عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ پاولۆس، سیلاس[a] و تیمۆتاوسی،
بۆ كەنیسەیا سالونیكیان یا خودایێ باب و خودان عیسایێ مەسیح:
كەرەم و ئاشتی ل سەر هەوە بن.
سوپاسیكرن ژ پێخەمەت باوەریا سالونیكیان 
2
ئەم هەردەم ژ پێخەمەت هەوە هەمیان سوپاسیا خودێ دكەین و بەردەوام د نڤێژێن خۆ دا هەوە دئینینە بیرا خۆ.
3
ل بەرامبەر خودێ، بابێ مە، بێی دابڕین كریارێن هەوە یێن ژ باوەریێ و رەنجا هەوە یا ژ حەزژێكرنێ و خۆڕاگریا هەوە یا ژ هیڤیێ، ئەوا مە د خودانێ خۆ عیسایێ مەسیح دا هەی، دئینینە بیرا خۆ.
4
ئەم دزانین، گەلی برایان، خۆشتڤیێن خودێ، كو وی هوین یێن هەلبژارتین،
5
چنكو مزگینیا مە نە ب تنێ ب پەیڤان، لێ ب هێزێ ژی و ب گیانێ پیرۆز و ب پشتڕاستیەكا تەمام گەهشتیە هەوە. هوین دزانن كا ئەم د ناڤ هەوە دا چ جۆرە كەس بووین ژ پێخەمەت هەوە.
6
هەوە ژی چاڤ ل مە و خودانی كر، د ناڤ گەلەك تەنگاڤیان دا، ب دلخۆشیا ژ گیانێ پیرۆز، پەیڤ قەبیل كر،[b]
7
تاكو هوین بۆ هەمی باوەردارێن ل مەقدۆنیایێ و ئەخایایێ بووینە نموونە.
8
چنكو دەنگڤەدانا پەیڤا خودانی ژ نك هەوە دەست پێ كر، نە ب تنێ گەهشتیە مەقدۆنیایێ و ئەخایایێ، لێ دەنگوباسێ باوەریا هەوە ب خودێ ل هەمی جهان بەڵاڤ بوو و ئێدی پێدڤی نینە كو ئەم ئاخفتنەكێ ل سەر بێژین.
9
چنكو خەلكێ وان دەڤەران بەحس دكەن، كا سەرەدانا مە بۆ هەوە چ كارتێكرن هەبوو و كا چەوا هوین ژ پووتان[c] بۆ خودێ ڤەگەڕیان، دا خودایێ زیندی یێ راستەقینە بپەرێسن
10
و چاڤەڕێی كوڕێ وی بن كو دێ ژ ئەسمانان هێت، ئەوێ وی ژ ناڤ مریان راكری، عیسا، ئەوێ مە ژ تۆڕەبوونا دێ هێت قورتال دكەت.
  1. a. 1‏:1 q سیلاس ب یونانی نڤیسیە ‹سیلوانۆس› كو ئەو ژی شێوازەكێ ناڤێ سیلاسیە.
  2. b. 1‏:6 كارێن هنارتیان 17‏:1‏-9
  3. c. 1‏:9 صەنەمان