عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یاخیبوونی ئه‌دۆنیا 
1
داودی پاشا پیر بوو و ته‌مه‌نی گه‌وره‌ بوو، هه‌رچه‌نده‌ به‌ جلوبه‌رگ دایانده‌پۆشی گه‌رم نه‌ده‌بووه‌وه‌.
2
ئینجا خزمه‌تكاره‌كانی پێیان گوت: «با به‌دوای كچێكی پاكیزه‌دا بگه‌ڕێین و بیهێنین بۆ پاشای گه‌وره‌مان، تاكو خزمه‌تی پاشا بكات و بایه‌خی پێبدات، له‌ باوه‌شیدا پاڵ بكه‌وێت، هه‌تا پاشای گه‌وره‌مان گه‌رم بێته‌وه‌.»
3
ئینجا له‌ هه‌موو ناوچه‌كانی ئیسرائیل به‌دوای كچێكی جواندا گه‌ڕان، ئه‌بیشه‌گی شونه‌مییان دۆزییه‌وه‌ و بۆ پاشایان هێنا.
4
كچه‌كه‌ زۆر جوان بوو، چاودێری پاشای ده‌كرد و خزمه‌تی ده‌كرد، به‌ڵام پاشا له‌گه‌ڵی جووت نه‌بوو.
5
ئه‌دۆنیای كوڕی داود كه‌ له‌ حه‌گیسی ژنی بوو، ڕاست بووه‌وه‌ و گوتی: «من ده‌بمه‌ پاشا.» گالیسكه‌ و ئه‌سپ سواری بۆ خۆی ئاماده‌ كرد، له‌گه‌ڵ په‌نجا پیاو كه‌ له‌پێشیه‌وه‌ ڕایانده‌كرد.
6
باوكی هیچ كاتێك سه‌رزه‌نشتی نه‌كردبوو پێی بڵێ، «بۆچی وات كردووه‌؟» هه‌روه‌ها زۆر قۆز بوو. دایكی له‌دوای ئه‌بشالۆم ئه‌وی ببوو.
7
ئه‌دۆنیا له‌گه‌ڵ یۆئابی كوڕی چه‌رویا و ئه‌بیاتاری كاهین قسه‌ی كرد، ئه‌وانیش پشتگیرییان كرد.
8
به‌ڵام سادۆقی كاهین و به‌نایای كوڕی یه‌هۆیاداع و ناتانی پێغه‌مبه‌ر و شیمعی و ڕێعی و پاڵه‌وانه‌كانی داود، له‌گه‌ڵ ئه‌دۆنیا نه‌بوون.
9
ئیتر ئه‌دۆنیا له‌لای به‌ردی زۆحه‌له‌ت ئه‌وه‌ی له‌ته‌نیشتی كانی ڕۆگێله‌، مه‌ڕ و مانگا و گوێره‌كه‌ی قه‌ڵه‌وی سه‌ربڕی. هه‌موو براكانی، واته‌ كوڕه‌كانی پاشا، له‌گه‌ڵ هه‌موو پیاوانی یه‌هودا كه‌ خزمه‌تكاری پاشا بوون بانگهێشتی كردن.
10
به‌ڵام ناتانی پێغه‌مبه‌ر و به‌نایا و پاڵه‌وانه‌كان و سلێمانی برای بانگهێشت نه‌كرد.
11
پاشان ناتان به‌ به‌تشه‌به‌عی دایكی سلێمانی گوت: «نه‌تبیستووه‌ كه‌ ئه‌دۆنیای كوڕی حه‌گیس بووه‌ته‌ پاشا و داودی گه‌وره‌شمان به‌مه‌ نازانێت؟
12
ئێستاش وه‌ره‌ ئامۆژگارییه‌كی باشت بكه‌م، تاكو گیانی خۆت و گیانی سلێمانی كوڕت بپارێزیت.
13
بڕۆ ژووره‌وه‌ بۆ لای داودی پاشا و پێی بڵێ: ”ئه‌ی پاشای گه‌وره‌م، ئایا تۆ سوێندت بۆ كه‌نیزه‌كه‌ت نه‌خوارد و گوتت، كه‌ سلێمانی كوڕت له‌دوای خۆت ده‌بێته‌ پاشا، ئه‌و له‌سه‌ر ته‌خته‌كه‌ت داده‌نیشێت؟ ئیتر بۆچی ئه‌دۆنیا بووه‌ته‌ پاشا؟“
14
له‌و كاته‌دا كه‌ تۆ هێشتا له‌وێ قسه‌ له‌گه‌ڵ پاشا ده‌كه‌یت، من له‌دوای تۆوه‌ دێمه‌ ژووره‌ و پشتگیری له‌ قسه‌كه‌ت ده‌كه‌م.»
15
پاش ئه‌وه‌ به‌تشه‌به‌ع چوو بۆ لای پاشا له‌ ژووری نوستنه‌كه‌ی، پاشا زۆر پیر ببوو، ئه‌بیشه‌گی شونه‌میش خزمه‌تی پاشای ده‌كرد.
16
به‌تشه‌به‌ع به‌چۆكدا هات و كڕنۆشی بۆ پاشا برد.
پاشاش پێی گوت: «چیت ده‌وێ؟»
17
ئه‌ویش پێی گوت: «گه‌وره‌م تۆ سوێندت به‌ یه‌زدانی په‌روه‌ردگارت خوارد بۆ كه‌نیزه‌كه‌ت و گوتت كه‌ سلێمانی كوڕت له‌دوای خۆت ده‌بێته‌ پاشا، ئه‌و له‌سه‌ر ته‌خته‌كه‌ت داده‌نیشێت.
18
ئه‌ی پاشای گه‌وره‌م، به‌ڵام وا ئه‌دۆنیا بووه‌ته‌ پاشا، تۆش له‌وه‌ بێئاگای.
19
ئه‌و گا و دابه‌سته‌ و مه‌ڕێكی زۆری سه‌ربڕیوه‌، هه‌موو كوڕه‌كانی پاشا و ئه‌بیاتاری كاهین و یۆئابی فه‌رمانده‌ی گشتی سوپای بانگهێشت كردووه‌، به‌ڵام سلێمانی خزمه‌تكاری تۆی بانگهێشت نه‌كردووه‌.
20
ئه‌ی پاشای گه‌وره‌م، هه‌موو ئیسرائیل چاوه‌ڕێی تۆ ده‌كه‌ن هه‌تا پێیان ڕابگه‌یه‌نیت كێ له‌دوای پاشای گه‌وره‌م له‌سه‌ر ته‌خته‌كه‌ی داده‌نیشێت.
21
ئه‌گینا كاتێك پاشای گه‌وره‌م له‌گه‌ڵ باوباپیرانی سه‌ری نایه‌وه‌، من و سلێمانی كوڕم به‌ تاوانبار هه‌ژمارد ده‌كرێین.»
22
هێشتا ئه‌و قسه‌ی له‌گه‌ڵ پاشا ده‌كرد، ناتانی پێغه‌مبه‌ر هات.
23
به‌ پاشایان ڕاگه‌یاند و گوتیان: «ناتانی پێغه‌مبه‌ر لێره‌یه‌.» ئینجا چووه‌ ژووره‌وه‌ بۆ به‌رده‌م پاشا، كڕنۆشی بۆ پاشا برد و سه‌ری خسته‌ سه‌ر زه‌وی.
24
ناتان گوتی: «پاشای گه‌وره‌م، ئایا تۆ ڕاتگه‌یاندووه‌ كه‌ ئه‌دۆنیا له‌پاش تۆ ده‌بێته‌ پاشا، ئه‌و له‌سه‌ر ته‌خته‌كه‌ت داده‌نیشێت؟
25
چونكه‌ ئه‌و ئه‌مڕۆ چووه‌ خواره‌وه‌، گا و دابه‌سته‌ و مه‌ڕێكی زۆری سه‌ربڕیوه‌. هه‌موو كوڕانی پاشا و سه‌ركرده‌كانی سوپا و ئه‌بیاتاری كاهینی بانگهێشت كردووه‌. ئێستا له‌به‌رده‌می ئه‌و ده‌خۆن و ده‌خۆنه‌وه‌ و ده‌ڵێن: ”بژی ئه‌دۆنیای پاشا!“
26
به‌ڵام منی خزمه‌تكارت و سادۆقی كاهین و به‌نایای كوڕی یه‌هۆیاداع و سلێمانی خزمه‌تكاری تۆی بانگهێشت نه‌كردووه‌.
27
ئایا ئه‌م كاره‌ له‌لای پاشای گه‌وره‌مه‌وه‌یه‌، ئه‌ی به‌ خزمه‌تكارانی خۆتت نه‌فه‌رمووه‌ كێ له‌دوای پاشای گه‌وره‌م له‌سه‌ر ته‌خته‌كه‌ت داده‌نیشێت؟»
داود سلێمان ده‌كاته‌ پاشا 
28
داودی پاشا وه‌ڵامی دایه‌وه‌ و گوتی: «به‌تشه‌به‌عم بۆ بانگ بكه‌ن.» ئه‌ویش هاته‌ ژووره‌وه‌ بۆ لای پاشا، له‌به‌رده‌م پاشا ڕاوه‌ستا.
29
ئینجا پاشا سوێندی خوارد: «به‌ یه‌زدانی زیندوو، ئه‌وه‌ی گیانی منی له‌ هه‌موو ته‌نگانه‌یه‌ك كڕییه‌وه‌،
30
ئه‌مڕۆ هه‌روه‌ك ئه‌وه‌ ده‌كه‌م كه‌ چۆن به‌ یه‌زدانی په‌روه‌ردگاری ئیسرائیل سوێندم بۆ خواردی و گوتم، كه‌ سلێمانی كوڕت له‌پاش من ده‌بێته‌ پاشا، ئه‌و له‌ شوێنی من له‌سه‌ر ته‌خته‌كه‌م داده‌نیشێت.»
31
به‌تشه‌به‌ع سه‌ری دانه‌واند و كڕنۆشی بۆ پاشا برد، گوتی: «بژی داودی پاشای گه‌وره‌م، بۆ هه‌تاهه‌تایه‌!»
32
داودی پاشا گوتی: «سادۆقی كاهین و ناتانی پێغه‌مبه‌ر و به‌نایای كوڕی یه‌هۆیاداعم بۆ بانگ بكه‌ن.» ئه‌وانیش هاتنه‌ ژووره‌وه‌ بۆ به‌رده‌م پاشا.
33
پاشا پێی گوتن: «خزمه‌تكاره‌كانی گه‌وره‌تان له‌گه‌ڵ خۆتان ببه‌ن، سلێمانی كوڕم سواری هێستره‌كه‌ی خۆم بكه‌ن و بیبه‌نه‌ خواره‌وه‌ بۆ گیحۆن.
34
با سادۆقی كاهین و ناتانی پێغه‌مبه‌ر له‌وێ وه‌ك پاشای ئیسرائیل ده‌ستنیشانی بكه‌ن[a] ، فوو به‌ كه‌ڕه‌نادا بكه‌ن و بڵێن: ”بژی سلێمانی پاشا!“
35
ئینجا له‌دوای ئه‌وه‌وه‌ سه‌ربكه‌ون، ئه‌ویش دێت و له‌سه‌ر ته‌خته‌كه‌م داده‌نیشێت، له‌ شوێنی من ده‌بێته‌ پاشا. من فه‌رمانم داوه‌ ئه‌و ببێته‌ فه‌رمانڕه‌وای ئیسرائیل و یه‌هودا.»
36
به‌نایای كوڕی یه‌هۆیاداع وه‌ڵامی پاشای دایه‌وه‌ و گوتی: «ئامین! با یه‌زدان، خودای پاشای گه‌وره‌م ئه‌مه‌ بكات.
37
هه‌روه‌ك چۆن یه‌زدان له‌گه‌ڵ پاشای گه‌وره‌م بوو، به‌و شێوه‌یه‌ش له‌گه‌ڵ سلێمانیش بێت، ته‌خته‌كه‌شی له‌ ته‌ختی داودی پاشای گه‌وره‌م مه‌زنتر بكات!»
38
ئیتر سادۆقی كاهین و ناتانی پێغه‌مبه‌ر و به‌نایای كوڕی یه‌هۆیاداع و كریتی و په‌له‌تییه‌كان[b] چوونه‌ خواره‌وه‌، سلێمانیان سواری هێستره‌كه‌ی داودی پاشا كرد و بردیانه‌ گیحۆن.
39
سادۆقی كاهین قۆچه‌ زه‌یته‌كه‌ی له‌ چادره‌كه‌وه‌ برد و سلێمانی پێ ده‌ستنیشان كرد، ئینجا فوویان به‌ كه‌ڕه‌نادا كرد، هه‌موو گه‌ل گوتیان: «بژی سلێمانی پاشا!»
40
هه‌موو گه‌ل له‌دوای ئه‌و سه‌ركه‌وتن. گه‌ل شمشاڵیان لێده‌دا و زۆر دڵخۆش بوون، زه‌وی له‌به‌ر ده‌نگیان ده‌له‌رزی.
41
ئه‌دۆنیا و هه‌موو بانگهێشتكراوان، ئه‌وانه‌ی له‌گه‌ڵی بوون، پاش ئه‌وه‌ی له‌ خواردن بوونه‌وه‌ گوێیان له‌ ده‌نگی ئه‌وان بوو. یۆئاب گوێی له‌ ده‌نگی كه‌ڕه‌ناكه‌ بوو و گوتی: «ئه‌و ده‌نگه‌ ده‌نگه‌ چییه‌ له‌ شاره‌وه‌ دێت؟»
42
كاتێك هێشتا قسه‌ی ده‌كرد، یۆناتانی كوڕی ئه‌بیاتاری كاهین هات، ئه‌دۆنیاش گوتی: «وه‌ره‌، چونكه‌ تۆ پیاوێكی چاكیت، دیاره‌ مژده‌ی خۆشیت هێناوه‌.»
43
یۆناتانیش وه‌ڵامی دایه‌وه‌ و به‌ ئه‌دۆنیای گوت: «به‌ پێچه‌وانه‌وه‌! داودی پاشای گه‌وره‌مان، سلێمانی كرده‌ پاشا.
44
پاشاش سادۆقی كاهین و ناتانی پێغه‌مبه‌ر و به‌نایای كوڕی یه‌هۆیاداع و كریتی و په‌له‌تییه‌كانی له‌گه‌ڵ ناردووه‌، سواری هێستره‌كه‌ی پاشایان كردووه‌.
45
سادۆقی كاهین و ناتانی پێغه‌مبه‌ریش له‌ گیحۆن به‌ پاشا ده‌ستنیشانیان كردووه‌[c] ، له‌وێشه‌وه‌ به‌ خۆشییه‌وه‌ سه‌ركه‌وتوون و شار خرۆشاوه‌، ئه‌مه‌ ئه‌و ده‌نگه‌یه‌ كه‌ گوێتان لێی ده‌بێت.
46
هه‌روه‌ها سلێمان له‌سه‌ر ته‌ختی پاشایه‌تییه‌كه‌ دانیشتووه‌.
47
خزمه‌تكارانی پاشاش بۆ پیرۆزبایی له‌ داودی پاشای گه‌وره‌مان هاتن و گوتیان: ”با خوداكه‌ت ناوی سلێمان له‌ ناوی تۆ ناودارتر بكات، ته‌خته‌كه‌شی له‌ ته‌خته‌كه‌ی تۆ مه‌زنتر بكات!“ پاشا له‌سه‌ر قه‌ره‌وێڵه‌كه‌ی كڕنۆشی برد.
48
پاشا گوتی: ”ستایش بۆ یه‌زدانی په‌روه‌ردگاری ئیسرائیل، ئه‌وه‌ی ئه‌مڕۆ كه‌سێكی پێداوم كه‌ له‌سه‌ر ته‌خته‌كه‌م دانیشێت و چاوه‌كانیشم ده‌یبینێت.“»
49
لێره‌دا هه‌موو ئه‌وانه‌ی ئه‌دۆنیا بانگی كردبوون تۆقین و هه‌ستان، هه‌ریه‌كه‌ به‌ ڕێگای خۆیدا ڕۆیشت.
50
ئه‌دۆنیاش له‌ سلێمان ترسا، هه‌ستا و چوو ده‌ستی به‌ قۆچه‌كانی قوربانگاكه‌وه‌ گرت.
51
ئینجا به‌ سلێمان ڕاگه‌یه‌نرا: «ئه‌وه‌تا ئه‌دۆنیا له‌ سلێمانی پاشا ده‌ترسێت، ده‌ستی به‌ قۆچه‌كانی قوربانگاكه‌وه‌ گرتووه‌ و ده‌ڵێت: ”با ئه‌مڕۆ سلێمانی پاشا سوێندم بۆ بخوات كه‌ خزمه‌تكاره‌كه‌ی به‌ شمشێر ناكوژێت.“»
52
سلێمانیش گوتی: «ئه‌گه‌ر پیاوێكی چاك بێت، تاڵه‌ مووێكی قژی ناكه‌وێته‌ سه‌ر زه‌وی، به‌ڵام ئه‌گه‌ر خراپه‌ی تێدا بینرا، ئه‌وا ده‌كوژرێت.»
53
ئینجا سلێمانی پاشا ناردی و ئه‌دۆنیایان له‌ قوربانگاكه‌وه‌ هێنایه‌ خواره‌وه‌، ئه‌ویش هات و كڕنۆشی بۆ سلێمانی پاشا برد، سلێمانیش پێی گوت: «بڕۆوه‌ ماڵه‌كه‌ی خۆت.»
  1. a. 1‏:34 به‌ زمانی عیبری پێی ده‌گوترێ \+tl مه‌شیخ\+tl* یان \+tl مه‌شیح\+tl*، كه‌ به‌ واتای چه‌وركردن به‌ زه‌یت دێت وه‌ك ده‌ستنیشانكردنی كه‌سێك بۆ له‌ئه‌ستۆگرتنی به‌رپرسیاریێتییه‌ك و پێ سپاردنی له‌لایه‌ن خوداوه‌.
  2. b. 1‏:38 كریتییه‌كان و په‌له‌تییه‌كان دوو له‌شكری ڕاهێنراو بوون له‌سه‌ر مه‌شقی سه‌ربازی.
  3. c. 1‏:45 عیبری: چه‌وریان كردووه‌، بڕوانه‌ \+xt یه‌كه‌م ساموئێل 12‏:5 و 15‏:1.‏\+xt*‏