عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پاولۆس ل ئەفەسۆسێ 
1
دەمێ ئەپولوس ل كورنتۆسێ، پاولۆس د ناڤ دەڤەرێن ناڤخۆیی دا دەرباز بوو و گەهشتە ئەفەسۆسێ. ل وێرێ هندەك شاگرد دیتن
2
و گۆتە وان: «ئایا دەمێ هەوە باوەری ئینای، هەوە گیانێ پیرۆز وەرگرت؟» وان بەرسڤ دا: «نەخێر! خۆ مە گوهـ ل هەبوونا گیانێ پیرۆز ژی نەبوویە.»
3
ئەڤجا وی گۆت: «پا هوین ب چ هاتینە تافیركرن؟» وان بەرسڤ دا: «ب تافیركرنا یوحەننای!»
4
پاولۆسی گۆت: «تافیركرنا یوحەننای، تافیركرنا لخۆزڤڕینێ بوو و دگۆتە خەلكی كو فەرە باوەریێ ب وی كەسی بینن، ئەوێ دێ پشتی وی هێت، كو ئەو ژی عیسایە.»
5
دەمێ وان ئەڤ چەندە بهیستی، ب ناڤێ خودان عیسای هاتنە تافیركرن.
6
گاڤا پاولۆسی دەستێن خۆ داناینە سەر وان، گیانێ پیرۆز ب سەر وان دا هات و ب زمانێن دی ئاخفتن و پەیاما خودێ گەهاند.
7
ئەو هەمی نێزیكی دوازدە زەڵامان بوون.
8
پاولۆس چوو د كنیشتەیێ ڤە، بۆ سێ هەیڤان ب وێرەكی دئاخفت، گەنگەشە دكر و دەربارەی پاشایەتیا خودێ خەلك قاییل دكر.
9
دەمێ هندەكان ركمانێ كری و نەڤیای باوەریێ بینن و ل بەرامبەر ئامادەبوویان جڤین داینە رێبازێ[a] ، پاولۆسی ئەو هێلان و شاگرد ل گەل خۆ برن و هەر رۆژ ل فێرگەها تیرانوسی دانوستاندن دكر.
10
ئەڤ رەوشە دوو ساڵان یا بەردەوام بوو، تاكو هەمی ئاكنجیێن هەرێما ئاسیا ژ جوهی و یونانیان، پەیڤا خودانی بهیستی.
كوڕێن سكێوای 
11
خودێ حنێرێن مەزن ل سەر دەستێن پاولۆسی ئەنجام ددان،
12
هەتا كو دەستمال و بەركۆشێن دگەهشتنە لەشێ پاولۆسی، دئینان و ددانانە سەر نەساخان، نەساخی ل نك وان نەدمان و گیانێن پیس ژێ دەردكەفتن.
13
هندەك جوهیێن گەڕۆك هەبوون، ئەوێن كارێ وان دەرئێخستنا گیانێن پیس بوو، ئەوان تاقی كر كو ناڤێ خودان عیسای ل سەر ئەوێن گیانێن پیس تێدا ب كار بینن، وان دگۆت: «ئەز ب ناڤێ عیسایێ كو پاولۆس مزگینیێ پێ ددەت، فەرمانێ ل هەوە دكەم، هوین دەركەڤن!»
14
ئەڤ چەندە حەفت كوڕێن سكێوای، كو سەرۆككاهنەكێ جوهیان بوو، دكر.
15
گیانێ پیس بەرسڤا وان دا و گۆت: «ئەز عیسای دنیاسم و دەربارەی پاولۆسی ژی دزانم، لێ هوین كینە؟»
16
ئینا ئەو زەڵامێ گیانێ پیس تێدا، هێرش كرە وان و ل سەر هەمیان زاڵ بوو و شیا وان، تاكو ب رویسی و برینداری ژ وێ مالێ رەڤین.
17
ئەڤ چەندە ل ناڤ هەمی جوهی و یونانیێن ئاكنجی ل ئەفەسۆس بەڵاڤ بوو، ترس ب سەر هەمیان دا هات و ناڤێ خودان عیسای بلند دبوو
18
و گەلەك ژ ئەوێن باوەری ئینای، دهاتن و دانپێدان ب گونەهێن خۆ دكر و كریارێن خۆ ئاشكرا دكرن.
19
ژمارەیەكێ ژ ئەوێن جادووگەری كری پەرتووكێن خۆ كۆم كرن و ل بەر چاڤێن خەلكی هەمیێ سۆتن. بهایێ وان پەرتووكان هژمارت، دیار بوو كو پێنجی هزار پارچەیێن زیڤینە[b] .
20
هۆسا پەیڤا خودانی بەڵاڤ دبوو و ب هێز دكەفت.
تێكدان ل ئەفەسۆس 
21
پشتی ئەڤان تشتان رویدای، پاولۆسی بڕیار دا د دەڤەرا مەقدۆنیا و ئەخایا را دەرباز ببیت و بچیتە ئورشەلیمێ و گۆت: «پشتی كو ئەز دچمە وێرێ، پێدڤیە رۆمایێ ژی ببینم.»
22
وی دوو ژ ئەوێن هاریكاریا وی دكر، تیمۆتاوس و ئەراستوس، هنارتنە مەقدۆنیا و ئەو ب خۆ دەمەكی ل هەرێما ئاسیا ما.
23
ل وی دەمی ژ ئەگەرێ رێبازا خودانی تێكچوونەكا ب ترس پەیدا بوو.
24
زیڤنگرەك هەبوو، ناڤێ وی دیمیتریۆس بوو، وی پەیكەرێن بچویك یێن پەرستگەها خوداوەند ئارتەمیسێ ژ زیڤی چێدكرن و ڤێ چەندێ مفایەكێ نە یێ كێم دگەهاندە پیشەكاران.
25
وی ئەو پیشەكار و هەڤپیشەیێن وان كۆمكرن و گۆت: «گەلی جوامێران، هەروەكو هوین دزانن، ئەم ژ ڤی كاری دەولەمەندیێ پەیدا دكەین،
26
هەوە دیت ژی و گوهـ لێ بوو، كو ڤی پاولۆسی، نە ب تنێ ل ئەفەسۆسێ، بەلكو ل هەمی هەرێما ئاسیا، ژمارەیەكا مەزن ژ خەلكی قاییل كرینە و ژ رێ دەرئێخستینە. ئەو دبێژیت كو ئەو تشتێن ب دەستی هاتینە چێكرن نە خودێنە.
27
مەترسیا ڤێ چەندێ ژی نە ب تنێ ئەوە كو كارێ مە د چاڤێن خەلكی دا بكەڤیت، لێ پەرستگەها خوداوەندا مەزن ئارتەمیسێ ژی دێ رسوا بیت و دێ مەزناهیا وێ خوداوەندێ ژ دەست چیت، ئەوا هەمی هەرێما ئاسیا و جیهان دپەرێسن!»
28
دەمێ وان ئەڤ ئاخفتنە بهیستی، تۆڕەبوون و قێڕی راهێلان: «مەزناهی بۆ ئارتەمیسا ئەفەسۆسیان!»
29
ئینا تێكدانێ هەمی باژێڕ ڤەگرت و خەلك پێكڤە بەزینە شانویێ و گایوس و ئەرستارخۆس یێن مەقدۆنی، كو هەردوو هەڤال رێیێن پاولۆسی بوون، ل گەل خۆ راكێشان.
30
پاولۆسی ژی ڤیا بچیتە د ناڤ وی خەلكی دا، لێ شاگردان نەهێلا.
31
هەروەسا هندەك دەستهەلاتدارێن هەرێما ئاسیا ژی، كو هەڤالێن وی بوون، مرۆڤ هنارتنە نك وی و هیڤی ژێ كرن كو نەچیتە شانویێ.
32
وی دەمی هندەكان تشتەك دقیڕاند و هندەكان تشتەكێ دی، چنكو كۆمبوون تێكچوو بوو و بەهرا پتر ژ وان نەدزانی بۆچی كۆم ببوون.
33
ئینا وان ئەسكەندەر ژ ناڤ جەماوەری برە پێش، چنكو جوهیان ئەو پێشڤە پالددا، ئەڤجا ئەسكەندەری ب دەستی ئاماژە كر، وی دڤیا ل بەرامبەر خەلكی بەڕەڤانیێ ژ جوهیان بكەت.
34
دەمێ وان زانی كو ئەو جوهییە، وان نێزیكی دوو دەمژمێران ب ئێك دەنگ دقیڕاند: «مەزناهی بۆ ئارتەمیسا ئەفەسۆسیان!»
35
پاشی نڤیسكارێ باژێڕی[c] شیا خەلكی تەنا بكەت و گۆت: «گەلی ئەفەسۆسیان، كی هەیە نەزانیت كو باژێڕێ ئەفەسۆس چاڤدێرا پەرستگەها ئارتەمیسا مەزن و وی كەڤریە ئەوێ ل سەر وێنەیێ وێ ژ ئەسمانی كەفتیە خوارێ؟
36
ژ بەر كو چ ناكۆكی ل سەر ڤێ چەندێ نینە، ئەڤجا پێدڤیە هوین ل سەر خۆ بن و تشتەكی ب سەر گەرمی نەكەن.
37
ئەڤ هەردوو زەڵامێن هەوە ئیناین، نە دزیكەرێن پەرستگەهێنە و نە ژی كوفری دەربارەی خوداوەندا مە كرینە.
38
ئەڤجا ئەگەر دیمیتریۆس و پیشەكارێن ل گەل وی گازندە ل سەر كەسەكی هەبن، دادگەهـ و دادوەر یێن هەین، بلا ل وێرێ سكالایێ ل ئێك و دوو بكەن.
39
لێ ئەگەر داخوازا هەوە ژ بەر تشتەكێ دییە، ئەو دێ د روینشتنەكا یاسایی دا هێتە چارەسەركرن.
40
چنكو مەترسی هەیە كو ئەم ژ بەر رویدانێن ئەڤرۆ، ب تێكدانێ بهێینە تاوانباركرن و مە چ بەهانە بۆ ڤێ تێكچوونێ نینن!»
41
پشتی ئەڤە گۆتی، خەلك بەڵاڤ كر.
  1. a. ‏19‏:9 مەبەست پێ رێبازا مەسیحی
  2. b. ‏19‏:19 هەر زیڤەك نێزیكی كرێیا رۆژانەیا پالەیەكی بوو.
  3. c. ‏19‏:35 نڤیسكارێ باژێڕی ئێك ژ دەستهەلاتدارێن باژێڕی بوو، ئەو بەرپرسێ نڤیسینێن فەرمی بوو.