عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ل كورنتۆس 
1
پشتی هنگی پاولۆسی ئەسینا هێلا و چوو باژێڕێ كورنتۆس.
2
ل وێرێ جوهیەك دیت ناڤێ وی ئەكیلا بوو، ژ دایكبوویێ پۆنتۆسێ بوو، ژ نوی ل گەل هەڤژینا خۆ پرسكیلایێ ژ ئیتالیا هاتبوو، چنكو كلودیوسێ قەیسەر فەرمانا دەرئێخستنا جوهیان ژ رۆمایێ دابوو. پاولۆسی قەستا وان كر،
3
ل نك وان ما و ل گەل وان كار كر، چنكو هەڤپیشەیێ وان بوو، كو ئەو د كارێ خۆ دا خیڤەتڤان بوون.
4
پاولۆسی هەمی شەمبیان ل كنیشتەیێ دانوستاندن دكر و جوهی و یونانی قاییل دكرن.
5
دەمێ سیلاس و تیمۆتاوس ژ دەڤەرا مەقدۆنیا گەهشتین، پاولۆسی هەمی دەمێ خۆ بۆ مزگینیێ تەرخان كر. وی شاهدەیی بۆ جوهیان ددا كو مەسیح، عیسایە.
6
لێ دەمێ وان دژایەتیا وی كری و جڤین داینێ، وی كراسێ خۆ داقوتا و گۆتە وان: «خوینا هەوە د ستۆیێ هەوە. ئەز یێ بێ تاوانم! ژ نوكە پێڤە ئەز دێ قەستا مللەتێن نەجوهی كەم.»
7
ئەڤجا پاولۆس ژ وێرێ چوو و هاتە مالا زەڵامەكێ نەجوهی یێ خودێپەرێس ناڤێ وی تیتۆس یوستوس بوو، مالا وی ب تەنشت كنیشتەیێ ڤە بوو.
8
كریسپوسێ سەرۆكێ كنیشتەیێ ل گەل هەمی كەسێن مالا خۆ باوەری ب خودانی ئینا. گەلەك خەلكێ كورنتۆسێ ژی، یێن كو ئاخفتنا پاولۆسی دبهیست، باوەری ئینا و هاتنە تافیركرن.
9
شەڤەكێ خودانی د بینینەكێ دا گۆتە پاولۆسی: «نەترسە، لێ بئاخڤە و بێدەنگ نەبە،
10
چنكو ئەز یێ ل گەل تە و كەس دەستێ خۆ درێژ ناكەتە تە، كو تە بئێشینیت، ژ بەر كو من گەلەك مرۆڤ ل ڤی باژێڕی یێن هەین.»
11
ئێدی ساڵەك و شەش هەیڤان ل وێرێ ما و ئەو فێری پەیڤا خودێ دكرن.
12
دەمێ گالیونی[a] حوكمڕانی ل سەر هەرێما ئەخایا دكر، جوهی ب ئێك دەست دژی پاولۆسی رابوون و ئەو برە دادگەهێ.
13
وان گۆت: «ئەڤ زەڵامە مرۆڤان قاییل دكەت، كو ب ئاوایەكی بەروڤاژی دەستووری خودێ بپەرێسن.»
14
دەمێ پاولۆس دا دەست ب ئاخفتنێ كەت، گالیونی گۆتە جوهیان: «گەلی جوهیان، ئەگەر بابەت گونەهـ یان تاوانەك با، دا ئەگەر هەبیت كو ئەز بێهنا خۆ ل هەوە فرەهـ كەم.
15
لێ ئەگەر بابەت دەربارەی پەیڤ و ناڤ و دەستوورێ هەوەیە، هوین ب خۆ چارەسەر بكەن، من نەڤێت ببمە دادوەرێ ڤان تشتان!»
16
ئینا وی ئەو ژ دادگەهێ دەرئێخستن.
17
ئەڤجا وان هەمیان سوستانیسێ سەرۆكێ كنیشتەیێ گرت و ل بەر دەرگەهێ دادگەهێ قوتا. لێ گالیونی چ پویتە ب ڤێ چەندێ نەكر.
ڤەگەڕیانا پاولۆسی بۆ ئەنتاكیایێ 
18
پاولۆس گەلەك رۆژێن دی ژی ل كورنتۆسێ ما، پاشی خاترا خۆ ژ برایان خواست و ب گەمیێ بەرەڤ سوریا چوو، پرسكیلا و ئەكیلا ژی د گەل دا بوون. ئەوی ل باژێڕێ كەنخریا سەرێ خۆ تراشی، چنكو نەزرەك[b] ل سەر بوو.
19
دەمێ گەهشتینە ئەفەسۆسێ، پاولۆسی ئەو ل وێرێ هێلان و چوو د كنیشتەیا جوهیان ڤە و دانوستاندن ل گەل وان كر،
20
ئەوان ژی داخواز ژێ كر كو دەمەكێ درێژتر ل نك وان بمینیت، لێ ئەو رازی نەبوو.
21
وی خاترا خۆ ژێ خواست و گۆت: «ب ئانەهیا خودێ دێ ڤەگەڕمە نك هەوە!» و ب گەمیێ ژ ئەفەسۆسێ چوو.
22
دەمێ ل قەیسەریێ پەیا بووی، سەركەفتە ئورشەلیمێ و سڵاڤ ل كەنیسەیێ كر، پاشی خواركەفتە باژێڕێ ئەنتاكیایێ.
23
پشتی دەمەكی ل وێرێ مای، كەفتە رێ و جهـ ب جهـ ل سەر دەڤەرا گالاتیا و فریگیە گەڕیا و هەمی شاگرد بهێز ئێخستن.
ئەپولوس ل ئەفەسۆس و ئەخایا 
24
جوهیەك هاتە ئەفەسۆس، ناڤێ وی ئەپولوس بوو و ژدایكبوویێ ئەسكەندەریێ بوو، یێ زمان رەهوان و د نڤیسارێن پیرۆز دا شارەزا بوو،
25
ل سەر رێبازا خودانی هاتبوو فێركرن و ب گەرمی د ئاخفت و ب دروستی دەربارەی عیسای فێركرن دكر، هەر چەندە ب تنێ تافیركرنا یوحەننای دزانی.
26
ئەوی دەست پێ كر د كنیشتەیێ دا وێرەكانە دئاخفت. دەمێ پرسكیلایێ و ئەكیلای گوهـ لێ بووی، ئەو برە نك خۆ و رێیا خودێ بۆ وی دروستتر شڕۆڤەكر.
27
دەمێ وی بڕیار دای بچیتە هەرێما ئەخایایێ، برایان ئەو هاندا و نامەیەك بۆ وی نڤیسی، دا شاگرد وی وەرگرن. دەمێ گەهشتیە وێرێ، هاریكاریەكا مەزن بۆ وان كر، یێن ب رێكا كەرەمێ باوەری ئیناین،
28
چنكو ب هێز و ب ئاشكرایی وی دەنگێ جوهیان دبڕی و ب رێكا نڤیساران دسەلماند كو مەسیح، عیسایە.
  1. a. 18‏:12 د ناڤبەرا ساڵێن 51‏-52 ز. دا حوكمڕانێ ئەخایا بوو، كەسەكێ ناڤدار بوو ب دادپەروەریێ.
  2. b. 18‏:18 ئەو سۆزە یا مرۆڤ ددەتە خودێ و پشتی هنگی فەرە مرۆڤ ب جهـ بینیت. بنێڕە: سەرژمێری 6‏:1‏-21