عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پاولۆس، بەنیێ خودێ و هنارتیێ عیسایێ مەسیح، دا بەرێ وان یێن خودێ هەلبژارتین بدەمە باوەریێ و بەرێ وان بدەمە زانینا وێ راستیێ یا مرۆڤی بەرەڤ خودێترسیێ دبەت،
2
ب هیڤیا ژیانا هەروهەر، ئەوا خودایێ كو چ جاران درەوان ناكەت، بەری دەستپێكا دەمان سۆزا وێ دا.
3
ئەوی پەیاما خۆ د دەمێ وێ یێ تایبەت دا ئاشكرا كر، ب رێكا وێ راگەهاندنێ، یا ل دویڤ فەرمانا قورتالكەرێ مە خودێ، بۆ من هاتیە سپاردن.
4
بۆ تیتۆسی، كوڕێ من یێ راستەقینە د باوەریا مە یا هەڤپشك دا:
كەرەم و ئاشتی ژ خودایێ باب و ژ قورتالكەرێ مە مەسیح عیسای ل سەر تە بن.
تیتۆس ل كریتێ 
5
من تۆ بۆ وێ ئەگەرێ هێلایە ل كریتێ، كو تۆ ئەو كاروبارێن ماینە نیڤەرۆ رێك بئێخی و ل هەر باژێڕەكی ریهسپیان دەستنیشان بكەی، هەروەكو من تۆ راسپاردی.
6
دڤێت ریهسپی جهێ گازندەیێ نەبیت، مێرێ ئێك ژن بیت، زاڕۆكێن وی د باوەردار[a] بن، ل سەر بەرەڵایێ و یاخیبوونێ[b] جهێ تاوانباركرنێ نەبن.
7
چنكو دڤێت چاڤدێر: جهێ گازندەیێ نەبیت، وەكو بریكارێ خودێ. خۆسەپاندن ل نك نەبیت، زوی تۆڕە نەبیت، مەی ڤەخۆر نەبیت[c] ، توند نەبیت، چاڤبرسیێ قازانجی نەبیت،
8
لێ دڤێت یێ مێڤاندار بیت، حەز ژ باشیێ بكەت، خودان رەفتارەكا ئاقلانە بیت، یێ راست و دروست بیت، یێ پیرۆز و ل سەر خۆ یێ زاڵ بیت.
9
دڤێت خۆ ب پەیڤا دلسۆز ڤە بگریت، هەروەكو ئەو هاتیە فێركرن، دا بشێت هاندانێ ب فێركرنا ساخلەم بكەت و شاشیێن بەرهنگارێن وێ فێركرنێ دیار بكەت.
10
چنكو گەلەكێن یاخیبووی هەنە، یێن ئاخفتن ڤاڵا و خاپینۆك، ب تایبەت لایەنگرێن سونەتكرنێ[d] ،
11
یێن كو دڤێت دەڤێ وان بهێتە گرتن، چنكو ئەو ژ پێخەمەت چاڤبرساتیا قازانجی، فێركرنێن وەسا ددەن یێن كو نابیت بهێنە دان، هۆسا خێزانان هەمیان د سەر دا دبەن.
12
خۆ ئێك ژ كریتیان ژی، كو فەیلەسوفەكێ[e] وانە، گۆت: «خەلكێ كریتێ هەرگاڤ د درەوینن، هۆڤێن دڕندەنە و خۆرەیێن تەمبەلن.»
13
ئەڤە شاهدەییەكا راستە. ژ بەر ڤێ ئەگەرێ، وان ب توندی پاشڤە ببە، دا د باوەریێ دا د ساخلەم بن
14
و گوهـ نەدەنە ئەفسانەیێن جوهیان و فەرمانێن وان مرۆڤان یێن راستیێ رەت دكەن.
15
بۆ پاقژان هەمی تشت د پاقژن، لێ بۆ هەڕمیان و بێباوەران تشتەكێ پاقژ نینە. ب راستی، مەژیێ وان و وژدانا وان ژی یێن هەڕمین.
16
ئەو دبێژن كو ئەو خودێ دنیاسن، لێ ب كریارێن خۆ وی ماندەل[f] دكەن. ئەو جهێ دلڕەشیێنە، نەگوهدارن، ب كێر هیچ كارەكێ باش ناهێن.
  1. a. 1‏:6 ب ڤی ئاوایی ژی دهێتە وەرگێڕان: زاڕۆكێن وی د دلسۆز بن
  2. b. 1‏:6 یاخیبوون: رابوونا كەسەكیە ل دژی دەستهەلاتا ل سەر وی
  3. c. 1‏:7 مەی ڤەخۆر نەبیت: مەبەست پێ ئەوە كو گەلەك مەیێ ڤەنەخۆت و سەرخۆش نەبیت. بنێڕە ئەفەسۆس 5‏:18‏
  4. d. 1‏:10 q لایەنگرێن سونەتكرنێ ل فەرهەنگۆكێ بنێڕە.
  5. e. 1‏:12 ب یونانی دبێژیت ‹پێغەمبەرەكێ وانە›. ل فەرهەنگۆكێ بنێڕە \k ئەپیمێنیدیس\k*.
  6. f. 1‏:16 ئینكار