عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
زاڵبوون ل سەر ئەزمانی 
1
بلا گەلەك ژ هەوە نەبنە مامۆستا، برایێن من، چنكو هوین دزانن ئەم مامۆستا دێ دادكرنەكا مەزنتر وەرگرین.
2
ئەم هەمی د گەلەك تشتان دا دهەلنگڤین. ئەگەر ئێك د ئاخفتنا خۆ دا نەهەلنگڤیت، ئەو مرۆڤەكێ كاملە، دشێت لەشێ خۆ هەمیێ ژی لغاڤ بكەت[a] .
3
ئەگەر ئەم دەڤێ هەسپان لغاڤ كەین دا ب حەزا مە بكەن، ئەم دشێین بەرێ هەمی لەشێ وان ژی بدەینە وی لایێ مە بڤێت.
4
هەروەسا ل گەمیان ژی بنێڕن: سەرەڕای كو ئەو هند د مەزنن و ب بایێن ب هێز دهێنە هاژوتن، لێ گەمیڤان ب دەستكەكێ بچویك یێ ئاراستەكرنێ بەرێ وان ددەتە وی لایێ وی بڤێت.
5
ب ڤی شێوەی ئەزمان ژی ئەندامەكێ بچویكە، لێ تشتێن ژ خۆ مەزنتر دبێژیت. بنێڕن ئاگرەكێ بچویك، دارستانەكا چەندا مەزن دسوژیت!
6
ئەزمان ژی ئاگرە. ئەزمان د ناڤ ئەندامێن لەشێ مە دا وەكو جیهانەكا خرابیێ هاتیە دانان، هەمی لەشی دهەڕمینیت و ئاگری بەرددەتە بازنێ ژیانا مرۆڤی و ئاگرێ وی ب خۆ ژی ژ دۆزەخێ بەردبیتێ.
7
هەر جۆرەكێ گیانەوەرێن چوار پێ و باڵندە و خشۆك و یێن ئاڤی ژ لایێ مرۆڤی ڤە زاڵبوون ل سەر دهێتە كرن و هاتیە كرن.
8
لێ چ مرۆڤ نەشێن ل سەر ئەزمانی زاڵ ببن. ئەزمان خرابیەكا هارە، یێ پڕە ژ ژەهرا كوژەك.
9
ب وی ئەم پەسنا[b] خودانێ[c] باب دكەین و ب وی ژی ئەم نفرینان ل مرۆڤان دكەین، ئەوێن ل سەر وێنەیێ خودێ هاتینە ئافراندن.
10
ژ هەمان دەڤ پەسن و نفرین دەردكەڤن. برایێن من، دڤێت ئەڤ چەندە ژی یا هۆسا نەبیت.
11
ما ژ هەمان كانی ئاڤا شرین و ئاڤا تەحل دزێت؟
12
برایێن من، ما دارهژیر دشێت زەیتونان بدەت، یان ژی مێو دشێت هژیران بدەت؟ وەسا ژی كانیا ئاڤا سویر نەشێت ئاڤا شرین بزێت.
ئاقلمەندیا راستەقینە 
13
د ناڤ هەوە دا كی یێ ئاقلمەند و تێگەهشتیە؟ بلا ب رەفتارا باش نیشان بدەت كو كریارێن وی ل دویڤ دەروونبچویكیا ئاقلمەندیێ دهێنە كرن.
14
لێ ئەگەر زكڕەشیەكا تەحل و خۆپەرێسی د دلێ هەوە دا هەبیت، شانازیێ ب خۆ نەبەن و هۆسا درەوان ل راستیێ بكەن.
15
ئاقلمەندیەكا هۆسا ژ سڵال ناهێت، لێ یا ئەردكانیە[d] ، یا مرۆڤكانیە و یا ئبلیسكیە.
16
چنكو ل كیرێ زكڕەشی و خۆپەرێسی هەبن، ل وێرێ تێكدان و هەمی خرابكاری یێن هەین.
17
لێ ئەو ئاقلمەندیا ژ سڵال، ئەو بەری هەر تشتی یا پاقژە، پاشی یا ئاشتیخوازە، دلنەرمە، سەرنەرمە، پڕی دلۆڤانی و بەرهەمێ چاكە، لایەنگر نینە، بێ دووڕویاتیە.
18
چێكەرێن ئاشتیێ تۆڤێ ئاشتیێ دچینن و راستداریێ ژێ دهەلینن.
  1. a. 3‏:2 مەبەست ب لغاڤكرنێ ئەڤەیە: ئەو دشێت ل سەر هەمی لەشێ خۆ یێ زاڵ بیت.
  2. b. 3‏:9 q پەسن مەدح و سەنا
  3. c. 3‏:9 مەبەست پێ خودێیە
  4. d. 3‏:15 ئانكو یا دنیاییە