عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ل باژێڕێ كۆنیایێ 
1
ل كۆنیایێ ژی هەمان تشت چێبوو، پاولۆس و بارناباس چوونە د كنیشتەیا جوهیان ڤە و دەست ب ئاخفتنێ كر، تاكو گەلەك جوهیان و یونانیان باوەری ئینای.
2
لێ ئەو جوهیێن باوەری نەئینای، مێشكێ نەجوهیان د سەردا بر و دژی برایان ئاراندن،
3
لەوما ئەو بۆ دەمەكێ درێژ مانە ل وێرێ و بێ ترس مزگینی ب خودانی ددا، خودانی ژی ب نیشان و مەندەهۆشیێن ل سەر دەستێ وان كرین، پەیڤا كەرەما خۆ دسەلماند.
4
خەلكێ كۆنیایێ ژی بوونە دوو پشك: هندەك ل گەل جوهیان بوون، هندەك ژی ل گەل هەردوو هنارتیان بوون.
5
هنگی هندەكێن نەجوهی و جوهیان ل گەل سەرۆكێن خۆ بڕیار دا كو هنارتیان كرێت و بەرباران بكەن،
6
ئینا وان ب وێ چەندێ زانی و رەڤینە باژێڕێن لوكاونیایێ: لیسترا و دەربە و دەوروبەرێن وان.
7
ل وێرێ دەست ب گەهاندنا مزگینیێ كر.
ل باژێڕێن لیسترا و دەربە 
8
ل لیسترا، زەڵامەكێ روینشتی هەبوو، هەر ژ ژدایكبوونا خۆ یێ فاڵنجی بوو، چ جاران بڕێڤە نەچووبوو.
9
وی گوهێ خۆ ددا ئاخفتنا پاولۆسی. پاولۆسی بەرێ خۆ دایێ و دیت كو وی باوەری یا هەی ساخ ببیت،
10
ب دەنگەكێ بلند گۆتێ: «رابە، ل سەر پێیێن خۆ راوەستە!» ئەو زەڵام راست رابوو ژ پێرڤە و دەست ب بڕێڤەچوونێ كر.
11
دەمێ ئامادەبوویان دیتی كا پاولۆسی چ كر، ب زمانێ لوكاونیایی كرنە گازی و گۆتن: «خوداوەند ل سەر شێوەیێ مرۆڤان بۆ مە هاتنە خوارێ.»
12
گۆتنە بارناباسی زەیوس و گۆتنە پاولۆسی هەرمس، چنكو ئەو ئاخفتنكەرێ سەرەكی بوو.
13
كاهنێ زەیوسی ژی، ئەوێ كو پەرستگەها وی ب رەخ باژێڕی ڤە، دەستكێن گولان و گا ئینانە د دەرگەهان دا، وی دڤیا ل گەل خەلكی بۆ هنارتیان بكەتە قوربان،
14
لێ دەمێ هەردوو هنارتیان، بارناباسی و پاولۆسی، گوهـ ل ڤێ چەندێ بووی، جلكێن خۆ دڕاندن و ب لەز چوونە نك كۆمبوویان و گازی كر
15
و گۆتن: «گەلی جوامێران، بۆچی هوین ڤێ دكەن؟ ئەم ژی وەكو هەوە مرۆڤین، مزگینیێ دگەهینینە هەوە، كو هوین ڤان تشتێن پویچ بهێلن و بۆ خودایێ زیندی ڤەگەڕن، ئەوێ ئەرد و ئەسمان و دەریا و هەر تشتێ تێدا ئافراندین،
16
ئەوێ ل سەردەمێن بوری هێلای كو هەر مللەتەك ل سەر رێیا خۆ بچیت،
17
لێ ئەوی خۆ بێ شاهد نەهێلا: چاكی كر و ژ ئەسمانی باران باراند و وەرزێن بەرهەمدار دانە هەوە، دلێ هەوە ژ خوارن و خۆشیێ تێر كر.»
18
ب ڤێ ئاخفتنێ و ل گەل هەوڵدانەكا زۆر، ئەو شیان وە ل خەلكی بكەن كو قوربانیان بۆ وان پێشكێش نەكەن.
19
پاشی هندەك جوهی ژ ئەنتاكیایێ و كۆنیایێ هاتن و خەلك قاییل كر و پاولۆس بەرباران كر تاكو ژ وان ڤە یێ مری و خڕاندە ژ دەرڤەی باژێڕی.
20
لێ دەمێ شاگرد لێ كۆم بووین، رابوو و ڤەگەڕیا باژێڕی و ل رۆژا د دویڤ دا، ل گەل بارناباسی چوو دەربە.
قاییمكرنا باوەردارێن ژ نوی باوەری ئینای 
21
پشتی مزگینی گەهاندیە خەلكێ دەربە و گەلەك ژ وان كرینە شاگرد، ڤەگەڕیانە لیسترا و كۆنیایێ و ئەنتاكیایێ،
22
وان دلێ شاگردان خورت دكر و ئەو هانددان كو د باوەریێ دا د خۆڕاگر بن و گۆتە وان: «دڤێت ئەم د گەلەك تەنگاڤیان را دەرباز ببین، دا بچینە د پاشایەتیا خودێ دا.»
23
ل هەر كەنیسەیەكێ بۆ شاگردان ریهسپی هەلبژارتن و ل گەل رۆژی گرتنێ نڤێژ كرن و هەمی دانە دەستێ خودانی، ئەوێ كو باوەری پێ ئینابوو.
ڤەگەڕیان بۆ ئەنتاكیایا سوریێ 
24
پاشی د دەڤەرا پیسیدیایێ را دەرباز بوون و گەهشتنە هەرێما پامفیلیایێ
25
و ل پەرگەیێ مزگینیا پەیڤا خودێ راگەهاند و چوونە ئەنتالیایێ.
26
ژ وێرێ ب گەمیێ ڤەگەڕیانە ئەنتاكیایێ، ئەو جهێ كو ل وێرێ رادەستی كەرەما خودێ هاتبوونە كرن، بۆ وی كارێ وان ئەنجامدای.
27
دەمێ گەهشتین، وان كەنیسە كۆم كر و بەحسێ وان هەمی تشتان كر، ئەوێن خودێ ل سەر دەستێ وان كرین و كا چەوا دەرگەهێ باوەریێ بۆ نەجوهیان ژی ڤەكر
28
و بۆ دەمەكێ درێژ ل گەل شاگردان ل وێرێ مان.