عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
خودێ ئیسرائیل رەت نەكریە 
1
ئەڤجا ئەز دبێژم: ئایا خودێ گەلێ خۆ رەت كریە؟ حاشا! ئەز ب خۆ ژی ئیسرائیلیمە، ژ دویندەها ئیبراهیمی و ژ هۆزا بنیامینیمە.[a]
2
خودێ گەلێ خۆ یێ پێشوەخت هەلبژارتی رەت نەكر. ما هوین نزانن نڤیسارا پیرۆز دەربارەی ئلیاسی چ دبێژیت، دەمێ ل بەرامبەر خودێ گازندە ژ ئیسرائیل كرین؟
3
ئەوی گۆت: «خودان، وان پێغەمبەرێن تە كوشتن و قوربانگەهێن تە هەڕفاندن، ئەز ب تنێ یێ مایم و ئەو ل كوشتنا من ژی دگەڕن.»[b]
4
لێ بەرسڤا خودایی بۆ وی چ بوو؟ «من حەفت هزار زەڵام بۆ خۆ هێلاینە یێن چۆكڤەدان بۆ بەعلی[c] نەبری.»[d]
5
د ڤی دەمی ژی دا، هندەك یێن هەین، ب رێكا كەرەمێ هاتینە هەلبژارتن.
6
ئەڤجا، ئەگەر ب كەرەمێ بیت، ئێدی ب كریاران نینە. ئەگەر ب كریاران با، ئێدی كەرەم نەدبوو كەرەم.
7
ئەڤجا چ؟ ئەو تشتێ ئیسرائیلێ بزاڤ بۆ دكر، ب دەست ڤە نەهات، لێ بدەست هەلبژارتیانڤە هات، ئەوێن دی ژی د سەرڕەق بوون.
8
هەروەكو هاتیە نڤیسین:
«خودێ ئەو كرنە د خەوەكا كویر دا
و چاڤێن كو نەبینن
و گوهێن كو نەبهیسن دانە وان، ئەو تا ئەڤرۆ ژی د وەسانە.»[e]
9
داوود ژی دبێژیت:
«بلا سفرا وان ژ بۆ وان
خەفك و داڤ و بەرێ هەلنگفتنێ و سزا بیت.
10
بلا چاڤێن وان تاری ببن، دا نەبینن
و هەردەم پشتێن وان دچەماندی بن.»[f]
قورتالبوونا نەجوهیان 
11
ئەڤجا ئەز دبێژم: ئایا ئەو هەلنگفتن دا بكەڤن؟ حاشا! لێ ب رێكا هەلنگفتنا وان، قورتالبوون بۆ نەجوهیان هات، دا چاڤپێڕانەبوونا جوهیان بهێتە ئازراندن.
12
ئەگەر هەلنگفتنا وان بۆ جیهانێ دەولەمەندی بیت و شكەستنا وان بۆ مللەتێن نەجوهی دەولەمەندی بیت، ئەڤجا ب تەمامبوونا وان دێ دەولەمەندی چەند پتر بیت!
13
ئەز بۆ هەوە نەجوهیان دبێژم: مادەم كو ئەز هنارتیێ نەجوهیانم، ئەز هەمیان ب مەزناهیا خزمەتا خۆ ئاگەهدار دكەم،
14
بەلكو ب ڤێ چەندێ ئەز چاڤپێڕانەبوونا مللەتێ خۆ بئازرینم و هندەكان ژ وان قورتال بكەم.
15
چنكو ئەگەر رەتكرنا وان ژ لایێ خودێ ڤە بۆ جیهانێ ئاشتكرن بیت، هنگی قەبیلكرنا وان ژ لایێ خودێ ڤە دێ چ بیت، ئەگەر ڤەژینا مریان نەبیت؟
16
ئەگەر نانا ئێكێ، ئەوا دهێتە پێشكێشكرن[g] ، یا پیرۆز بیت، ئەو هەڤیر هەمیێ پیرۆزە و ئەگەر رەهـ یا پیرۆز بیت، چەق ژی د پیرۆزن.
17
لێ ئەگەر هندەك چەق هاتنە بڕین و تۆ ژی دارزەیتونەكا خۆڕستی[h] بی و پێڤە هاتیە پەترومەكرن و بوویە پشكدارێ رەهـ و قەلەویا دارزەیتونێ،
18
ل بەرامبەری وان چەقێن هاتینە بڕین شانازیێ ب خۆ نەبە. ئەگەر تە شانازی ب خۆ بر، ژ بیر نەكە كو تۆ رەهێ هەلناگری، لێ رەهـ تە هەلدگریت.
19
ئەڤجا تۆ دێ بێژی: «چەق هاتنە بڕین، داكو ئەز بهێمە پەترومەكرن.»
20
راستە، ئەو ژ بەر بێباوەریێ هاتنە بڕین و تۆ ب باوەریێ جهگیر بووی. ئەڤجا خۆ دفنبلند نەكە، لێ بترسە.
21
چنكو ئەگەر دلێ خودێ نەمابیتە ب چەقێن خۆمالی ڤە، دلێ وی نامینیتە ب تە ژی ڤە.
22
ئەڤجا قەنجی و توندیا خودێ ببینە: توندی بۆ وانە یێن كەفتین[i] ، قەنجی ژی بۆ تەیە، ئەگەر تۆ د قەنجیا وی دا بمینی. ئەگەر نە، تۆ ژی دێ هێیە بڕین.
23
ئیسرائیلی ژی ئەگەر د بێباوەریێ دا نەمینن، دێ هێنە پەترومەكرن، چنكو خودێ دشێت جارەكا دی وان پەترومە بكەت.
24
چنكو ئەگەر تۆ ژ دارزەیتونەكا خۆڕستی هاتیە بڕین و بەروڤاژی سرۆشتی ب دارزەیتونەكا خۆمالیڤە هاتیە پەترومەكرن، چەند پتر چەقێن خۆمالی دێ ب دارزەیتونا خۆ ڤە هێنە پەترومەكرن!
هەمی گەلێ ئیسرائیل دێ قورتال بیت 
25
ئەز حەز ناكەم، گەلی برا، هوین ئاگەهداری ڤێ نهێنیێ نەبن، داكو هوین خۆ ئاقلدار نەهژمێرن. نهێنی ئەوە، كو سەرڕەقیێ پشكەكا گەلێ ئیسرائیل یا گرتی، تاكو ژمارەیا نەجوهیێن دێ قورتال بن، تەمام ببیت.
26
هۆسا هەمی گەلێ ئیسرائیل دێ قورتال بیت، هەروەكو هاتیە نڤیسین:
«قورتالكەر دێ ژ سییۆنێ هێت،
ئەو دێ خودێنەنیاسیێ ژ دویندەها یەعقوبی دویر ئێخیت.
27
ئەڤەیە پەیمانا من ل گەل وان،
دەمێ كو ئەز گونەهێن وان راكەم.»[j]
28
سەبارەت مزگینیێ ئەو ژ پێخەمەت هەوە دوژمنن[k] ، لێ سەبارەت هەلبژارتنا خودێ ئەو ژ پێخەمەت بابكالان خۆشتڤینە.
29
چنكو خودێ ژ بەرەكەتداركرن و هەلبژارتنا كەسەكی پەشیمان نابیت.
30
كا چەوا دەمەكی هەوە گوهداریا خودێ نەكر، لێ نوكە ژ ئەنجامێ نەگوهداریا وان دلۆڤانی ب هەوە هاتە برن،
31
هۆسا ئەو ژی نوكە بوونە نەگوهدار، دا ژ ئەنجامێ وێ دلۆڤانیا ب هەوە هاتیە برن، دلۆڤانی ب وان ژی بهێتە برن.
32
چنكو خودێ هەمی كرنە گرتیێن نەگوهداریێ، داكو دلۆڤانیێ ب هەمیان ببەت.
33
چەند د كویرن دەولەمەندی، ئاقلمەندی و زانینا خودێ! چەند د دویرن بڕیارێن وی ژ ڤەكۆلینێ و رێكێن وی ژ راڤەكرنێ![l]
34
چنكو «ما كێ هزرێن خودانی زانینە؟
یان كی بوویە شیرەتكارێ وی؟»[m]
35
«ما كێ تشتەك دایە وی،
كو لێ بهێتە ڤەگەڕاندن؟»[n]
36
چنكو هەمی تشت ژ وینە و ب وینە و ژ بۆ وینە، مەزناهی هەروهەر بۆ وی بیت. ئامین.[o]
  1. a. 11‏:1 فیلیپی 3‏:5
  2. b. 11‏:3 1 پاشا 19‏:10، 14
  3. c. 11‏:4 بەعل: ناڤێ خوداوەندەكێ كەنعانیان بوو. ل فەرهەنگۆكێ بنێڕە.
  4. d. 11‏:4 1 پاشا 19‏:18
  5. e. 11‏:8 گۆتارا مووسای 29‏:4؛ ئیشایا 29‏:10
  6. f. 11‏:9‏-10 زەبوور 69‏:22‏-23
  7. g. 11‏:16 سەرژمێری 15‏:17‏-21، هەروەسا ل فەرهەنگۆكێ بنێڕە: \k خێڤە \k*
  8. h. 11‏:17 ئەوا بێی دەستكاریا مرۆڤی شین بووی.
  9. i. 11‏:22 ئەوێن ژ باوەریێ دەركەفتین
  10. j. 11‏:26‏-27 ئیشایا 59‏:20‏-21؛ 27‏:9
  11. k. 11‏:28 ئانكو دوژمنێن خودێنە
  12. l. 11‏:33 ئیشایا 55‏:8‏-9
  13. m. 11‏:34 ئیشایا 40‏:13؛ یەرمیا 23‏:18
  14. n. 11‏:35 ئەیوب 41‏:11
  15. o. 11‏:36 1 كورنتۆس 8‏:6