عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- سڵاڤ
- 1
- ژ من، پاولۆسێ زیندانكری ژ پێخەمەت مەسیح عیسای،
ژ برایێ مە تیمۆتاوسی ژی،
بۆ هەڤكارێ مە یێ خۆشتڤی فلیمونی، - 2
- بۆ خویشكا مە ئاپفیایێ، بۆ ئارخیپۆسێ ل گەل مە سەرباز[a] و بۆ جڤاكا باوەرداران[b] یا ل مالا هەوە كۆم دبیت[c] :
- 3
- ژ بابێ مە خودێ و ژ خودان عیسایێ مەسیح، كەرەم و ئاشتی ل سەر هەوە بن.
- سوپاسیكرنا پاولۆسی ژ بەر باوەری و حەزژێكرنا فلیمونی
- 4
- ئەز هەردەم سوپاسیا خودایێ خۆ دكەم، دەمێ تە د نڤێژێن خۆ دا دئینمە بیرا خۆ،
- 5
- چنكو ئەز حەزژێكرنا تە بۆ هەمی پیرۆزكریان و باوەریا تە ب خودان عیسای دبهیسم.
- 6
- ئەز د نڤێژان دا داخواز دكەم كو پشكداریا تە د باوەریێ دا یا كاریگەر بیت، دا تۆ كویرتر د هەمی تشتێن باش بگەهی، یێن مە ژ پێخەمەت مەسیحی هەین.
- 7
- ئەز ژ بەر حەزژێكرنا تە گەلەك دلخۆش بووم و هاتمە هاندان، چنكو دلێ پیرۆزكریان ب تە، هەی برا، گەش بوویە.
- هیڤیكرنا پاولۆسی بۆ ئۆنیسیمۆسی
- 8
- لەوما، هەر چەندە من ب مەسیحی هەمی بستەهیا هەی كو دەربارەی وی تشتێ پێدڤیە بكەی، فەرمانێ ل تە بكەم،
- 9
- لێ بۆ من خۆشترە كو ئەز ب حەزژێكرنێ هیڤیێ ژ تە بكەم. ئەز، پاولۆسێ پیرەمێر و نوكە ژی یێ زیندانكری ژ پێخەمەت مەسیح عیسای،
- 10
- دەربارەی كوڕێ خۆ ئۆنیسیمۆسی[d] هیڤی ژ تە دكەم، ئەوێ ئەز د قەیدێ دا بۆ وی بوویمە باب.[e]
- 11
- دەمەكی ئەو بۆ تە یێ بكێرنەهاتی بوو، لێ نوكە ئەو بۆ تە و بۆ من ژی یێ بكێرهاتیە.[f]
- 12
- ئەز وی، ئانكو جەگەرا خۆ، بۆ تە دهنێرمەڤە.
- 13
- من حەز دكر وی ل نك خۆ بهێلم، دا دەمێ ئەز ژ پێخەمەت مزگینیێ د قەیدێ دا، ل شوینا تە خزمەتا من بكەت،
- 14
- لێ من نەڤیا ئەز بێی دلێ تە تشتەكی بكەم، دا ئەڤ چاكیا تە ژ نەچاری نەبیت، لێ ژ دل بیت.
- 15
- بەلكو ژ بەر وێ چەندێ ئەو بۆ دەمەكێ كورت ژ تە جودا بوو، دا تۆ بۆ هەتا هەتایێ وی وەرگریەڤە،
- 16
- ئێدی نەوەكو بەنی، لێ ژ بەنیەكی زێدەتر، وەكو برایەكێ خۆشتڤی، ب تایبەت بۆ من، ئەڤجا بۆ تە هێشتا پتر، كو ئەو د لەشی دا بەنیێ تەیە و د ئێكبوونا ل گەل خودانی دا برایە.
- 17
- ئەڤجا ئەگەر تۆ من ب هەڤپشكێ خۆ ددانی، وی قەبیل بكە هەروەكو تۆ من قەبیل دكەی.
- 18
- ئەگەر وی د تشتەكی دا زیان ل تە كربیت یان قەرەكێ تە ل سەر بیت، ل سەر من بنڤیسە.
- 19
- ئەز پاولۆس، ڤێ ب دەستێ خۆ دنڤیسم: ئەز دێ وی قەری ل تە ڤەگەڕینم. من نەڤێت بێژمە تە كو تۆ ب ژیانا خۆ قەردارێ منی.
- 20
- بەلێ، برایێ من! بلا ل سەر خاترا خودانی ئەز مفایەكی ژ تە ببینم، من د ئێكبوونا ل گەل مەسیحی دا دلگەش بكە.
- 21
- ئەز ژ گوهداریا تە یێ پشتڕاستم، لەوما من بۆ تە نڤیسی، دزانم كو تۆ دێ پتر ژ وێ كەی یا ئەز دبێژم.
- 22
- ل گەل ڤێ چەندێ، ژۆرەكێ بۆ مێڤانكرنا من ئامادە بكە، چنكو ئەز هیڤیدارم ب نڤێژێن هەوە، بۆ هەوە بهێمە بەخشین.
- سڵاڤ و خاترخواستن
- 23
- ئێپافراس، ئەوێ ژ پێخەمەت مەسیح عیسای ل گەل من د زیندانێ دا، سڵاڤان ل تە دكەت.
- 24
- هەڤكارێن من مەرقۆس، ئەرستارخۆس، دیماس و لوقا ژی سڵاڤان ل تە دكەن.
- 25
- كەرەما خودان عیسایێ مەسیح ل گەل گیانێ هەوە بیت.
- a. 1:2 پاولۆسی خەباتا خۆ وەكو جەنگەكا روحانی ددیت. بنێڕە ئەفەسۆس 6:10-20
- b. 1:2
q جڤاكا باوەرداران: ئانكو كەنیسە. ل فەرهەنگۆكێ بنێڕە جڤاك*. - c. 1:2 كۆلۆسی 4:17
- d. 1:10 كۆلۆسی 4:9
- e. 1:10 مەبەست پێ: ژ لایێ باوەریێ ڤە بوویمە بابێ وی
- f. 1:11 رامانا ناڤێ ‹ئۆنیسیمۆس› ب زمانێ یونانی ئانكو ‹یێ بكێرهاتی›.
