه‌ كه‌ڵه‌ك، هه‌تا ئه‌و شوێنه‌ی خۆت دیاری ده‌كه‌یت له‌وێ هه‌ڵیانده‌وه‌شێنمه‌وه‌ و تۆش باریان ده‌كه‌یت. به‌ دابینكردنی نانیش بۆ ماڵه‌كه‌م خواستی من به‌جێده‌هێنیت.»
10
ئه‌وه‌ بوو حیرام به‌پێی ئاره‌زووی سلێمان داری ئورز و سنه‌وبه‌ری دایێ.
11
سلێمانیش هه‌ر ساڵێك بیست هه‌زار كۆڕ[a] گه‌نم و بیست هه‌زار به‌ت[b] زه‌یتی زه‌یتوونی وه‌ك ئازووقه‌ ده‌دایه‌ ماڵی حیرام.
12
یه‌زدانیش هه‌روه‌ك چۆن به‌ڵێنی پێدابوو دانایی دایه‌ سلێمان، ئاشتی له‌نێوان سلێمان و حیرام هه‌بوو، هه‌ردووكیان په‌یمانیان به‌ست.
13
سلێمانی پاشا له‌ هه‌موو ئیسرائیل بێگاری به‌ سی هه‌زار پیاو كرد.
14
هه‌ر مانگه‌ و به‌ نۆبه‌ ده‌ هه‌زاری لێیان ده‌نارده‌ لوبنان، مانگێك له‌ لوبنان ده‌بوون و دوو مانگیش له‌ ماڵه‌وه‌، ئه‌دۆنیرامیش سه‌رپه‌رشتیاری كاری بێگار بوو.
15
سلێمان حه‌فتا هه‌زار بارهه‌ڵگر و هه‌شتا هه‌زار نه‌قاڕی له‌ چیا هه‌بوو.
16
بێجگه‌ له‌مه‌ سلێمان سێ هه‌زار و سێ سه‌د سه‌ركاریشی هه‌بوو سه‌رپه‌رشتی كاره‌كه‌ و كرێكاره‌كانیان ده‌كرد.
17
هه‌روه‌ها پاشا فه‌رمانی دا كه‌ به‌ردی گه‌وره‌ هه‌ڵبكه‌نن، به‌ردی نایاب بۆ دامه‌زراندنی په‌رستگاكه‌ به‌ به‌ردی تاشراو.
18
وه‌ستاكانی سلێمان و حیرام و كرێكارانی شاری جوبه‌یل[c] دار و به‌رده‌كانیان ئاماده‌ كرد بۆ بنیادنانی په‌رستگاكه‌.
  1. a. 5‏:11 بیست هه‌زار كۆڕ: نزیكه‌ی 250‏3 ته‌ن.
  2. b. 5‏:11 بیست هه‌زار به‌ت: نزیكه‌ی 440 هه‌زار لیتر.
  3. c. 5‏:18 شاری جوبه‌یل شارێكی كۆنه‌ كه‌ مێژووه‌كه‌ی ده‌گه‌ڕێته‌وه‌ بۆ 7000 ساڵ له‌مه‌وپێش، ئه‌مرۆ به‌ دووری 38 كیلۆمه‌تر ده‌كه‌وێته‌ باكووری به‌یروت.