عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كاربه‌ده‌ست و بریكاره‌كانی سلێمان 
1
ئیتر سلێمان پاشایه‌تی هه‌موو ئیسرائیلی كرد.
2
ئه‌مانه‌ش باڵاترین كاربه‌ده‌ستانی ئه‌و بوون:
عه‌زه‌ریای كوڕی سادۆقی كاهین،
3
ئه‌لیحۆره‌ف و ئاحییا، دوو كوڕه‌كه‌ی شیشا، خامه‌ی نهێنی[a] بوون،
یه‌هۆشافاتی كوڕی ئه‌حیلود، تۆماركار.
4
به‌نایای كوڕی یه‌هۆیاداعیش سوپاسالار،
سادۆق و ئه‌بیاتاریش هه‌ردووكیان كاهین بوون.
5
عه‌زه‌ریای كوڕی ناتان سه‌رۆكی بریكاره‌كان و
زه‌ڤودی كوڕی ناتان، كاهین و یاوه‌ری پاشا بوون.
6
ئه‌حیشار سه‌رپه‌رشتیاری كۆشك،
ئه‌دۆنیرامی كوڕی عه‌ڤدا سه‌رپه‌رشتیاری كاری بێگاری بوو.
7
هه‌روه‌ها سلێمان دوازده‌ بریكاری له‌سه‌ر هه‌موو ئیسرائیل هه‌بوو، ئازووقه‌یان بۆ پاشا و ماڵه‌كه‌ی دابین ده‌كرد و ساڵی مانگێك له‌سه‌ر هه‌ریه‌كه‌یان بوو بۆ دابینكردنی ئازووقه‌.
8
ئه‌مانه‌ش ناوه‌كانیانه‌:
به‌ن‌حور له‌ ناوچه‌ شاخاوییه‌كانی ئه‌فرایم.
9
به‌ن‌ده‌قه‌ر له‌ ماقه‌چ و شه‌عه‌لڤیم و بێت‌شه‌مه‌ش و ئێلۆن بێت‌حانان.
10
به‌ن‌حه‌سه‌د له‌ ئه‌روبۆت، سۆكۆ و هه‌موو خاكی حێفه‌ر سه‌ر به‌ ئه‌و بوو.
11
به‌ن‌ئه‌بیناداب له‌ هه‌موو به‌رزاییه‌كانی دۆردا، تافه‌تی كچی سلێمانیش بووه‌ ژنی.
12
به‌عنای كوڕی ئه‌حیلود، ته‌عنه‌ك و مه‌گیدۆ و هه‌موو بێت‌شان ئه‌وه‌ی له‌ته‌نیشت چه‌ره‌تانه‌ له‌ خوار یه‌زره‌عیل، له‌ بێت‌شانه‌وه‌ هه‌تا ئابێل مه‌حۆلا، هه‌تا ئه‌و به‌ری یۆقمه‌عام.
13
به‌ن‌گه‌ڤه‌ر له‌ ڕامۆتی گلعاد، ئاواییه‌كانی یائیری كوڕی مه‌نه‌شه‌، ئه‌وه‌ی له‌ گلعاده‌ سه‌ر به‌ ئه‌و بوون، له‌گه‌ڵ ناوچه‌ی ئه‌رگۆڤ ئه‌وه‌ی له‌ باشانه‌، شه‌ست شاری گه‌وره‌ی شوورابه‌ند كه‌ شمشیره‌ی[b] ده‌رگاكانی له‌ بڕۆنز دروستكرا بوون.
14
ئه‌حینادابی كوڕی عیدۆ له‌ مه‌حه‌نه‌یم بوو.
15
ئه‌حیمه‌عه‌چ له‌ نه‌فتالی، ئه‌ویش باسمه‌تی كچی سلێمانی هێنا ببێته‌ ژنی.
16
به‌عنای كوڕی حوشه‌ی له‌ ئاشێر و له‌ عالۆت بوو.
17
یه‌هۆشافاتی كوڕی پاروه‌ح له‌ یه‌ساخار بوو.
18
شیمعی كوڕی ئێلا له‌ بنیامین بوو.
19
گه‌ڤه‌ری كوڕی ئوری له‌ خاكی گلعاد، خاكی سیحۆنی پاشای ئه‌مورییه‌كان و عۆگی پاشای باشان، تاكه‌ بریكار بوو له‌سه‌ر ناوچه‌كه‌.
ئازووقه‌ی ڕۆژانه‌ی سلێمان 
20
یه‌هودا و ئیسرائیل له‌ زۆریدا وه‌ك لمی سه‌ر كه‌ناری ده‌ریا بوون، ده‌یانخوارد و ده‌یانخوارده‌وه‌ و دڵخۆش بوون.
21
سلێمان ده‌سه‌ڵاتدار بوو له‌سه‌ر هه‌موو پاشایه‌تییه‌كان، له‌ ڕووباری فوراته‌وه‌ هه‌تا خاكی فه‌له‌ستییه‌كان و سنووری میسر، سه‌رانه‌یان پێده‌دا و به‌ درێژایی ژیانی خزمه‌تكاری سلێمان بوون.
22
ئازووقه‌ی ڕۆژانه‌ی سلێمان، سی كۆڕ[c] له‌ باشترین ئارد و شه‌ست كۆڕ[d] بڕوێش،
23
ده‌ گای قه‌ڵه‌و و بیست گای له‌وه‌ڕگا و سه‌د مه‌ڕ و بزن، جگه‌ له‌ ئاسك و مامز و ئاسكه‌ سووره‌ و په‌له‌وه‌ڕی قه‌ڵه‌و.
24
له‌به‌ر ئه‌وه‌ی فه‌رمانڕه‌وا بوو له‌سه‌ر هه‌موو شانشینه‌كانی ئه‌م به‌ری ڕووباری فورات، له‌ تیفسه‌حه‌وه‌ هه‌تا غه‌زه‌، له‌ هه‌موو لایه‌كه‌وه‌ ئاشتی هه‌بوو.
25
هه‌موو سه‌رده‌می سلێمان یه‌هودا و ئیسرائیلی هه‌ریه‌كه‌ له‌ژێر دار مێو و دار هه‌نجیره‌كه‌ی خۆی به‌ ئاسووده‌یی نیشته‌جێ بوون، له‌ دانه‌وه‌ هه‌تا بیری شابه‌ع[e] .
26
سلێمان چوار هه‌زار ئاخوڕی هه‌بوو بۆ ئه‌سپی گالیسكه‌كانی، له‌گه‌ڵ دوازده‌ هه‌زار ئه‌سپ.
27
ئه‌م بریكارانه‌ ئازووقه‌یان دابین ده‌كرد بۆ سلێمانی پاشا و هه‌موو ئه‌وانه‌ی ده‌هاتنه‌ سه‌ر خوانه‌كه‌ی، هه‌ریه‌كه‌ و له‌ مانگی خۆی، ئیتر پێویستیان به‌ هیچ نه‌بوو.
28
جۆ و كاش بۆ ئه‌سپی گالیسكه‌كان و ئه‌سپه‌كانی دیكه‌ ده‌هێنران بۆ ئه‌و شوێنه‌ی كه‌ لێی ده‌بوون، هه‌ركه‌سه‌ و به‌گوێره‌ی ئه‌ركی خۆی.
دانایی سلێمان 
29
خودا دانایی و تێگه‌یشتنێكی زۆر زۆری دایه‌ سلێمان، هه‌روه‌ها مێشكێكی فراوان وه‌ك ئه‌و لمه‌ی له‌سه‌ر كه‌ناری ده‌ریایه‌.
30
دانایی سلێمان زیاتر بوو له‌ دانایی هه‌موو خه‌ڵكی ڕۆژهه‌ڵات و هه‌موو دانایی میسرییه‌كان.
31
له‌ هه‌موو خه‌ڵك داناتر بوو، ته‌نانه‌ت داناتر بوو له‌ ئێیتانی ئه‌زراحی و له‌ هێیمان و له‌ كه‌لكۆل و له‌ ده‌رده‌عی كوڕانی ماحۆل، ناوبانگیشی له‌نێو هه‌موو نه‌ته‌وه‌كانی ده‌وروبه‌ری بڵاو بووه‌وه‌.
32
سێ هه‌زار په‌ند و هه‌زار و پێنج سروودیشی هه‌بوو.
33
ده‌رباره‌ی دارودره‌خت قسه‌ی كردووه‌، له‌ دار ئورزه‌وه‌ ئه‌وه‌ی له‌ لوبنانه‌ هه‌تا ئه‌و زوفایه‌ی له‌بن دیوار ده‌ڕوێت، هه‌روه‌ها ده‌رباره‌ی ئاژه‌ڵ و باڵنده‌ و خشۆك و ماسیش قسه‌ی كردووه‌.
34
له‌ هه‌موو گه‌لانه‌وه‌ ده‌هاتن بۆ گوێگرتن له‌ دانایی سلێمان، هه‌موو پاشایانی زه‌وی كه‌ ده‌رباره‌ی داناییه‌كه‌ی بیستبوویان خه‌ڵكیان ده‌نارده‌ لای.
  1. a. 4‏:3 ڕازپۆش.
  2. b. 4‏:13 شمشیر، پارچه‌ دارێك بووه‌ له‌ جیاتی قوفڵ له‌ دواوه‌ی ده‌رگا به‌ شێوه‌ی ئاسۆیی دانراوه‌ بۆ داخستنی ده‌رگا.
  3. c. 4‏:22 سی كۆڕ: نزیكه‌ی پێنج ته‌ن.
  4. d. 4‏:22 شه‌ست كۆڕ: نزیكه‌ی ده‌ ته‌ن.
  5. e. 4‏:25 واته‌ له‌ باكووری ئیسرائیل هه‌تا باشوور.