عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بنیادنانی په‌رستگا 
1
له‌ چوار سه‌د و هه‌شتایه‌مین ساڵی هاتنه‌ ده‌ره‌وه‌ی نه‌وه‌ی ئیسرائیل له‌ خاكی میسر، كه‌ ده‌كاته‌ ساڵی چواره‌می پاشایه‌تی سلێمان له‌ ئیسرائیل، له‌ مانگی زیڤ كه‌ مانگی دووه‌، سلێمان ده‌ستی به‌ بنیادنانی په‌رستگاكه‌ی یه‌زدان كرد.
2
ئه‌و پیرۆزگایه‌ی سلێمانی پاشا بۆ یه‌زدان بنیادی نا، درێژییه‌كه‌ی شه‌ست باڵ[a] و پانییه‌كه‌ی بیست باڵ[b] و به‌رزاییه‌كه‌شی سی باڵ[c] بوو.
3
هه‌یوانی به‌رده‌م هۆڵی سه‌ره‌كی پیرۆزگاكه‌ش درێژییه‌كه‌ی به‌رامبه‌ر بوو به‌ پانی پیرۆزگاكه‌، واته‌ بیست باڵ بوو، پانییه‌كه‌شی له‌به‌رده‌م پیرۆزگاكه‌وه‌ ده‌ باڵ بوو[d] .
4
هه‌روه‌ها كڵاوڕۆژنه‌ی[e] كه‌تیبه‌داری بۆ پیرۆزگاكه‌ دروستكرد.
5
ئینجا له‌سه‌ر دیواری سه‌ر به‌ هۆڵه‌ سه‌ره‌كییه‌كه‌ و دیواری شوێنه‌كه‌ی هه‌ره‌پیرۆز چه‌ند نهۆمێكی بنیاد نا، واته‌ له‌ ده‌وری دیواره‌كانی پیرۆزگاكه‌، ژووری لاته‌نیشت له‌ ده‌وریان هه‌بوو.
6
نهۆمی ژێره‌وه‌ پانییه‌كه‌ی پێنج باڵ[f] و نهۆمی ناوه‌ڕاست پانییه‌كه‌ی شه‌ش باڵ[g] و سێیه‌میشیان پانییه‌كه‌ی حه‌وت باڵ[h] بوو، به‌م شێوه‌یه‌ له‌ ده‌ره‌وه‌ لێواری له‌ ده‌وری پیرۆزگاكه‌ كرد هه‌تا كاریته‌كان نه‌خاته‌ ناو دیواره‌كان.
7
له‌ كاتی بنیادنانی په‌رستگاكه‌دا به‌ردی نایابی ئاماده‌كراو به‌كارهێنرا، به‌ڵام ده‌نگی چه‌كوش و ته‌ور و هیچ ئامێرێكی ئاسن له‌ په‌رستگاكه‌ نه‌بیسترا.
8
داڵانی نهۆمی ژێره‌وه‌ له‌لای باشووری په‌رستگاكه‌ بوو، به‌ په‌یژه‌ی پێچاوپێچ سه‌رده‌كه‌وتن بۆ ناوه‌ڕاست و له‌ناوه‌ڕاستیشه‌وه‌ بۆ نهۆمی سێیه‌م.
9
په‌رستگاكه‌ی بنیاد نا و ته‌واوی كرد، به‌ ته‌خته‌داری پان و كاریته‌ی ئورز سه‌ری په‌رستگاكه‌ی گرت.
10
هه‌موو ئه‌و ژووره‌ لاته‌نیشتانه‌ش كه‌ له‌ ده‌وری پیرۆزگاكه‌ بنیادی نان، به‌رزاییه‌كه‌یان پێنج باڵ بوو، به‌ داری ئورز به‌ پیرۆزگاكه‌ی گه‌یاندن.
11
فه‌رمایشتی یه‌زدان بۆ سلێمان هات و فه‌رمووی:
12
«ئه‌م په‌رستگایه‌ی كه‌ تۆ دروستی ده‌كه‌یت، ئه‌گه‌ر به‌ ڕێگای فه‌رزه‌كانمدا بڕۆیت و حوكمه‌كانم په‌یڕه‌و بكه‌یت، هه‌روه‌ها هه‌موو فه‌رمانه‌كانم به‌جێبهێنیت بۆ په‌یڕه‌وكردنی، ئه‌وا ئه‌و به‌ڵێنه‌ی به‌ داودی باوكی تۆم دا له‌ ڕێگه‌ی تۆوه‌ ده‌یهێنمه‌ دی.
13
هه‌روه‌ها له‌نێو نه‌وه‌ی ئیسرائیلدا نیشته‌جێ ده‌بم و ئیسرائیلی گه‌لم به‌جێناهێڵم.»
14
سلێمان په‌رستگاكه‌ی بنیاد نا و ته‌واوی كرد.
15
دیواری ناوه‌وه‌ی پیرۆزگاكه‌ هه‌تا بنمێچه‌كه‌ی به‌ ته‌خته‌ی داری ئورز ڕووپۆش كرد، هه‌روه‌ها زه‌مینه‌كه‌شی به‌ ته‌خته‌ی دار سنه‌وبه‌ر.
16
بیست باڵیشی له‌ به‌شی دواوه‌ی پیرۆزگاكه‌ به‌ دیوارێك له‌ ته‌خته‌ی دار ئورز جیا كرده‌وه‌، هه‌تا ببێته‌ پیرۆزگای ناوه‌وه‌ی په‌رستگاكه‌، كه‌ شوێنی هه‌ره‌پیرۆزه‌.
17
هۆڵه‌ سه‌ره‌كییه‌كه‌ له‌به‌رده‌م ئه‌م ژووره‌وه‌ چل باڵ[i] بوو.
18
دار ئورزی په‌رستگاكه‌ به‌ دیوی ناوه‌وه‌ی په‌رستگاكه‌ له‌سه‌ر شێوه‌ی سه‌وزه‌وات[j] و گوڵی كراوه‌ نه‌خشێنرابوو، هه‌مووی داری ئورز بوو، هیچ به‌ردێك نه‌ده‌بینرا.
19
له‌ناوه‌ڕاستی په‌رستگاكه‌، شوێنی هه‌ره‌پیرۆزی ئاماده‌ كرد هه‌تا سندوقی په‌یمانی یه‌زدان له‌وێ دابنێت.
20
شوێنی هه‌ره‌پیرۆز، كه‌ بیست باڵ درێژ و بیست باڵ پان و بیست باڵیش به‌رز بوو، به‌ زێڕی بێگه‌رد ڕووپۆشی كرد، قوربانگاكه‌شی به‌ ئورز ڕووپۆش كرد.
21
سلێمان دیوی ناوه‌وه‌ی پیرۆزگاكه‌ی به‌ زێڕی بێگه‌رد ڕووپۆش كرد، زنجیری زێڕیشی له‌به‌رده‌م شوێنی هه‌ره‌پیرۆز ڕاكێشا، به‌ زێڕ ڕووپۆشی كرد.
22
ته‌واوی قوربانگای شوێنی هه‌ره‌پیرۆز و ته‌واوی دیوی ناوه‌وه‌ی پیرۆزگاكه‌شی به‌ زێڕ ڕووپۆش كرد.
23
له‌ناو شوێنی هه‌ره‌پیرۆزیش دوو كه‌ڕوبی[k] له‌ داری زه‌یتوون دروستكرد، به‌رزی هه‌ریه‌كه‌یان ده‌ باڵ بوو.
24
هه‌ر كه‌ڕوبێك دوو باڵی هه‌بوو، درێژی هه‌ر باڵێك پێنج باڵ بوو،[l] له‌ سه‌ری باڵێكییه‌وه‌ هه‌تا سه‌ری باڵه‌كه‌ی دیكه‌ ده‌ باڵ بوو.
25
هه‌ردوو كه‌ڕوبه‌كه‌ یه‌ك ئه‌ندازه‌ و یه‌ك شێوه‌یان هه‌بوو.
26
به‌رزی كه‌ڕوبی یه‌كه‌م ده‌ باڵ بوو، كه‌ڕوبی دووه‌میش به‌ هه‌مان شێوه‌.
27
هه‌ردوو كه‌ڕوبه‌كه‌ی له‌ناوه‌ڕاستی شوێنی هه‌ره‌پیرۆز دانا و باڵی كه‌ڕوبه‌كانی كرده‌وه‌. باڵی یه‌كێك له‌ كه‌ڕوبه‌كان به‌ر دیوارێك كه‌وت و باڵی كه‌ڕوبی دووه‌میان به‌ر دیواره‌كه‌ی به‌رامبه‌ری كه‌وت، له‌ناوه‌ڕاستی ژووره‌كه‌ش به‌ر یه‌كتری ده‌كه‌وتن، باڵ به‌ باڵ.
28
هه‌ردوو كه‌ڕوبه‌كه‌شی به‌ زێڕ ڕووپۆش كرد.
29
له‌سه‌ر هه‌موو دیواره‌كانی پیرۆزگاكه‌، له‌ناو هه‌ردوو ژووره‌كه‌ی، ژووری ناوه‌وه‌ و ژووری ده‌ره‌وه‌ش، وێنه‌ی كه‌ڕوب و دار خورما و گوڵی كراوه‌ی نه‌خشاند.
30
زه‌مینی ژووری ناوه‌وه‌ و ژووری ده‌ره‌وه‌ی پیرۆزگاكه‌شی به‌ زێڕ ڕووپۆش كرد.
31
بۆ داڵانه‌كه‌ی شوێنی هه‌ره‌پیرۆزیش، ده‌رگایه‌كی دوو ده‌ری له‌ داری زه‌یتوون دروستكرد، به‌ شێوه‌ی پێنج چوارچێوه‌ له‌ناو یه‌كدا.
32
له‌سه‌ر هه‌ردوو لای ده‌رگاكه‌ش كه‌ له‌ داری زه‌یتوون بوون، كه‌ڕوب و دار خورما و گوڵی كراوه‌ی له‌سه‌ر نه‌خشاند و به‌ زێڕ ڕووپۆشی كردن.
33
به‌ هه‌مان شێوه‌ له‌ داڵانی هۆڵه‌ سه‌ره‌كییه‌كه‌ش چوار چوارچێوه‌ی له‌ناو یه‌كدا له‌ داری زه‌یتوون دروستكرد.
34
هه‌روه‌ها دوو ده‌رگای به‌ داری سنه‌وبه‌ر دروستكرد، هه‌ردووكیان دوو ده‌ری بوون كه‌ به‌ نه‌رماده‌[m] به‌سترا بوون و ده‌سووڕانه‌وه‌.
35
كه‌ڕوب و دار خورما و گوڵی كراوه‌ی له‌سه‌ر نه‌خشاندن و به‌ زێڕی كوتراو له‌سه‌ر نه‌خشه‌كه‌ ڕووپۆشی كردن.
36
هه‌روه‌ها حه‌وشه‌كه‌ی ناوه‌وه‌ی بنیاد نا به‌ سێ ڕیز به‌ردی تاشراو و ڕیزێك كاریته‌ی ئورز.
37
له‌ ساڵی چواره‌م په‌رستگای یه‌زدانی دامه‌زراند، له‌ مانگی زیڤ.
38
له‌ ساڵی یازده‌یه‌مینیش، له‌ مانگی بول كه‌ مانگی هه‌شته‌، هه‌موو به‌شه‌كانی په‌رستگاكه‌ به‌ هه‌موو ورده‌كارییه‌كانییه‌وه‌ ته‌واو كرا، به‌ حه‌وت ساڵ بنیادی نا.
  1. a. 6‏:2 شه‌ست باڵ: نزیكه‌ی 27 مه‌تر.
  2. b. 6‏:2 بیست باڵ: نزیكه‌ی 9 مه‌تر.
  3. c. 6‏:2 سی باڵ: نزیكه‌ی 13,5 مه‌تر.
  4. d. 6‏:3 ده‌ باڵ: نزیكه‌ی 4,5 مه‌تر.
  5. e. 6‏:4 وه‌ك په‌نجه‌ره‌یه‌، ده‌لاقه‌یه‌كه‌ بۆ هاتوچۆی هه‌وا و گێڕانه‌وه‌ی تیشكی خۆر.
  6. f. 6‏:6 پێنج باڵ: نزیكه‌ی 2,3 مه‌تر.
  7. g. 6‏:6 شه‌ش باڵ: نزیكه‌ی 2,7 مه‌تر.
  8. h. 6‏:6 حه‌وت باڵ: نزیكه‌ی 3,1 مه‌تر.
  9. i. 6‏:17 چل باڵ: نزیكه‌ی 18 مه‌تر.
  10. j. 6‏:18 له‌ زمانی عیبری وشه‌ی \+tl په‌قه‌عی\+tl* مه‌به‌ستی له‌ به‌رهه‌می هه‌موو ئه‌و ڕووه‌كانه‌یه‌ كه‌ بڕكه‌كانیان په‌ل ده‌هاوێت، وه‌كو: كودو، ئاروو، كودووه‌ زه‌رده‌، ترۆزی… هتد.
  11. k. 6‏:23 دوو كه‌ڕوب: جووتێك په‌یكه‌ری بوونه‌وه‌ری ئاسمانی باڵداره‌، له‌ شێوه‌ی ئاژه‌ڵ و مرۆڤدایه‌، بۆ پارێزگاریكردن له‌ سندوقی په‌یمان دانرابوو، بڕوانه‌ ‏\+xt ده‌رچوون 25‏:18 و عیبرانییه‌كان 9‏:5‏.‏\+xt*‏
  12. l. 6‏:24 درێژی هه‌ر باڵێكی كه‌ڕوبه‌كه‌ نزیكه‌ 2,25 مه‌تره‌.
  13. m. 6‏:34 نه‌رماده‌ له‌ دوو پارچه‌ ئاسن پێكهاتووه‌ كه‌ تێكهه‌ڵكێشی یه‌كن و ده‌جوڵێن، كه‌ بۆ به‌ستنه‌وه‌ی ده‌رگا به‌ یه‌كه‌وه‌ یان بۆ به‌ستنه‌وه‌ی ده‌رگا به‌ چوارچێوه‌كه‌یه‌وه‌ به‌كاردێت.