عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
د حەزژێكرنێ دا بژین 
1
ژ بەر ڤێ چەندێ، وەكو زاڕۆكێن خۆشتڤی، چاڤلێكرنا خودێ بكەن.
2
د حەزژێكرنێ دا بژین، هەروەكو مەسیحی ژی حەز ژ مە كری و خۆ گۆری مە كری، ژ پێخەمەت مە بوویە قوربان و پێشكێشیەكێ بێهنخۆش بۆ خودێ.
3
لێ بلا دەهمەنپیسی و هەمی جۆرێن پویچاتیێ یان چاڤبرساتی ب ئێكجاری[a] د ناڤ هەوە دا نەبن، چنكو ئەو نە ژ هەژی پیرۆزكریانە.
4
هەروەسا بلا ئاخفتنێن بێشەرم و دەبەنگانە، یان تڕانەیێن بێتۆرە یێن بكێرنەهاتی نەبن، لێ ل شوینا وان بلا سوپاسیكرنا خودێ هەبیت.
5
ڤێ چەندێ باش بزانن: چ مرۆڤێن دەهمەنپیس، یان نەپاك، یان چاڤبرس (ئانكو كەسەكێ پووتپەرێس[b] )، وان د پاشایەتیا مەسیحی و خودێ دا میرات نینە.
زاڕۆكێن رۆناهیێ 
6
نەهێلن چ كەس هەوە ب ئاخفتنێن ڤاڵا بخاپینیت، چنكو ژ بەر ڤان تشتان تۆڕەبوونا خودێ ب سەر مرۆڤێن نەگوهدار[c] دا دهێت.
7
لەوما هوین نەبنە پشكدارێن وان.
8
چنكو دەمەكی هوین تاری بوون، لێ نوكە هوین ب ئێكبوونا ل گەل خودانی رۆناهینە. ئەڤجا وەكو زاڕۆكێن رۆناهیێ بژین
9
(ژ بەر كو بەرهەمێ رۆناهیێ هەمی جۆرێن باشی و راستی و دروستیێنە)
10
و بزاڤێ بكەن كو بزانن كا چ تشت خودانی رازی دكەت.
11
پشكداریێ د كارێن تاریێ یێن بێبەرهەم دا نەكەن، بەلكو وان بەرچاڤ بكەن.
12
چنكو كارێن ئەو ب نهێنی دكەن، فهێتە كو بهێنە بەحسكرن ژی.
13
لێ هەر تشتێ ب رۆناهیێ بهێتە بەرچاڤكرن، ئەو ئاشكرا دبیت.
14
چنكو هەر تشتێ ئاشكرا ببیت، دبیتە رۆناهی. لەوما دهێتە گۆتن:
«هەی نڤستی، هشیار ببە!
ژ ناڤ مریان رابە و
مەسیح دێ رۆناهیێ دەتە تە.»[d]
15
ژ بەر هندێ ب هشیاری لێ بنێڕن كا هوین چەوا دژین، نە وەكو نەزانان، لێ وەكو ئاقلمەندان.
16
دەرفەتا ڤی دەمی ژ دەست نەدەن، چنكو رۆژ دبەدكارن.[e]
17
لەوما خۆ مەژی هشك نەكەن، لێ تێبگەهن كا حەزا خودانی چیە.
18
ب شەرابێ سەرخۆش نەبن، چنكو سەربەردان یا تێدا، بەلكو ب گیانێ پیرۆز پڕ ببن.
19
بۆ ئێكودوو زەبوور، سروود و سترانێن روحانی ببێژن، ژ دلێ خۆ بۆ خودانی بسترن و موزیكێ بژەنن.[f]
20
هەردەم بۆ هەمی تشتان، ب ناڤێ خودانێ مە عیسایێ مەسیح، سوپاسیا خودایێ باب بكەن.
21
ژ بەر ترسا خۆ ژ مەسیحی ملكەچی ئێكودوو بن.
پەیوەندیێن ژن و مێران 
22
گەلی ژنان، هەر ئێك ژ هەوە ملكەچی مێرێ خۆ بیت، كا چەوا هوین ملكەچی خودانی دبن.[g]
23
چنكو مێر سەرێ ژنێیە، كا چەوا مەسیح سەرێ كەنیسەیێیە و ئەو ب خۆ قورتالكەرێ لەشیە[h] .
24
ئەڤجا كا چەوا كەنیسە ملكەچی مەسیحیە، وەسا ژن ژی د هەمی تشتان دا ملكەچی مێرێ خۆ بیت.
25
گەلی مێران، هەر ئێك ژ هەوە حەز ژ ژنا خۆ بكەت، كا چەوا مەسیحی حەز ژ كەنیسەیێ كر و خۆ گۆری وێ كر،[i]
26
دا وێ ب شویشتنێ ب ئاڤێ ئانكو ب پەیڤێ پاقژ بكەت و هۆسا وێ پیرۆز بكەت،
27
دا وێ وەكو كەنیسەیەكا شۆخ و شەنگ پێشكێشی خۆ بكەت، یا بێ پنی و بێ قورمچین و هەر تشتەكێ هۆسا بیت، لێ یا پیرۆز و بێكێماسی بیت.
28
ب ڤی شێوەی، دڤێت مێر وەكو لەشێ خۆ حەز ژ ژنا خۆ بكەن. ئەوێ حەز ژ ژنا خۆ بكەت، ئەو حەز ژ خۆ دكەت.
29
چنكو چ جاران كەسێ كەرب ژ لەشێ خۆ ڤەنەبوویە، بەلكو ئەو لەشێ خۆ ب خودان دكەت و چاڤێ خۆ ددەتێ، هەروەكو مەسیح ژی ل گەل كەنیسەیێ دكەت.
30
چنكو ئەم ئەندامێن لەشێ وینە.
31
«ژ بەر ڤێ چەندێ زەڵام دێ دایك و بابێن خۆ هێلیت و ب ژنا خۆ ڤە نویسیێت و دێ هەردوو بنە ئێك لەش.»[j]
32
ئەڤە نهێنیەكا كویرە و مەبەستا من پێ مەسیح و كەنیسەیە.
33
لێ پێدڤیە هەر ئێك ژ هەوە ژی حەز ژ ژنا خۆ بكەت، هەروەكو حەز ژ خۆ دكەت و پێدڤیە ژن رێزێ ل مێرێ خۆ بگریت.
  1. a. 5‏:3 ب یونانی دبێژیت: خۆ ناڤ لێ نەهێتە ئینان.
  2. b. 5‏:5 صەنەمپەرێس
  3. c. 5‏:6 ب یونانی دبێژیت: كوڕێن نەگوهداریێ
  4. d. 5‏:14 بنێڕە: ئیشایا 26‏:19؛ 60‏:1
  5. e. 5‏:16 كۆلۆسی 4‏:5
  6. f. 5‏:19 كۆلۆسی 3‏:16‏-17
  7. g. 5‏:22 كۆلۆسی 3‏:18؛ 1 پەترۆس 3‏:1
  8. h. 5‏:23 مەبەست ژ ‹لەش›ی، كەنیسەیە.
  9. i. 5‏:25 كۆلۆسی 3‏:19؛ 1 پەترۆس 3‏:7
  10. j. 5‏:31 دەستپێكرن 2‏:24