عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داواكردنی دانایی له‌لایه‌ن سلێمانه‌وه‌ 
1
سلێمان خزمایه‌تی له‌گه‌ڵ فیرعه‌ونی پاشای میسر كرد و كچه‌كه‌ی فیرعه‌ونی هێنا. كچه‌كه‌ی برده‌ شاری داود هه‌تا ئه‌و كاته‌ی له‌ بنیادنانی كۆشكه‌كه‌ی و په‌رستگای یه‌زدان و شووراكه‌ی چوارده‌وری ئۆرشه‌لیم بووه‌وه‌.
2
له‌و كاته‌ گه‌ل له‌ نزرگه‌كانی سه‌ر به‌رزاییدا[a] قوربانییان سه‌رده‌بڕی، چونكه‌ هه‌تا ئه‌و ڕۆژانه‌ په‌رستگایه‌ك بۆ ناوی یه‌زدان دروستنه‌كرابوو.
3
سلێمانیش خۆشه‌ویستی بۆ یه‌زدان ده‌ربڕی به‌وه‌ی به‌پێی فه‌رزه‌كانی داودی باوكی ده‌ڕۆیشت، ته‌نها ئه‌وه‌ نه‌بێت كه‌ له‌ نزرگه‌كانی سه‌ر به‌رزاییدا قوربانی سه‌رده‌بڕی و بخووری ده‌سووتاند.
4
پاشا چوو بۆ گبعۆن هه‌تا له‌وێ قوربانی سه‌ر ببڕێت، چونكه‌ ئه‌وه‌ گرنگترین نزرگه‌ی سه‌ر به‌رزایی بوو، سلێمان هه‌زار قوربانی سووتاندنی سه‌رخسته‌ سه‌ر ئه‌و قوربانگایه‌.
5
له‌ گبعۆن یه‌زدان له‌ خه‌ونی شه‌ودا بۆ سلێمان ده‌ركه‌وت، خودا پێی فه‌رموو: «داوا بكه‌ چیت پێ بده‌م؟»
6
سلێمانیش گوتی: «تۆ له‌گه‌ڵ خزمه‌تكاره‌كه‌ت، له‌گه‌ڵ داودی باوكم چاكه‌ی گه‌وره‌ت كردووه‌، به‌و شێوه‌یه‌ی له‌به‌رده‌مت هه‌ڵسوكه‌وتی كرد، به‌ دڵسۆزی و ڕاستودروستی و دڵڕاستی له‌گه‌ڵت. جا ئه‌م چاكه‌ گه‌وره‌یه‌ت بۆ له‌به‌رچاو گرت و كوڕێكت پێیدا هه‌تا له‌سه‌ر ته‌خته‌كه‌ی دابنیشێت وه‌ك ئه‌مڕۆ.
7
«ئێستاش ئه‌ی یه‌زدانی په‌روه‌ردگارم، تۆ خزمه‌تكاره‌كه‌تت كردووه‌ به‌ پاشا له‌ جێی داودی باوكم، منیش مێردمنداڵێكی بچووكم و شاره‌زاییم له‌ ڕابه‌رایه‌تیكردن نییه‌.
8
خزمه‌تكاره‌كه‌شت له‌نێو گه‌له‌كه‌تدایه‌ ئه‌وه‌ی هه‌ڵتبژاردووه‌ و ئه‌و گه‌له‌ش گه‌لێكی زۆرن و له‌ زۆریدا له‌ ژماره‌ نایه‌ن.
9
ئینجا دڵێكی تێگه‌یشتووم پێبده‌ بۆ ئه‌وه‌ی فه‌رمانڕه‌وایه‌تی گه‌له‌كه‌ت بكه‌م، تاكو جیاوازی بكه‌م له‌نێوان چاكه‌ و خراپه‌، چونكه‌ كێ ده‌توانێت فه‌رمانڕه‌وایه‌تی ئه‌م گه‌له‌ گه‌وره‌یه‌ت بكات؟»
10
ئه‌م قسه‌یه‌ له‌لای په‌روه‌ردگار باش بوو، كه‌ سلێمان داوای ئه‌م شته‌ی كرد.
11
ئینجا خودا پێی فه‌رموو: «له‌به‌ر ئه‌وه‌ی نه‌ ڕۆژگاری زۆرت داوا كرد و نه‌ ده‌وڵه‌مه‌ندی بۆ خۆت و نه‌ مه‌رگی دوژمنه‌كانت، به‌ڵكو لێك جیاكردنه‌وه‌ بۆ تێگه‌یشتنی دادپه‌روه‌ری،
12
ئه‌وا من به‌پێی داواكارییه‌كه‌ی تۆ ده‌كه‌م. دڵێكی وا دانات پێ ده‌به‌خشم شت لێك جیا بكاته‌وه‌، كه‌ كه‌س له‌مه‌وبه‌ر وه‌ك تۆ نه‌بووبێت و له‌ داهاتووشدا كه‌سێكی وه‌ك تۆ هه‌ڵناكه‌وێت.
13
هه‌روه‌ها ئه‌وه‌ی داواشت نه‌كردبوو پێم به‌خشیت، ده‌وڵه‌مه‌ندی و پایه‌داری به‌ جۆرێك كه‌ به‌ درێژایی ژیانت هیچ پیاوێك له‌ناو پاشایان وه‌ك تۆی نه‌بێت.
14
جا ئه‌گه‌ر به‌ ڕێگای مندا بڕۆیت به‌وه‌ی وه‌ك داودی باوكت فه‌رز و فه‌رمانه‌كانم به‌جێبهێنیت، درێژه‌ به‌ ڕۆژگارت ده‌ده‌م.»
15
كه‌ سلێمان هه‌ستا، زانی خه‌ونه‌، هاته‌ ئۆرشه‌لیم و له‌به‌رده‌م سندوقی په‌یمانی په‌روه‌ردگار ڕاوه‌ستا و قوربانی سووتاندنی سه‌رخست و قوربانی هاوبه‌شی[b] پێشكه‌ش كرد، خوانێكی بۆ هه‌موو خزمه‌تكاره‌كانی ساز كرد.
بڕیاردانی دانا 
16
له‌و كاته‌دا دوو ژنی له‌شفرۆش هاتنه‌ لای پاشا و له‌به‌رده‌می ڕاوه‌ستان.
17
یه‌كێك له‌ ژنه‌كان گوتی: «ئه‌ی گه‌وره‌م، تكایه‌، من و ئه‌م ژنه‌ له‌ یه‌ك ماڵ ده‌ژین و من له‌و ماڵه‌ منداڵم بوو.
18
ئه‌وه‌ بوو له‌ ڕۆژی سێیه‌می له‌دایكبوونی منداڵه‌كه‌م ئه‌م ژنه‌ش منداڵێكی بوو، هه‌ردووكمان به‌ ته‌نها بووین و له‌ ماڵه‌كه‌ هیچ كه‌سێكی دیكه‌مان له‌گه‌ڵ نه‌بوو، ته‌نها هه‌ردووكمان له‌ ماڵه‌كه‌ بووین.
19
«شه‌وێ كوڕه‌كه‌ی ئه‌م ژنه‌ مرد، له‌به‌ر ئه‌وه‌ی خۆی به‌سه‌ریدا دابوو.
20
ئیتر له‌ نیوه‌ی شه‌و هه‌ستا و كوڕه‌كه‌ی منی له‌ته‌نیشتمه‌وه‌ برد، كه‌نیزه‌كه‌شت نوستبوو. كوڕه‌كه‌ی منی له‌ باوه‌شی كرد و كوڕه‌ مردووه‌كه‌شی له‌ باوه‌شی من دانا.
21
بۆ به‌یانی كه‌ له‌ خه‌و هه‌ستام هه‌تا شیر بده‌مه‌ كوڕه‌كه‌م ته‌ماشام كرد مردووه‌! به‌ڵام كاتێك لێی ورد بوومه‌وه‌ ته‌ماشام كرد ئه‌وه‌ ئه‌و كوڕه‌ نییه‌ كه‌ من بوومه‌.»
22
ژنه‌كه‌ی دیكه‌یان گوتی: «نه‌خێر! زیندووه‌كه‌ كوڕی منه‌ و مردووه‌كه‌ش هی تۆیه‌!»
ئه‌مه‌شیان ده‌یگوت: «نه‌خێر! مردووه‌كه‌ هی تۆیه‌ و زیندووه‌كه‌ هی منه‌!» به‌م شێوه‌یه‌ له‌به‌رده‌م پاشا ده‌مه‌قاڵێیان كرد.
23
پاشاش گوتی: «ئه‌میان ده‌ڵێت ”ئه‌مه‌ كوڕه‌كه‌ی منه‌ زیندووه‌ و كوڕه‌كه‌ی تۆ مردووه‌،“ ئه‌ویشیان ده‌ڵێت ”نه‌خێر! كوڕه‌كه‌ی تۆ مردووه‌ و كوڕه‌كه‌ی من زیندووه‌!“»
24
پاشا گوتی: «شمشێرێكم بۆ بهێنن.» ئه‌وانیش شمشێرێكیان بۆ پاشا هێنا.
25
پاشا گوتی: «منداڵه‌ زیندووه‌كه‌ بكه‌نه‌ دوو به‌ش، نیوه‌ی بده‌نه‌ یه‌كێكیان و نیوه‌كه‌ی دیكه‌ش بده‌ن ئه‌وی دیكه‌یان.»
26
ئه‌و ژنه‌یان كه‌ كوڕه‌كه‌ی زیندوو بوو له‌به‌ر ئه‌وه‌ی هه‌ناوی بۆ كوڕه‌كه‌ی سووتا به‌ پاشای گوت: «تكایه‌، گه‌وره‌م، منداڵه‌ زیندووه‌كه‌ی بده‌نێ و مه‌یكوژن!»
به‌ڵام ئه‌وی دیكه‌یان گوتی: «نه‌ بۆ من ده‌بێت و نه‌ بۆ تۆ، بیكه‌نه‌ دوو به‌ش!»
27
ئینجا پاشا وه‌ڵامی دایه‌وه‌ و گوتی: «كوڕه‌ زیندووه‌كه‌ بده‌نه‌ ژنی یه‌كه‌م و مه‌یكوژن، ئه‌و دایكییه‌تی.»
28
كاتێك هه‌موو ئیسرائیل ئه‌و بڕیاره‌یان بیسته‌وه‌ كه‌ پاشا دابووی، ترسیان لێ نیشت، چونكه‌ بینییان دانایی خودایی تێدا بوو بۆ په‌یڕه‌وكردنی دادپه‌روه‌ری.
  1. a. 3‏:2 مه‌به‌ست له‌ هه‌موو ئه‌و شوێنه‌ به‌رزانه‌یه‌ كه‌ گه‌ل قوربانی لێ ده‌كرد، هه‌رچه‌نده‌ ئه‌و شوێنه‌ له‌لایه‌ن یه‌زدانه‌وه‌ هه‌ڵنه‌بژێردرابوو. بڕوانه‌ \+xt دواوتار 12‏:5‏\+xt*.
  2. b. 3‏:15 قوربانی هاوبه‌شی: ئه‌م قوربانییه‌ هاوده‌می قوربانی سووتاندن بوو. ته‌نها یه‌ك كه‌س هه‌ڵده‌ستا به‌ دابینكردنی ئه‌م قوربانییه‌، به‌ڵام له‌گه‌ڵ خه‌ڵكی دیكه‌ به‌شی زۆری ئه‌م قوربانییه‌یان له‌به‌رده‌م خودا ده‌خوارد وه‌ك هێمایه‌ك بۆ پێكه‌وه‌ ژیان. \+xt بڕوانه‌ لێڤییه‌كان 7‏:11‏-15.‏\+xt*‏