عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
گەلی برا، حەزا دلێ من و هیڤیا من ژ خودێ ژ پێخەمەت ئیسرائیلیان، قورتالبوونا وانە.
2
ئەز ژ بۆ وان شاهدەییێ ددەم كو وان دلگەرمی ژ بۆ خودێ هەیە، لێ ئەڤ دلگەرمیە نە ل گۆر زانینێیە.
3
چنكو ئەو دەربارەی راستداریا ژ خودێ دهێت، د نەزان بوون و بزاڤ دكر كو ئەو ب خۆ راستداریێ پێكبینن، ئەڤجا ملكەچی راستداریا خودێ نەبوون.
4
چنكو ب مەسیحی دەستوور تەمام بوو، داكو هەر كەسێ باوەریێ بینیت، راستداریێ وەرگریت.
قورتالبوون بۆ هەمی كەسان یا هەی 
5
مووسا دەربارەی راستداریا ژ دەستووری دهێت، هۆسا دنڤیسیت: «ئەو مرۆڤێ ڤان تشتان بكەت، دێ پێ ژیت.»[a]
6
لێ راستداریا ژ باوەریێ دهێت ڤێ دبێژیت: «د دلێ خۆ دا نەبێژە: كی دێ سەركەڤیتە ئەسمانی؟» (ئانكو دا مەسیحی بینیتە خوارێ،)
7
یان ژی: «كی دێ داكەڤیتە ناڤ چاڵا بێ بن[b] ؟» (دا مەسیحی ژ ناڤ مریان سەربئێخیت.)
8
لێ چ دبێژیت؟ «پەیڤ یا نێزیكی تەیە، ل سەر ئەزمانێ تەیە و د دلێ تە دایە» (ئانكو پەیڤا باوەریێ یا ئەم رادگەهینین.)[c]
9
چنكو ئەگەر تۆ ب دەڤێ خۆ دانپێدانێ بكەی كو عیسا خودانە و ب دلێ خۆ باوەریێ بینی كو خودێ ئەو ژ ناڤ مریان راكریە، تۆ دێ قورتال بی.
10
مرۆڤ ب دلی باوەریێ دئینیت و راستدار دهێتە دەرئێخستن، ب دەڤی ژی دانپێدانێ دكەت و قورتال دبیت.
11
هەروەكو نڤیسارا پیرۆز دبێژیت: «هەر كەسێ باوەریێ پێ بینیت، ناهێتە شەرمزاركرن.»[d]
12
ژ بەر كو چ جوداهی د ناڤبەرا یێ جوهی و یێ نەجوهی دا نینە، هەمان خودان خودانێ هەمیانە، یێ مەردە بۆ هەمیێن هەوارا خۆ دگەهیننە ناڤێ وی.
13
چنكو: «هەر كەسێ هەوارا خۆ بگەهینیتە ناڤێ خودانی، دێ قورتال بیت.»[e]
14
لێ ئەو دێ چەوا هەوارا خۆ گەهیننە وی یێ وان باوەری پێ نەئینای؟ و چەوا دێ باوەریێ ب وی ئینن، یێ دەربارەی وی چ نەبهیستی؟ و چەوا دێ بهیسن بێی كو كەس بۆ وان رابگەهینیت؟
15
و ئەو دێ چەوا راگەهاندنێ كەن، ئەگەر نەهێنە هنارتن؟ هەروەكو هاتیە نڤیسین: «پێیێن وان یێن مزگینیا تشتێن باش دئینن، چەند د جوانن!»[f]
16
لێ هەمیان گوهداریا مزگینیێ نەكر، چنكو ئیشایا دبێژیت: «خودان، كێ باوەر ژ پەیاما مە كر؟»[g]
17
هۆسا باوەری ژ بهیستنێ دهێت و بهیستن ژی ب رێكا پەیاما مەسیحی دهێت.
18
لێ ئەز دبێژم: ما وان نەبهیست؟ بەلێ، وان بهیست، چنكو:
«دەنگێ وان ل هەمی ئەردی چوو
و ئاخفتنێن وان گەهشتنە كوژیێن جیهانێ.»[h]
19
ئەز دیسان دبێژم: ما ئیسرائیل د ڤێ چەندێ تێنەگەهشت؟ ل بەراهیێ مووسا دبێژیت:
«ئەز دێ چاڤپێڕانەبوونا هەوە ب رێكا وان یێن كو نەمللەتن ئازرینم
و دێ هەوە ب مللەتەكێ كۆرەفام تۆڕە كەم.»[i]
20
پاشی ئیشایا ب وێرەكی دبێژیت:
«ئەز ژ لایێ وان ڤە هاتمە دیتن یێن كو ل من نەدگەڕیان،
من خۆ بۆ وان دیار كر یێن پرسیارا من نەدكر.»[j]
21
لێ دەربارەی ئیسرائیل ئەو دبێژیت:
«ب درێژاهیا رۆژێ من دەستێن خۆ بۆ مللەتەكێ نەگوهدار و سەرهشك درێژ كرن.»[k]
  1. a. 10‏:5 پەرستن و پیرۆزی 18‏:5
  2. b. 10‏:7 q چاڵا بێ بن ب یونانی دبێژنێ ‹ئەبیسۆس›. ل فەرهەنگۆكێ بنێڕە.
  3. c. 10‏:6‏-8 گۆتارا مووسای 30‏:12‏-14
  4. d. 10‏:11 ئیشایا 28‏:16
  5. e. 10‏:13 یۆئێل 2‏:32
  6. f. 10‏:15 ئیشایا 52‏:7
  7. g. 10‏:16 ئیشایا 53‏:1
  8. h. 10‏:18 زەبوور 19‏:4
  9. i. 10‏:19 گۆتارا مووسای 32‏:21
  10. j. 10‏:20 ئیشایا 65‏:1
  11. k. 10‏:21 ئیشایا 65‏:2