عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دڵدار 
1
ئه‌ی یاره‌كه‌م، تۆ چه‌ند جوانیت،
چه‌ند جوانیت!
چاوه‌كانت دوو كۆترن له‌ پشت په‌چه‌كه‌ته‌وه‌.
قژت وه‌ك مێگه‌له‌ بزنه‌
كه‌ له‌ كێوی گلعاده‌وه‌ دێته‌ خواره‌وه‌.
2
ددانه‌كانت وه‌ك ڕانه‌ مه‌ڕن،
كه‌ تازه‌ بڕاونه‌ته‌وه‌ و له‌ شوشتن گه‌ڕاونه‌ته‌وه‌،
هه‌موویان جووتن،
هیچیان به‌ ته‌نها نین.
3
لێوه‌كانت وه‌ك ڕیسی ئاڵه‌،
ده‌مت شیرینه‌،
گۆنات وه‌ك له‌ته‌ هه‌ناره‌
له‌ پشت په‌چه‌كه‌ته‌وه‌.
4
گه‌ردنت وه‌ك قولله‌ی داوده‌
به‌ ڕیزه‌ به‌رد بنیاد نراوه‌،
هه‌زار قه‌ڵغانی پێوه‌ هه‌ڵواسراوه‌،
هه‌مووی قه‌ڵغانی پاڵه‌وانانه‌.
5
جووته‌ مه‌مكه‌كه‌ت وه‌ك دوو كارمامزن،
وه‌ك جووتێك مامزن،
كه‌ له‌نێو گوڵه‌ سه‌وسه‌ندا ده‌له‌وه‌ڕێن.
6
به‌ر له‌وه‌ی ڕۆژ هه‌ڵبێت و
تاریكی بڕه‌وێته‌وه‌،
ده‌چمه‌ چیای موڕ و
گردی بخوور.
7
ئه‌ی یاره‌كه‌م، سه‌رتاپات جوانییه‌،
هیچ كه‌موكوڕیت تێدا نییه‌.
8
بووكێ، له‌گه‌ڵ من له‌ لوبنانه‌وه‌ وه‌ره‌،
له‌گه‌ڵ من له‌ لوبنانه‌وه‌ وه‌ره‌.
له‌ لووتكه‌ی چیای ئه‌ماناوه‌ وه‌ره‌ خواره‌وه‌،
له‌ سه‌ری سنیره‌وه‌ كه‌ لووتكه‌ی حه‌رمۆنه‌،
له‌ لانه‌ی شێرانه‌وه‌،
له‌ چیای پڵنگانه‌وه‌.
9
ئازیزه‌كه‌م، بووكێ، دڵی منت ڕفاندووه‌،
به‌ تیله‌ی چاوت دڵت ڕفاندووم،
به‌ موورووێكی ملوانكه‌كه‌ت.
10
ئه‌وینت چه‌ند جوانه‌، بووكی ئازیزم،
ئه‌وینت چه‌ند له‌ شه‌راب خۆشتره‌،
بۆنی عه‌تره‌كه‌شت له‌ هه‌موو بۆنوبه‌رامێك.
11
لێوه‌كانت شانه‌ی هه‌نگوینیان لێ ده‌تكێت، بووكێ،
شیر و هه‌نگوین له‌ژێر زمانته‌!
بۆنی جلوبه‌رگت وه‌ك بۆنی لوبنانه‌.
12
باخچه‌یه‌كی داخراوه‌! بووكی ئازیزم،
سه‌رچاوه‌یه‌كی داخراوه‌، كانییه‌كی مۆركراوه‌!
13
نه‌مامه‌كانت باخی هه‌نارن
له‌گه‌ڵ به‌روبوومی هه‌ڵبژارده‌،
خه‌نه‌ و ناردین،
14
ناردین و كاركۆم[a] ،
قامیشی بۆنخۆش و دارچین،
له‌گه‌ڵ هه‌موو جۆره‌ دار بخوورێك،
موڕ و ئه‌لوا[b]
له‌گه‌ڵ هه‌موو بۆنوبه‌رامه‌كان.
15
تۆ سه‌رچاوه‌ی باخچه‌كانیت،
بیری ئاوی له‌به‌ر ڕۆیشتووی،
لێشاوه‌ له‌ لوبنان دێته‌ خوارێ.
ئه‌ویندار 
16
هه‌سته‌، ئه‌ی بای باكوور،
وه‌ره‌، ئه‌ی بای باشوور!
به‌سه‌ر باخچه‌كه‌م هه‌ڵبكه‌ن،
با بۆنوبه‌رامی بڵاوبێته‌وه‌،
بۆ ئه‌وه‌ی دڵداره‌كه‌م بێته‌ ناو باخچه‌كه‌ی خۆی،
با به‌روبوومه‌ هه‌ڵبژارده‌كه‌ی تام بكات.
  1. a. 4‏:14 ئه‌و گوڵه‌یه‌ كه‌ ڕه‌گه‌كه‌ی زه‌رده‌چه‌وه‌ی لێ دروستده‌كرێت.
  2. b. 4‏:14 ڕووه‌كێكی دڕكاوییه‌ وه‌ك سه‌باڕ، شله‌یه‌كی تێدایه‌ بۆ پێست باشه‌.