Isa got,
«Erd û ezman wê bibihûrin, lê peyvên min tu caran nabihûrin.»
Încîl (Mizgînî)
- Xwezikdariya Rastîn
- 1
- Îsa elalet* dîtin û hilkişiya çiyê. Çaxê rûnişt, şagirtên* wî hatin ba wî.
- 2
- Wî dest bi hînkirina wan kir û got:
- 3
- «Xwezî bi wan ên ku bi ruh belengaz in,
Çimkî Padîşahiya* Ezmanan ya wan e.[a] - 4
- Xwezî bi wan ên ku şîndar in,
Çimkî ewê bên aşkirin.[b] - 5
- Xwezî bi wan ên ku nefsbiçûk in,
Çimkî ewê erdê par bistînin.[c] - 6
- Xwezî bi wan ên ku tî û birçiyên rastdariyê ne,
Çimkî ewê bên têrkirin. - 7
- Xwezî bi wan ên ku dilbirehm in,
Çimkî dilrehmî wê li wan bê kirin. - 8
- Xwezî bi wan ên ku dilpak in,
Çimkî ewê Xwedê bibînin.[d] - 9
- Xwezî bi wan ên ku aştîker* in,
Çimkî wê ji wan re zarokên Xwedê bê gotin. - 10
- Xwezî bi wan ên ku di ber rastdariyê de mirov tengahiyê didin wan,
Çimkî Padîşahiya* Ezmanan a wan e. - 11
- Xwezî bi we, gava ku ew di ber navê min de we nizim bikin, tengahiyê bidin we û bi bêbextî her cûreyê gotinên xerab ji bo we bêjin.
- 12
- Şa bibin û dilgeş bin! Çimkî xelata we li ezmanan mezin e. Ji ber ku wan bi vî awayî tengahî da wan pêxemberên* beriya we jî.
- Xwê û Ronahî
- 13
- «Hûn xwêya dinyayê ne, lê eger xwê tama xwe winda bike, careke din ewê bi çi bê bitamkirin? Êdî bi kêrî tiştekî nayê, ji bilî ku bê avêtin derve û di bin lingên mirovan de bê perçiqandin.
- 14
- «Hûn ronahiya dinyayê ne. Bajarê ku li ser çiyê ye nikare bê veşartin.
- 15
- Ne jî kes qendîlê pêdixe û dike bin melkebê, lê belê datîne ser şamdankê ku ronahiyê bide her kesên hundir.
- 16
- Bi vî awayî bila ronahiya we jî li ber mirovan wusa şewq bide, da ku kirinên we yên qenc bibînin û pesnê Bavê* we yê li ezmanan bidin.
- Şerîet û Nivîsarên Pêxemberan
- 17
- «Nefikirin ku ez hatime Şerîetê* û nivîsarên pêxemberan* ji holê rakim. Ez nehatime ku ji holê rakim, lê ez hatime ku temam bikim.
- 18
- Beriya ku erd û ezman bibihûre, herfek an nuqteyeke biçûk ji Şerîetê winda nabe, heta ku her tişt bê cih.
- 19
- Loma kî ku ji van emran ê herî biçûk bişikêne û bi wî awayî mirovan hîn bike, wê di Padîşahiya Ezmanan de ji wî re yê herî biçûk bê gotin. Lê kî ku van emran bîne cih û hîn bike, wê di Padîşahiya Ezmanan de ji wî re mezin bê gotin.
- 20
- De îcar ez ji we re dibêjim, eger rastdariya we ne di ser a Şerîetzan* û Fêrisiyan* re be, hûn tu caran nakevin Padîşahiya Ezmanan.
- Hêrs û Mêrkujî
- 21
- «We bihîstiye ku ji pêşiyan re hatiye gotin: ‹Nekuje! Kî ku bikuje, wê bê dîwankirin*!›[e]
- 22
- Lê ez ji we re dibêjim, her kesê ku li birayê xwe hêrs bibe, wê bê dîwankirin. Û kî ku ji birayê xwe re bêje: ‹Bêmejî!› wê li ber Dîwana Bilind bê kişandin pirsyarê. Û kî ku bêje: ‹Ehmeq!› ewê agirê dojehê* heq bike.
- 23
- Loma, gava ku tu li ser gorîgehê* diyariya xwe pêşkêş dikî, eger bê bîra te ku dilê birayê te ji te maye,
- 24
- diyariya xwe li wir, li ber gorîgehê bihêle. Pêşî here bi birayê xwe re li hev were û hingê vegere, diyariya xwe pêşkêş bike.
- 25
- Hê ku tu di riya dadgehê* de yî, zû bi sûcdarkerê xwe re li hev were. An na, ewê te bide destê dadger* û dadger jî te bide destê qerdiyan û tê bikevî zîndanê.
- 26
- Bi rastî ez ji te re dibêjim, heta ku tu qurişê* dawî nedî, tu ji wê derê qet dernakevî.
- Zîna
- 27
- «We bihîstiye ku hatiye gotin: ‹Zînayê neke!›[f]
- 28
- Lê ez ji we re dibêjim, her kesê ku bi dilxwazî li jinekê binêre, ji xwe wî di dilê xwe de bi wê re zîna kiriye.
- 29
- Eger çavê te yê rastê te bixe guneh, wî derxe û ji xwe bavêje! Ji bo te çêtir e ku tu endamekî ji bedena xwe winda bikî, lê hemû bedena te nekeve dojehê*.
- 30
- Û eger destê te yê rastê te bixe guneh, wî jêke û ji xwe bavêje! Ji bo te çêtir e ku tu endamekî ji bedena xwe winda bikî, lê hemû bedena te neçe dojehê.
- Jinberdan
- 31
- «Hatiye gotin: ‹Kî ku jina xwe berde, bila kaxeza jinberdanê bide wê.›[g]
- 32
- Lê ez ji we re dibêjim, her kesê ku zîna ne tê de, ji ber sedemekî din jina xwe berde, dibe sedemê zînakirina wê. Û kî ku bi jineke berdayî re bizewice zînayê dike.
- Sondxwarin
- 33
- «We ev jî bihîstiye ku ji pêşiyan re hatiye gotin: ‹Bi derew sond nexwe û sondên xwe li ber Xudan bîne cih.›[h]
- 34
- Lê ez ji we re dibêjim, qet sond nexwin! Ne bi ezmên, çimkî ew textê Xwedê ye,
- 35
- ne jî bi erdê, çimkî binlingê wî ye, ne jî bi Orşelîmê*, çimkî ew bajarê Padîşahê Mezin e
- 36
- û ne jî bi serê xwe sond bixwe, çimkî tu nikarî mûyekî spî an reş bikî.
- 37
- Bila erêya we «Erê» be û naya we «Na» be. Ji vê zêdetir ji Yê Xerab e.
- Heyfhilanîn
- 38
- «We bihîstiye ku hatiye gotin: ‹Çav di ber çav de, diran di ber diran de.›[i]
- 39
- Lê belê ez ji we re dibêjim, li ber ê xerab ranebin. Eger yek sîleyekê li lama te ya rastê bixe, ya din jî bide ber.
- 40
- Û eger yek bixwaze te bide dadgehê û kirasê te ji te bistîne, ebayê xwe jî bi dest wî ve berde.
- 41
- Eger yek bi zorê te kîlometrekê rêve bibe, bi wî re du kîlometreyan here.[j]
- 42
- Bide wî yê ku ji te dixwaze, rûyê xwe ji yê ku ji te deyn dixwaze, nezivirîne.
- Ji Dijminên Xwe Hez Bikin
- 43
- «We bihîstiye ku hatiye gotin: ‹Ji cîranê xwe hez* bike, ji dijminê xwe nefret bike!›[k]
- 44
- Lê ez ji we re dibêjim, ji dijminên xwe hez bikin û ji bo yên ku tengahiyê didin we dua bikin,
- 45
- da ku hûn bibin zarokên Bavê* xwe yê li ezmanan. Çimkî ew tava xwe hem li ser xeraban û hem jî li ser qencan dertîne û barana xwe bi ser rast û nerastan de dibarîne.
- 46
- Eger hûn ji wan hez bikin, yên ku ji we hez dikin, ma wê xelata we çi be? Ma bacgir* jî weha nakin?
- 47
- Û eger hûn bi tenê silavê bidin birayên xwe, ma hûn ji yên din zêdetir çi dikin? Ma pûtperest* jî weha nakin?
- 48
- Loma bêkêmahî bin, çawa ku Bavê* we yê li ezmanan bêkêmahî ye.
- a. 5:3 «bi ruh belengaz» weha tê fêmkirin: «li ber Xwedê şikestî».
- b. 5:4 Binêre: Îşaya 61:2-3
- c. 5:5 Binêre: Zebûr 37:11
- d. 5:8 Binêre: Zebûr 24:3-4
- e. 5:21 Ji: Derketin 20:13; Dubarekirina Şerîetê 5:17
- f. 5:27 Ji: Derketin 20:14; Dubarekirina Şerîetê 5:18
- g. 5:31 Ji: Dubarekirina Şerîetê 24:1
- h. 5:33 Ji: Qanûna Kahîntiyê 19:12; Hejmartin 30:2
- i. 5:38 Ji: Derketin 21:24; Qanûna Kahîntiyê 24:20; Dubarekirina Şerîetê 19:21
- j. 5:41 Bi Yewnanî: «Mîlek»; mîla Romayî (Îtalya) 1478,5 metre bû.
- k. 5:43 Ji: Qanûna Kahîntiyê 19:18
