عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
هنارتنا بارناباس و شائوولی 
1
ل كەنیسەیا ئەنتاكیایێ چەندین پێغەمبەر و مامۆستا هەبوون: بارناباس، شەمعونێ كو دبێژنێ نیگەر[a] ، لوكیوس ژ قەیرەوانێ، مەنایینێ كو هەر ژ زاڕۆكینی ل گەل هێرودێسێ دەستهەلاتدار[b] مەزن بووی و شائوول.
2
ل دەمێ ئەو ب رۆژی و خودان دپەرست، گیانێ پیرۆز گۆتێ: «بۆ من بارناباسی و شائوولی بۆ وی كارێ من داخوازا وان كری تەرخان بكەن.»
3
ئەڤجا وان رۆژی گرتن و نڤێژ كرن و دەستێن خۆ دانانە سەر، پاشی ئەو ب رێ ئێخستن.
ل قوبرسێ 
4
دەمێ گیانێ پیرۆز ئەو هنارتین، ژۆردا چوونە سەلوكیایێ و ب گەمیێ دەربازی قوبرسێ بوون.
5
دەمێ گەهشتینە سەلامیس[c] ، پەیڤا خودێ د كنیشتەیێن جوهیان دا راگەهاند و یوحەننا ژی بۆ هاریكاریێ ل گەل وان بوو.
6
ئەو ل هەمی گزیرتەیێ گەڕیان هەتا گەهشتینە پافوس و ل وێرێ جادووگەرەكێ جوهی دیت، ئەو پێغەمبەرەكێ درەوین بوو، ناڤێ وی باریەشوع بوو.
7
نیاسێ سەرجیوس پاولۆسێ حوكمڕان بوو، سەرجیوس پاولۆس زەڵامەكێ ژیر بوو. گازی بارناباسی و شائوولی كر و داخواز ژ وان كر كو پەیڤا خودێ بۆ وی ببێژن.
8
لێ ئێلوماسێ جادووگەر، كو وەرگێڕانا ناڤێ ویە، بەرهنگاریا وان كر، داكو بەرێ حوكمڕانی ژ باوەریێ بگوهۆڕیت.
9
لێ شائوولێ كو دبێژنێ پاولۆس، ژ گیانێ پیرۆز پڕ بوو و بەرێ خۆ دا جادووگەری و گۆت:
10
«هەی ئەوێ تژی ژ هەمی سەختەیێ و هەمی فێلبازیێ، هەی كوڕێ ئبلیسی، هەی دوژمنێ هەمی باشیێ! ما تۆ دەست ژ خواركرنا رێكێن خودانی یێن راست بەرنادەی؟
11
ئها ئەڤە دەستێ خودانی ل هنداڤی تەیە و دێ كۆرە بی و تا دەمەكی رۆناهیا رۆژێ نابینی.» د جهـ دا مژ و دومان كەفتە سەر چاڤێن وی، ئەڤجا ل واران گەڕیا داخواز دكر كو ئێك دەستێ وی بگریت و بڕێڤە ببەت.
12
دەمێ حوكمڕانی ئەڤ چەندە دیتی، باوەری ئینا و ژ بەر فێركرنا خودانی گوهشی.
ل ئەنتاكیا پیسیدیایێ 
13
پاولۆس و هەڤالێن خۆ د دەریایێ دا ژ پافوس بەرەڤ پەرگەیا پامفیلیایێ چوون. ل وێرێ یوحەننای ئەو هێلان و ڤەگەڕیا ئورشەلیمێ.
14
ئەو ژی ژ پەرگەیێ چوونە ئەنتاكیا پیسیدیایێ، ل رۆژا شەمبیێ چوونە كنیشتەیێ و روینشتنە خوارێ.
15
پشتی خواندنا دەستووری و نڤیسارێن پێغەمبەران، سەرۆكێن كنیشتەیێ هنارتە دویڤ وان و گۆتنێ: «گەلی برا، ئەگەر هەوە پەیڤەك بۆ شیرەتكرنا كۆمبوویان هەبیت، بێژن.»
16
پاولۆس رابوو و ب دەستی ئاماژە كر و گۆت:
«گەلی ئیسرائیلیان و ئەوێن دی یێن ژ خودێ دترسن، گوهێ خۆ بدەنێ:
17
خودایێ ڤی مللەتی ئانكو ئیسرائیل، بابكالێن مە هەلبژارتن و مللەتێ مە، دەمێ ئەو ل ئاوارەیێ ل ئەردێ مسرێ، مەزن كر، پاشی ب زەندەكێ هێزدار ژ وێرێ ئینانە دەر.
18
نێزیكی چل ساڵان ل بیابانێ بێهنا خۆ ل وان فرەهـ كر،
19
پاشی حەفت مللەت ل ئەردێ كەنعان وێران كرن و ئەردێ وان وەكو میرات دا گەلێ خۆ.
20
ئەڤێ هەمیێ نێزیكی چوار سەد و پێنجی ساڵان ڤەكێشا. پشتی هنگی خودێ دادوەر بۆ وان راكرن، هەتا هاتنا ساموئێل پێغەمبەری.
21
ئینا وان داخوازا پاشایەكی كر، خودێ ژی شائوولێ كوڕێ قیشی ژ هۆزا بنیامین دا وان، بۆ چل ساڵان وی پاشایەتی ل وان كر.
22
پاشی خودێ ئەو لادا و داوود كرە پاشایێ وان، ئەوێ خودێ شاهدەیی ژی بۆ دای و گۆتێ: ‹من داوودێ كوڕێ یێشای دیت، زەڵامەكێ ب دلێ من، ئەوێ دێ هەمی حەزێن من ب جهـ ئینیت.›[d]
23
ژ دویندەها[e] وی، خودێ ل گۆر سۆزا خۆ، قورتالكەرەك بۆ ئیسرائیلیان ئینا، ئەو ژی عیسایە.
24
بەری هاتنا وی، یوحەننای بۆ هەمی مللەتێ ئیسرائیل راگەهاند، كو ل خۆ بزڤڕن و بهێنە تافیركرن.
25
دەمێ یوحەننای كارێ خۆ ب دویماهی ڤە دئینا، گۆت: ‹هوین هزر دكەن ئەز كیمە؟ ئەز نە ئەوم، لێ ئەڤە ئەو دێ پشتی من هێت، ئەوێ ئەز نە هەژیمە بەندكێ پێلاڤا وی ڤەكەم.›[f]
26
گەلی برا، كوڕێن دویندەها ئیبراهیمی و ئەوێن دی یێن د ناڤ هەوە دا ژ خودێ دترسن، پەیڤا ڤێ قورتالبوونێ بۆ مە یا هاتیە هنارتن.
27
ژ بەر كو خەلكێ ئورشەلیمێ و سەرۆكێن وان ئەو نەنیاسی، لەو وان ئەو داد كر و هۆسا وان پەیڤێن پێغەمبەران، یێن هەمی رۆژێن شەمبی دهێنە خواندن، ب جهـ ئینان.
28
هەر چەندە وان ئەگەرەكێ هەژی كوشتنێ ژی نەدیت، لێ هەر داخواز ژ پیلاتۆسی كر وی بكوژیت.
29
پشتی هەمی تشتێ ل سەر هاتیە نڤیسین، ب جهـ ئیناین، ژ خاچێ ئینا خوارێ و بەرگۆڕ ڤەشارت.
30
لێ خودێ ژ ناڤ مریان راكر
31
و گەلەك رۆژان بۆ وان دیار بوو، یێن ژ دەڤەرا جەلیل ل گەل وی هاتبوونە ئورشەلیمێ و نوكە ئەو ل بەرامبەری خەلكی شاهدێن وینە.
32
ئەم ژی مزگینیێ ددەینە هەوە، كو ئەو سۆزا خودێ دایە بابكالێن مە،
33
وی بۆ مە، كوڕێن وان، ب جهـ ئینا، دەمێ عیسا ژ مرنێ راكری. هەروەكو د زەبوورا دوویێ دا هاتیە نڤیسین:
‹تۆ كوڕێ منی،
ئەڤرۆ من تۆ بوویی.›[g]
34
دەربارەی راكرنا وی یا ژ ناڤ مریان، كو ئێدی ئەو ناڤەگەڕیتە رزیبوونێ، خودێ هۆسا گۆتیە:
‹ئەز دێ وان بەرەكەتێن پیرۆز و مسۆگەر دەمە هەوە، ئەوێن من سۆز پێ دایە داوودی.›[h]
35
لەوما د زەبوورەكا دی ژی دا دبێژیت:
‹تۆ ناهێلی ئێكانێ تە یێ پیرۆز تووشی رزیبوونێ ببیت.›[i]
36
چنكو پشتی داوودی د دەمێ خۆ دا ل دویڤ حەزكرنا خودێ خزمەت كری، مر و گەهشتە بابكالێن خۆ و تووشی رزیبوونێ بوو،
37
لێ ئەوێ خودێ راكری، رزیبوون نەدیت.
38
‏-39 ئەڤجا گەلی برا، بلا ل دەڤ هەوە یا ئاشكرا بیت، كو لێبورینا گونەهان ب رێكا ڤی مرۆڤی بۆ هەوە دهێتە راگەهاندن. ب رێكا وی، هەر كەسێ باوەریێ بینیت، دێ هێتە بێگونەهكرن، ژ وان هەمی تشتێن هوین نەشیاین ب دەستوورێ مووسای، ژێ بهێنە بێگونەهكرن.
40
ئەڤجا هشیار بن، داكو ئەو تشتێ پێغەمبەران گۆتی ب سەرێ هەوە نەهێت:
41
‹بەرێ خۆ بدەنێ، گەلی تڕانەكەران!
بگوهشن و بنبڕببن،
چنكو ئەز دێ ل سەردەمێ هەوە كارەكی كەم،
كو ئەگەر ئێك بۆ هەوە بەحس بكەت، هوین ئێكجار باوەر نەكەن!›[j] »
42
دەمێ پاولۆس و بارناباس دەردكەفتن، خەلكی داخواز ژ وان كر، كو شەمبیا داهاتی ژی دەربارەی ڤی تشتی، بۆ وان بئاخڤن.
43
پشتی كۆمبوون ب دویماهی هاتی، گەلەك ژ جوهی و ئەوێن بووینە جوهی یێن خودێپەرێس ل دویڤ پاولۆسی و بارناباسی چوون. ئەو ژی بۆ وان ئاخفتن و هاندان كو د كەرەما خودێ دا بمینن.
44
د شەمبیا دی دا، نێزیكی هەمی خەلكێ باژێڕی كۆمبوون، دا گوهێ خۆ بدەنە پەیڤا خودانی.
45
دەمێ جوهیان ئەو جەماوەر دیتی، ژ چاڤپێڕانەبوونێ پڕ بوون و ب جڤینان بەرهنگاریا ئاخفتنا پاولۆسی كر.
46
هنگی پاولۆسی و بارناباسی ب وێرەكی گۆت: «پێدڤی بوو ل بەراهیێ پەیڤا خودێ بۆ هەوە هاتبا گۆتن، لێ چنكو هەوە رەتكر و دیار كر كو هوین نە هەژی ژیانا هەروهەرن، ئەڤە ئەم یێ قەستا مللەتێن نەجوهی دكەین.
47
چنكو خودانی هۆسا فەرمان یا ل مە كری:
‹من تۆ كریە رۆناهی بۆ مللەتێن دی،
دا تۆ قورتالبوونێ بگەهینییە هەر چوار كوژیێن جیهانێ.›[k] »
48
دەمێ یێن نەجوهی ئەڤ چەندە بهیستی، دلخۆش بوون و پەسنا[l] پەیڤا خودانی كرن و هەمیێن ژ بۆ ژیانا هەروهەر هاتینە دەستنیشانكرن، باوەری ئینا.
49
ئێدی پەیڤا خودانی ل هەمی دەڤەرێ بەڵاڤ بوو،
50
لێ جوهیان ژنێن خودێپەرێس یێن قەدرگران و ریهسپیێن باژێڕی هاندان و تەپەسەریەك دژی پاولۆسی و بارناباسی ئاراند و ئەو ژ دەڤەرا خۆ دەرئێخستن.
51
ئەوان ژی تۆزا پێیێن خۆ ل سەر وان داقوتا و چوونە باژێڕێ كۆنیایێ.
52
ئەڤجا شاگرد ژ دلخۆشی و ژ گیانێ پیرۆز پڕ دبوون.
  1. a. 13‏:1 نیگەر ئانكو پیست رەش
  2. b. 13‏:1 هێرودێس ئەنتیپاس، حوكمدارێ هەرێما جەلیلێ بوو یا سەر ب ئیمپراتۆریا رۆمایێ ڤە. ل فەرهەنگۆكێ بنێڕە.
  3. c. 13‏:5 سەلامیس گرنگترین باژێڕێ قوبرسێ بوو
  4. d. 13‏:22 1 ساموئێل 13‏:14؛ زەبوور 89‏:20
  5. e. 13‏:23 نەسل یان زوڕیەت
  6. f. 13‏:25 لوقا 3‏:16
  7. g. 13‏:33 زەبوور 2‏:7
  8. h. 13‏:34 ئیشایا 55‏:3
  9. i. 13‏:35 زەبوور 16‏:10
  10. j. 13‏:41 حەبەقوق 1‏:5
  11. k. 13‏:47 ئیشایا 49‏:6
  12. l. 13‏:48 مەدح و سەنا