عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پاولۆس، بەنیێ مەسیح عیسای، ئەوێ هاتیە گازیكرن دا ببیتە هنارتی و بۆ مزگینیا خودێ هاتیە تەرخانكرن،
2
ئەوا كو پێشتر د نڤیسارێن پیرۆز دا، ب رێیا پێغەمبەرێن خۆ، سۆز پێ دابوو.
3
ئەڤ مزگینیە دەربارەی كوڕێ ویە، ئەوێ ل دویڤ لەشی ژ دویندەها داوودی[a] هاتی
4
و ل گۆر گیانێ پیرۆزیێ، ب رابوونا وی ژ ناڤ مریان، ب هێزێ وەكو كوڕێ خودێ هاتیە دیاركرن. ئەو خودانێ مە عیسایێ مەسیحە.
5
ب وی مە كەرەم و هنارتیاتی وەرگرت، داكو ئەم سەخمەراتی ناڤێ وی گازی هەمی مللەتان بكەین كو باوەریێ پێ بینن و گوهداریا وی بكەن.
6
هوین ژی د ناڤ وان دانە یێن هاتینە گازیكرن كو یێن عیسایێ مەسیح بن.
7
بۆ هەمی خۆشتڤیێن خودێ یێن ل رۆمایێ، ئەوێن هاتینە گازیكرن دا ببنە پیرۆزكریێن خودێ: كەرەم و ئاشتی ژ بابێ مە خودێ و خودان عیسایێ مەسیح ل سەر هەوە بن.
حەزا پاولۆسی كو سەرەدانا رۆمایێ بكەت 
8
بەری هەر تشتی، ئەز ب رێیا عیسایێ مەسیح ژ بۆ هەوە هەمیان سوپاسیا خودایێ خۆ دكەم، چنكو باوەریا هەوە ل سەرانسەری جیهانێ یا دەنگ ڤەدای.
9
‏-10 ئەو خودایێ ئەز د مزگینیا كوڕێ وی دا، ب هەمی گیانێ خۆ خزمەتا وی دكەم، شاهدێ منە، كو ئەز د نڤێژێن خۆ دا بێ راوەستیان هەوە دئینمە بیرا خۆ و هەرگاڤ هیڤیان دكەم، ب ئانەهیا خودێ، ئێدی دەلیڤەیەك بۆ من رێك بكەڤیت، ئەز بهێمە نك هەوە.
11
چنكو ئەز گەلەك حەز دكەم هەوە ببینم، داكو ژ بۆ موكمبوونا هەوە بەهرەیەكا روحانی بدەمە هەوە،
12
ئانكو ئەم پێكڤە ب باوەریا ئێكودوو، یا هەوە و یا من، بهێینە هاندان.
13
من نەڤێت هوین ژ ڤێ چەندێ د بێ ئاگەهـ بن، گەلی خویشك و برایان، كو گەلەك جاران من ل بەر بوو بهێمە نك هەوە، دا من د ناڤ هەوە ژی دا بەرهەمەك هەبیت، وەك د ناڤ مللەتێن دی دا، لێ هەتا نوكە ئاستەنگ بۆ من چێدبوون.[b]
14
خودێ قەرەك كریە ستۆیێ من كو بدەمە یونانی و بەربەران[c] ، زانا و نەزانان.
15
ژ بەر هندێ، ئەز ب دل و گیانێ خۆ یێ ئامادەمە مزگینیێ بدەمە هەوە ژی، هوین ئەوێن ل رۆمایێ.
هێزا مزگینیێ 
16
ئەز مزگینیێ ب شەرم نابینم، ژ بەر كو ئەو هێزا خودێیە بۆ قورتالبوونێ ژ بۆ هەر كەسێ باوەریێ پێ دئینیت، ل بەراهیێ ژ بۆ یێ جوهی و پاشی ژ بۆ یێ نەجوهی[d] .
17
چنكو د مزگینیێ دا راستداریا خودێ ئاشكرا دبیت. ئەڤ راستداریە ژ دەستپێكێ هەتا دویماهیێ ب باوەریێیە، هەروەكو هاتیە نڤیسین: «یێ راستدار دێ ب باوەریێ ژیت.»[e]
تاوانا مرۆڤی 
18
ژ ئەسمانی تۆڕەییا خودێ دهێتە ئاشكرا كرن، دژی هەمی خودێنەنیاسی و خرابیا وان مرۆڤێن ب خرابیێن خۆ بۆ راستیێ دبنە ئاستەنگ،
19
ژ بەر كو ئەو تشتێن مرۆڤ بشێن ژ خودێ بزانن، بۆ وان د دیارن، چنكو خودێ بۆ وان یێن ئاشكرا كرین.
20
چنكو سالۆخەتێن وی یێن نەهێنە دیتن، ئانكو هێزا وی یا هەروهەر و خودینیا وی، هەر ژ ئافراندنا جیهانێ د دیارن، ب رێیا تشتێن دەستكرد دهێنە تێگەهشتن، ژ بەر هندێ وان بەهانە نینە.
21
سەرەڕای كو وان خودێ نیاسی، وان ئەو وەك خودێ مەزن نەكر و سوپاسیا وی نەكر، لێ هزرێن وان دخرش بوون و تاریاتیێ ب سەر مێشكێ وان یێ كۆرەفام دا گرت.
22
دەمێ وان دگۆت: «ئەم د ئاقلمەندین،» ئەو بوونە دەبەنگ[f]
23
و مەزناهیا خودایێ نەمر ب وێنە و پەیكەرێن وەكو مرۆڤێ مربار[g] ، باڵندە، گیانەوەرێن چوارپێ و خشۆكان گوهۆڕی.[h]
24
ژ بەر ڤێ چەندێ، خودێ ل دویڤ حەزێن دلێ وان، ئەو رادەستی پویچاتیێ كرن، دا ل گەل ئێك لەشێ خۆ فهێت بكەن.
25
وان راستیا خودێ ب درەوێ گوهۆڕی. یێ ئافراندی پەرست و خزمەتا وی كر، ل شوینا ئافرێندەری، ئەوێ هەروهەر پیرۆز. ئامین.
26
ژ بەر ڤێ چەندێ خودێ ئەو رادەستی گڕێن[i] شەرمزاریێ كرن. خۆ ژنكێن وان ژی پەیوەندیا سرۆشتی ب یا بەروڤاژی سرۆشتی گوهۆڕی.
27
هەروەسا زەڵامان ژی پەیوەندیا سرۆشتی یا ل گەل ژنكێ هێلا و گڕی گرتن بۆ ئێكودوو. زەڵامان ل گەل زەڵامان فهێتی كر و سزایێ د سەرداچوونا خۆ، د خۆ دا وەرگرت.
28
كا چەوا وان ب باش نەدیت خودێ د زانینا خۆ دا هەلگرن، وەسا خودێ ئەو رادەستی زێهنەكێ خراب كرن، كو ئەو كریارێن نەژێهاتی بكەن.
29
ئەو ژ هەمی نەڕاستی، خرابی، چاڤبرساتی و بەدكاریێ دپڕن و ب زكڕەشی، كوشتن، هەڤڕكی، فێلبازی و زیانخوازیێ د داگرتینە. نەكامیكەرن[j] ،
30
بوهتانكارن[k] ، كیندارێن خودێنە، بێشەرمن، دفنبلند و خۆ مەزنكەرن، داهێنەرێن خرابیێنە و گوهدارێن دایك و بابێن خۆ نینن،
31
د كۆرە فامن، بێ سۆزن، دلڕەق و نە د دلۆڤانن.
32
هەر چەندە ئەوان ئاگەهـ ژ فەرمانا خودێ یا دادپەروەرانە هەیە، كو یێن تشتێن هۆسا دكەن، ژ هەژی مرنێنە، لێ نە ب تنێ ئەو ڤان تشتان دكەن، كەیفا وان ب یێن دكەن ژی دهێت.
  1. a. 1‏:3 q دویندەها داوودی: نەسل یان زوڕیەتا داوودی. مەتتا 1‏:1‏-16
  2. b. 1‏:13 كارێن هنارتیان 19‏:21
  3. c. 1‏:14 ‹یونانی› ئەون یێن د ناڤ شارستانیێ دا دژیان. ‹بەربەر› ئەو مللەتێن ب زمانێ یونانی نەدئاخڤن و ب كەسێن دویر ژ شارستانیێ دهاتنە هژمارتن.
  4. d. 1‏:16 دەقێ رەسەن دبێژیت: ‹یێ یونانی›.
  5. e. 1‏:17 حەبەقوق 2‏:4؛ هۆسا ژی دهێتە وەرگێڕان: «یێ ب رێكا باوەریێ راستدار بیت دێ ژیت.»
  6. f. 1‏:22 q دەبەنگ: ئەحمەق
  7. g. 1‏:23 q مربار: ئانكو تۆڤێ مرنێ یێ دێ هەر مریت.
  8. h. 1‏:23 گۆتارا مووسای 4‏:15‏-18
  9. i. 1‏:26 q گڕ: ب عەرەبی ‹شهوة›
  10. j. 1‏:29 q نەكامی: بەحسكرنا ئێكی ب خرابی.
  11. k. 1‏:30 q بوهتان: تاوانباركرنا بێ بنیات