عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داهاتووی ئۆرشه‌لیم 
1
قوڕبه‌سه‌ر شاری سته‌مكاره‌كان
ئه‌وه‌ی یاخی بووه‌ و گڵاوه‌!
2
گوێی له‌ كه‌س نه‌گرت،
ته‌مبێ نه‌بوو،
پشتی به‌ یه‌زدان نه‌به‌ست،
له‌ خودای خۆی نزیك نه‌بووه‌وه‌.
3
میره‌كانی ناوه‌ڕاستی شێرن ده‌نه‌ڕێنن،
دادوه‌ره‌كانی گورگی ئێوارانن،
هیچ بۆ به‌یانی ناهێڵنه‌وه‌.
4
پێغه‌مبه‌ره‌كانی له‌خۆبایین،
خه‌ڵكانێكی ناپاكن،
كاهینه‌كانی پیرۆزگایان گڵاو كردووه‌،
ته‌وراتیان پێشێل كردووه‌.
5
یه‌زدان له‌و شاره‌دا ڕاستودروسته‌،
ناڕه‌وایی ئه‌نجام نادات.
به‌یانییان دادپه‌روه‌رییه‌كه‌ی په‌یڕه‌و ده‌كات،
كه‌موكوڕی تێدا نییه‌،
به‌ڵام سته‌مكار واتای سه‌رشۆڕی نازانێت.
تۆبه‌نه‌كردنی ئۆرشه‌لیم 
6
«نه‌ته‌وه‌كانم ڕیشه‌كێش كرد،
قه‌ڵاكانیان وێران بوون،
شه‌قامه‌كانی ئه‌وانم چۆڵ كرد،
به‌بێ ڕێبوارن،
شاره‌كانیان وێران كران،
به‌بێ مرۆڤن، بێ دانیشتووان.
7
ئینجا فه‌رمووم:
”بێگومان ئیتر لێم ده‌ترسیت و
ته‌مبێ ده‌بیت!“
هه‌تا نشینگه‌كه‌ی ڕیشه‌كێش نه‌كرێت،
هه‌موو سزای خۆم به‌سه‌ریدا ناسه‌پێنم.
به‌ڵام چالاك بوون
له‌ گه‌نده‌ڵكردنی هه‌موو كرده‌وه‌كانیان.»
8
یه‌زدان ده‌فه‌رموێت: «له‌به‌ر ئه‌وه‌ چاوه‌ڕێم بكه‌ن،
هه‌تا ئه‌و ڕۆژه‌ی هه‌ڵده‌ستم بۆ شایه‌تیدان،
چونكه‌ بڕیارم دا نه‌ته‌وه‌كان كۆبكه‌مه‌وه‌،
پاشایه‌تییه‌كان خڕبكه‌مه‌وه‌،
هه‌تا هه‌ڵچوونم به‌سه‌ریاندا هه‌ڵڕێژم،
هه‌موو گڕی تووڕه‌ییم،
به‌ ئاگری ئیره‌ییم
هه‌موو زه‌وی هه‌ڵده‌لووشێت.
چاكسازی پاشماوه‌ی ئیسرائیل 
9
«ئینجا لێوی هه‌موو گه‌لان پاك ده‌كه‌مه‌وه‌،
هه‌تا هه‌موویان به‌ ناوی یه‌زدانه‌وه‌ نزا بكه‌ن،
تاكو هاوشانی یه‌كتر خزمه‌تی بكه‌ن.
10
له‌وبه‌ری ڕووباره‌كانی كوشه‌وه‌
ئه‌وانه‌ی ده‌مپه‌رستن، گه‌له‌ په‌رتوبڵاوكراوه‌كه‌م،
دیارییه‌كانم پێشكه‌ش ده‌كه‌ن.
11
له‌و ڕۆژه‌دا به‌هۆی كرده‌وه‌كانت سه‌رشۆڕ نابیت
كه‌ پێیان له‌ من یاخی بوویت،
چونكه‌ من له‌م شاره‌ دایانده‌ماڵم،
ئه‌وانه‌ی به‌ لووتبه‌رزییان دڵخۆشن.
ئیتر ناگه‌ڕێیته‌وه‌ بۆ سه‌ر لووت به‌رزی
له‌ كێوی پیرۆزم.
12
به‌ڵام گه‌لێكت تێدا ده‌هێڵمه‌وه‌
ساده‌ و ساكار،
پشت به‌ ناوی یه‌زدان ده‌به‌ستێت.
13
پاشماوه‌ی ئیسرائیلیش چیدی خراپه‌ ناكه‌ن،
درۆ ناكه‌ن،
له‌ ده‌میاندا زمانی هه‌ڵخه‌ڵه‌تێنه‌ر نامێنێت،
چونكه‌ به‌ ئاسووده‌یی ده‌خۆن و ڕاده‌كشێن،
كه‌سیش نییه‌ بیانترسێنێت.»
14
سییۆنی كچ گۆرانی بڵێ،
ئه‌ی ئیسرائیل، هاواری خۆشی بكه‌!
به‌ هه‌موو دڵته‌وه‌ شادمان و دڵخۆشبه‌،
ئه‌ی ئۆرشه‌لیمی كچ!
15
یه‌زدان سزاكه‌ی تۆی داماڵی،
دوژمنه‌كه‌ت كشایه‌وه‌.
یه‌زدان، پاشای ئیسرائیل، له‌گه‌ڵ تۆیه‌،
جارێكی دیكه‌ له‌ خراپه‌ ناترسیت.
16
له‌و ڕۆژه‌دا به‌ ئۆرشه‌لیم ده‌گوترێت:
«ئه‌ی سییۆن مه‌ترسه‌،
ده‌ستت شل مه‌كه‌.
17
یه‌زدانی په‌روه‌ردگارت له‌گه‌ڵتدایه‌،
له‌ ڕزگاركردن قاره‌مانه‌.
به‌ شادییه‌وه‌ پێت دڵخۆش ده‌بێت،
له‌ناو خۆشه‌ویستییه‌كه‌ی ده‌تبووژێنێته‌وه‌،
به‌ گۆرانییه‌وه‌ پێت شاد ده‌بێت.»
18
«ئه‌وانه‌ی بۆ نه‌مانی جه‌ژن ده‌گریێن
له‌ تۆ دایانده‌ماڵم،
له‌مه‌ودوا شه‌رمه‌زاری هه‌ڵناگریت.
19
له‌و كاته‌دا من سزایان ده‌ده‌م
هه‌موو ئه‌وانه‌ی زه‌لیلیان كردیت؛
شه‌له‌كه‌ ڕزگار ده‌كه‌م و
ئه‌وانه‌ی دوورخراوبوونه‌وه‌ كۆیان ده‌كه‌مه‌وه‌.
ستایش و ناوبانگیان پێ ده‌به‌خشم
له‌ هه‌موو خاكێك كه‌ شه‌رمه‌زار بوون.
20
له‌و كاته‌دا كۆتان ده‌كه‌مه‌وه‌،
له‌و كاته‌دا ده‌تانگه‌ڕێنمه‌وه‌ خاكی خۆتان.
ستایش و ناوبانگتان پێ ده‌به‌خشم
له‌نێو هه‌موو گه‌لانی زه‌وی،
كاتێك ڕاپێچكراوه‌كانتان و به‌ختیاریتان
له‌به‌رچاوتان ده‌گه‌ڕێنمه‌وه‌.»
ئه‌وه‌ فه‌رمایشتی یه‌زدانه‌.