عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
جوداهیێ نەئێخنە د ناڤبەرا مرۆڤان دا 
1
برایێن من، مادەم هوین باوەریێ ب خودانێ مە عیسایێ مەسیح، خودانێ مەزناهیێ، دئینن، جوداهیێ نەئێخنە د ناڤبەرا مرۆڤان دا.
2
ئەگەر ئێك هاتە د كۆمبوونا هەوە دا، گوستیرەكا زێڕی د تبلێ بیت و جلكێن پڕبها ل بەر بن، هەروەسا ئێكێ هەژار كو كنجڕ ل بەر بن ب ژۆر كەفت،
3
ئەڤجا هەوە پویتە ب خودانێ جلكێن پڕبها دا و گۆتێ: «كەرەم كە، ل ڤێرێ ل سەرێ ژۆری روینە» و گۆتە یێ هەژار: «تۆ ل وێرێ راوەستە» یان «ل بەر پێیێن من روینە،»
4
ما هەوە د ناڤبەرا خۆ دا جوداهی نەكر؟ ما هوین نەبوونە دادوەرێن هزر خراب؟
5
برایێن من یێن خۆشتڤی، گوهێ خۆ بدەنێ: ما خودێ هەژارێن ڤێ جیهانێ نەهەلبژارتینە كو ب باوەریێ د دەولەمەند بن و میراتگرێن وێ پاشایەتیێ بن، ئەوا سۆزا وێ دایە وان یێن حەز ژ وی دكەن؟
6
لێ هەوە یێ هەژار بێڕێز كر. ما نە دەولەمەندن یێن زۆرداریێ ل هەوە دكەن؟ ما نە ئەون هەوە رادكێشنە دادگەهان؟
7
ما نە ئەون یێن كوفریان ب وی ناڤێ باش دكەن، ئەوێ هوین پێ هاتینە بناڤكرن؟
8
ئەگەر هوین دەستوورێ پاشایانە ب جهـ بینن، ئەوێ د نڤیسارێ دا هاتی كو دبێژیت: «حەز ژ نێزیكێ خۆ بكە، وەك چەوا تۆ حەز ژ خۆ دكەی،»[a] هوین باش دكەن.
9
لێ ئەگەر هوین جوداهیێ بئێخنە د ناڤبەرا مرۆڤان دا، هوین گونەهێ دكەن و ژ لایێ دەستووری ڤە ل هەوە وەكو سەرپێچكار دهێتە حەیتاندن.
10
ئەوێ هەمی دەستووری ب جهـ بینیت، لێ د خالەكا ب تنێ دا بهەلنگڤیت، ئەڤە ئەو د هەمیێ دا یێ گونەهبارە.
11
ژ بەر كو ئەوێ گۆتی: «دەهمەنپیسیێ نەكە»، هەروەسا یێ گۆتی: «كوشتنێ نەكە»[b] . ئەڤجا ئەگەر تە دەهمەنپیسی نەكر، لێ كوشتن كر، ئەڤە تۆ بوویە سەرپێچكار ل سەر دەستووری.
12
هۆسا بئاخڤن و هۆسا كار بكەن وەكو وان یێن كو دێ ب دەستوورێ ئازادیێ هێنە دادكرن.
13
چنكو دادكرن یا بێ دلۆڤانیە بۆ وی یێ دلۆڤانی نەبری، لێ دلۆڤانی ب سەر دادكرنێ دكەڤیت.
باوەری و كریار 
14
چ مفا تێدایە، برایێن من، ئەگەر ئێك بێژیت كو وی باوەریا هەی، لێ وی كریار نینن، ئایا باوەری دشێت وی قورتال بكەت؟
15
ئەگەر برایەك یان خویشكەك رویس ما و نانێ رۆژانە نەبیت
16
و ئێك ژ هەوە بێژیتە وان: «ب خێر بچن، خۆ گەرم كەن و تێر بخۆن»، لێ هەوە هەوجەییێن وان یێن لەشی نەدانێ، چ مفا تێدایە؟
17
ب هەمان شێوە باوەریا ب تنێ ژی، ئەگەر یا بێ كریار بیت، ئەو یا مریە.
18
دبیت ئێك ببێژیت: «تە باوەریا هەی و من كریار یێن هەین.» لێ ئەز دێ بێژم: كا باوەریا خۆ بێی كریار نیشا من بدە و ئەز دێ ب كریارێن خۆ باوەریا خۆ نیشا تە دەم.
19
تۆ باوەر دكەی كو خودێ ئێكە، تۆ باش دكەی. خۆ ئەجنە ژی باوەر دكەن و دلەرزن.
20
ما تە بەلگە دڤێن، هەی مرۆڤێ بێئاقل، كو باوەری بێی كریار یا بێمفایە؟
21
ما بابێ مە ئیبراهیم ب كریاران راستدار[c] نەهاتە دەرئێخستن، دەمێ كوڕێ خۆ ئیسحاق ل سەر قوربانگەهێ پێشكێش كری؟[d]
22
تۆ دبینی كو باوەریێ ل گەل كریارێن وی كار دكر و ب كریاران باوەری هاتە تەمام كرن.
23
هۆسا گۆتنا نڤیسارێ ب جهـ هات: «ئیبراهیمی باوەر ژ خودێ كر، ئەڤە ژی بۆ وی وەكو راستداری هاتە هژمارتن»[e] و ب دۆستێ خودێ هاتە بناڤكرن.
24
هوین دبینن كو مرۆڤ ب كریاران دهێتە راستدار كرن، نە ب تنێ ب باوەریێ.
25
ب هەمان شێوە ژی راحابا لەشفرۆش، ما ب كریاران راستدار نەهاتە هژمارتن، دەمێ هنارتی[f] قەبیل كرین و د رێكەكا دی را ب رێ ئێخستین؟
26
ئەڤجا كا چەوا لەش بێی گیان یێ مریە، وەسا باوەری ژی بێی كریار یا مریە.
  1. a. 2‏:8 پەرستن و پیرۆزی 19‏:18
  2. b. 2‏:11 دەركەفتن 20‏:13‏-14؛ گۆتارا مووسای 5‏:17‏-18
  3. c. 2‏:21 ئانكو بێگونەه
  4. d. 2‏:21 دەستپێكرن 22‏:1‏-14
  5. e. 2‏:23 دەستپێكرن 15‏:6؛ رۆما 4‏:3؛ گالاتیا 3‏:6
  6. f. 2‏:25 مەبەست پێ ئەو سیخوڕ بوون یێن یەشوعێ كوڕێ نوونی هنارتین دا رەوشا ئەریحا بزانن. بنێڕە یەشوع 2‏:1‏-22؛ 6‏:22‏-25