عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ل گزیرتەیا ماڵتایێ 
1
پشتی ئەم قورتال بووین، مە زانی كو ناڤێ گزیرتەیێ ماڵتایە.
2
خەلكێ وێ جوامێریەكا كێم وێنە ل گەل مە كر، وان بخێرهاتنا مە كر و ئاگر هەلكر، چنكو بارانێ دەست پێ كربوو و سەرما بوو.
3
دەمێ پاولۆسی بەرملەكێ داران كۆمكری و هاڤێتیە د ئاگری دا، ژ بەر گەرمایێ، كورەمارەك دەركەفت و خۆ ب دەستێ وی ڤە گرت.
4
دەمێ خەلكی دیتی كورەمار ب دەستێ وی ڤە دهەژیا، گۆتە ئێكودوو: «بێگۆمان ئەڤ كەسە مێركوژە! سەرەڕای كو ئەو ژ دەریایێ قورتال بوو، ‹دادپەروەری›ێ نەهێلا ئەو بژیت.»
5
لێ پاولۆسی ئەو گیانەوەر ڤەهەژاندە د ئاگری دا و چ زیان ب وی ب خۆ نەكەفتن.
6
ئەوان چاڤەڕێ دكر كو بوەرمیت یان ژ نشكەكێ ڤە بكەڤیت و بمریت، لێ پشتی دەمەكێ درێژ چاڤەڕێ ماین و دیتی چ لێ نەهات، ئەو ژ هزرا خۆ لێڤەبوون و گۆتن: «ئەڤە خوداوەندەكە!»
7
ل دەوروبەرێن وی جهی، رەز و باغێن مەزنێ گزیرتەیێ بوون، ناڤێ وی پوپلیۆس بوو، ئەوی بخێرهاتنا مە كر و ب خۆشحالی بۆ سێ رۆژان ئەم مێڤان كرین.
8
بابێ پوپلیۆسی ژ بەر تایێ و زكچوونێ د ناڤ نڤینكان دا یێ نەساخ بوو. پاولۆس چوو نك وی و نڤێژ كر و دەستێن خۆ دانانە سەر و ساخ كر.
9
دەمێ ڤێ چەندێ روی دای، نەساخێن دی ژی یێن گزیرتەیێ دهاتنە نك وی و ساخ دبوون.
10
وان گەلەك رێز ل مە گرت و دەمێ ئەم ب رێ كەفتین، تشتێن پێدڤی بۆ مە داگرتن.
ژ ماڵتایێ بۆ رۆما 
11
پشتی سێ هەیڤان، ب گەمیەكا ئەسكەندەریێ كو پەیكەرێ «جێمك[a] »ی ل سەر بوو، ئەم ب رێ كەفتین، وێ گەمیێ زڤستان ل گزیرتەیێ بوراندبوو.
12
ئەم گەهشتینە باژێڕێ سیراكوسا و سێ رۆژان ل وێرێ ماین.
13
پاشی ئەم ژ وێرێ چووین و گەهشتینە باژێڕێ رێگیومێ. رۆژا پاشتر بایەك ژ باشووری ڤە رابوو و ل رۆژا ب دویڤ دا، ئەم گەهشتینە باژێڕێ پوتیولی.
14
ل وێرێ مە هندەك برا دیتن و داخواز ژ مە كر كو حەفت رۆژان ل نك وان بمینین. هۆسا ئەم گەهشتینە رۆمایێ.
15
ل وێرێ، دەمێ برایان گەهشتنا مە بهیستی، هەتا «گۆڕەپانا ئەپیوس» و «سێ خانە[b] »یێ بۆ پێشوازیكرنا مە دەركەفتن. گاڤا پاولۆسی ئەو دیتین، سوپاسیا خودێ كر و هاتە هاندان.
ل رۆمایێ 
16
دەمێ ئەم هاتینە رۆمایێ، دەستویری بۆ پاولۆسی هاتە دان، ل گەل وی سەربازێ زێرەڤانیێ لێ دكەت، ب تنێ ئاكنجی ببیت.
17
پشتی سێ رۆژان پاولۆسی داخوازا مەزنێن جوهیان كر، دەمێ كۆم بووین، گۆتە وان: «گەلی برا، سەرەڕای كو من چ تشت دژی مللەتی یان داب و نەریتێن بابكالێن مە ئەنجام نەداینە، لێ ل ئورشەلیمێ ئەز هاتمە گرتن و رادەستی رۆماییان هاتمە كرن.
18
وان لێپرسین ل گەل من كر و حەز دكر من بەردەن، چنكو وان چ ئەگەرێن هەژی كوشتنێ ل سەر من نەدیتن.
19
لێ دەمێ جوهی نەرازیبووین، ئەز نەچاربووم گازندەیا خۆ بگەهینمە قەیسەری، نە ژ بەر هندێ كو من سكالایا ل سەر مللەتێ خۆ هەی.
20
لەوما من هوین داخواز كرن كو هەوە ببینم و ل گەل هەوە بئاخڤم، چنكو ژ بەر هیڤیا ئیسرائیلێ، ئەز ب ڤێ زنجیرێ یێ گرێدایمە.»
21
وان بەرسڤ دا: «دەربارەی تە، مە چ نامە ژ یەهودیایێ وەرنەگرتینە، هەروەسا ژ برایێن مە ژی كەسەك نەهاتیە، كو ب خرابی دەنگوباسەكێ تە گەهاندبیتە مە یان بەحسێ تە كربیت،
22
لێ ئەم حەز دكەین ژ تە ببهیسین كا بۆچوونێن تە چنە، چنكو ئەم دزانین ل هەمی جهان ئاخفتن ل دژی ڤێ رێبازێ دهێنە گۆتن.»
23
رۆژەك بۆ وی دەستنیشانكر، ئینا گەلەك كەس هاتنە جهێ ئاكنجیبوونا وی. ئەوی ژی هەر ژ سپێدێ تا ئێڤاری، بۆ وان شڕۆڤە دكر، بۆ پاشایەتیا خودێ شاهدەیی ددا و بزاڤ دكر كو ل دویڤ دەستوورێ مووسای و نڤیسارێن پێغەمبەران، وان دەربارەی عیسای قاییل بكەت.
24
هندەك ب ئاخفتنێن وی قاییل بوون و هندەكان ژی باوەری نەئینا.
25
بیروڕایێن وان ئێك نەبوون و بەری دەركەڤن پاولۆسی ئەڤ ئاخفتنا دویماهیێ گۆتێ: «گیانێ پیرۆز ل سەر زارێ ئیشایا پێغەمبەری، راست گۆتیە بابكالێن هەوە:
26
‹هەڕە نك ڤی مللەتی و بێژێ:
هوین دێ گوهـ ڤەكری بهیسن و تێناگەهن،
دێ چاڤ ڤەكری لێ نێڕن و نابینن.
27
چنكو ئەڤ مللەتە یێ سەرهشك بووی
و گوهێن وان یێن گران بووین
و چاڤێن خۆ یێن نقاندین،
نەكو ب چاڤێن خۆ ببینن
و ب گوهێن خۆ ببهیسن
و ب مەژیێ خۆ تێبگەهن
و بزڤڕن، دا ساخ بكەم!›[c]
28
ئەڤجا بزانن، خودێ قورتالبوونا خۆ بۆ مللەتێن نەجوهی هنارت و ئەو دێ گوهداریا وی كەن!»
29
دەمێ ئەڤ ئاخفتنە گۆتی، جوهی ژ وێرێ دەركەفتن و گەنگەشەیەكا دژوار ل گەل ئێكودوو دكر.
30
پاولۆس دوو ساڵێن تەمام د وی خانی ڤە ما یێ بۆ خۆ ب كرێ گرتی، بخێرهاتنا وان هەمی كەسان دكر، یێن دهاتنە نك وی.
31
ئەوی ب وێرەكی و بێی ئاستەنگ مزگینیا پاشایەتیا خودێ رادگەهاند و دەربارەی خودان عیسایێ مەسیح فێركرن دكر.
  1. a. 28‏:11 جێمك: ئانكو هەردوو خوداوەندێن جێمك یێن یونانی، كاستور و پولوكس.
  2. b. 28‏:15 سێ خانە: ناڤێ جهەكیە دكەڤیتە باشوورێ رۆمایێ، نێزیكی 40 كیلۆمەتران یێ دویرە.
  3. c. 28‏:26‏-27 ئیشایا 6‏:9‏-10