عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
بریا برای من بووای،
شیره‌خۆری مه‌مكی دایكم!
ئه‌وا له‌ ده‌ره‌وه‌ تووشت ده‌هاتم و ماچم ده‌كردیت،
به‌بێ ئه‌وه‌ی ڕیسوا بم.
2
ده‌مبردیت،
ده‌مبردیته‌ ماڵی دایكم،
ئه‌وه‌ی منی په‌روه‌رده‌ كردووه‌.
شه‌رابی تێكه‌ڵاوم ده‌رخوارد ده‌دای،
له‌ خۆشاوی هه‌ناره‌كه‌م.
3
ده‌ستی چه‌پی له‌ژێر سه‌رمه‌ و
ده‌ستی ڕاستی له‌ ئامێزم ده‌گرێت.
4
ئه‌ی كچانی ئۆرشه‌لیم، سوێندتان ده‌ده‌م
كه‌ خۆشه‌ویستی هه‌ڵنه‌ستێنن و به‌ ئاگای نه‌هێنن
هه‌تا خۆی حه‌ز ده‌كات.
ده‌سته‌خوشكه‌كان 
5
ئه‌و كچه‌ كێیه‌ له‌ چۆڵه‌وانییه‌وه‌ دێت و
پاڵی به‌ دڵداره‌كه‌یه‌وه‌ داوه‌؟
له‌ژێر دار سێوه‌كه‌ به‌ئاگام هێنای،
له‌وێ دایكت به‌ تۆ سك پڕ بوو،
له‌وێ ئه‌وه‌ی تۆی بوو سكی پێت پڕ بوو.
ئه‌ویندار 
6
بمكه‌ مۆر له‌سه‌ر دڵت،
مۆر له‌سه‌ر بازووت،
چونكه‌ خۆشه‌ویستی وه‌ك مردن به‌هێزه‌،
ئیره‌یی وه‌ك گۆڕ سه‌خته‌،
خۆشه‌ویستی سووتێنه‌ره‌، گڕی ئاگره‌،
وه‌ك ئاگرێكی به‌هێزه‌.
7
ئاوه‌ زۆره‌كان ناتوانن خۆشه‌ویستی بكوژێننه‌وه‌،
ڕووباره‌كان نوقومی ناكه‌ن.
ئه‌گه‌ر مرۆڤ هه‌موو سامانی ماڵه‌كه‌ی
له‌ پێناوی خۆشه‌ویستی ببه‌خشێت،
به‌ بێبه‌ها داده‌نرێت.
ده‌سته‌خوشكه‌كان 
8
خوشكێكی بچووكمان هه‌یه‌،
هێشتا مه‌مكی نه‌هاتووه‌.
چی بكه‌ین بۆ خوشكمان،
ئه‌و ڕۆژه‌ی داخوازیكه‌ری بێت؟
9
ئه‌گه‌ر شوورا بێت،
قولله‌ی زیوین له‌سه‌ری بنیاد ده‌نێین.
ئه‌گه‌ر ده‌رگا بێت،
به‌ ته‌خته‌داری ئورز ده‌وری ده‌ده‌ین.
ئه‌ویندار 
10
من شوورام و
مه‌مكه‌كانم وه‌ك قولله‌ن،
به‌م جۆره‌ له‌ چاوه‌كانی
په‌سه‌ندی به‌دی ده‌كه‌م.
11
سلێمان ڕه‌زه‌مێوێكی هه‌بوو له‌ به‌عل‌هامۆن،
ئه‌م ڕه‌زه‌مێوی دایه‌ ڕه‌زه‌وانان،
هه‌ریه‌كه‌ و له‌ بڕی به‌رهه‌مه‌كه‌ی
هه‌زار شاقل[a] زیوی ده‌دا.
12
به‌ڵام ڕه‌زه‌مێوه‌كه‌ی خۆم به‌ ویستی خۆمه‌ بیبه‌خشم؛
ئه‌ی سلێمان، هه‌زار شاقل بۆ تۆ بێت،
دوو سه‌د شاقلیش[b] بۆ ڕه‌زه‌وانه‌كان.
دڵدار 
13
ئه‌ی دانیشتووی ناو باخچه‌كان!
هاوڕێیان گوێیان له‌ ده‌نگت گرتووه‌،
با گوێم لێت بێت.
ئه‌ویندار 
14
ڕابكه‌، دڵداره‌كه‌م،
وه‌ك ئاسك به‌
یان وه‌ك كارمامز
له‌سه‌ر ئه‌و چیایانه‌ی پڕ بۆنوبه‌رامن.
  1. a. 8‏:11 نزیكه‌ی 11,5 كیلۆگرام.
  2. b. 8‏:12 دوو سه‌د شاقل نزیكه‌ی 2,3 كیلۆگرام.