عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- عیسا ل نك پیلاتۆسی
- 1
- دەمێ بوویە سپێدە، سەرۆكێن كاهنان و ریهسپی و مامۆستایێن دەستووری و جڤاتا بلند هەمی كەفتنە دانوستاندنێ، پاشی عیسا گرێ دا و بر و رادەستی پیلاتۆسی كر.
- 2
- ئینا پیلاتۆسی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.»
- 3
- سەرۆكێن كاهنان ئەو ب گەلەك تشتان تاوانبار كر.
- 4
- پیلاتۆسی جارەكا دی پرسیار ژێ كر و گۆت: «ما تۆ چ بەرسڤان نادەی؟ گوهێ خۆ بدێ یێ چەند تاوانان ئاراستەی تە دكەن!»
- 5
- لێ عیسای چ بەرسڤێن دی نەدان و پیلاتۆس حێبەتی بوو.
- دادكرنا عیسای ب مرنێ
- 6
- ژ نەریتێن پیلاتۆسی ئەو بوو ل هەر جەژنەكێ گرتیەكی كو خەلك دخوازیت، ئازاد بكەت.
- 7
- زەڵامەكێ زیندانكری ب ناڤێ باراباس هەبوو ل گەل كۆمەكا تێكدەران، ئەوێن د دەمێ یاخیبوونێ دا كوشتن كری.
- 8
- جەماوەر هات و داخواز ژ پیلاتۆسی كر، كو وێ بكەت ئەوا هەردەم بۆ وان دكر،
- 9
- ئینا گۆتە وان: «ئەرێ هەوە دڤێت ئەز پاشایێ جوهیان بۆ هەوە ئازاد بكەم؟»
- 10
- چنكو وی دزانی سەرۆكێن كاهنان ژ زكڕەشی عیسا رادەستی وی كریە.
- 11
- لێ سەرۆكێن كاهنان جەماوەر ئازراند بۆ داخوازا ئازادكرنا باراباسی ل شوینا عیسای.
- 12
- ئەڤجا پیلاتۆسی دیسان پرسیار ژ وان كر: «پا هەوە دڤێت ئەز چ ل وی بكەم یێ هوین دبێژنێ پاشایێ جوهیان؟»
- 13
- ئینا ل قێڕیان دان و گۆتن: «ل خاچێ بدە!»
- 14
- پیلاتۆسی گۆتە وان: «ما ئەڤی چ خرابی كریە؟» ئینا قێڕیێن وان بلندتر لێ هاتن: «ل خاچێ بدە!»
- 15
- لێ چنكو پیلاتۆسی دڤیا جەماوەری رازی بكەت، ئینا باراباس بۆ وان ئازاد كر و عیسا قامچی دا، پاشی رادەستی وان كر داكو بهێتە خاچدان.
- سەرباز تڕانەیان ب عیسای دكەن
- 16
- پاشی سەربازان عیسا برە د ناڤ حەوشا كۆچكا والی دا و هەمی بەتالیون[a] گازی كر، دا كۆم ببن.
- 17
- وان كوركەكێ بنەفشی[b] كرە بەر و تانجەك ژ ستریان ڤەهاند و دانا سەر سەرێ وی
- 18
- و دەست ب سڵاڤكرنێ ل وی كر و گۆت: «بژی پاشایێ جوهیان!»
- 19
- ب لەڤەنەكی ددانا سەرێ وی و تف دكرێ و چۆكڤەدان و بۆ وی سوجدە دبرن.
- 20
- پشتی تڕانە پێ كرین، كوركێ بنەفشی ژ بەر كر و جلكێن وی كرنە بەر و برە ژ دەرڤە، دا ل خاچێ بدەن.
- عیسا ل سەر خاچێ
- 21
- زەڵامەكێ قەیرەوانی ب رێكا خۆ ژ ئاقاری دهات، ناڤێ وی شەمعون بوو و بابێ ئەسكەندەری و روفۆسی بوو. وان ئەو نەچار كر كو خاچا عیسای هەلگریت.
- 22
- عیسا ئینا وی جهێ دبێژنێ گۆلگۆتە (كو رامانا وی كلۆخە)
- 23
- و بۆ وی شەرابەكا تێكهەل ل گەل موڕێ[c] ئینا، لێ وی ڤەنەخوار.
- 24
- ئەو ل خاچێ دا و جلكێن وی ل خۆ لێكڤەكرن، ب هاڤێتنا پشكێ، دا هەر ئێك بەهرا خۆ بزانیت.[d]
- 25
- دەمژمێر نەهێ رۆژێ بوو، دەمێ ل خاچێ دای.
- 26
- ل سەر دەپەكی تاوانا وی هۆسا هاتبوو نڤیسین: «پاشایێ جوهیان»
- 27
- و دوو قاچاخ ژی ل گەل وی ل خاچێ دان، ئێك ل لایێ وی یێ راستێ و یێ دی ل لایێ وی یێ چەپێ.
- 28
- ئەو نڤیسار ژی ب جهـ هات: «ل گەل تاوانباران هاتە هژمارتن.»[e]
- 29
- یێن كو د وێرێ را دهاتن و دچوون ئەو كرێت دكر و سەرێ خۆ لێ دهەژاند و دگۆت: «ها! هەی ئەوێ دا پەرستگەهێ د سێ رۆژان دا هەڕفینیت و ئاڤا كەتەڤە!
- 30
- ژ خاچێ وەرە خوار و خۆ قورتال بكە!»
- 31
- هەروەسا سەرۆكێن كاهنان ل گەل مامۆستایێن دەستووری ژی تڕانە پێ دكرن و دگۆتنە ئێكودوو: «هندەكێن دی قورتال كرن، لێ نەشێت خۆ قورتال بكەت!
- 32
- بلا مەسیح، پاشایێ ئیسرائیلێ، ژ خاچێ بهێتە خوارێ، دا ببینین و باوەریێ پێ بینین!» هەروەسا ئەوێن ل گەل وی هاتینە خاچدان ژی ئەو فهێت دكر.
- مرنا عیسای
- 33
- دەمێ بوویە دەمژمێر دوازدەی نیڤرۆ، ژ وی دەمی تا دەمژمێر سێ، تاریاتیێ هەمی ئەرد گرت.
- 34
- ل دەمژمێر سێ، عیسای ب دەنگەكێ بلند كرە هەوار: «ئێلۆیی، ئێلۆیی، لەما ساباختانی؟» رامانا وێ ئەوە كو: «خودایێ من، خودایێ من، بۆچی تە ئەز هێلام؟»[f]
- 35
- هندەك ژ ئامادەبوویان گوهـ ل وی بوو و گۆتن: «ئەڤە ئەو یێ گازی ئلیاسی دكەت!»
- 36
- ئێكی كرە غار و ئیسفەنجەك د سهكێ[g] هەلاند و دانا سەر لەڤەنەكی و گەهاندە وی دا ڤەخۆت و گۆت: «بهێلن دا ببینین كا دێ ئلیاس هێت وی ئینیتە خوار؟»
- 37
- عیسای ب دەنگەكێ بلند كرە قێڕی و گیانێ خۆ ژ دەست دا.
- 38
- پەردەیا پەرستگەهێ ژ سەری تا بنی شەق بوو و بوو دوو پارچە.
- 39
- سەرلەشكەر بەرامبەر خاچێ یێ راوەستیای بوو و دەمێ دیتی كا چەوا عیسای گیان ژ دەست دا، گۆت: «ب راستی، ئەڤ مرۆڤە كوڕێ خودێ بوو.»
- 40
- هەروەسا هندەك ژنكان ژ دویر ڤە بەرێ خۆ ددایێ، مەریەما مەجدەلی و مەریەما دایكا هەردوو برا یەعقوبێ بچویك و یوسی، هەروەسا سالومە ژی د ناڤ وان دا بوون،
- 41
- ئەوێن ل جەلیل ب دویڤ كەفتین و خزمەتا وی كری، ژبلی وان گەلەك ژنكێن دی ژی بوون یێن ل گەل وی سەركەفتینە ئورشەلیمێ.
- ڤەشارتنا عیسای
- 42
- دەمێ بوویە ئێڤار، ژ بەر كو رۆژا ئامادەكرنێ[h] بوو، ئانكو رۆژا بەری شەمبیێ،
- 43
- یوسڤێ ئاریمەتیایی[i] هات، ئەو ژی ئەندامەكێ رێزدار بوو د ناڤ جڤاتا بلند دا و چاڤەڕێیا پاشایەتیا خودێ دكر، وی مێرانی كر و چوو نك پیلاتۆسی و داخوازا تەرمێ عیسای ژێ كر.
- 44
- پیلاتۆس گوهشی بوو كو ئەو هۆسا زوی مر و گازی سەرلەشكەری كر و ژێ پرسی: «ئەرێ راستە ئەو هۆسا زوی مریە؟»
- 45
- و دەمێ ژ سەرلەشكەری زانی، رێ دا یوسڤی تەرمێ عیسای ببەت.
- 46
- وی پارچەیەكا كتانی كڕی و تەرم ژ خاچێ ئینا خوارێ و ب وی كتانی كفن كر و دانا د گۆڕەكێ[j] د كەڤری كۆلای دا و بەرەك گڕێل كرە بەر دەرێ گۆڕی.
- 47
- مەریەما مەجدەلی و مەریەما دایكا یوسی دیت، كا ل كیڤە هاتە دانان.
- a. 15:16
q بەتالیون: ئانكو فەوج - b. 15:17 ل وی سەردەمی جلكێن بنەفشی گەلەك بهاگران بوون و ژ لایێ كەسوكارێن پاشای ڤە دهاتنە ل بەر كرن.
- c. 15:23
q موڕ: روینەكێ بێهنخۆشە. ل فەرهەنگۆكێ بنێڕە. - d. 15:24 زەبوور 22:18
- e. 15:28 ئیشایا 53:12
- f. 15:34 زەبوور 22:1
- g. 15:36
q سهك: ب عەرەبی ‹خەل› - h. 15:42 ل فەرهەنگۆكێ بنێڕە رۆژا ئامادەكرنێ*.
- i. 15:43
q ئاریمەتیا: ناڤێ كەڤنێ باژێڕێ ‹رامە›یە. - j. 15:46 ل فەرهەنگۆكێ بنێڕە گۆڕ*.
