عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
كارێ پاولۆسی ل سالونیكیێ 
1
هوین ب خۆ دزانن، گەلی برا، كو هاتنا مە بۆ لایێ هەوە یا بێ مفا نەبوو،
2
لێ هەروەكو هوین دزانن، ل پێشیێ ل فیلیپی ئەم هاتینە ئازاردان و كرێتكرن، سەرەڕای هندێ مە ب خودایێ خۆ وێرەكی هەبوو كو د ناڤ بەرهنگاریەكا دژوار دا، مزگینیا خودێ بۆ هەوە رابگەهینین.[a]
3
ئەو هیڤیخوازیا ئەم دكەین، نە ژ شاشیێ و نە ژ نەپاكیێ دهێت و نە ب فێلبازیێیە،
4
لێ كا چەوا خودێ ئەم پەسەند كرین كو مزگینیێ ب مە بسپێریت، ئەم وەسا دئاخڤین، نە دا خەلكی رازی كەین، لێ دا خودێ رازی كەین، ئەوێ دلێ مە تاقی دكەت.
5
خودێ شاهدە كو مە چ جاران د گۆتنێن خۆ دا سالویسی[b] نەكریە، هەروەكو هوین دزانن، نە ژی ب دویڤ چاڤبرساتیەكا نخافتی كەفتینە،
6
نە ژی مە بزاڤ كریە كو ژ لایێ مرۆڤان ڤە بهێینە مەزنكرن، نە ژ لایێ هەوە ڤە و نە ژ لایێ كەسێن دی ڤە،
7
هەر چەندە مە ماف هەبوو وەكو هنارتیێن مەسیحی بارگرانی بین ل سەر هەوە، لێ ئەم ل گەل هەوە د دلنازك بووین، وەكو دایكەك چاڤدانا ساڤایێن خۆ دكەت.
8
ئەم هۆسا شەیدایێن هەوە بووین كو مە حەز دكر نە ب تنێ مزگینیا خودێ بدەینە هەوە، لێ ژیانا خۆ ژی، چنكو هوین بوونە خۆشتڤیێن مە.
9
رەنج و وەستیانا مە یا ل بیرا هەوە، گەلی برا، كو دەمێ مە مزگینیا خودێ بۆ هەوە رادگەهاند، مە ب شەڤ و رۆژ كار دكر دا بۆ كەسێ ژ هەوە نەبینە بارگرانی.
10
هوین شاهدن و خودێ ژی شاهدە، كا سەرەدەریا مە ل گەل هەوەیێن باوەردار چەند یا پاك و راست و بێ گازندە بوو.
11
هەروەكو هوین دزانن، ئەم بۆ هەر ئێك ژ هەوە د وەسا بووین، وەكو بابەكی بۆ زاڕۆكێن خۆ،
12
مە هوین هاندان و ل بەر دلێ هەوە دا و ل سەر ژیانا هەوە راوەستیاین، كو ب شێوەیەكی بیت یا هەژی وی خودای بیت، ئەوێ هوین بۆ پاشایەتی و مەزناهیا خۆ گازی كرین.
13
ژ بەر ڤێ چەندێ ژی ئەم بێی دابڕین سوپاسیا خودێ دكەین، چنكو دەمێ هەوە پەیڤا خودێ ژ مە بهیستی، هەوە قەبیل كر نە هەروەكو ئەو پەیڤا مرۆڤان بیت، لێ هەروەكو ئەو پەیڤا خودێ بیت، ب راستی ژی ئەو پەیڤا خودێیە كو د هەوەیێن باوەردار دا كار دكەت.
14
چنكو هوین ژی گەلی برا، كەفتنە هەمان دەردێ كەنیسەیێن خودێ یێن مەسیح عیسای ل یەهودیایێ، هەوە ژی ل سەر دەستێ هەڤوەڵاتیێن خۆ هەمان ئازار كێشان، وەكو وان ل سەر دەستێ جوهیان ئازار كێشاین،[c]
15
ئەوێن خودان عیسا و پێغەمبەر كوشتین و ئەم ژی تەپەسەر كرین. ئەو خودێ رازی ناكەن و دژی هەمی مرۆڤانە.
16
ئەو رێ نادەن كو ل گەل مللەتێن دی بئاخڤین دا قورتال ببن. ب ڤێ چەندێ ژی ئەو وەكو هەر جار چانتكێ خۆ یێ گونەهان تژی دكەن و ل دویماهیێ تۆڕەبوونا خودێ هاتە سەر وان.
پاولۆس و هەڤالێن خۆ بیریا سالونیكیان دكەن 
17
لێ ئەم، گەلی برا، پشتی بۆ دەمەكێ كورت ژ هەوە هاتینە ڤەقەتاندن -نە دلێ مە، لێ رویێ مە ژ ئێكودوو دویر كەفت- مە گەلەك بزاڤ كر، ب دلخوازیەكا مەزن، كو هەوە روی ب روی ببینین.
18
لەوما مە ڤیا -من ب خۆ وەكو پاولۆس جارەكێ و دوویان- بهێینە نك هەوە، لێ ئبلیسی رێ ل مە گرت.
19
چنكو ما هیڤی، یان دلخۆشی، یان تانجا مە یا شانازیێ ل پێشیا خودانێ مە عیسای د رۆژا هاتنا وی دا چیە؟ ما نە هوینن؟
20
بەلێ، مەزناهی و دلخۆشیا مە هوینن.
  1. a. 2‏:2 كارێن هنارتیان 16‏:19‏-24؛ 17‏:1‏-9
  2. b. 2‏:5 تەمەلق یان مەلاقی
  3. c. 2‏:14 كارێن هنارتیان 17‏:5